Ex-BF, ayaw nang makita… OGIE: SI JULIA ANG NAKIPAG-BREAK KAY GERALD

ni Melba R. Llanera @Insider | September 21, 2025

Photo: Gerald at Julia - IG

Kung mauuwi sa relasyon ang pagkaka-link ni Julia Barretto kay Lucas Lorenzo, masasabing one big happy family ang mangyayari dahil asawa ng nakababatang kapatid ni Julia na si Claudia si Basti Lorenzo, habang ang isa pang Lorenzo na si Mateo ay asawa naman ng malapit na kaibigan ng pamilya Barretto na si Erich Gonzales. 

Si Lucas ang isa sa mga naituturong dahilan ng breakup nina Julia at Gerald Anderson. Sa parte ni Gerald, ang volleyball player naman na si Vanie Gandler ng Cignal HD Spikers ang naituturong third party. 

Si Lucas ay isang equestrian at ngayon ay chief executive ng Restaurant Concepts Group, Inc..

Sa Showbiz Update (SU) show ni Ogie Diaz, kinumpirma nito ang breakup nina Julia at Gerald, na ang aktres daw ang nag-initiate. 

Kasunod nito ang balita na ayaw na raw makita ni Julia ang ex-boyfriend. Marami tuloy ang nag-iisip kung may nagawa kayang hindi maganda si Gerald kay Julia kaya’t mukhang ayaw nang masilayan o makita man lang ng aktres ang ex-boyfriend, o baka naman napuno na lang ito at hindi na kinaya ang mga bagay na hindi na rin nila napagkakasunduan?

Inakala ng marami na si Julia na ang makakatuluyan ni Gerald lalo’t mukha namang minahal at sineryoso ng Kapamilya actor ang nobya. 

Isang reliable source mula sa Laguna ang nakausap namin noon na nagsabing tumitingin ng lupa roon si Gerald at mukhang balak magpatayo ng bahay para sa dating nobya. 

Very open na rin noon ang aktor na nakita na niya si Julia bilang “the one” para sa kanya, pero hindi pa nila naiisip magpakasal dahil gusto niyang i-enjoy muna ni Julia ang single life nito at ang magandang career.

Pero maaaring katulad ng ibang relasyon na nauwi rin sa breakup, hindi lang talaga sila nakatakda sa isa’t isa o maaari rin namang sa tamang panahon ay magtagpo muli ang kanilang landas at doon ay madugtungan ang isang naputol na pag-iibigan.

Sa ngayon, hayaan na muna nating gamutin ng dalawa ang nasaktan nilang mga puso at magpatuloy sa kani-kanilang buhay bilang indibidwal.

---

MULING mapapanood ang kinatutuwaang video-kantawanan show ng mga hinahangaan nating celebrities, ang Sing Galing: Sing-lebrity Edition (SGSE). 

Simula Sept. 27, 48 na Sing-lebrities ang maglalaban-laban para sa kanilang beneficiaries at para tanghaling susunod na “Ultimate Bida-oke Sing-lebrity.”

Magbabalik bilang Sing Masters si Donita Nose kasama sina K Brosas at Randy Santiago. 

Magsisilbi namang Jukebosses ang Sing-nior Hitmaker na si Rey Valera kasama sina Ariel Rivera, Nina, Ella May Saison, Mitoy Yonting at Ethel Booba.

Kabilang naman sa 48 celebrities na sasali sina Romnick Sarmenta, Dominic Ochoa, Nikko Valdez, Meryll Soriano, Carmi Martin, Valerie Concepcion, Patricia Javier, Leandro Baldemor, Anton Diva, Tetay, Keanna Reeves at iba pa.

Makakasama rin ang mga Sing-tokers na sina Queenay Mercado, Gab Pascual, Yanyan de Jesus, Muse Jazz at Niko Badayos.

Mapapanood ang second season ng Sing Galing: Sing-lebrity Edition tuwing Sabado, 7:00 PM at Linggo, 8:00 PM simula Sept. 27-28 sa TV5, Sari-Sari Channel at BuKo Channel.

Last year lang daw… CHRISTOPHER, INAMIN ANG DAHILAN NG MUNTIK NANG HIWALAYAN NILA NI GLADYS

ni Melba R. Llanera @Insider | August 22, 2025

Photo: Christopher Roxas at Gladys Reyes

Kinumpirma sa amin ni Christopher Roxas na dumaan sa mabigat na pagsubok ang relasyon nila ng asawang si Gladys Reyes na sa tagal na ng kanilang pagsasama ay hindi nila inasahan na pagdaraanan pa nila. 

Ayon sa aktor-businessman, doon niya mas napatunayan na ang pagpapakasal at pagkakaroon ng pamilya ay isang non-stop learning process at napakahalaga talaga ng komunikasyon para maayos kung anuman ang problema sa isang pagsasama.

