P-BBM, nasa Japan na

ni Lolet Abania | Pebrero 8, 2023

Sinimulan na ni Pangulong Ferdinand Marcos Jr. ang kanyang 5-day official visit sa Japan ngayong Miyerkules, ang unang biyahe nito sa East Asian country simula ng maupo sa puwesto noong Hunyo 2022.

Dumating si P-BBM at kanyang delegasyon sa Japan ng alas-5:35 ng hapon local time, sakay ng flight PR 001.

Nakaiskedyul na makipagkita si Marcos kay Japanese Prime Minister Fumio Kishida at makaharap si Emperor Naruhito. Nasa tinatayang pitong key agreements ang inaasahang malalagdaan sa kanyang pagbisita sa naturang bansa.

Nakapaloob sa mga kasunduan ang tungkol sa humanitarian assistance at disaster relief, infrastructure, agriculture, at digital cooperation. Magkakaroon din ang Pangulo ng mga meetings sa mga Japanese business leaders upang i-promote ang mga trade at investment opportunities sa Pilipinas.

“This administration is keen on working closely with Japan to forge stability and dynamism in our bilateral relations,” ani Marcos sa kanyang pre-departure speech.

Samantala, sa bisperas ng pagbisita ni P-BBM sa naturang bansa, ang Maynila ay nagpa-deport ng dalawa sa apat na Japanese nationals na sina Toshiya Fujita at Kiyoto Imamura, na nai-report na sangkot sa organized robberies sa buong Japan.

Habang ang dalawang iba pa, ang mastermind umano na si Yuki Watanabe at si Kojima Tomonobu, ay nakatakdang pabalikin sa gabi ng Miyerkules.

Pinuri naman ng Japanese Embassy in Manila ang gobyerno ng Pilipinas dahil sa tinatawag na “constructive” response at kooperasyon nito kaugnay sa deportation ng kanilang mga mamamayan.

Ayon naman sa Department of Foreign Affairs (DFA), “The “Luffy” controversy would not affect the President’s trip to Japan, which will conclude on February 12.”

Japan trip ni Marcos, kasado na.. Sangkaterba uli ang kasama

ni Mylene Alfonso | February 2, 2023

Inanunsyo kahapon ng Department of Foreign Affairs (DFA) na pitong key bilateral agreements ang inaasahang malalagdaan sa official working visit ni Pangulong Bongbong Marcos sa Tokyo, Japan sa darating na Pebrero 8 hanggang 12.

Sa pre-departure briefing sa Malacañang, sinabi ni DFA Assistant Secretary for Asian and Pacific Affairs Neal Imperial na kabilang sa pitong kasunduan ay may kinalaman sa infrastructure development, defense, agriculture, at information and communications technology na pasok sa priority agenda ni Marcos.

Ayon kay Imperial, inaasahan din ang paglagda ng “umbrella terms of reference” kaugnay sa humanitarian assistance at disaster relief cooperation sa panahon ng working visit kung saan lalagdaan ito ng Department of National Defense (DND) at ng Ministry of Defense ng Japan.

Gayundin, kasama sa pagbisita ang pagpapalitan ng mga notes sa mga loan agreements hinggil sa mga infrastructure projects.

Nabatid na dahil sa imbitasyon ni Japanese Prime Minister Kishida Fumio ang pagbisita ni Marcos kung saan ito ang kauna-unahang pagbisita ng Pangulo sa Japan mula nang maluklok sa puwesto at ikatlo naman na kanyang biyahe sa labas ng bansa ngayong taon.

Magsisimula ang official activities ng Pangulo sa Pebrero 9 sa pamamagitan ng ilang pulong kabilang ang bilateral meeting ni Marcos kay Kishida na una nang nagkausap sa United Nations General Assembly (UNGA) sa New York noong nakaraang Setyembre.

Ang bilateral meeting ay susundan ng isang working dinner na pangangasiwaan ng Japanese Prime Minister. Nakatakda ring magkaroon ng courtesy call ang First Couple kina Emperor Naruhito at Empress Masako.

Makikipagpulong din ang Pangulo sa mga chief executive officers ng Japanese shipping companies at association upang maisulong ang global competitiveness ng mga Filipino seafarers maging ang maritime education at welfare programs.

