U.S.A. kampeon sa Tokyo Olympics Men's Basketball

ni Anthony E. Servinio - @Sports | August 08, 2021

Nakamit ng U.S.A. ang kanilang ika-apat na sunod na gintong medalya sa 2020 Tokyo Olympics Men’s Basketball matapos makaganti sa Pransiya, 87-82, Sabado ng umaga sa Saitama Super Arena. Hindi na nag-aksaya ng panahon ang mga Amerikano at first quarter pa lang ay ipinakita nila kung sino ang hari at nagtira ng lakas para sa makapigil hiningang pagtatapos.

Tinuldukan ni Kevin Durant ang kanyang halimaw na laro sa dalawang free throw na may walong segundo sa orasan upang matiyak ang tagumpay. Unti-unting ibinura ng mga Pranses ang 71-57 lamang ng Team USA sa third quarter hanggang naging tatlo na lang ito matapos ang dalawang free throw ni Nando de Colo na may 10 segundong nalalabi, 82-85, subalit bumida ng isa pang beses si Durant.

Kabaligtaran sa karamihan ng kanilang mga laro sa torneo, lumamang agad ng maaga ang Team USA at hindi na nila binitawan ito kung saan 12 puntos agad ang sinumite ni Durant upang makuha ang first quarter, 22-18. Lumamang sila ng 13 sa second quarter, 39-26, subalit pumalag ang mga Pranses at naging lima na lang ang agwat pagsapit ng halftime, 44-39, sa likod nina Rudy Gobert at Evan Fournier.

Tinutukan ng depensa si Fournier at wala siyang nagawang puntos sa third quarter matapos ang 11 sa first half. Ginamit itong pagkakataon para lalong diinan ni Durant at Jayson Tatum ang atake para sa 71-63 lamang papasok sa huling quarter. Nagtapos si Durant na may 29 puntos at sinundan ni Tatum na may 19 puntos. Nag-ambag ng tig-11 puntos sina Damian Lillard at Jrue Holiday.

Nanguna sa Pransiya sina Gobert at Fournier na parehong may 16 puntos. Sumunod si Guerschon Yabusele na may 13 at de Colo na may 11 puntos.

U.S.A. areglado na sa semis vs. Spain sa Men's Basketball

ni Anthony E. Servinio - @Sports | August 04, 2021

Nilampasan ng defending champion Estados Unidos ang matinding hamon ng Espanya, 95-81, upang tumuloy sa semifinals ng Tokyo 2020 Men’s Basketball sa Saitama Super Arena Martes ng hapon. Pinagpag ng Amerikano ang kanilang mabagal na simula at uminit sa tamang panahon upang manatiling buhay ang paghananap ng kanilang ika-apat na sunod na gintong medalya.

Tinapos nina Jayson Tatum, Devin Booker at Damian Lillard sa fourth quarter ang trabahong sinimulan ni Kevin Durant. Nagpalitan ang mga bituin ng NBA ng mga tira upang mapanatili sa 10 o higit ang lamang ng Team USA hanggang huling busina.

Lumamang ang Espanya ng 10 sa second quarter, 39-29, subalit ipinasok ng Team USA ang huling pitong puntos upang maitabla ang laban, 43-43. Pagsapit ng second half ay mas ganado at mabangis na Amerikano ang lumabas at hindi na sila nag-aksaya ng panahon sa pag-arangkada sa 65-49 na lamang sa pangunguna ng mga atake ni Durant.

Ipinasok ni Durant ang 13 ng kanyang 29 puntos sa mahalagang third quarter upang pangunahan ang Team USA. Sinundan siya ni Tatum na may 13, Holiday na may 12 at Lillard na may lima ng kanyang 11 puntos sa simula ng fourth quarter.

Nanguna para sa Espanya si Ricky Rubio na may 38 puntos sa 27 minutong aksyon. Nag-ambag ng 16 puntos si Sergio Rodriguez habang double-double si Willy Hernangomez na 10 puntos at 10 rebound.

Hihintayin pa ng Team USA ang magwawagi sa ika-apat at huling quarterfinals ng Australia kontra Argentina. Ang semifinals ay nakatakda sa Agosto 5 at ang dalawang magtatagumpay ay maglalaro para sa ginto sa Agosto 7.

Naunang nakapasok sa semifinals ang Slovenia matapos tambakan ang Alemanya, 94-70, sa likod ng 27 puntos ni Zoran Dragic at 20 puntos at 11 assist ni Luka Doncic. Susunod para sa Slovenia ang magwawagi sa pagitan ng Pransiya at Italya.

USA, dinurog ang Iran Czech paghahandaan

ni Anthony E. Servinio - @Sports | July 29, 2021

Nabuhay muli ang kampanya ng U.S.A at dinurog ang Iran, 120-66, sa pagpapatuloy ng 2020 Tokyo Olympics Men’s Basketball sa Saitama Super Arena noong Miyerkules. Kailangan na lang ng mga superstar ng NBA na magwagi sa huling laban nila sa Czech Republic ngayong Sabado (Hulyo 31) upang makasiguro sa knockout playoffs at ituloy ang paghanap ng kanilang ika-apat na sunod na gintong medalya.

Sa first quarter pa lang ay pumokol ng tatlong tres si Damian Lillard ng Portland Trail Blazers para sa 28-12 na lamang at hindi nakaporma kahit minsan ang mga Iranian. Patuloy ang mainit ni kamay ni Lillard at dumagdag ng tatlo pang tres at kasama si Zach LaVine ng Chicago Bulls ay lamang ang Team USA sa halftime, 60-30.

Nagtapos si Lillard na may kabuuang pitong tres para sa 21 puntos sa 23 minutong paglalaro. Sumunod sina Devin Booker ng Phoenix Suns na may 16 puntos at Jayson Tatum ng Boston Celtics na may 14 puntos.

Sa panig ng Iran, nanguna si dating Memphis Grizzlies at Phoenix Suns sentro Hamed Haddadi sa kanyang 15 puntos at anim na rebound. Sinundan siya nina dating Meralco Bolts import Mohammad Jamshidi na may 14 puntos at Navid Rezaeifar na parehong may 12 puntos.

Sa unang laro, nakuha ng Alemanya ang unang panalo sa Grupo B kontra sa Nigeria, 99-92. Nanguna sa panalo ang mga sentro na sina Johannes Voightman na may 19 puntos at Moritz Wagner ng Orlando Magic na may 17 puntos upang burahin ang 33 puntos ni Jordan Nwora ng World Champion Milwaukee Bucks.

Sa torneo ng 3X3 sa Aomi Park, haharapin ng numero uno at walang talo Serbia ang #5 Russian Olympic Committee sa semifinals. Sa kabilang semis, magtatapat ang #2 Belgium at #3 Latvia.

Ginulat ng mga Russo ang Netherlands sa quarterfinals, 21-19, habang lumusot ang Latvia sa hamon ng punong abala Japan, 21-18, noong Martes ng gabi.