NU Bulldogs at DLSU Eagles mababangis vs. ADU at UE

ni Anthony E. Servinio @Sports | October 22, 2023

Mga laro ngayong Linggo – MOA

1:00 PM FEU vs. UST

4:00 PM Ateneo vs. UP

Tinakasan ng National University ang huling hirit ng Adamson University, 69-66, sa 86th UAAP Men’s Basketball Tournament Sabado sa University of Santo Tomas Quadricentennial Pavilion. Bumalik din sa panalo ang De La Salle University at pinabagsak ang host University of the East, 83-75.

Mula sa 63-63 tabla ay nagsama sina Kean Baclaan at Steve Nash Enriquez para sa anim na puntos at lumayo ang Bulldogs, 69-63. Bumanat ng three-points si Matthew Montebon upang lumapit ang Falcons, 66-69, at isinalba ang NU ng kanilang depensa sa nalalabing minuto at hindi na nakapuntos ang Adamson.

Gumawa ng 19 puntos kasama ang limang three-points si Baclaan na siyang pinakamataas niya ngayong taon. Sumunod si Jake Figueroa na may 17 puntos habang 13 si Enriquez at tumibay ang kapit ng NU sa pangalawang pwesto na may 6-1 panalo-talo.

Patuloy ang husay nina Kevin Quiambao na nagtala ng 17 puntos, siyam na rebound at 12 assist at Evan Nelle na may 14 puntos. Malaking bawi din ito para sa DLSU ng dalawang beses sa Warriors noong 85th UAAP na malaking dahilan bakit hindi sila nakapasok sa Final Four.

Samantala, magkikita muli ngayong ang araw ang defending champion Ateneo de Manila University at University of the Philippines upang isara ang Round One ng elimination sa MOA Arena simula 4:00 ng hapon. Sa unang laro sa 1:00 ng hapon, hahanapin muli ng UST ang unang panalo laban sa FEU.

Red Lions, asam ang solo 2nd place, Blazers iinit pa

ni GA @Sports | October 20, 2023

Mga laro ngayong Biyernes

(Filoil EcoOil Arena)

2 p.m. - CSB Blazers vs EAC Generals

4 p.m. - SBU Red Lions vs SSC Golden Stags

Puntirya ng San Beda Red Lions na masiguro ang solong 2nd place laban sa delikadong San Sebastian College-Recoletos Golden Stags, habang asam na pahabain ng College of Saint Benilde Blazers sa apat na sunod na panalo ang target laban sa katunggaling Emilio Aguinaldo College Generals sa double-header ngayong Biyernes ng hapon sa nalalapit na pagtatapos ng first round elimination ng 99th National Collegiate Athletic Association (NCAA) men’s basketball tournament sa FilOil EcoOil Arena sa San Juan City.

Naging matagumpay ang matinding pagtakas ng San Beda sa kontra University of Perpetual Help System Dalta Altas sa 62-60 kasunod ng pamamayani ni rookie forward Jomel Puno na pinunuan ang 12pts at 17 rebounds upang madala sa ikalawang sunod na panalo ang koponan. Hahanap ng ika-anim na panalo ang mga bataan ni Yuri Escueta sa tampok na laro ng 4 p.m.

Muling susubukang buhatin ni gunner Miguel Andre Oczon ang kampanya ng CSB Blazers na target ang four-game winning streak upang kumawala sa pagkakatabla kontra EAC Generals sa pambungad na salpukan sa alas-2:00 ng hapon.

Patitibayin ng Mendiola-based squad ang kanilang puwesto sa second place sa 5-2 kartada matapos bumagsak sa ikatlong sunod na pagkabigo ang Lyceum Pirates sa 6-3 marka, kontra sa San Sebastian na planong makaangat sa puwesto sa 3-5 rekord katabla ang Perpetual sa 8th-place.

Manila, nagtala ng malaking panalo sa FIBA challenger

ni Anthony E. Servinio @Sports | October 19, 2023

Naitala ng Manila Chooks ang maaaring pinakamalaking panalo sa kanilang kasaysayan at itinumba ang walang iba kundi ang #2 Antwerp ng Belgium sa overtime, 14-12, sa EXPO 2023 FIBA3x3 Al Bidda Park Challenger Miyerkules sa Doha, Qatar. Naghalong husay at suwerte ang tumulak sa koponang Pinoy subalit tila naubos ito agad.

Walang puntos sa unang 10 minuto, bumida sa overtime si Paul Desiderio sa nag-iisang shoot na una ay binilang na dalawang puntos na inakala ay wakas ng laro, 14-12. Binalikan ng reperi ang video at ibinaba ito sa 1 puntos lang dahil nakita na nakatapak si Desiderio sa linya, 13-12.

May pagkakataon ang mga Belgian na maagaw ang panalo subalit nagmintis sila at nakuha ng Manila ang rebound. Ipinasok ni Tosh Sesay ang nagpapanalong buslo galing sa pasa ni Desiderio sabay diwang ng mga manonood na karamihan ay mga Pinoy.

Hawak ng Manila ang 11-7 bentahe subalit bumangon ang Antwerp at lumapit, 11-12. Pumito ng foul ang reperi na may 1 segundo sa orasan subalit tumiklop si Jonas Foerts at isa lang naipasok sa dalawang free throw upang itakda ang overtime na unahan nang maka-2 puntos.

Halimaw si Sesay sa 7 puntos at 12 rebound. Nag-ambag ng apat si Dennis Santos at dalawa kay Marcus Hammonds. Nanatiling buhay ang Antwerp matapos biguin ang Utrecht ng Netherlands sa sumunod na laro sa Grupo B, 21-17. Dahil dito, kinailangan manalo ng Manila sa Utrecht upang masigurado ang pagpasok sa q'finals.

Tumalon ang Utrecht sa 5-0 lamang at hindi na nakaporma ang Manila patungo sa 22-15 resulta. Tumabla ang tatlong koponan sa 1-1 panalo-talo at ayon sa dami ng puntos, pasok ang Utrecht (39) at Antwerp (33) habang tanggal ang Manila (29) at nagtapos sa ika-9 na puwesto.