It’s final: BBM hindi dadalo sa Comelec debates

ni Jasmin Joy Evangelista | March 15, 2022

Hindi dadalo si presidential candidate Ferdinand “Bongbong” Marcos Jr. sa debate na inorganisa ng Commission on Elections sa March 19.

Ito ay kinumpirma ng spokesman ni Marcos na si Attorney Vic Rodriguez nitong Lunes.

“I confirm our non-participation in the Comelec sanctioned debate this coming Saturday, March 19, 2022,” ani Rodriguez.

“Presidential frontrunner Bongbong Marcos’ words are his bond, thus we shall honor our commitment to our supporters to be with them on the field on this day,” dagdag niya.

Ipagpapatuloy umano ng Marcos camp ang “preferred mode of direct communication with the people and engage them in a more personal face to face interaction that discusses real issues that affect them today, tomorrow and in the days to come as this election is all about our collective future.”

Nauna ring sinabi ng running mate ni BBM na si Davao City Mayor Sara Duterte na hindi siya dadalo sa mga debate.

Matatandaang hindi dumalo si Marcos sa presidential interview ni Jessica Soho at sa forum na inorganisa ng Kapisanan ng mga Brodkaster ng Pilipinas.

Hindi rin siya dumalos sa debate na sponsored ng CNN Philippines.

Gayunman, dumalo si Marcos sa debate na inorganisa ng SMNI.

Para ‘di extend nang extend… 5 taon termino sa mga barangay official — BBM

ni Jasmin Joy Evangelista | March 13, 2022

Inihayag ni presidential candidate Ferdinand “Bongbong” Marcos na itutulak niya ang five-year term para sa mga barangay officials kung siya ang magiging pangulo ng bansa.

“Wag na tayong extend nang extend, postpone nang postpone, palitan na natin ‘yung batas para ang termino ng barangay official ay limang taon na at three-term limit,” pahayag ni Marcos Jr. sa kanyang meet and greet sa mga barangay officials sa Parañaque City.

Paulit-ulit na lang din umano na nire-reschedule ang barangay elections.

“Kung titingnan natin ang kasaysayan ng barangay elections sa kaka-extend natin mula sa simula na nag-postpone ng halalan ay on average ay five years na nakaupo,” aniya.

Simula 1988 ay maraming beses nang na-postpone ang barangay elections.

Noong 2019, nilagdaan ni Pangulong Rodrigo Duterte ang Republic Act 11462 o ang postponement ng May 2020 barangay at Sangguniang Kabataan (SK) elections sa December 2022.

Sa ilalim ng batas na ito, ang mga barangay elections pagkatapos ng December elections ay isasagawa na sa unang Lunes ng December 2025, kada tatlong taon.

Sa halip na i-postpone ang barangay elections, nais ni Bongbong na amyendahan ang Local Government Code.

“Gawin natin ang termino ng barangay official ay limang taon na talaga. Ang term limit [ay] tatlong termino rin,” ani Marcos Jr.

Sa kabilang banda, ang running-mate ni Marcos na si Davao City Mayor Sara Duterte, ay inihayag naman na itutulak niya ang standardization ng honorarium ng barangay officials.

“Lagi po naming sinasabi na dapat simulan ang pagplano at discussion sa standardization ng compensation o honorarium ng functionaries ng mga tao natin sa barangay para sa buong Pilipinas,” ani Sara.

Imee kay Bongbong Marcos: Dumalo ka sa mga debate

ni Jasmin Joy Evangelista | March 13, 2022

Pinayuhan ni Sen. Imee Marcos nitong Sabado ang kanyang kapatid na si presidentian candidate former Sen. Ferdinand “Bongbong” Marcos, na dumalo sa mga debate dahil marami itong natatanggap na kritisismo sa hindi pagsali sa mga ito.

Ang mga kandidato umano ay dapat na maging “transparent, accountable, responsible, open, accessible,” ayon sa senador, sa kanyang interview sa AM radio station na DWIZ.

“Answer all their criticisms,” payo ng senador sa kanyang kapatid.

“After all, we have faced all our cases. We answer all the criticisms. He can easily do that,” dagdag niya.

Patuloy pa ni Imee: “So for me, he should go, even if not all of them… If he thinks he would be wasting time because he has a lot of things to do, my advice is: ‘Show up at some of them.”

Naiinis din umano ang senador sa #MarcosDuwag hashtag na nag-trend sa Twitter nang hindi dumalo si BBM sa interview kay veteran journalist Jessica Soho.

“Hindi naman duwag ‘yung kapatid ko”, aniya.

“Kayang-kaya naman niya sagutin ‘yun dahil magaling ‘yung kapatid ko.”

Matatandaang hindi dumalo si BBM sa interviews na inorganisa nina Jessica Soho, radio DZBB, at ng KBP presidential forum. Hindi rin niya dinaluhan ang CNN Philippines interview.