Kaya sa kalaban sumama… ARA, UMAMING ‘DI KILALA SI VICO

ni Melba R. Llanera @Insider | Mar. 20, 2025

Photo: Ara Mina - IG

Sa kabaitan ni Ara Mina at dahil nasa dugo niya bilang Mathay ang pulitika kaya’t hindi kataka-taka na pumalaot na rin ang aktres bilang konsehal sa District 2 ng Pasig sa ilalim ng tiket ng negosyanteng si Ms. Sarah Discaya, kalaban ng incumbent mayor ng Pasig na si Mayor Vico Sotto. 

Ayon kay Ara, sa partido ni Ms. Sarah Discaya siya sumali dahil nakita niya ang kabutihan at pagiging bukas-puso nitong tumulong sa mga nangangailangan, kung saan pareho sila ng adhikain. 

Inamin niyang hindi niya personal na kilala si Mayor Vico at ang kilala niya ay ang ama nito na si Vic Sotto. 

Sa tanong kung hindi kaya ito ang maging daan para magkalamat ang samahan nila ni Vic, naniniwala naman si Ara na matalinong tao si Vic at may kani-kanyang gusto at tinatahak ang bawat tao, kung kaya’t alam niyang hindi sasama ang loob nito sa kanya.

Nagpahayag na rin ng suporta ang ilang mga taga-industriya sa pagtakbo ni Ara tulad nina Piolo Pascual na dating kasamahan niya sa That’s Entertainment (TE) at ang kapatid na si Cristine Reyes na nangako na sasama sa kanyang mangampanya. 

Buo rin ang suporta sa kanya ng asawang si Dave Almarinez na ngayon ay tumatakbo naman bilang first nominee ng Turismo Partylist. 

Ngayong parehong busy sa pangangampanya, naka-hold muna ang plano ng mag-asawa na magkaanak pero puwede namang mabuo pagkatapos ng eleksiyon.  

Ang ninang na si Ms. Vilma Santos ang idolo ni Ara pagdating sa public service. Bilib si Ara sa magandang record ng Star for All Seasons pagdating sa public service, bukod pa sa pareho silang aktres at nakagawa ng magandang tatak at pangalan sa pulitika.

---

Nag-post sa kanyang Facebook (FB) account si Miguel Lorenzo Padlan, panganay na anak ni Dr. Mike Padlan, ang doktor na ex-boyfriend ni Kris Aquino. 

Kamakailan kasi ay naging trending ang social media post ng dating TV host kung saan kinumpirma nito na nauwi na sa hiwalayan ang relasyon nila ng Makati Med trauma doctor. 

Dito ay nabanggit ni Kris na hindi na kinaya ni Dr. Mike ang bigat ng responsibilidad ng pagkakaroon ng girlfriend na tulad niya na may iniindang karamdaman at nagbabayad siya ng professional fee sa ex sa pag-aalaga nito sa kanya. Kabi-kabilang mga pamba-bash at masasakit na mga salita ang ipinukol ng mga bashers kay Dr. Mike, kung saan tinawag pa itong ‘gold digger’ at ‘user’ ng iba.

Sa madamdaming post ni Miguel, idinepensa nito ang ama at sinigurong minahal talaga ni Dr. Mike ang kanyang Mama Kris at vice-versa.

Dagdag na pahayag ni Miguel, may mga pagkakataon na hindi lang talaga sapat ang pagmamahal at sadyang hindi lang talaga laan sa isa’t isa. 

Ayon din kay Miguel, may mga pagkakataon na pakiramdam nila ay napabayaan na nga sila ng ama dahil sa paglipad nito sa America para puntahan at alagaan ang TV host kung saan dumarating sa punto na nawawalan na ng kita ang ama dahil hindi makapag-clinic para samahan lamang si Kris. 

Kinlaro rin ni Miguel na hindi nanghingi ng kahit na ano ang ama sa TV host, mapa-pera man o regalo, at kung anuman ang naibigay ni Kris sa ama ay dahil sa kabaitan at pagiging mapagbigay nito.

