Bilang ng mga nabakunahan sa bansa, sadyang napakababa

ni Korina Sanchez - @Isyung 'K' | July 02, 2021

Natapos na ang Hunyo. Pero ayon sa ourworldindata.org/covid-vaccinations, ang kanilang datos noong Hunyo 29 ay 7.67 milyong tao pa lang ang nabakunahan o 7% ng populasyon. Kung bibigyan pa natin ng isang araw para opisyal na katapusan ng Hunyo, hindi pa rin siguro aabot ng sampung milyong tao.

Sa datos na nakalap ng organisasyong ito ang ating basehan. Kinakalap din nila ang lahat ng impormasyon hinggil sa pagbabakuna mula sa maraming bansa sa buong mundo. Numero-uno sa malalaking bansa ay ang Canada sa 68.0% noong Hunyo 29. Kaunti na lang makakamit na nila ang ‘herd immunity’. Naunahan na nila ang Israel na dating numero-uno. Magandang pinagmumulan ng tamang impormasyon ang website. Walang fake news — walang pulitika.

Malayo pa tayo sa herd immunity. Pero nagpahayag ang OCTA research na maaaring makamit ng NCR Plus ang herd immunity ngayong Disyembre kung hindi kakalat ang Delta variant ng na sinasabing pinaka-nakahahawa.

May balita mula sa Guangdong, China na 14-segundo lang ang kinailangan ng Delta variant makahawa ng ibang tao. Dalawang babae ang nakunan ng CCTV na hiwalay pumasok sa banyo, sa mall. Hindi raw magkakilala at hindi rin nag-usap. Pero hinawaan agad ng may impeksiyon na ang nakasabay sa banyo. Hindi ba nakakatakot ‘yan? Hindi ba sa Disyembre dumarami nang husto ang populasyon ng NCR dahil dumarating ang mga taga-ibang lugar para sa Christmas shopping? Magawa o payagan kaya ng gobyerno ngayong Disyembre? Kaya mahalaga ang magpabakuna para may laban sa COVID-19, kasama na ang Delta variant nito.

Samantala, napag-uusapan na rin ang pagbabakuna, huwag sanang ipahiya, siraan, pagtawanan o ‘ipako sa krus’ ang nagkamaling nagbigay ng bakuna sa Makati. Daan na rin ‘yan sa paulit-ulit na kilos at pagod. Ilangdaan din ang dumaraan sa kanya sa isang araw.

Ang importante ay naitama agad ang pagkakamali, na sigurado hindi sinasadya. Bigyan natin ng parangal at pasasalamat ang ating health frontliners na higit isang taon nang walang pahinga sa labang ito.

Body cams sa mga operasyon ng pulisya, oks!

ni Korina Sanchez - @Isyung 'K' | June 08, 2021

Ipinatupad noong Biyernes ni PNP chief Gen. Guillermo Eleazar ang paggamit ng mga body cams sa mga operasyon kontra ilegal na droga at paghain ng search warrant.

Ito na aniya ang “eyes and ears” ng mamamayan laban sa pang-aabuso ng pulis tulad ng kaso ni Kian delos Santos na pinatay noong 2017 at para pabulaanan na rin ang pang-abuso raw ng pulis sa ilang operasyon.

Sa totoo nga, proteksiyon ito para sa mamamayan at para sa pulis na rin para hindi sila pagbintangan ng kriminalidad. Kung walang itinatago, walang problema sa kapulisan ang paggamit nito. Ilang hepe ng Philippine National Police (PNP) na rin ang dumaan pero hindi ito ipinatupad — mabuti ngayon ay natuloy na.

Siguradong malaki ang interes ng mamamayan sa magiging resulta ng paggamit ng body cams. Pero dapat din mabanggit na 3, 000 units lang ang ibinigay sa iba’t ibang istasyon sa buong bansa. Ibig sabihin, iilan lang ang may suot nito. Kung ganyang iilan lang, baka tig-isa lang bawat istasyon ang may body cam, hindi sapat para sa lahat ng operasyon.

May operasyon na walang body cam na magagamit. Dito na siguro magkakaproblema na naman, baka piliin lang ng mga istasyon kung anong operasyon ang gagamitan ng body cam.

