Wala raw bahid ng pulitika ang pakikipagkita kay Mayor Leni, pero nagpakita naman si PBBM ng pink na medyas

ni Pablo Hernandez @Prangkahan | February 22, 2026

SABI NI PBBM, WALA RAW BAHID-PULITIKA ANG PAGTUNGO NIYA SA NAGA CITY, PERO NAGPAKITA NAMAN SIYA NG PINK NA MEDYAS – Nang magtungo si Pangulong Ferdinand “Bongbong” Marcos Jr. (PBBM) sa Naga City at makaharap si Mayor at dating Bise Presidente Leni Robredo, iginiit ng Pangulo na wala umanong bahid ng pulitika ang kanyang pagbisita sa lungsod.

Gayunman, matapos ang naturang pahayag ay ipinakita niya sa publiko ang kanyang pink na medyas.

Kung wala ngang kaugnayan sa pulitika ang pagpunta niya sa Naga, bakit kailangang ipakita ang kulay na matagal nang iniuugnay kay Robredo? Para sa ilan, malinaw itong senyales na nagsisimula na ang maagang pagpoposisyon para sa 2028 presidential election—isang galaw na tila paglalatag ng alyansa o panliligaw kay Robredo bilang posibleng katapat ni Vice President Sara Duterte. Boom!

XXX

'SUNTOK SA BUWAN' MAKAKUHA PA NG 31M VOTES SI VP SARA SA PRESIDENTIAL ELECTION KASI 'HIWALAY' NA SILA NI PBBM – Kung makukumbinse ni Pangulong Ferdinand “Bongbong” Marcos Jr. (PBBM) si Mayor Leni Robredo na maging presidential candidate ng administrasyon, posibleng mahirapan si Vice President Sara Duterte sa 2028 presidential election.

Batay sa resulta ng mga nakaraang halalan, makikita ang galaw ng boto. Noong 2016, nakakuha si dating Pangulong Rodrigo Duterte ng 15.970 milyong boto sa pagkapangulo. Sa pagka-bise presidente naman, nakakuha si Robredo ng 14.023 milyon, habang si Marcos ay may 13.803 milyon.

Pagsapit ng 2022, nang magsanib ang puwersa ng Marcos at Duterte camps, umabot sa 31.104 milyong boto si Marcos sa pagkapangulo, habang si Sara Duterte ay nakakuha ng 31.561 milyon sa pagka-bise presidente. Kung susumahin ang boto nina Duterte noong 2016 (15.970 milyon) at Marcos (13.803 milyon), aabot ito sa humigit-kumulang 29.773 milyon—malapit sa 30 milyong baseline na malinaw na naging pundasyon ng kanilang panalo noong 2022, bukod pa sa mga nadagdag na bagong botante.

Samantala, si Robredo ay nakakuha ng 14.822 milyong boto noong 2022 presidential race—bahagyang mas mataas kumpara sa kanyang 14.023 milyon noong 2016.

Kung pagbabatayan ang mga numerong ito, magiging hamon para kay VP Sara na maabot muli ang higit 31 milyong boto kung hiwalay na ang puwersa nila ni PBBM sa 2028. Kung, halimbawa, maidadagdag ang 13.803 milyong boto ni Marcos noong 2016 sa 14.822 milyong boto ni Robredo noong 2022, aabot ito sa 28.625 milyon—isang matibay na panimulang bilang, lalo na kung susuportahan pa ng iba pang malalaking pangalan at alyansa.

Sa pulitika, mahalaga ang kombinasyon ng solidong base at estratehikong koalisyon. Kung magkakaroon ng realignment ng puwersa bago ang 2028, tiyak na mag-iiba ang timbangan sa pampanguluhang laban. Period!

