Gulantang ang madlang pipol sa pagreretiro ni P-Digong!

ni Korina Sanchez - @Isyung 'K' | October 05, 2021

Nagsimula na noong Biyernes ang pag-file ng Certificate of Candidacy (COC) ng mga nais tumakbo ngayong darating na halalan. May mga nauna agad na magsumite ng kanilang COC tulad ni Sen. Manny Pacquiao na tatakbo sa pagka-pangulo ng bansa. Aniya, magreretiro na siya sa boksing upang makapokus sa pulitika. Samantala, ang kanyang kandidato para VP ay si Lito Atienza.

Ang ikinagulat ng marami ay ang pag-anunsiyo ni Pangulong Rodrigo Duterte na magreretiro na siya mula sa pulitika, habang si Sen. Bong Go ang kandidatong tatakbong bise-presidente ng PDP-Laban. Pero narinig na natin itong lumang tugtugin. Nag-anunsiyo rin si P-Duterte noong 2015 na magreretiro na mula sa pulitika. Pero nakita naman nating kung ano ang nangyari. Pinalitan niya ang bumitiw na si Martin Diño sa pagkapangulo matapos makitang mataas siya sa pagsusuring isinasagawa noon. Ang huling araw na itinakda ng Comele para magpalit ng kandidato ngayon ay Nov. 15.

Kaya lahat ay binabantayan ang magiging kilos ni Davao City Mayor Sara Duterte. Nag-file na nga siya ng COC para tumakbong mayor muli ng Davao. Pero nagpahayag din siyang hindi siya tatakbong pagka-pangulo kung tatakbo ang kanyang ama sa pagka-VP dahil hindi magandang tingnan ang dalawang Duterte na tumatakbo para sa dalawang pinakamataas na posisyon sa gobyerno. Pero sa pag-atras na ni Pangulong Duterte, bukas na bukas na ang pinto para sa kanya. Nagpahayag pa nga ito na si Sara ang tatakbong pangulo ka-tandem ni Bong Go.

Sa totoo lang, marami ang nakitang ganito ang mangyayari. May higit isang buwan pa para mangyari ‘yan. Wala pang opisyal na kandidato ang PDP-Laban para sa posisyon ng pangulo, lalo na’t wala pang desisyon ang Comelec kung kaninong paksiyon ang opisyal na PDP-Laban, kaya bukas nga ang pinto para manumpa si Sara sa PDP-Laban at siya ang tumakbong pangulo. Lahat naman ng tinatawag na oposisyon ay nais tumakbo kaya wala na talaga ang pinaplanong “united opposition” para tapatan ang mga Duterte. Maliban na lang kung may umatras para suportahan ang kandidatong malakas, ‘di ba? Mangyari kaya?

Kung walang COA, hindi mabubuking ang mga buwaya

ni Korina Sanchez - @Isyung 'K' | September 09, 2021

Nagpatuloy ang mga banat ni Pangulong Rodrigo Duterte laban sa mga kumukuwestiyon sa paggastos ng kanyang administrasyon sa pondo ng bayan. Nagsimula siya sa Commission on Audit (COA), na sinabihan silang huwag isapubliko ang mga ulat o natuklasan dahil agad na hinuhusgahan ng tao ang mga ahensiyang sangkot, at pagkatapos ay sinabihan ang kanyang gabinete na huwag pansinin ang COA. Kaugnay nito, Senado naman ang sunod na tinira, partikular ang Blue Ribbon Committee na iniimbestigahan ang mga natuklasan ng COA hinggil sa pagbili ng mga PPE at iba pang materyales kontra-COVID napatunayang mahal ang presyo at kung bakit isang suplayer na may kaduda-dudang kuwalipikasyon ang nakakuha ng bilyun-bilyong pisong kontrata.

Naging personal si Pangulong Duterte sa kanyang pag-atake kay Sen. Richard Gordon na namumuno sa komite at Sen. Ping Lacson. Sinabi kong kapag ang mga pag-atake ay naging personal sa pagtatalo o debate, alam nating natalo na ang namemersonal. Nasa tungkulin ng COA ang suriin ang paggasta ng gobyerno at punahin ang mga anomalya, kakulangan, o disallowances sa paggastos ng gobyerno - trabaho nila 'yan. Ang Senado ay nagsisilbing bantay din sa lahat ng ginagawa ng gobyerno. Kabilang ito sa "checks and balance". Ngunit para kay Pangulo Duterte, tila nais niyang mawala na lang lahat ito.

