Imported rice sa ‘benteng bigas’’ ng gobyerno, pinalagan

ni Mylene Alfonso @News | March 31, 2026

Photo: Sen. Imee Marcos / FB

Kunot-noo si Senador Imee Marcos sa patuloy na paggamit ng imported na bigas sa programang “benteng bigas” ng pamahalaan, sa kabila ng kasalukuyang anihan at kawalan ng idinedeklarang kakulangan sa suplay.

Ayon kay Marcos, malinaw na mas pinili ng ilang opisyal ang kumita kaysa protektahan ang kapakanan ng mga lokal na magsasaka.

“Malinaw naman na walang shortage dahil wala pang idinedeklara ang DA,” giit ng senador. 

“Kung ang programang benteng bigas ay 30kg/buwan kada bahay, 5.4MMT lang ‘yon sa isang taon, pasok pa rin sa lokal na produksyon na 20.3MMT! Maliwanag pa sa sikat ng araw na ginagawang sideline ng mga opisyal ang pagkakitaan ang pag-angkat ng bigas!” aniya.

Iginiit ni Marcos na tila kinakampihan ng ilang opisyal ng Food Terminal Incorporated (FTI) ang importasyon upang mapanatili ang kanilang mga posisyon, sa halip na itaguyod ang mandato ng ahensya.

Binigyang-diin din ng senador na mistulang “multo” ang Trading Unit ng FTI na dapat sana’y direktang bumibili ng ani ng mga magsasaka. 

“Kung may Trading Unit, bakit hindi direktang kinukuha ang ani ng ating mga magsasaka?” giit niya.

Binanggit din ni Marcos na hindi sinadyang buhayin ang contract growing arrangement sa mga magsasaka upang mapangatwiranan ang pag-aangkat.

“Anihan na, bakit pa mag-i-import? Babaratin na naman ba natin ang sarili nating mga magsasaka?” dagdag niya.

“Ang ating sariling kagawaran ay dapat tumulong sa mga magsasaka, hindi protektahan ang mga oportunistang kumikita sa kahirapan ng ating agrikultura,” pagtatapos ni Marcos.

Acting pa rin o overacting?!!

ni Imee Marcos @Imeesolusyon | March 20, 2026

Ito na nga ang bagong chika—tinalo pa ng admin ang Star Magic sa rami ng “acting” stars nila! Halos kalahati ng gabinete ay nasa “acting” status, kaya napapatanong na ako: acting pa ba o “overacting” na?!

Ang malala r’yan, kapag “acting” lang, hindi sila isasailalim sa Commission on Appointments o CA! Hindi natin sila makikilatis kung keri ba at dasurv nila ang trabaho. Kaloka beshie!

Kumbaga, wala ng audi-audition—kuha na agad ang role! O diba? Sila na talaga!

At ang mas malala pa, labag sa batas kung lagpas isang taon na silang “acting”! Pero parang wapakels sila na hindi dapat besh! Bawal ‘yan! Malinaw ‘yan sa EO 292 o Administrative Code of 1987 na labag 'yan sa tungkuling nakasaad ng CA.

Kaya kami ng forever seatmate ko, Sen. Marcoleta, todo-kalampag sa totoong CA—ang Commission on Appointments—na ipaglaban ang kanilang konstitusyonal na mandato! Dapat ang ating matataas na opisyal ay pinamumunuan ng mga kwalipikadong tao na dumaraan sa CA.

Kung ang ordinaryong mamamayan mahigpit ang screening sa trabaho, lalo na dapat sa mga magpapatakbo ng ating bansa, diba? Ang sakit nila sa head, beshie! Babush!

Pagdampot ng ICC kay Du30, imbestigahan uli sa Senado — Sen. Imee

ni Mylene Alfonso @News | March 11, 2026

Photo: Sen. Imee Marcos - FB

Nais paimbestigahan ni Senadora Imee Marcos ang nangyaring pagdampot kay dating Pangulong Rodrigo Roa Duterte noong Marso 11 ng nakaraang taon.

Sa kanyang inihaing Senate Resolution No. 340, muling pinabubusisi ni Marcos ang buong katotohanan sa umano’y koordinasyon ng mga ahensya ng pamahalaan sa International Criminal Court (ICC) hinggil sa nasabing insidente.

“Isang taon nang palaisipan ang nangyaring paglapastangan sa karapatan ng ating kapwa Pilipino,” ani Marcos.

“Dapat ilantad na ang buong katotohanan at panagutin ang mga lumabag sa ating konstitusyon!” wika ni Marcos.

Giit ng senadora, kailangang mabunyag kung may naging pakikipagtulungan ang ilang ahensya ng pamahalaan sa ICC sa kabila ng pagkalas ng Pilipinas sa Rome Statute noong 2019.

“Hindi nagtutugma ang kwento ng pamahalaan—malinaw na may nagsisinungaling!” giit ng senador. 

“Paulit-ulit sinasabi na wala nang ugnayan at hindi na makikipagtulungan ang Pilipinas sa ICC, pero inamin din na nakipag-usap si Remulla sa mga tauhan ng ICC,” patuloy niya.

Dagdag pa ni Marcos, mahalagang maibalik ang tiwala ng mamamayan sa sariling sistema ng hustisya at matiyak na hindi mauulit ang anumang hakbang na maaaring maglagay sa alanganin sa soberanya ng bansa.

“Dapat walang Pilipinong matatakot sa sarili niyang gobyerno at magtatago sa dayuhan sa sarili niyang bansa,” pagtatapos ng senadora.