• XXX

KUNG NAIS NI VP SARA MAGING PRESIDENTE, KUMBINSIHIN NIYA SI MAYOR LENI NA ‘WAG SIYANG LABANAN SA PRESIDENTIAL ELECTION – Kung nais ni VP Sara na maging presidente, dapat kapag na-monitor niyang kinukumbinse ni PBBM si Mayor Leni na kumandidatong pangulo, kumbinsihin din niya ang mayora ng Naga City na huwag nang tumakbo.

Kapag napapayag niya itong huwag siyang labanan, siguradong panalo si VP Sara sa 2028 presidential election. Boom!

XXX

KAILAN KAYA IMI-'MEOW-MEOW' NI CONG. KIKO ANG ERMAT NIYANG SI MAYOR JENNY BARZAGA PARA MAPA-STOP ANG MGA RAKET SA DASMARIÑAS CITY? – May raket na color games at drop balls sina alyas "Jessica" at alyas "Emily" sa Brgy. Paliparan 1 at Brgy. Paliparan 2 sa Dasmariñas City, Cavite.

Kailan daw kaya iimbitahan ni suspended Cavite 4th District Cong. Kiko Barzaga ang kanyang ermat, Mayor Jenny Barzaga, para mapahinto ang mga ilegal na laro? Abangan!

Mga politicians, binash ang announcement ni VP Sara for president, Mayor Leni Robredo, nirespeto ang anak ni FPRRD

ni Pablo Hernandez @Prangkahan | February 23, 2026

SANA LAHAT NG PULITIKO AY TULAD NI MAYOR LENI ROBREDO NA MARUNONG RUMESPETO SA ANNOUNCEMENT NI VP SARA FOR PRESIDENT SA 2028 ELECTION – Nang tanungin si Naga City Mayor at dating Vice President Leni Robredo tungkol sa pagdedeklara ni Vice President Sara Duterte na tatakbo bilang presidente sa 2028, sinabi ng mayor na karapatan naman ng kahit sino ang magpahayag ng kanilang kandidatura at nararapat itong igalang.

Sana’y gayon din ang ugali ng lahat ng pulitiko—na may respeto sa kapwa—hindi tulad ng iba na todo-bash ang ginawa kay VP Sara matapos nitong ianunsyo ang kanyang kandidatura. Period!

XXX

VP SARA, NA-BASH SA STATEMENT NIYA NA LAST YEAR PA SIYA NAGRE-RECRUIT NG KANYANG MAGIGING VP SA 2028 ELECTION – Sa isang panayam ng Sonshine Media Network, sinabi ni VP Sara Duterte na noong nakaraang taon ay may nire-recruit siyang magiging ka-tandem niya sa 2028 presidential election. Sa ngayon, ayon sa kanya, hindi pa raw nakapagdesisyon ang naturang tao kaya hindi pa niya puwedeng isapubliko ang pangalan nito.

Dahil dito, muli siyang nakatanggap ng pambabash mula sa netizens sa social media. Marami ang nagtaka at bumatikos dahil lumalabas na simula pa noong nakaraang taon ay naghahanda na siya para sa kanyang kandidatura, kahit napakalayo pa ng 2028 presidential election. Ayon sa ilang netizens, habang abala ang ibang posibleng kandidato sa serbisyo sa bayan at mamamayan, nakatutok naman siya sa pangarap niyang maging presidente ng Pilipinas sa 2028. Boom!

XXX

TAMA ANG GINAWA NI MAYOR VICO SOTTO NA KASUHAN SI SARAH DISCAYA KAHIT NATALO NA NIYA  ITO – Tama ang ginawa ni Pasig City Mayor Vico Sotto na sampahan ng kaso si Sarah Discaya, ang kanyang kalaban sa pulitika, dahil sa umano’y paglabag sa Comelec Code. Ayon sa ulat, gumasta si Discaya ng milyun-milyong piso sa eleksyon, pero ang idineklara sa Statement of Contributions and Expenditures (SOCE) ay wala pang isang milyon, na malinaw na pagsisinungaling sa Comelec.