Nabatid na mahalaga ang pagbisita ng Pangulo sa Japan dahil ito ang ikalawang pinakamalaking trading partner ng Pilipinas at ikatlong pinakamalaking export market at ikalawang top source ng imports.

Nabatid na isa ang Japan sa dalawang strategic partner ng Pilipinas kung saan isa rito ay ang Vietnam. Bago tumulak pabalik ng Maynila, makikipagkita si Marcos sa mahigit 1,000 miyembro ng Filipino community sa Tokyo.

Kabilang sa delegasyon ng Punong Ehekutibo sina First Lady Liza AranetaMarcos, dating Pangulong Gloria Macapagal-Arroyo, Foreign Affairs Secretary Enrique Manalo, Finance Sec. Benjamin Diokno, Trade Sec. Alfredo Pascual, Energy Sec. Raphael Lotilla, Tourism Sec. Christina Frasco, Special Assistant to the President Anton Lagdameo at Communications Sec. Cheloy Garafil.

Idinagdag ni Imperial na malaking business delegation din ang inaasahan na makakasama sa delegasyon ni Marcos.

Aalis sa Maynila ang Pangulo sa hapon ng Pebrero 8 at darating sa Tokyong gabi sa kaparehong araw.

BBM at Sara, umamin.. K-12, palpak

ni Madel Moratillo | January 31, 2023

Aminado sina Pangulong Ferdinand ‘Bongbong’ Marcos, Jr. at Vice President/Education Secretary Sara Duterte na bigo ang Kto12 Program na matupad ang layunin ng pagbuo rito.

“We have failed them. We have to admit that we have failed our children. And let us not keep failing them anymore. Otherwise, we will not allow them to become the great Filipinos that we know they can be,” pahayag ni Marcos.

Ayon naman kay Duterte, sa pamamagitan ng K-12, target sana ng pamahalaan na pagka-graduate ng estudyante ay ready na ito for employment. Pero sa kanyang Basic Education Report 2023, sinabi ni VP Sara na batay sa ginawa nilang assessment,

mababa ang bilang ng mga nagtapos dito na nakahanap ng trabaho.

Katunayan, sa pag-aaral aniya ng Bureau of Curriculum Development sa mga nagtapos ng Senior High School, 83% ang kumuha pa ng higher education para may siguradong trabaho.

Habang 10% lang ng nagtapos ng senior high ang nakapasok ng trabaho.

Nakita rin aniya nilang bigo ang mga guro na matugunan ang 21st-century skills. Pero hindi naman daw ito kasalanan ng mga guro dahil ang naging problema ay sa sistema.

Dahil dito, rerebisahin aniya nila ang curriculum ng Kto12 Program at babawasan ang ilang subject.

“We will reduce the number of learning areas in K to 3 from 7 to 5 to focus on foundational skills in literacy and numeracy in the early grades, particularly among

disadvantaged students. We will strengthen our literacy and numeracy programs,” pahayag ni Duterte.

Palalakasin din aniya nila ang Reading, Science and Technology, at Math programs. Tiniyak din nito ang suporta para mapataas ang kanilang kapasidad at kakayahan ng mga guro.

Kabilang aniya rito ang pagbibigay ng graduate degree scholarship programs at certificate programs para sa mga guro.

Tiniyak din niya na aayusin nila ang pamamahagi ng workload ng mga guro at bayad kapag overloaded na ang mga ito ng trabaho.

Kasama rin sa plano ng DepEd ang pag-extend sa Special Hardship Allowances para sa mga guro, pagbibigay ng libreng annual physical examination at libreng legal assistance.

Samantala, naglaan na aniya ang DepEd ng P15.6 bilyong pondo para sa pagpapatayo ng mga bagong klasrum. Para masolusyunan ang mga isyu na ito, isinulong ng DepEd ang “MATATAG” education agenda.

Tiniyak din ni VP Sara na magkakaroon ng kuryente ang lahat ng paaralan sa bansa lalo ang nasa mga malayong lugar pagtatayo ng library hubs sa division offices ng DepEd.