Mag-ingat pa rin kahit merong bakuna

ni Korina Sanchez - @Isyung 'K' | May 18, 2021

Balik general community quarantine (GCQ) na ulit ang NCR Plus itong Mayo 15, batay sa rekomendasyon ng Inter-Agency Task Force on Emerging Infectious Diseases. Papayagan na ang ilang kainan na magbukas pero hanggang 20 porsiyentong kapasidad lamang ng nais kumain sa loob ng kanilang establisimyento habang 50 porsiyento naman kung may kainan sa labas.

Kaugnay nito, sarado pa rin ang mga sinehan, videoke, bars at iba pang kaparehong establisimyento na may indoor facility. Hindi pa rin puwede ang mga meeting, conference o exhibits o sa madaling salita, papayagan na ang mga aktibidad na nagaganap sa labas ng tahanan pero hindi 100 porsiyento.

Pero may magandang payo naman si PNP Chief Gen. Guillermo Eleazar, ito ay huwag maging kampante. Ugaliin pa rin magsuot ng facemask at face shield, maghugas ng mga kamay at ‘wag kalimutan ang mag-social distancing.

Hindi raw alam ng ‘COVID-19’ ang pagkakaiba ng ECQ, MECQ at GCQ, ang alam lang nito ay kung sino ang puwedeng kapitan. Kung ganyang GCQ na at dumami na naman ang mga kaso, baka bumalik lang tayo sa mahigpit na quarantine at paikut-ikot na lang.

Sa Amerika, inanunsiyo ng kanilang Center for Disease Control (CDC) na kung kumpleto na ng bakuna ay puwedeng hindi na magsuot ng facemask kahit saan — tandaan, kumpleto lang ng bakuna.

Ikinatuwa ito ng mga ‘Kano, lalo na mga napipilitan lang magsuot ng facemask. Ang mahirap lang ay hindi mo naman alam kung sino ang kumpleto na ang bakuna. Ang sa atin, kung may ayaw pa rin magsuot ng facemask at ayaw din magpabakuna, sila-sila na lang siguro ang magkakasakit kung protektado na. Ang layunin ng gobyerno ay makamit ang herd immunity ngayong Nobyembre.

Babala ng bagong hepe

ni Korina Sanchez - @Isyung 'K' | May 10, 2021

May bagong hepe ang Philippine National Police (PNP) sa katauhan ni Lt. Gen. Guillermo Eleazar. Pinalitan niya si Gen. Debold Sinas na nagretiro noong Sabado.

Sa totoo lang, dapat matagal nang naging hepe si Eleazar pero marami sigurong dahilan kung bakit may mga inuna muna sa kanya. Sa kanyang talumpati nang inangkin na niya ang posisyon, nangako siya na lilinisin ang hanay ng PNP para mawala ang mga tiwali o scalawags kung tawagin.

Tatangalin din daw niya ang sistemang padrino at korupsiyon na nananatili sa pagtalaga ng mga bagong opisyal sa PNP. “You will hate me”, ang kanyang babala sa lahat ng tiwaling pulis. Binanggit niya na sa taas ng sahod at benepisyong natatanggap ng kapulisan ngayon, marami ang puwedeng pumalit sa kanila. Inamin rin na napakasuwerte nga ng kapulisan ngayon.

Sa totoo lang, ito ang de-kahong unang talumpati ng bawat bagong hepe ng PNP. Pero ang katotohanan ay hindi pa rin nawawala ang masasamang pulis, mataas man o maraming benepisyong natatanggap. Pero gayunman, dapat bigyan ng pagkakataon si Lt. Gen. Eleazar para tuparin ang kanyang ibinahaging pangako.

Binanggit niya na QR code na lang ang magiging pagkakakilanlan ng mga pulis, walang pangalan o litrato, mga kuwalipikasyon lang para mawala nga ang padrino-padrino pagdating sa pagsusuri. Magandang simula, kung talagang maipatutupad at magbibigay ng resulta.

Pero sa tingin natin, ang pinakamahalagang dapat ipatupad ni Eleazar ay ang paggamit ng body cams ng mga pulis. Wala talagang hepe ng PNP ang nagpatupad ng body cams kahit ilang taon nang may pondo at nakabili na nga ng ilang libong gamit.

