Subpoena lang para sa senador — Jonvic... Bato, ‘di aarestuhin

ni Jeff Tumbado @News | May 11, 2026

Photo: Sen. Bato Dela Rosa at Jonvic Remulla - FB

Nilinaw ni Interior Secretary Jonvic Remulla na hindi aarestuhin si Senador Ronald "Bato" dela Rosa kundi isisilbi lamang ang subpoena ng DILG sa kanya na takdang ilabas ngayong araw ng Lunes, May 11.

Ayon kay Remulla, layunin ng subpoena na pagpaliwanagin lamang ang senador kaugnay ng mga nakabinbing reklamo laban sa kanya kaugnay sa drug war.

"There is no credible information of an impending warrant of arrest from the ICC or Interpol, this is a separate matter," ayon sa kalihim.

Kailangan umanong humarap si Dela Rosa sa Criminal Investigation and Detection Group (CIDG) bilang bahagi ng patuloy na imbestigasyon kasunod ng kumakalat na balitang may warrant of arrest umano mula sa International Criminal Court (ICC).

He was the tip of the spear in the EJK drive. So we will start with him and investigate down further,” dagdag ni Remulla.

Nilinaw din ng opisyal na ang imbestigasyon ay internal lamang at walang kinalaman sa ICC.

“We are not a member of the ICC. We are not working with the ICC. This is a purely internal matter that we are doing,” saad nito.

Giit pa ng kalihim, bilang isang senador ay igagalang si Dela Rosa sa proseso at ang hakbang ay subpoena lamang, at wala ring paggamit ng posas.

Kaufman, out sa legal ni Digong

ni Mylene Alfonso @News | May 10, 2026

Photo: File / International Criminal Court

Nagbitiw na bilang lead defense counsel ni dating Pangulong Rodrigo Duterte sa International Criminal Court (ICC) si Atty. Nicholas Kaufman matapos magtapos ang kanyang isang taong kontrata noong Marso 31, 2026.

Sa inihaing resignation ni Kaufman sa ICC na may petsang Mayo 8, sinabi niya na napagkasunduan niya at ni Duterte na tapusin na ang kanilang professional engagement.

Nakapili na rin aniya ang dating pangulo ng bagong abogado na hahawak sa kanyang depensa sa kinahaharap na kasong crimes against humanity kaugnay ng kontrobersyal na ‘war on drugs.’

Sinabi ni Kaufman na nakausap na niya ang bagong legal counsel ni Duterte at tiniyak naman umano nito na agad akuin ang kaso, kabilang ang pagharap sa susunod na paglilitis ng ICC na nakatakda sa Mayo 27, 2026.

Tiniyak din ni Kaufman na may sapat na karanasan sa ICC ang papalit na legal counsel ng dating pangulo kaya’t hindi maaapektuhan o maaantala ang takbo ng kaso ni Duterte.

Kasabay ng kanyang pagbibitiw, humingi rin si Kaufman ng pormal na pahintulot sa ICC upang makapag-withdraw bilang counsel, alinsunod sa proseso at regulasyon ng korte.

Samantala, wala pang inilalabas na pahayag ang kampo ni Duterte kaugnay sa pagkakakilanlan ng bagong lead defense counsel nito.

Sa arrest warrant ng ICC... 10K pulis vs. Bato — Jonvic

ni Mylene Alfonso @News | May 10, 2026

Photo: File / Sen. Ronald Bato Dela Rosa - FB

Wala pang impormasyon kaugnay sa paglalabas ng arrest warrant ng International Criminal Court (ICC) laban kay Senador Ronald “Bato” Dela Rosa. Ito ang ginawang paglilinaw ni Department of the Interior and Local Government (DILG) Secretary Juanito Victor “Jonvic” Remulla.

“None yet to my information. As far as I am concerned, until I see the official copy, it is hearsay,” wika ng DILG chief.

Kaugnay nito, ibinunyag ni Remulla ang kasalukuyang lokasyon ni Dela Rosa.

“He’s in the Davao region,” wika ng DILG chief.

Aniya, kasalukuyang naghahanda ang ahensya ng “10k task force” para sa dragnet operations sakaling mailabas ang arrest warrant laban sa senador.

“As of the latest update, the DILG is preparing a 10k task force for dragnet operations in case a warrant of arrest for Senator Bato is issued,” saad pa ni Remulla.

Bumuo na rin aniya ng task force ang DILG kasunod ng hindi beripikadong impormasyon.

“It takes time to mobilize,” diin ng kalihim.

Samantala, sinabi na rin ng ICC na wala pang pampublikong warrant of arrest na inilalabas kaugnay ng sitwasyon sa Pilipinas.