Para sa pangulo, walang dapat magtanong, pumuna sa kanyang administrasyon at lumabag sa kanyang kalooban o kagustuhan. Maging ang senador na dating nag-imbestiga sa kanya habang siya ay alkalde pa sa Davao City, maging ang Komisyon sa Karapatang-Pantao sa pagpuna at pagsita sa kanyang madugong laban kontra ilegal na droga, maging isang network na nagpalabas ng mga pampulitikang komersiyal na hindi niya nagustuhan o kung ano pang mga ahensiya o grupo na pumupuna sa kanyang administrasyon o sa kanyang gabinete. Ipinahayag niya noong 2016 na ang kanyang itinalaga sa kanyang gabinete ay "the best and brightest". Matapos ang limang taon panunungkulan, "the best and brightest" nga ba?

Pinupuri ang COA at ang mga senador sa pagiging matatag sa kanilang posisyon sa kabila ng mga panunuyo at banta ni Pangulong Duterte. Mabuti at nakikita natin ang mga senador na may gulugod, kahit ngayon lang. Dapat magpatuloy ang imbestigasyon. At tungkol sa pagtatangka ni Roque na ilihis at ituro ang mga daliri sa inaakalang mga pagkakamali sa nakaraang administrasyon, isang dating tagapagsalita at maging ang COA ay kaagad na nagbigay ng mga sagot kontra sa kanyang mga pahayag. Dapat sagutin na lang ang mga isyu sa matalino at marangal na pamamaraan, kung kaya pa nila.

Aminado si P-Digong…“Utang na loob” ang dahilan kaya may posisyon sa Gov’t si Lao

ni Korina Sanchez - @Isyung 'K' | September 04, 2021

Ano’ng madalas idepensa ng taong natatalo na sa diskusyon, debate o argumento? Hindi ba’t idinadaan nito sa personalan? Hindi ba, magtuturo ng ibang isyu, tao o grupo na mas masama pa umano ang ginawa o kaya’y ibabalik ang tanong sa nagtatanong, paglilihis?

Lahat ‘yan ay ginawa ng Palasyo, nitong mga nakaraang araw habang nagaganap ang imbestigasyon ng Senado sa napakamahal na pagbili ng mga gamit laban sa pandemya tulad ng PPE, at iba pang healthcare supply. Ang nakapagtataka pa, mula sa nag-iisang supplier — bilyun-bilyon ang halaga ng nakuhang kontrata ng Pharmally Pharmaeuticals Corp.

Pinuna ni Pangulong Rodrigo Duterte ang katawan ni Senate Blue Ribbon Committee Chairman Sen. Richard Gordon, na dapat umanong magpapayat. Binatikos nito ang huli dahil sa ginawang imbestigasyon sa dating namuno sa Procurement Service of the Department of Budget and Management (DBM), Lloyd Christopher Lao.

Inamin pa ni Pangulong Duterte na “utang ng loob” ang dahilan kaya binigyan niya ng posisyon sa gobyerno si Lao. Karamihan ng miyembro ng gabinete nito ay mga tumulong sa kanyang sa kampanya o kaya’y ‘fraternity brad’, tulad nina Lao, Aguirre, Argosino at Robles, mabanggit ang ilan. Noong binubuo ni Pangulong Duterte ang gabinete, “best and brightest” umano ang mga ito, kayo na ang humusga.

Samantala, pinuna rin nito ang buhok ni Sen. Panfilo “Ping” Lacson, at tinanong kung malinis siya. May ilalabas umano ito kapag hindi nagustuhan ang sagot. Para namang may saysay ang mga ‘yan sa isyung iniimbestigahan. At wala bang mataba sa kanyang gabinete, una na ang madalas nating makitang tagapagsalita niya? Lahat ba sila ay maaayos ang buhok, o may buhok? Ano’ng kinalaman ng buhok sa isyu ng bayan? Wala.

Ngayon, ang kanilang bagong depensa, mas mataas presyo ng pagbiling PPE ng nakaraang adminstrasyon. May pandemya na ba noong panahong iyon? Alam na ba ng tao kung ano ang PPE? Saan ginamit ang mga PPE na ‘yan, dahil sa ating pagkakaalam, wala namang naganap na pandemya sa dating administrasyon? Malinaw na paglilihis ng usapan ang ginagawa ng Palasyo.

Gayunman, “panic mode” na umano si Pangulong Duterte kaya ganyan na ang mga depensa. Pati si Michael Yang, ang dating “economic adviser” ay ipinagtanggol rin nito kahit lumantad na may kuwestiyunable palang nakaraan. Ang mga ka-negosyo ay pugante sa Taiwan. Kahit nang-iinsulto na ang pangulo ay hindi umano ititigil ang imbestigasyon sa isyung ‘to. Dapat lang. May natatamaan nang buto, kaya ganyan na ang depensa. Nanggagalaiti na kaya ganyan ang pananalita. Tsk!