Ang huling balita ay sinusuri pa ang paggamit pero taon na rin ang dumaan. Tataas talaga ang kilay natin kung bakit ayaw ipatupad ng PNP ang body cams. Ano ang takot nila kung maayos naman ang kanilang operasyon? Sa ibang bansa, ilang beses nahuhuli ang pulis na nagkakamali o gumagawa ng masama dahil sa body cams. Inaasahan nating kung may pulis na papatayin ang kanyang body cam ay may ibang matinong pulis na patuloy na kukuha ng video.

Hindi naman masamang mangarap pero ilang dekada na tayong nangangarap, hindi ba? Dapat ang paggamit ng mga body cams ay kasama sa babala ni Eleazar kung talagang nais ayusin ang imahe ng PNP.

‘Epalitiko’ sa panahon ng pandemya, mahiya naman sana!

ni Korina Sanchez - @Isyung 'K' | May 04, 2021

Nagsimula sa simple at marangal na ideya, “Magbigay ayon sa kakayanan, kumuha batay sa pangangailangan.” At d’yan nagsimula ang unang community pantry sa bansa. Dahil sa napakadakila ng pamamaraan para makatulong sa kapwa na nalulunod na sa kahirapan dulot ng pandemya, nag-usbungan sa lahat ng panig ng bansa ang mga community pantry.

At ngayon, pati sa East Timor ay nagtayo na rin ng kanilang unang community pantry dahil sa inspirasyong dulot ng ideya ni Ana Patricia Non.

Kaya’t nakapagtataka kung ano ang nagtulak sa dalawang opisyal ng NTF-ELCAC para isiping komunista ang mga organizers nito at kailangang imbestigahan ang kanilang pagkatao.

Sa laki na nga ng community pantry sa Maginhawa kung saan sa Philcoa na umaabot ang pila ng tao, minabuti nilang gawing bagsakan na lang ng donasyon ito at sila na ang mamamahagi sa iba’t ibang barangay sa Diliman para hindi na rin mahirapan ang tao na pumila. Maiiwasan na rin ang ilang abusado sa mga pantries. Nagpapasalamat tayo sa lahat ng nagbigay ng kahit anong klaseng tulong sa mga community pantries. Maraming klaseng tulong na nga ang inaalay, hindi lang pagkain — may ilang gimik at patawa pa.

Mabanggit na lang rin natin ang na ibinigay ng pulis sa Sampaloc sa mga tricycle at jeepney driver kung saan sinagot ng mga ito ang kanilang boundary. Totoo nga na mas mabiyaya sila dahil kahit sa panahon ng pandemya ay hindi sila nawalan ng trabaho. Kaya ang kanilang tulong ay siguradong ikatutuwa ng mga makatatanggap. Ganito ang mga balita na gusto nating marinig kapag pulis ang pinag-uusapan. Mabuhay kayo!

Muli nating nakita ng buong mundo ang bayanihan ng Pilipino. Diwa na hindi kayang takutin ninuman. Mabuti na lang at pinatahimik na ang dalawang opisyal na nais masamain lang ang intensiyon ng community pantry. Malakas ang panawagan na tanggalin bilang tagapagsalita ng NTF-ELCAC si Lt. Gen. Parlade. Malaya na ang mga pantry para makatulong sa mga nangangailangan. Ipinagbawal na rin ng ang maglagay ng mga pangalan ng pulitiko sa mga community pantries para hindi pagsamantalahan ng mga epal. Tama lang. May mga pulitiko na hindi matiis ang hindi makita ang pangalan kung saan-saan.

Pero, bakit tila pinabayaan ang dalawang mambabatas na magbigay ng Ivermectin? Wala pang matibay na ebidensiya na puwede itong gamitin panlaban o magbigay ng proteksiyon sa COVID-19. May balita na mga resetang ipinakita ay walang pangalan ng doktor pero binigyan pa rin. Akala ko ba bawal ang epal? O, puwede naman basta kaalyado ng administrasyon?