Health certificate, required sa dance instructor

ni Atty. Persida Rueda-Acosta - @Magtanong Kay Attorney | March 24, 2022

Dear Chief Acosta,

Nag-apply ako bilang isang dance instructor. Tinanggap naman ako, ngunit sinabi sa akin ng may-ari ng kompanyang aking pinasukan na kinakailangan ko diumano na kumuha muna ng health certificate. Tama po ba ito?

Jaime

Dear Jaime,

Para sa inyong kaalaman, ang inyong suliranin ay tinatalakay sa Presidential Decree (P.D.) No. 856 o The Code on Sanitation of the Philippines. Nabanggit sa Chapter XI, Section 57 (a) ng nasabing batas na:

“CHAPTER XI

DANCING SCHOOLS, DANCE HALLS AND NIGHT CLUBS

Sec. 57. Special Provisions The following provisions are applicable in cases herein specified:

(a) For dancing schools

No person shall be employed as a dancing instructor or instructress without first securing a health certificate from the local authority.” (Binigyang-diin)

Samakatuwid, malinaw sa nabanggit na batas na lahat ng magtatrabaho bilang dance instructor ay kinakailangang magkaroon muna ng health certificate buhat sa isang lokal na health authority.

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.

Karapatan ng Pinay na nakasal sa foreigner

ni Atty. Persida Rueda-Acosta - @Magtanong Kay Attorney | March 23, 2022

Dear Chief Acosta,

Sinabihan po ako ng aking kaibigan na kaagad na mawawala diumano ang aking Philippine citizenship sa oras na ako ay makasal sa aking foreigner na fiancé. Tama po ba ang payong ito?

Kim

Dear Kim,

Para sa inyong kaalaman, ang batas na nakasasaklaw sa inyong sitwasyon ay ang Chapter V, Section 19 ng Republic Act No. 9710 o mas kilala sa tawag na The Magna Carta of Women, kung saan nakasaad na:

“SEC. 19. Equal Rights in All Matters Relating to Marriage and Family Relations. –

x x x

(g) women shall have equal rights with men to acquire change, or retain their nationality. The State shall ensure in particular that neither marriage to an alien nor change of nationality by the husband during marriage shall automatically change the nationality of the wife, render her stateless or force upon her the nationality of the husband. Various statutes of other countries concerning dual citizenship that may be enjoyed equally by women and men shall likewise be considered;” (Binigyang-diin)

Sang-ayon sa nabanggit, malinaw na ang pagpapakasal sa isang foreign national, o ang pagpapalit ng nationality ng kanyang asawa, ay hindi dahilan upang kaagad na mawala ang nationality o Philippine citizenship ng isang Pilipina, sapagkat siya ay may karapatang panatilihin ang kanyang nationality. Ibig sabihin, hindi tama ang sinabi sa inyo ng inyong kaibigan.

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.

Sports center, lehitimong proyekto ng barangay

ni Atty. Persida Rueda-Acosta - @Magtanong Kay Attorney | March 22, 2022

Dear Chief Acosta,

Nais pong magpatayo ng aming barangay ng isang sports center, lalo na’t matatapos na ang pandemya at upang magkaroon na ng ligtas at makakalusugang libangan ang mga tao sa aming lugar. Maaari bang gawing prayoridad ang ganitong proyekto sa

isang barangay?

Ena

Dear Ena,

Para sa inyong kaalaman, ang Section 17 ng Republic Act (R. A.) No. 7160 na kilala bilang Local Government Code of the Philippines, ang batas na makatutugon sa inyong katanungan. Sa nabanggit na probisyon ng batas nakalista ang mga pangunahing serbisyo at pasilidad na dapat ibigay at/o responsibilidad na idulot ng isang barangay. Ayon sa nabanggit na probisyon, ang mga serbisyo at pasilidad na ito ay ang mga sumusunod:

“Section 17. Basic Services and Facilities. –

(a) Local government units shall endeavor to be self-reliant and shall continue exercising the powers and discharging the duties and functions currently vested upon them. They shall also discharge the functions and responsibilities of national agencies and offices devolved to them pursuant to this Code. Local government units shall likewise exercise such other powers and discharge such other functions and responsibilities as are necessary, appropriate, or incidental to efficient and effective provisions of the basic services and facilities enumerated herein.

(b) Such basic services and facilities include, but are not limited to, the following:

(1) For Barangay xxx (vi) Infrastructure facilities such as multi-purpose hall, multipurpose pavement, plaza, sports center, and other similar facilities […] (Binigyang-diin)

Samakatuwid, malinaw na responsibilidad ng pamunuan ng isang barangay ang pagpapatayo ng imprastraktura na tulad ng sports center. Ang pagpapatayo nito ay sang-ayon sa batas at ito ay isang legal na proyekto. Kung mayroong sapat na alokasyon sa budget ang barangay para rito, maaari itong maging prayoridad na proyekto ng pamayanan.

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.