Pagbabahagi ni Christopher, nangyari ito noong nakaraang taon at pagdating niya mula sa Australia ay masinsinan silang nag-usap ng asawa. 

Siniguro rin ng aktor na kung maghihiwalay sila ni Gladys, ito ay hindi dahil hindi na nila mahal ang isa’t isa o may third party involved. Ito ay dahil sa sulsol o pagkakampi-kampihan ng mga tao sa paligid nila. 

Isa rin sa mga naging problema ay ang kakulangan sa oras. Dahil maluwag ang schedule noon ni Gladys at walang masyadong trabaho, napansin nito na masyado nang busy si Christopher sa kanilang mga negosyo. Ipinaliwanag niya rin sa asawa na dapat ay i-enjoy nito ang oras kung sino man ang kasama niya—kapag nasa trabaho, kasama siya o ang mga anak, kailangan niyang magpokus at i-enjoy ang oras kung nasaan siya at huwag nang mag-isip pa ng kung anu-ano.

Dahil kabi-kabila ang tukso sa mga aktor lalo na’t madalas ay mga babae talaga ang nagbibigay ng motibo sa kanila, aminado si Christopher na nagagandahan pa rin siya sa iba o nakaka-appreciate pa rin siya ng ganda ng ibang babae, pero sapat na ang maisip niya ang asawa’t mga anak para maiwasan ang tukso. 

Ibinahagi rin ng aktor na ipinangako niya sa sarili na hindi niya gagawin sa pamilya niya ang naging pagkakamali noon ng kanyang ama na nasira ang pamilya nila dahil sa ibang babae.

Ang pagsasama nina Gladys at Christopher ay isa sa mga relasyon sa showbiz na nananatiling matatag at matibay sa kabila ng ilang dekada. Inamin din ng aktor na hindi sa lahat ng pagkakataon ay mahal mo ang asawa mo, pero kapag naiisip niya na si Gladys ang pinili niyang makasama habambuhay ay mas pinanghahawakan niya ang pangako nila na magsasama forever.

Well, sa kabila ng mas sikat at mas malaki ang kita noon ng asawa, hindi nakaramdam ng anumang insecurities si Christopher. Para sa aktor, alam niya kung ano ang naibibigay niya sa kanilang pamilya kung saan si Gladys ang humahawak ng budget.

Sa ngayon ay may dalawang branches na ang resto bar nilang That’s Diner. May commissary din sila, ang Grateful Galley, at ang Manay Gina Canteen sa Kongreso. 

Bukod sa silang mag-asawa ang may-ari ng kanilang mga restaurants, tumatayo ring chef dito si Christopher.

---

KAKAIBA ang pakulo ng BingoPlus na siyang tumatayo bilang isa sa main sponsors ng 37th Philippine Movie Press Club (PMPC) Star Awards for Television. Magagamit ang prediction skills ng mga manonood kung saan magkakaroon ng guess-and-win promo sa mga major categories ng naturang awards night at puwede silang manalo ng P2,000 worth of gift certificates.

Ilan sa mga kategoryang pahuhulaan ay ang Best Drama Actor and Actress, Best Supporting Actress and Actor, Best Male and Female Host, at BingoPlus Male and Female TV Star of the Year. 

Para makasali, i-click lang ang BingoPlus official Facebook (FB) page para sa full promo details.

Ang 37th Star Awards for Television ay gaganapin sa VS Hotel Convention Center sa darating na August 24 at magsisilbing hosts sina Boy Abunda, Pops Fernandez, Gela Atayde, Elijah Canlas at Robi Domingo.

Bongga, ‘di ba?

Lahat ng gusto ng misis, ibinibigay… MATTEO, KUNTENTO KAHIT WALA PA RIN SILANG ANAK NI SARAH

ni Melba R. Llanera @Insider | August 7, 2025

Photo: Sarah at Matteo - IG

Sa Easy Brand Food and Beverages Fair 2025 na ginanap sa SMX Convention Center, natanong namin si Matteo Guidicelli sa naging viral sa social media na may anak na raw sila ng asawang si Sarah Geronimo. 

Agad namang kinlaro ni Matteo na wala pa silang baby ng asawa pero kita naman sa aktor na masaya at kuntento ito sa pagsasama nila. 

Sa nakaraang 37th birthday nga ni Sarah kung saan kumain sila sa isang French restaurant sa Europe, kitang-kita ang pagiging romantiko at maalaga ni Matteo sa misis.

Sa nasabing interview din ay kinumusta namin ang dalawang business courses ni Matteo sa Harvard Business School, at ayon kay Matteo ay mahalaga ang edukasyon at masarap sa pakiramdam na ibahagi ito sa mga tauhan nila sa kanilang mga negosyo.

