Phl Futsal nagbabanta, wala sa World Ranking ang sukatan

ni Anthony E. Servinio @Sports | Nov. 17, 2024

Photo: Philippine Women’s Futsal National Team

Mga laro ngayong Linggo – Philsports

4 PM Myanmar vs. Vietnam 7 PM Thailand vs. Pilipinas

Naniniwala ang beteranong coach ng Philippine Women’s Futsal National Team na hindi sukatan ng lakas ang FIFA Futsal World Ranking. Patutunayan ito ni Coach Vic Hermans at ng Pinay 5 ngayong Linggo pagharap nila sa paboritong Thailand sa ikalawang araw ng ASEAN Women’s Futsal Championship 2024 sa Philsports Arena simula 7:00 ng gabi.

Ayon kay Coach Hermans, pinapaboran ng sistema ang mga bansa na mas marami ang nilalarong torneo o kahit friendly. Sa mga nakalipas na taon, mabibilang lang ang mga laro ng Pinay 5 sa dalawang friendly laban sa Guam at isang maikling torneo kasama ang Indonesia at Aotearoa New Zealand.

Malaking hamon ang hatid ng mga Thai na #6 sa buong mundo kumpara sa #59 Pilipinas. Subalit masasabi na alam na alam ni Coach Hermans ang Thailand dahil nahawakan niya ito noon at nagabayan sa ilang kampeonato sa Timog Silangang Asya.

Nanatiling matatag si Coach Hermans sa kanyang patakaran sa pagpili ng manlalaro at mas gusto niya ang mga makakapagbigay ng sapat na panahon. Dahil dito, karamihan ng Pinay 5 ay galing sa mga paaralan at mga club sa Pilipinas.

May ilang mga matunog na pangalan galing sa Women’s Football Team Filipinas na nagsubok na maging bahagi ng Pinay 5.

Sa huli ay hindi sila naisama dahil maliban sa malayo ang pagkakaiba ng Football sa Futsal, naroon ang tanong kung ipapahiram sila ng matagal ng kanilang club sa pambansang koponan. Mahalaga talaga ang panahon at pagsapit ng Mayo ay kakailanganin na ng Pinay 5 ang 100% pagtutok ng mga manlalaro hanggang FIFA Women’s Futsal World Cup sa Nob. 21, 2025.

Nilinaw na ang 16 na maglalaro ngayon ay hindi nakakatiyak sa World Cup. Maghaharap ang Myanmar at Vietnam sa unang laro ng 4 p.m. Tinatapos ang laban ng Pinay 5 at Myanmar Sabado ng gabi.

GSW nagpasiklab, Curry bida sa Emirates NBA Cup

ni Anthony E. Servinio @Sports | Nov. 14, 2024

Photo: Steph Curry vs Dallas Mavericks - Instagram / GSW

Walang personalan at trabaho lang sa 120-117 panalo ng Golden State Warriors sa bisitang Dallas Mavericks sa unang araw ng Emirates NBA Cup kahapon. Puno ng emosyon ang pagbabalik ni Klay Thompson sa Chase Center subalit pinaalala ni Stephen Curry bakit siya ang may pinakamaraming three-points sa kasaysayan ng liga.

Itinala ni Curry ang huling 12 puntos ng Warriors upang makahabol galing 108-114 sa huling tatlong minuto. Matapos magbanta ang Mavs sa tres ni Quentin Grimes, 117-118, binigyan ni Thompson ng foul si Curry at ipinasok ang dalawang paniguradong free throw na may 13 segundo sa orasan.

Nagtapos si Curry na may 37 buhat sa limang tres. Nanguna sa Mavs si Luka Doncic na may 31 subalit nagmintis ang huling tres na magtatakda sana ang overtime habang may 22 buhat sa anim na tres si Thompson na naging bahagi ng Warriors mula 2011 hanggang 2024. Itinapik papasok ni Oneka Okongwu ang mintis ni Dyson Daniels na may anim na segundong nalalabi upang malusutan ng Atlanta Hawks ang World Champion Boston Celtics, 117-116.

Nanguna pa rin si Daniels na may 28 habang may 15 si Okongwu na minsan ay naging kandidato para sa Gilas Pilipinas bilang naturalisadong manlalaro. Makapigil-hininga rin ang tagumpay ng Detroit Pistons sa Miami Heat sa overtime 123-121.

Matapos itabla ng dunk ni Jalen Duren ang laro na may isang segundo pa sa overtime, 121-121, pinatawan ng technical foul ang Heat dahil tumawag sila ng labis na timeout at ipinasok ni Malik Beasley ang free throw.

Wagi ang New York Knicks sa Philadelphia 76ers, 111-99, sa likod ng 24 ni OG Anunoby.

Nabahiran ang unang laro ngayong taon ni Joel Embiid na gumawa ng 13 matapos lumiban sa unang siyam na pinagsamang pagpapagaling ng pilay at tatlong larong suspensiyon bunga ng pakikipag-away niya sa isang mamamahayag.

Phl Curling team champ sa Div. B C'ships Canada

ni Anthony E. Servinio @Sports | Nov. 11, 2024

Saludo kami sa malakas na performance ng Philippine Women’s Curling Team sa Division B ng Pan-Continental Curling Championships sa Lacombe, Canada, nang masungkit ang fourth overall. (pscpix)

Lumikha ng kasaysayan ang Philippine Curling National Team at nag-kampeon sa 2024 Pan-Continental Curling Division B Championship sa Lacombe, Canada. Dahil dito, aakyat na ang mga Pinoy sa Division A sa 2025 at lalapit sa kanilang ultimong layunin na mapabilang sa 2026 Winter Olympics sa Milan at Cortina d’Ampezzo sa Italya.

Kinailangang lampasan ng #1 Pilipinas ang makapigil-hiningang finals kontra #3 Kazakhstan, 9-3. Tinalo ng mga Pinoy ang #4 Hong Kong sa semifinals, 6-1, habang ginulat ng Kazakhs ang paboritong #2 Jamaica, 10-3.

Walang bahid ang Pilipinas sa 10 laro sa elimination na tumakbo mula Oktubre 26 hanggang 31 kung saan ang unang apat ang tutuloy sa knockout crossover semifinals. Isa-isa nilang pinabagsak ang Saudi Arabia (15-0), India (10-2), Nigeria (18-2), Qatar (12-1), Puerto Rico (11-2), Brazil (8-1), Jamaica (7-5), Kenya (16-0), Hong Kong (9-4) at Kazakhstan (6-5).

Binubuo ang koponan nina Alan Frei, Christian Haller at magkapatid na Marc Pfister at Enrico Pfister at reserba Benjo Delarmente. Sunod nilang paghahandaan ang Ninth Asian Winter Games sa Harbin, Tsina sa Pebrero.

Pagkatapos ng Harbin ay tututok na sila sa Pre-Qualifier sa Oktubre bago ang pagbabalik sa 2025 Pan-Continental sa Nobyembre na qualifier din para sa World Championship. Ang Qualifier sa Olympics ay nakatakda para sa Disyembre at ang Olympics ay sa Pebrero.

Ang Curling ay nilalaro sa pamamagitan ng pagpapadulas ng isang malaking bato sa yelo. Ginagabayan ito habang winawalis ng mga kakampi ang dinadaanan hanggang makapasok at tumigil sa loob ng nakaguhit na bilog.

Nais ng koponan na subukan ng mga kababayan ang Curling lalo na at may mga palaruan sa mga mall. Ang apat na manlalaro ay nakatira sa Switzerland at may naipon na malawak na karanasan sa Europa bago magpasya na magbuo ng pambansang koponan.