Sa pagkamatay ng 2 Ateneo players — NBI... Coach Baldwin, 11 pa, tutuluyan sa DOJ

ni Gina Pleñago @News | July 14, 2026

Photo: Tab Baldwin - Ateneo de Manila University

Sasampahan sa Department of Justice (DOJ) ng kasong reckless imprudence resulting in two counts of homicide ang dating head coach ng men's basketball team ng Ateneo de Manila University at 11 iba pa.

Kahapon, inirekomenda ng NBI ang pagsasampa ng mga kaso sa dating head coach ng Ateneo de Manila University na si Tab Baldwin at 11 iba pa kaugnay ng pagkamatay ng mga estudyanteng atleta na sina Rene Clert Baterbonia at Divine Adili.

Ang nilalaman ng rekomendasyon ng NBI ang reklamong reckless imprudence resulting to two counts of homicide laban kay Baldwin; strengthening at conditioning coaches na sina Ceasar Vincent “CJ” Elumba at Grant Dearns; assistant coaches Reynaldo Jacinto Jr., Dean Caesar Castaño, Sandro Nicholas Soriano, at Hernan Ameer “Buboy” Domingo; at ang Ateneo physical therapist na si John Eric Rueca.

Simple negligence resulting in two counts of homicide ang pinasasampa naman kina Ateneo Athletic Director Emmanuel Fernandez; Francisco Zubia III, operating manager Hermanos Leisure & Agri-Farm Resor, at co-managers na sina Frederick Barangan Zubia, at Yedda Mary Molina Rubio.

Bahagi ng imbestigasyon ang pagkuha ng mga salaysay ng ilang indibidwal kabilang sina Ateneo President Roberto “Bobby” Yap, SJ; Baldwin, iba pang mga coach, pati na rin ang mga dati at kasalukuyang basketball players, mga miyembro ng coaching staff, utility personnel, at mga nangasiwa sa resort, noong Hunyo kaugnay sa pagkamatay nina Baterbonia at Adili sa team-building activity ng basketball team sa Dipaculao, Aurora.

Sa pagkamatay nina Rene at Divine — CIDG... Coach Baldwin, 10 pa, kasuhan sa hazing

ni Jeff Tumbado @News | June 27, 2026

Photo: The Guidin / FIle

Natanggap na ng Department of Justice (DOJ) ang referral o rekomendasyon ng PNP-Criminal Investigation and Detection Group (CIDG) ang pagsasampa ng mga kasong kriminal kaugnay sa pagkamatay nina Rene Baterbonia at Divine Adili.

Ito ang kinumpirma ng DOJ kasabay ng paglalahad sa mga kaso sa ilalim ng Anti-Hazing Act at iba pang posibleng paglabag sa batas kaugnay ng Ateneo drowning incident sa Aurora.

Kabilang sa mga personalidad na posibleng kasuhan ay si resigned Ateneo Men's Basketball Team Head Coach Tab Baldwin at 10 iba pa.

Ayon kay DOJ spox Atty. Polo Martinez, kabilang sa maaaring ikonsiderang kaso ang homicide at reckless imprudence resulting in homicide, depende sa magiging pagsusuri sa mga ebidensyang isinumite.

Sisimulan muna ng DOJ ang initial evaluation upang matukoy kung sapat at kumpleto ang mga dokumento para sa karagdagang proseso.

Kung kulang ang ebidensya, maaari itong ibalik para sa karagdagang case build-up kasama ang CIDG.

Kung sapat naman, isasailalim ito sa preliminary investigation.

Giit ni Martinez na isasagawa nila ang pagsusuri nang mabilis ngunit patas, batay sa ebidensya at umiiral na batas.

Ex-Coach Baldwin, humarap na sa NBI

ni Gina Pleñago @News | June 24, 2026

Photo: File / Tab Baldwin - Ateneo de Manila University

Humarap kahapon sa National Bureau of Investigation-Homicide Division (NBI-HD) ang nagbitiw na si Ateneo coach Tab Baldwin para sa nagpapatuloy na imbestigasyon sa pagkamatay ng student-athletes na sina Rene Baterbonia at Divine Adili nitong Martes.

Walang ibinigay na sagot o pahayag si Baldwin sa mga pagtatanong ng media, nang dumating sa NBI headquarters sa Pasay City ala-1:45 ng hapon ng Hunyo 23, kasama ang abogadong si Atty. Karl Justine David.

Isa si Baldwin na pinadalhan ng subpoena ng NBI sa 20 indibidwal para sa fact-finding investigation sa pagkalunod at pagkamatay ng dalawang basketbolista sa team building na isinagawa sa isang beach resort sa Dipaculao, Aurora noong Hunyo 8, 2026.

Matatandaang hindi sumipot si Baldwin sa subpoena ng NBI noong nakaraang linggo kaya nagpalabas ng warning ang NBI na maaaring maharap sa contempt proceedings ang sinumang indibidwal na pinadalhan ng notice.

Kabilang sa sisilipin sa imbestigasyon kung may paglabag sa Anti-Hazing Act at iba pang batas.

Samantala, ayon kay NBI Director Melvin Matibag, malapit nang makumpleto ang kanilang imbestigasyon at hawak na rin nila ang autopsy reports sa mga labi nina Baterbonia at Adili.