Impeachment ni VP Sara, pagbobotohan na sa Kamara

ni Jeff Tumbado @News | May 5, 2026

Photo: House of Reprensentatives PH

Inaprubahan na ng House Committee on Justice nitong Lunes ang committee report na naglalaman ng mga artikulo ng impeachment laban kay Vice President Sara Duterte, na magbibigay-daan sa botohan ng buong Kamara.

Ang pag-apruba ay nagmula sa mosyon ni House Deputy Speaker Jayjay Suarez, at sinuportahan ng lahat ng 55 miyembro ng komite.

Nangyari ito ilang araw matapos pagtibayin ng panel ang pagkakaroon ng “probable cause” upang i-impeach ang Bise Presidente.

Ayon kay Batangas 2nd District Rep. Gerville Luistro, chairperson ng komite, sinunod umano nila nang mahigpit ang itinakda ng Konstitusyon sa buong proseso.

Sa mga pagdinig ng komite, inilatag ang umano’y mabilis na paglabas ng P125 milyong confidential funds sa loob ng 24 oras, mga kuwestyonableng resibo at “envelopes,” at testimonya ng ilang resource persons.

Iniulat din ng Commission on Audit na may mga notice of disallowance sa paggamit ng confidential funds ng Office of the Vice President, kabilang ang P73 milyon noong 2022 at kabuuang P375 milyon noong 2023.

Samantala, sinabi ng Philippine Statistics Authority (PSA) na walang rekord sa civil registry ang ilang umano’y tumanggap ng pondo, habang kinumpirma naman ng National Bureau of Investigation (NBI) ang ilang detalye kaugnay ng mga pirma at iba pang ebidensya.

Lumabas din sa ulat ng Anti-Money Laundering Council (AMLC) na may kabuuang P6.7 bilyong bank transactions ang na-flag bilang “covered” at “suspicious” na may kaugnayan sa Bise Presidente at sa kanyang asawa na si Atty. Manases Carpio mula 2006 hanggang 2025.

Kabilang din sa tinalakay ang umano’y banta ng Bise Presidente laban kay Pangulong Ferdinand Marcos Jr. at kanyang pamilya, na ayon sa NBI ay maaaring pumasok sa kasong inciting to sedition at grave threats.

Sa susunod na hakbang, isasailalim sa plenaryo ng Kamara ang botohan kung a-aprubahan ang impeachment complaint, na posibleng umusad sa paglilitis sa Senado. 

Sa botong 53-0 — House panel... Impeachement vs. VP Sara, may basehan

ni Jeff Tumbado @News | April 30, 2026

Photo: VP Inday Sara Duterte / House of Representatives

Unanimous ang boto ng 53 miyembro ng House Committee on Justice na may probable cause o sapat na basehan ang dalawang impeachment complaints laban kay Vice President Sara Duterte.

Ang mga nasabing reklamo ay pormal na inendorso nina Mamamayang Liberal Rep. Leila de Lima at 6th District Manila Rep. Benny Abante.

Kabilang sa mga alegasyong tinalakay sa komite laban sa opisyal ay ang umano’y maling paggamit ng confidential funds, panunuhol, tagong yaman, money trail, at mga hakbang ng destabilisasyon.

Nakatakda nang bumuo ng pormal na report ang panel upang iakyat sa House plenary kung saan kinakailangan ang one-third na boto para tuluyang ma-impeach ang Bise Presidente. 

Samantala, naglabas ng opisyal na pahayag ang Defense team ni VP Sara matapos makitaan ng probable cause ng House Committee on Justice ang mga inihaing impeachment complaints laban sa kanya.

Ayon sa inilabas na mensahe ng kampo ng Bise Presidente, hindi na umano nakakagulat ang naging desisyon ng komite lalo na kung pagbabasehan ang mismong takbo ng mga isinagawang pagdinig.

Pag-amin, kinondena sa House... Cong. Suntay, nag-init kay Anne

by BRT @News | March 4, 2026

Photo : Instagram @Anne Curtis / House of Representatives

Umani ng samu't saring reaksyon ang kontrobersyal na pahayag si 4th District Quezon City Rep. Bong Suntay sa gitna ng kanyang manifestation sa pagdinig ng House Committee on Justice kaugnay ng impeachment complaint laban kay Vice President Sara Duterte.

Sa gitna ng talakayan sa naging partisipasyon umano ni VP Sara sa mga rally at sa mga pahayag nito tungkol sa pagiging “designated survivor,” ibinahagi ni Suntay ang isang personal na halimbawang tumukoy sa "It's Showtime" host at aktres na si Anne Curtis.

“Minsan nasa Shangri-La ako, nakita ko si Anne Curtis. Ang ganda-ganda pala niya. You know, may desire sa loob ko na nag-init talaga, at na-imagine ko na lang kung ano ang puwedeng mangyari. Pero siyempre hanggang imagination lang 'yon,” ani Suntay sa pagdinig.

"Pero ‘di naman siguro ako puwedeng kasuhan kung ano ang na-imagine ko eh," dagdag pa niya.

Ang naturang pahayag ay agad na sinita ng ilang miyembro ng komite, na nagsabing hindi ito kaugnay ng usapin sa pagdinig. Dahil dito, may ilang kongresista ang naghain ng mosyon upang ipatanggal sa opisyal na records ng pagdinig ang nabanggit na bahagi ng kanyang manifestation.

Nilinaw naman ni Suntay na hindi sexual ang kanyang naging pahayag.

"There is nothing sexual do’n sa sinabi ko, nothing immoral, it’s just, I said, may na-imagine ako, I think there is nothing wrong," aniya.

Sa botong 13-2-2, sinusugan naman ng mga mambabatas ang pag-strike out sa records sa mga nasabi ni Suntay.