Tripleng ingat ngayong Undas

ni Imee Marcos @Imeesolusyon | October 29, 2025

Mga beshie, habang ginugunita natin ang mga namayapang mahal sa buhay ngayong Undas, tandaan: mga patay ang bibisitahin, hindi sila susundan anytime soon -- MAG-INGAT!

Alam ko, sabik tayong umuwi sa probinsya — pero bago iwan ang bahay, siguraduhing hindi na rin “magpaparamdam” ang kuryente’t gas tank. Triple-check muna bago bumiyahe, besh! Ayaw nating pag-uwi, abo na lang ang bahay.

Sa sementeryo naman, chill lang. Hindi ito concert ni Taylor Swift, kaya ‘wag magtulakan at mag-unahan. Kalma lang tayo at ‘wag magpaulan ng init ng ulo.

Magdala ng payong, tubig, pamaypay — at higit sa lahat, sandamakmak na pasensya. 

Pero seryoso, habang dinadalaw natin ang mga pumanaw, huwag nating kalimutan ang mga buhay na hirap sa gastos kapag may naiiwan.

Kaya nga meron tayong batas para sa Libreng Libing, para hindi na kailangang mamroblema sa abuloy o magbenta ng kalabaw para lang may kabaong.

Sakop ng libreng serbisyo ang kabaong, burol, cremation o tradisyunal na libing, pati na rin ang transportasyon ng labi.

Sa halip na ilaan sa lamay, gamitin niyo na lang ‘yang pera pambiling kandila, bulaklak, o panghanda sa susunod na Undas o anumang emergency.

Ngayong Undas, alalahanin ang patay — pahalagahan ang buhay. At kung sakali mang naalangan na ng tuluyan, ‘wag kang mag-alala, ipalilibing kita -- LIBRE!

Siyempre, ipagdasal din natin ang mga nauna sa atin — harinawa’y magsilbing aral sa atin ang kanilang buhay at mga sakripisyo.

1 araw para sa mga OG Pinoy, i-push na ‘yan!

ni Imee Marcos @Imeesolusyon | October 26, 2025

Buwan na naman ng mga Katutubong Pilipino, mga besh! Happy Indigenous Peoples Month! Pero teka lang, paano natin masasabing “happy” kung hanggang ngayon, wala pa ring nakatakdang araw para ipagdiwang at kilalanin sila?

Lagi nating hinahanap kung sino nga ba ang tunay na Pilipino. Haller, nasa harap na natin sila -- ang ating mga katutubong Pilipino! Sila ang OG, ang unang mga Pinoy.

Kaso over naman, kinuha na natin halos lahat ng lupain nila, tinataboy pa sila minsan sa bundok! Tapos ngayong isang araw lang ang hinihingi nila para kilalanin, parang ang hirap pa nating ibigay!

Kaya ito na mga beshie, isinusulong ko ang Senate Bill No. 1130 o “National Indigenous Peoples Day Act” para gawing special non-working holiday ang Agosto 9, bilang Araw ng mga Katutubong Pilipino, at ang buong buwan ng Agosto bilang National Indigenous Peoples Month.

Huwag n’yo namang sabihing gusto lang natin ng “walang pasok,” ha! Hindi ito tungkol sa pahinga, kundi sa pagbibigay halaga sa ating mga kapatid na katutubo na madalas pa ring naaapi at hindi nabibigyan ng boses.

Isipin ninyo, sila na nga ang nauna rito, pero sila pa ang madalas nahuhuli sa progreso at pagkilala. 

‘Di ba, may holiday tayo para sa lahat: Pasko, Eid’l Fitr, mga bayani, kung anu-ano pa! Pero ‘yung mga OG na Pinoy, wala man lang araw para sa kanila? Naku ha, unfair ‘yun, besh!

Kaya ako, simple lang ang hiling: isang araw lang para sa mga katutubong Pilipino. Para kilalanin natin ang kanilang tapang, dangal, at kultura na siyang ugat ng ating pagka-Pinoy.

Ibigay na natin ang araw ng mga OG na Pinoy! Dasurv nila ‘yun!

Push na natin ang Midwifery Act — It’s long overdue

ni Imee Marcos @Imeesolusyon | October 23, 2025

Mga beshie, mukhang overdue na talaga ang dagdag-sahod ng ating mga komadrona. Halos araw-araw silang nanganganak ng serbisyo, pero hanggang ngayon, sila pa rin ang pinakakulelat sa sahod!

Sa madaling sabi — sila ang tumutulong magluwal ng buhay, pero ang bulsa nila, walang mailuwal! Aray ko!

Kaya naman, isinusulong natin ang “Philippine Midwifery Act” — dahil panahon nang palakasin ang batas para sa ating mga komadrona.

Hindi biro ang trabaho nila. Sa bundok, sa baryo, sa gitna ng ulan o baha — sila ang literal na first responder tuwing may manganganak.

Pero ang kapalit? Mababang sahod, kulang sa benepisyo, at minsan, ni “thank you,” wala!

Sa ilalim ng panukalang ito, magkakaroon ng Board of Midwifery sa PRC — para siguraduhing may tamang training, lisensya, at karapatan ang ating mga midwife.

Ibig sabihin, hindi lang basta tagapaanak, kundi propesyonal na tagapagligtas ng buhay!

Kasama rin dito ang pagtaas ng sahod — hindi bababa sa Salary Grade 11 sa gobyerno, at hindi rin bababa sa minimum wage sa pribado.

Ang mga komadrona — sila ang tahimik na bayani ng bawat barangay.

Sila ang unang humahawak sa bagong buhay, at madalas, sila rin ang unang humaharap sa panganib.

Pero tila nakakalimutan ng gobyerno na may “life and death” din ang bawat shift nila.

Kaya baka naman, panahon nang i-labor na ‘to sa Kongreso — dahil kung ang mga ina ay may maternity leave, dapat ang mga komadrona naman, may delivery of justice!

Kung gusto nating ligtas ang bawat sanggol na isinisilang, siguraduhin din nating may maayos na kabuhayan ang mga kamay na unang humahawak sa kanila.

Agree?