Du30, lilitisin na ng ICC

ni Mylene Alfonso @News | April 24, 2026

Photo: File / ICC

Haharap sa paglilitis si dating Pangulong Rodrigo Duterte sa International Criminal Court (ICC). 

Ito ay makaraang kumpirmahin ng ICC pre-trial chamber ang lahat ng charges laban sa dating pangulo. 

Kabilang sa mga kasong isinampa laban kay Duterte ang three counts of crimes against humanity ng murder kung saan sakop nito ang 49 na insidente ng pagpatay at 78 na biktima. 

“The Chamber finds that there are substantial grounds to believe that Mr Duterte is criminally responsible for the crimes charged in Counts 1-3 as an indirect co-perpetrator, and/or for ordering and/or inducing, and/or for aiding and abetting the commission of the crimes, pursuant to articles 25(3)(a), (b) and (c) of the Statute,” ayon sa desisyon ng pre-trial chamber. Nabatid na naglabas ng nagkakaisang desisyon ang all-women chamber ng ICC na binubuo nina judges Iulia Antoanella Motoc, Reine Adélaïde Sophie Alapini Gansou, at Maria del Socorro Flores Liera.  

Hindi tulad ng ibang desisyon, ang naturang hatol ay hindi awtomatikong maaaring iapela. Nangangahulugan na hindi agad maaaring dumulog si Duterte sa appeals chamber upang kwestyunin ang desisyon. 

Kung nais umano niyang maghain ng apela, kinakailangan muna niyang humingi ng pahintulot o awtorisasyon bago mapagbigyan. 

“Trials in the ICC are fair and impartial and the defense would have sufficient time to prepare its case while respecting the rights of victims,” ayon kay ICC spokesperson Oriane Maliet. 

Inaabot aniya ng anim na buwan hanggang isa’t kalahating taon bago tuluyang magsimula ang paglilitis sa ICC matapos makumpirma ang lahat ng mga charges.

Pagdampot ng ICC kay Du30, imbestigahan uli sa Senado — Sen. Imee

ni Mylene Alfonso @News | March 11, 2026

Photo: Sen. Imee Marcos - FB

Nais paimbestigahan ni Senadora Imee Marcos ang nangyaring pagdampot kay dating Pangulong Rodrigo Roa Duterte noong Marso 11 ng nakaraang taon.

Sa kanyang inihaing Senate Resolution No. 340, muling pinabubusisi ni Marcos ang buong katotohanan sa umano’y koordinasyon ng mga ahensya ng pamahalaan sa International Criminal Court (ICC) hinggil sa nasabing insidente.

“Isang taon nang palaisipan ang nangyaring paglapastangan sa karapatan ng ating kapwa Pilipino,” ani Marcos.

“Dapat ilantad na ang buong katotohanan at panagutin ang mga lumabag sa ating konstitusyon!” wika ni Marcos.

Giit ng senadora, kailangang mabunyag kung may naging pakikipagtulungan ang ilang ahensya ng pamahalaan sa ICC sa kabila ng pagkalas ng Pilipinas sa Rome Statute noong 2019.

“Hindi nagtutugma ang kwento ng pamahalaan—malinaw na may nagsisinungaling!” giit ng senador. 

“Paulit-ulit sinasabi na wala nang ugnayan at hindi na makikipagtulungan ang Pilipinas sa ICC, pero inamin din na nakipag-usap si Remulla sa mga tauhan ng ICC,” patuloy niya.

Dagdag pa ni Marcos, mahalagang maibalik ang tiwala ng mamamayan sa sariling sistema ng hustisya at matiyak na hindi mauulit ang anumang hakbang na maaaring maglagay sa alanganin sa soberanya ng bansa.

“Dapat walang Pilipinong matatakot sa sarili niyang gobyerno at magtatago sa dayuhan sa sarili niyang bansa,” pagtatapos ng senadora. 

Ibinulgar ng 18 ex-Marines... Remulla, inaming naka-meeting ang ICC sa kanyang bahay

ni Madel Moratillo @News | March 3, 2025

Photo File: Boying Remulla / FB

Inamin ni Ombudsman Jesus Crispin Remulla na nakapulong niya sina dating Sen. Antonio Trillanes IV, Gen. Nicolas Torre III at dalawang ICC investigators sa kanyang bahay sa Makati noong nakaraang taon, tulad ng binanggit sa joint affidavit ng 18 ex-Marines.  

Nangyari umano ito matapos maaresto si dating Pangulong Rodrigo Duterte at nu’ng siya ay kalihim pa ng Department of Justice (DOJ).

Ang nasabing meeting ay para umano sa proteksyon ng mga testigong Pilipino sa crimes against humanity case laban kay dating Pangulong Duterte.

Nais aniya nila sa DOJ na masiguro ang kaligtasan ng mga Pilipinong testigo.

“Since we're in the DOJ, kinakailangan gawin namin 'yun. Mga Pilipino kasi mga testigong 'to.

This happened maybe less than a year ago,” pahayag ni Remulla.

Sa joint affidavit na isinumite ni Atty. Levi Baligod, abogado ng 18 dating Marines, sa Ombudsman, nakasaad na nakipagpulong umano si Remulla sa ICC personnel noong kalihim pa siya ng DOJ.

“Kailangan protektahan natin ang ating mga testigo pero ang mas mahalaga d'yan 'yung allegations na ginawa nila na iba. Kasi kung 18 sila na nandoon na magkakasama ng dalawang taon na walang patid, na lahat ng pangyayari nakita nila, 'yun ang ating gustong malaman,” pahayag ni Remulla.

Sabi ni Remulla, gusto niyang magkaroon ng kopya ng affidavit ng bawat isa sa 18 dating Marines upang makasiguro na may personal knowledge sila sa kanilang mga alegasyon.