Ngayon, ang hiling ni Miguel kay Kris ay huwag sana itong magpakalat ng mga kuwentong walang katotohanan dahil mabuting tao ang ama at kilala ng mga kaibigan at mga pasyente nito ang tunay na Dr. Mike Padlan. 

Papuri pa ni Lorenzo, mapagbigay, mapagmahal, at matapang na tao ang ama at hindi niya kayang magpikit-mata na lamang na masira ang magandang reputasyon nito dahil sa maling pag-aakusa at walang katotohanang mga kuwento.

Sa huli ay nabanggit ni Lorenzo na mahal nila ang kanilang Mama Kris at mahal din nila ang ama, pero ang pamilya ay pamilya. Kaya siya nandito ay para suportahan ang kanilang ama at manindigan para sa kanilang pamilya.

Aniya, “We love you, Mama Kris, and we love our father as well. Family is family. That is why I am here—to support my father and stand by my family.”

Wala pang tugon si Kris sa pahayag ng anak ng kanyang ex-boyfriend na doktor.

Basta happy together daw sila… RAYVER, TANGGAP NA MARAMI ANG TUTOL SA KANYA PARA KAY JULIE ANNE

ni Melba R. Llanera @Insider | Mar. 18, 2025

Photo: Rayver at Julie Anne - IG

Sa kabila ng ilang taon na rin ang itinatakbo ng relasyong Julie Anne San Jose at Rayver Cruz, may ilang tagahanga ng singer-actress ang hindi pa rin boto sa kanyang BF na Kapuso actor.

Hiningan namin ng reaksiyon tungkol dito si Rayver sa nakaraang Sinagtala presscon at ayon naman sa Kapuso actor ay hindi siya apektado tungkol dito at tanggap niya na hindi niya talaga mapi-please ang lahat. 

Dagdag pa ni Rayver ay dapat na respetuhin na lang ang opinyon ng iba at ang mahalaga ay 100% ang pagmamahal niya sa kasintahan at ganoon din ito sa kanya, bukod pa sa tanggap sila ng pamilya ng bawat isa. 

Masaya at kuntento si Rayver sa relasyon nila ni Julie Anne. Walang lugar ang negativity at hindi na lang niya pinapansin kung may puna o komento man sa kanila ang ibang tao.  

Nang tanungin namin kung may balak na bang i-level-up ang relasyon nila ni Julie Anne at mag-propose na rin sa kasintahan, agad kaming sinagot ng Sinagtala lead actor na mahirap sagutin ito dahil kung mayroon mang tao na dapat ay unang makaalam tungkol dito ay ang kasintahan mismo ‘yun. 

Siniguro rin ni Rayver na kung may babae man siyang gustong pakasalan at makasama sa buhay, ito ay walang iba kundi si Julie Anne lang at wala siyang pagdadalawang-isip dito.  

Sa kabilang banda ay masayang-masaya naman si Rayver na nakasama siya sa pelikulang Sinagtala kung saan para sa kanya ay nakakita siya ng mga bagong kapatid sa katauhan nina Rhian Ramos, Glaiza de Castro, Arci Muñoz at Matt Lozano na mga kasama niya sa pelikula. 

Bukod sa musical ang pelikula, maganda ang istorya at tiyak na maaantig ang puso ng mga manonood dahil may back stories ang karakter ng bawat isa.

Ito ay sa ilalim ng direksiyon ni Mike Sandejas, direktor/producer ng mga pelikulang Dinig Sana Kita (DSK), Tulad Ng Dati (TND), at Wat Floor Ma’am (WFM) at mapapanood sa darating na April 2 sa mga sinehan. Magaganda at de-kalidad ang mga ginawa ni Direk Mike, kung kaya’t siguradong masarap panoorin at magbibigay ng inspirasyon ang Sinagtala sa mga manonood.  

Kilala bilang mahusay na dancer si Rayver at iilan lang ang nakakaalam na isa rin siyang mahusay na singer kung saan kilala bilang mga mang-aawit talaga ang pamilya Cruz. Aminado si Rayver na hindi niya na-pursue ang pag-awit dahil na rin sa kakulangan ng confidence pero pagkatapos ng pandemya ay naramdaman niya na gusto na niyang ipagpatuloy ang kanyang singing career. Alam niya na matutuwa sa naging desisyon niya ang namayapang ina. 