Balik sa pandemya, sa Mindanao na naman ngayon mas dumarami ang kaso. Sa totoo lang, pati sa Metro Manila mukhang dumarami na naman mga kaso. May nakausap tayong doktor at sabi niya ay dumarami na naman ang admission ng mga seryosong COVID-19 na pasyente.

Parang paikut-ikot na lang. Maghihigpit na naman at mababawasan ang mga kaso. Kapag lumuwag, muli paakyat ang bilang.

Mukhang hindi ito magbabago maliban kung marami na ang mabakunahan. Pero sa ngayon, noong Mayo 30 nasa 3.63% pa lang ng populasyon ang nakatanggap na isang bakuna. Nababalitaan nating mas maraming bakuna ang dumarating na sa bansa.

Sana ay mas mapabilis ang pagbigay ng bakuna sa mas maraming tao, baka puwede ng pagbigyan ang may gusto. ‘Yan lang talaga ang solusyon sa problemang pandaigdig na ito.

‘Body cams’ sa PNP, malaking bagay kontra krimen

ni Korina Sanchez - @Isyung 'K' | May 27, 2021

Binaril umano ng pulis ang isang lalaki na taga-Valenzuela na may ‘special needs’ nang mang-agaw ng baril. Nangyari ang insidente kasunod ng pagsalakay ng awtoridad sa ilegal na sabungan. Nang-agaw umano ang binatilyo ng baril na nauwi sa agawan hanggang sa pumutok ito at napatay ang biktima.

Kaugnay nito ay pinaiimbestigahan na ni PNP chief Gen. Guillermo Eleazar kung may pagkukulang ang pulis sa nangyaring insidente. Natural ay umangal ang pamilya ng biktima dahil hindi umano nito magagawang mang-agaw ng baril dahil takot ito sa pulis. Kaya naman, nanawagan si Gen. Eleazar sa mga nakasaksi ng pangyayari na makipagtulungan sa imbestigasyon — kung hindi sila tinatakot, hindi ba?

Lahat ito ay madali sanang malaman kung may body cams ang mga pulis na sangkot sa operasyon. Nakita sana ang tunay na nangyari sa nasabing insidente. Kaya muli tayong magtatanong kung nasaan na nga ba ang mga body cams at kailan ito gagamitin ng mga pulis? Hindi ba’t inutos na ni Gen. Eleazar na gamitin ang mga ito?

Samantala, pinayagan na rin ni Gen. Eleazar na buksan ang rekords sa Department of Justice (DOJ) ng 61 opersyon ng Philippine National Police (PNP) kontra ilegal na droga para maimbestigahan kung may pagkakamali, pagkukulang o may kriminal na aspeto. Malaking bagay ang kilos ni Gen. Eleazar dahil nahirapan daw ang DOJ makuha ang mga rekords na ito sa ilalim ni Gen. Sinas.

Sana nga ito na ang simula ng pagbabago ng imahe ng PNP sa ilalim ni Gen. Eleazar. Nakalulungkot lang isipin na ilang buwan lang mamumuno si Gen. Eleazar bilang hepe ng PNP dahil magreretiro na rin.

Nagsimula na rin ang pagdinig sa Senado sa madugong “misencounter” sa pagitan ng Quezon City Police District (QCPD) at Philippine Drug Enforcement Agency (PDEA) sa Commonwealth, Quezon City noong Pebrero. At kung nagkamayan noon sina Gen. Sinas ng PNP at Wilkins Villanueva ng PDEA, nagturuan at nagsisihan na ang dalawang ahensiya sa Senado. Kailan lang ay muntik na namang magkaroon ng misencounter ang dalawang ahensiya sa Novaliches, patunay na may problema talaga sa koordinasyon sa pagitan nilang dalawa. Mabuti na lang at agad nagpakilala ang dalawang panig at hindi nauwi sa barilan.

Mapapakamot ka talaga ng ulo kung nangyari na naman ‘yan. Hinikayat naman ni Sen. Ronald Dela Rosa, dati ring hepe ng PNP, na sana ay “humarap at aminin kung sino ang nagkamali”.