Ayuda para sa mga apektado ng Mayon, handa na — DSWD

ni Jeff Tumbado @News | May 4, 2026

Photo: DSWD

Inihayag ng Department of Social Welfare and Development (DSWD) na mahigit 300,000 family food packs at iba pang pangunahing pangangailangan ang nakaantabay para sa mga residenteng naapektuhan ng pag-aalburoto ng Bulkang Mayon.

Umabot na umano sa 301,311 family food packs ang nai-preposition hanggang alas-6 ng umaga kahapon para sa mga residente ng Albay na tinamaan ng makapal na ashfall mula sa bulkan.

Nakaantabay na rin ang 27,322 ready-to-eat food boxes at 15,156 non-food items na handa nang ipamahagi anumang oras.

Naglaan na rin ang DSWD ng P11,304,150 para sa emergency cash transfer, habang P28,305,450 naman ang inilabas para sa cash-for-work (CFW) program.

Ayon sa ahensya, mahigit 2,169 magsasaka na naapektuhan ng mga nakaraang aktibidad ng Bulkang Mayon ang nakatanggap ng tulong sa ilalim ng CFW program.

52 barangay, apektado ng Mayon... Mga hayop, pananim, nangamatay

ng BRT @News | May 4, 2026

Photo: PCO

Ilang alagang hayop ang nangamatay habang natuyo naman ang mga pananim dulot ng ashfall mula sa Bulkang Mayon.

Samantala, umabot na sa 52 barangay ang apektado ng ashfall bunsod ng patuloy na pagtaas ng aktibidad ng Mayon, ayon sa Office of Civil Defense (OCD).

Sa ulat ng Philippine Institute of Volcanology and Seismology (PHIVOLCS), magkakasunod na volcanic activity ang nagdulot ng makapal na abo na tumakip sa iba’t ibang bahagi ng Albay.

Alas-4:28 ng hapon, nagkaroon ng lava collapse sa summit ng bulkan na nag-generate ng pyroclastic density currents (PDCs) partikular sa Mi-isi Gully sa southwestern slopes. Tinatayang umabot sa apat na kilometro ang inilabas na PDCs, na itinuturing na pinakamalaki mula sa huling pagputok ng Mayon.

Nananatili pa rin sa Alert Level 3 ang bulkan, indikasyon ng magmatic unrest at posibilidad ng mas mapanganib na pagputok. Dahil dito, mahigpit na ipinagbabawal ang pagpasok sa 6 km Permanent Danger Zone (PDZ).

Kabilang sa mga barangay na apektado ng ashfall ay mula sa mga bayan ng Camalig, Guinobatan, Daraga, at Legazpi City.

2,429 sa Batangas, inilikas dahil sa pag-aalburoto ng Bulkang Taal

ni Ronalyn Seminiano Reonico | July 3, 2021

Umabot sa 2,429 katao ang inilikas sa Batangas dahil sa patuloy na pag-aalburoto ng Bulkang Taal, ayon sa Provincial Disaster Risk Reduction Management Office (PRDRRMO) ngayong Sabado nang hapon.

Ani PDRRMO Chief Lito Castro sa isang panayam, “Mayroon nang record na tumaas ang bilang ng mga evacuees. Nakita namin na maraming ‘di nagpunta sa evacuation center at pumunta sa kani-kanilang mga pamilya sa labas ng Batangas.

“Ngayon ay may 2,429 individuals na nag-evacuate.” Ayon naman sa Civil Defense Philippines, umabot sa 778 pamilya o 3,141 katao ang naapektuhan ng pag-aalburoto ng bulkan.

Karamihan umano ng mga nasa evacuation centers ay mula sa Agoncillo, Laurel, San Nicolas at Lemery, Batangas.

Samantala, joint forces naman ang Philippine Coast Guard at Philippine Red Cross sa pag-a-assist sa mga nasa evacuation centers.