Malaking bahagi rin sa naging desisyon niya ay ang girlfriend na kilala na isang magaling at sikat na singer.  

---

Kahit may Rainier na rin… 

MARK, MAS SPECIAL PA RIN PARA KAY JOJO

SINO nga kaya kina Mark Herras at Rainier Castillo ang kakanta ng original song na Nandito Lang Ako kay Jojo Mendrez ngayong napapalapit na sa kanya ang dalawang StarStruck alumni? 

Heto nga’t naglabasan at pinagpipiyestahan ngayon sa social media ang larawan nina Jojo at Rainier na magkasama sa isang casino. Marami ang nagtaka kung bakit pagkatapos na ma-link kay Mark ay mukhang napapalapit na rin ang loob ng Revival King kay Rainier. 

Pero sa kabila nito ay ramdam pa rin ang espesyal na pagtingin ni Jojo kay Mark dahil sa isang kumakalat na vlog ay paulit-ulit na tinatanong si Jojo kung sino ang pipiliin niya - - - si Mark o mga pangalan ng mga kilalang aktor - - - pero ang StarStruck Male Survivor ang paulit-ulit  na pinipili niya.

Samantala, inaabangan na rin ng mga tagahanga niya ang revival ni Jojo ng kantang Tamis Ng Unang Halik. May sariling estilo ang singer kung bakit kinakagat at tinatangkilik ang mga nire-revive niyang mga kanta. Maaaring pinaghuhugutan niya ang masalimuot at mabigat niyang pinagdaanan kung kaya’t may puso ang kanyang pagkanta. Patunay nito ay kung paano niya pinasikat uli ang kantang Somewhere In My Past, Nandito Lang Ako, Handog, atbp.. 

Hinulaang may cancer… IVANA, ‘DI TAKOT MAMATAY

ni Melba R. Llanera @Insider | Mar. 11, 2025

Photo: Ivana Alawi - FB

Sa nakaraang thanksgiving party ni Ivana Alawi for the press ay nagbigay ng pahayag ang Kapamilya actress tungkol sa hula ni Rudy Baldwin sa programang Rated Korina (RK) na isang sikat na vlogger/artista ang mamamatay ngayong 2025. 

Ayon pa sa manghuhula, nagkaroon ng isang malubhang sakit ang naturang vlogger/actress pero taliwas sa paniniwala na magaling na ito ay kumalat na raw ang cancer sa buong katawan nito. 

Batay sa mga clues ni Rudy, tumutugma ito sa pagkakaroon ng kapatid na babae at isang lalaki ni Ivana, ganu'n din ang may lahi raw ang ama nito. 

Naospital din nang dalawang beses nu’ng nakaraang taon si Ivana dahil sa PCOS (polycystic ovaries) na nagkaroon ng komplikasyon kung saan ay nagkaroon ng tubig ang tiyan nito at nagmukhang 5 o 6 buwang buntis at umabot pa sa baga ng aktres, kaya’t nahirapan na rin itong huminga.  

Sa tanong kung kumusta na ang kanyang kalusugan sa ngayon, agad na sumagot si Ivana na nagkaroon lang siya ng trangkaso kamakailan dahil sa sunud-sunod na trabaho, pero maayos ang pakiramdam niya bukod pa sa medyo tumaba siya dahil nga sa water retention pa sa katawan. 

Si Ivana na mismo ang nagbukas ng paksa tungkol sa hula sa kanya. Aniya ay walang katotohanan ito at wala siyang sakit. Ang pinakanag-alala ay ang kanyang ina pero agad niya itong sinabihan na kumalma lang at walang mangyayari sa kanya. 

Dagdag na pahayag pa ng Kapamilya actress, walang makakapag-predict kung kailan mamamatay ang isang tao at tanging Diyos lang ang nakakaalam nito. 

Para rin kay Ivana, lahat naman tayo ay papunta sa kamatayan, kaya’t hindi ito dapat kinatatakutan.  

Last Sunday ay pumasok na si Ivana sa Bahay ni Kuya bilang guest housemate. Ito siguro ang binanggit ng Kapamilya actress na pangarap niyang magkakaroon ng katuparan ilang araw mula nu’ng nainterbyu namin siya last week. 