Heto nga’t pinasok na rin nila ang music label industry kung saan ini-launch nila ni Sarah ang G Music. Very proud ang aktor sa bago nilang negosyo ng asawa kung saan ayon nga sa aktor ay dito ang magiging tahanan ng musika ni Sarah. 

Ayon pa kay Matteo, sa G Music ay magiging business savvy ang mga singers kung saan hindi lang sila pang-on cam kundi malalaman din nila ang mga nangyayari sa likod ng kamera, kung saan mahalaga ang transparency at collaboration. 

Nang tanungin kung hawak pa rin ba sila ng Viva management, binigyang-linaw naman ni Matteo na Viva artists pa rin ang asawa.

Bukod sa pagiging isang singer, artista, reservist ay isa ring entrepreneur si Matteo.

Nu’ng mag-guest siya sa naturang event ng Easy, ipinangako niya na susubukan niya ang naturang produkto sa kanyang mga food business dahil naniniwala siya sa kalidad ng mga gawang Pinoy at malaki ang maitutulong nito sa pag-unlad ng mga local businesses.

---

SA press conference ng fan-driven music countdown show, ang Vibe, nakausap namin si Joao Constancia at nahingan namin siya ng reaksiyon sa relasyong Sue Ramirez-Dominic Roque. Naging magkasintahan sina Joao at Sue sa loob ng dalawang taon at nag-break sila noong 2019. 

Nagkaroon naman ng non-showbiz girlfriend si Joao na nauwi rin sa paghihiwalay, samantalang si Sue naman ay naging boyfriend si Albee Benitez na nauwi rin sa breakup at ngayon nga ay karelasyon na ng Kapamilya actor na si Dominic Roque. 

Ayon kay Joao ay maayos naman sila ni Sue at masaya siya sa relasyon ng dalawa. 

Sa ngayon ay wala namang girlfriend si Joao pero lumalabas siya. Career daw ang kanyang prayoridad.

Isa si Joao sa mga Vibe jocks ng Vibe na mapapanood sa TV5 sa darating na August 9 at eere araw-araw. Kasama ni Joao bilang mga Vibe jocks sina Ryle Santiago, Paulo Angeles, Queenay Mercado, Anna Ramsey, Maxie Anderson, Kych Minemoto, Dylan Menor at Elijah Canlas. 

Masayang-masaya si Joao dahil handpicked sila sa show kung saan isang malaking hamon para sa kanya na pagbutihan ang hosting, lalo’t isa itong bagong adventure para sa kanya.

---

NAGING emosyonal at hindi maiwasang mapaiyak ng Revival King na si Jojo Mendrez nang tanungin namin siya sa kanyang press conference kamakailan kung ano ang mga aral na natutunan niya sa mga pinagdaanan niya sa kanyang buhay. 

Unang sinagot sa amin ng Revival King na natutunan niya na huwag masyadong magtiwala sa ibang tao pero ang aral na tumimo sa puso niya ay huwag mapagod mangarap at magsikap. 

Umiiyak na binalikan ni Jojo na nagkaroon siya ng show noon sa isang kilalang disco bar sa Quezon City, siniguro sa kanya ng dati niyang manager na maraming tao ang manonood pero tatlong tao lang ang pumunta, kasama ang pinakamamahal na ina. 

Puno ng panlulumo at lungkot ang puso niya pero hindi niya ito ipinakita sa kanyang ina at ipinagpatuloy lang ang performance. 

Ngayon na tinagurian na siyang Revival King kung saan milyun-milyon lagi ang views ng bawat kanta na nire-revive o kinakanta niya, dito niya napatunayan na walang imposible sa pangarap basta patuloy ka lang magsikap at mahalin ang talento na ipinagkaloob sa iyo ng nasa Itaas.

Sa ngayon ay nasa ilalim na ng Artist Circle sa pangunguna ni Sir Rams David, siniguro naman ni Jojo na wala siyang sama ng loob sa dating manager at naniniwala siya na darating din ang panahon na magkikita at personal silang magkakausap.

Iniurong na rin niya ang demanda laban kay Mark Herras at patuloy ang pamimigay ng mga biyaya kung saan marami siyang natutulungang mga tao. 

Kilala naman na malambot talaga ang puso ni Jojo at ang gusto lang niya ay makatulong sa mga nangangailangan.

Ngayon pa lang ay inaabangan na ang revival niya ng kantang I Love You Babe mula sa kantang I Love You Boy na pinasikat ni Timmy Cruz. Bukod dito ay inihahanda na rin ang Christmas songs ni Jojo na ang magko-compose ay si Jonathan Manalo.