FIL-Canadian Fernandez sa U.S. Open final vs. Raducanu

ni Anthony E. Servinio - @Sports | September 12, 2021

Hudyat ng pagdating ng malaking pagbabago sa larangan ng Women’s Tennis ang inaabangang tapatan ngayong umaga nina Leylah Fernandez, isang Filipina-Canadian at Emma Raducanu ng Gran Britanya para sa prestihiyosong 2021 US Open

Championships. Nakatakda ang Women’s Singles finals ng 4:00 a.m. ngayon sa Arthur Ashe Stadium sa loob ng USTA Billie Jean King National Tennis Center sa New York.

Kinailangan ng dalawang dalaga na lampasan ang hamon ng mas matandang kalaro sa semifinals noong Biyernes. Tinalo ng 19-anyos na si Fernandez si #2 seed Aryna Sabalenka ng Belarus, 7-6 (3), 4-6 at 6-4 habang agad pinauwi ng 18-anyos na si Raducanu si Maria Sakkari ng Gresya, 6-1 at 6-4.

Bago ang torneo, dalawang beses lang umabot ng Round Two si Fernandez noong 2020 US Open at 2021 French Open. Natalo din siya sa Round 2 ng katatapos na Tokyo Olympics.

Umani ng atensiyon si Fernandez matapos niyang isa-isang pinadapa ang mga higante ng tennis. Sinimulan niya ang kampanya sa mga panalo kay Ana Konjuh ng Croatia at Kaia Kanepi ng Estonia bago ang malaking gulat kay #3 Naomi Osaka ng Japan sa Round Three.

Mas mabigat kung ihahambing ang mga tinalo ni Fernandez subalit mahirap din ang daan ni Raducanu na kinailangan pang dumaan sa qualifier bago mapabilang sa 128 sa main draw.

Binigo ni Raducanu ang mga unseeded na sina Stefanie Vogele ng Switzerland, Zhang Shuai ng Tsina, Sara Sorribes ng Espanya, Shelby Rogers ng U.S. at ang nag-iisang seeded na #11 Belinda Bencic ng Switzerland bago labanan si Sakkari. Ang kakaiba kay Raducana ay hindi pa siya natatalo ng kahit isang set sa kanyang anim na laban at winalis ang lahat ng kalaro sa dalawang set.

Naglaro din sa Women’s Doubles si Fernandez at ang kanyang katambal na si Erin Routliffe ng New Zealand. Nakatutok ang mga tagahangang Filipino sa lahat ng kilos ni Fernandez bunga ng kanyang pagkakaroon ng lahing Pinoy. Ang kanyang lolo at lola ay tubong Pilipinas subalit ang kanyang nanay ay ipinanganak na sa Canada at ang kanyang tatay ay isang Ecuadorian.

Kanselado ang NBL at WNBL

ni Anthony E. Servinio - @Sports | September 11, 2021

Hindi matutuloy ang mga nakatakdang laro ngayong Sabado at Linggo ng Chooks To Go National Basketball League (NBL) Chairman’s Cup 2021 at Women’s National Basketball League (WNBL) 2021 sa Bren Z. Guiao Convention Center sa City of San Fernando, Pampanga. Sa kabila ng hindi inaasahang pangyayari, patuloy pa rin ang WNBL sa pagdidisiplina sa kanilang mga manlalaro bilang bahagi ng pagpapalaganap ng mataas na antas na Basketball sa kababaihan.

Nagpasya ang pamunuan ng dalawang liga na ipagpaliban ang mga laro matapos pahabain ang Enhanced Community Quarantine (ECQ) sa Kamaynilaan at ilang karatig na lugar hanggang Setyembre 15. Nakapaglabas ang liga noong Martes ng schedule para sa dalawang araw subalit ibinawi ito sa gitna ng pabago-bagong patakaran ng pamahalaan.

“Hindi namin isusugal ang kalusugan at kaligtasan at handa kaming magsakripisyo,” wika ni NBL/WNBL Executive Vice President Rhose Montreal. “Naintindihan ng mga koponan at suportado nila ang desisyon ng liga.”

Nagpataw ng suspensiyon ang WNBL sa tatlong hindi pinangalanang manlalaro buhat sa magkaibang koponan bunga ng paglahok sa isang ligang labas noong nakaraang linggo sa isang paaralan sa Maynila. Ito ay malinaw na paglabag sa kanilang kontrata at paglabag din sa mga health at safety protocol ng pamahalaan. “Bilang pro league ay pinapairal namin ang self-regulation,” dagdag paliwanag ni Montreal. “Lahat ng mga desisyon ay dumadaan sa tamang proseso sa harap ng isang komite at ito ay para sa kabutihan ng nakakarami pati ang mga lumabag.”

Nakatanggap ng sumbong ang WNBL at ipinatawag ang mga manlalaro para kunan ng paliwanag. Suspendido sila ng tig-dalawang laro at maaaring mamili ang kanilang coach kung kailan ito ipapatupad.

Kailangan din nila sumailalim sa pagsusuri sa COVID-19 bago payagan bumalik sa koponan. Hindi rin apektado ang kartada ng mga koponan ng mga suspendidong manlalaro.

Bago pansamantalang itinigil ang liga noong Hulyo 25, lamang sa torneo ang mga walang talong Glutagence Glow Boosters (2-0) at Paranaque Lady Aces (1-0). Wala pang panalo ang STAN Quezon Lady Spartan (0-1) at Pacific Water Queens (0-2) habang hindi pa sumasalang ang ika-limang koponan na Taguig Lady Generals.

Triathlete Macasieb, ligtas na matapos maaksidente sa U.S.

ni Anthony E. Servinio - @Sports | September 09, 2021

Bumubuti na ang kalagayan ni Arland Macasieb, ang two-time Southeast Asian Games bronze medallist sa Men’s Individual Triathlon, matapos maaksidente nitong Setyembre 4 habang nagbibisikleta sa Fairfield, New Jersey. Sumailalim na si Macasieb sa operasyon sa iba’t ibang bahagi ng kanyang katawan at nakakasalita na ng kaunti subalit nananatili pa rin sa Intensive Care Unit ng ospital ayon sa pahayag ng kanyang pamilya.

Ayon sa ulat ng pulis, binangga ang Fil-Am triathlete ng kotse na minamaneho ng nakilalang si John Lehr at kinaladkad ng tinatayang 100 talampakan o mahigit 30 metro. Sinusubukan lumipat ng lane si Lehr ngunit hindi niya nakita si Macasieb.

Bumuhos agad ang suporta at dasal para kay Macasieb mula sa kanyang mga kasamahan sa Triathlon Association of the Philippines (TRAP). Nagsimula rin ng kampanya upang makalikom ng pondo para tumulong sa mga gastos sa pagpapagamot.

Maliban sa kanyang 2 tanso sa SEAG noong 2005 sa Subic at 2007 sa Thailand, mahaba ang listahan ng mga napagwagian at naabot ni Macasieb bilang atleta at coach. Kahit mas tutok na siya sa pagiging coach, sumasali pa rin siya ng mga karera.

Nitong taon, naging kandidato ang 46 anyos na si Macasieb na maging coach ng pambansang koponan ng Northern Marianas. Nakilala siya doon matapos sumali sa ilang malalaking karera sa isla. Tumatak sa mga tagasubaybay ng Triathlon ang kinagawiang baliktad na pagtawid ni Macasieb sa finish line gamit ang kamay imbes na ang paa. Sa ngayon, matatagalan pa bago masasaksihan itong muli.