Maganda ang itinatakbo ng kanyang career kung saan matagal din siyang napanood sa Batang Quiapo (BQ), bukod pa sa isa si Ivana sa pinakasikat na vloggers sa bansa.

Nang tanungin kung paano niya hina-handle ang tagumpay, iisa ang ipinayo ng aktres at ito ay huwag lalaki ang ulo o ipapasok ang tagumpay sa iyong utak na magiging daan para magmayabang o tumaas ang tingin mo sa sarili.  

Kung marami ang natutuwa ay hindi rin maiiwasan na marami rin ang namba-bash kay Ivana, pero hindi na lang daw niya pinapansin basta ‘wag lang ang kanyang pamilya ang idamay.

Wala rin siyang love life sa ngayon kahit pa bukas naman siyang makipag-date. Ang hinahanap daw niya, bukod sa hindi dapat mayabang ay bukas tumulong sa mga nangangailangan tulad niya. 

Malaking bagay din kay Ivana na dapat kasundo ng kanyang pamilya ang magiging boyfriend niya, lalo’t masyadong malapit ang aktres sa kanyang ina at mga kapatid.  

---

SA nakaraang Philippine International Furniture Exhibit sa SMX Convention Center ay nakausap namin ang SylPaulJoyce Furniture and Solano Hotel owner na si Mr. Charles Solano. 

Hindi man namin nakausap ang endorser ng SylPaulJoyce na si Ronnie Liang, naibahagi sa amin ni Mr. Solano kung paano nila nakuhang ambassador si Ronnie na tulad niya ay nagsimula sa hirap pero nangarap kaya ngayon ay isa nang matagumpay na negosyante. 

Naikuwento ni Sir Charles ang makulay niyang buhay kung paano sila nagsikap na mag-asawa bago narating ang tagumpay na tinatamasa nila sa buhay ngayon. Pagbabalik-tanaw ni Sir Charles, nagmula siya sa mahirap na pamilya sa Albay, Bicol kung saan magsasaka ang kanyang mga magulang. Namasukan silang mag-asawa sa isang furniture shop sa Pasay, kung saan nagtrabaho siya bilang isang delivery boy at dito siya natuto sa paggawa ng mga muwebles. 

Nagsimula sa maliit lang na furniture shop sa Lipa, Batangas kung saan kumukuha sila noong una sa mga suppliers, kalaunan ay nagkaroon ng break si Sir Charles nang maging tenant sila ng SM Malls kung saan noong isinarado nila ang puwesto nila rito ay maraming malls ang nag-alok sa kanila. 

Kaya kung noong una ay may mga suppliers lang sila ng mga furniture, kalaunan ay sariling design na ni Sir Charles ang ibinebenta niya sa SylPaulJoyce Furniture, na nanggaling pala ang pangalan sa name ng mga anak niyang sina Sylvia, Paul at Joyce. 

Dahil huli na nang ipanganak ang bunso nilang si Ysabel, ipinangalan naman dito ang negosyo nilang Cafe Ysabel sa Lipa, Batangas. 

Bukod sa SylPaulJoyce Furniture, isa rin sa mga negosyo ng pamilya ay ang Solano Hotel na matatagpuan din sa Lipa. Dito nag-lock-in taping ang Dirty Linen (DL) nu’ng pandemic at naging daan kung bakit naging kaibigan niya ang ilang artista. 

Naging malapit na kaibigan din ng Solano family sina John Lloyd Cruz, Randy Santiago, Tart Carlos at Queenay Mercado, bukod kay Ronnie Liang na unang endorser ng SylPaulJoyce. 

Ang kagustuhan na mabigyan ng magandang buhay at edukasyon ang mga anak ang nagsilbing inspirasyon nina Sir Charles kung bakit sila nagpursige sa buhay.

Nang tanungin namin kung ano ang payo na maibibigay niya sa mga tulad niyang nagsimula sa mababa at gustong umasenso sa buhay ay patuloy lang na manalig sa Diyos, huwag humintong magsikap sa buhay at manatiling isang mabuting tao.