Ginawa ni Mayor Vico ang hakbang na ito upang hindi tularan ng ibang pulitiko ang labis na paggastos sa halalan, na lumalampas sa itinakdang limitasyon ng Comelec para sa mga lokal na kandidato. Period! 

XXX

TULAD NI CONG. ABANTE, TAKLESA RIN DAW PALA ANG ANAK NIYANG SI ATTY. PRINCESS ABANTE – Hindi nagustuhan ni Atty. Princess Abante ang mga atake ni Davao City 1st District Rep. Paolo Duterte sa kanyang ama na si Manila 6th District Rep. Bienvenido Abante. Bilang tugon, sinabihan niya si Cong. Duterte na mas mabuting pumasok muna sa Kamara at huwag palaging absent. Idinagdag niya na umaasa lamang si Duterte sa apelyido upang manalo sa eleksyon, at kung hindi siya anak ni “Tatay Digs,” kahit barangay kagawad ay hindi siya mananalo.

Si Cong. Abante ay kilalang taklesa sa Kamara, at sa pahayag ng anak niyang si Atty. Princess, nalaman na ngayon ng publiko ang kanilang reputasyon. Boom!

Dapat ang kakandidatong VP ay bukal sa loob, hindi 'yung inutusan lang ni FPRRD!

ni Pablo Hernandez @Prangkahan | February 22, 2026

NAGSALITA NA SI MAYOR LENI NA NAGA CITY LANG ANG POKUS NIYA, KAYA MALAMANG SASABLAY ANG MARCOS ADMIN NA KUMBINSIHIN ITONG LABANAN SI VP SARA SA 2028 PRESIDENTIAL ELECTION – Nang ianunsyo ni Presidential Communication Officer (PCO) Usec. Claire Castro na makikipagkita si Pangulong Ferdinand “Bongbong” Marcos Jr. (PBBM) kay Mayor at dating Bise Presidente Leni Robredo sa Naga City para sa programang "Kontra-Baha," napansin ng mga mamamahayag ang suot na pink na damit ni Usec. Claire. Nang magkita naman sina PBBM at Mayor Leni, ipinakita rin ng presidente na ang kanyang medya ay kulay pink.

Kung ito man ay unang hakbang ng administrasyong Marcos upang himukin si Mayor Leni na tumakbo sa pagka-presidente at palakasin ang posisyon ni Vice Pres. Sara Duterte-Carpio sa 2028, malamang ay hindi ito magtatagumpay. Mula sa pahayag ng mayora, malinaw na naka-pokus siya sa paglilingkod sa kanyang mga kababayan sa Naga City at wala siyang intensyong sumali sa pambansang eleksyon. Period!

XXX

HINDI KATANGGAP-TANGGAP SA PUBLIKO ANG SINABI NI SEN. PADILLA NA KAKANDIDATO SIYANG VP KUNG IUUTOS SA KANYA NI FPRRD, DAPAT ‘PAG KAKANDIDATONG BISE PRESIDENTE, BUKAL SA LOOB AT HINDI MAY NAG-UTOS LANG – Ayon kay Sen. Robin Padilla, handa siyang tumakbo bilang bise presidente sa tabi ni VP Sara Duterte kung ito raw ang utos ni dating Pangulong Rodrigo Roa Duterte.

Hindi katanggap-tanggap sa publiko ang pahayag ni Sen. Padilla, dahil ang desisyon na tumakbo sa pagka-bise presidente ay dapat bukal sa kanyang sariling kagustuhan at hangaring maglingkod sa bayan, hindi lamang dahil sa utos ng kanyang “Tatay Digong.” Boom!

XXX

MALAMANG IABSUWELTO NG COMELEC SI SEN. MARCOLETA SA TAKOT NA I-BASH SILA NG MILYON-MILYONG BOMOTO SA SENADOR – ‘Wag nang umasa ang mga anti-Marcoleta na papatawan ng parusa ng Comelec si Sen. Rodante Marcoleta dahil sa umano’y misdeclaration sa Statement of Contributions and Expenditures (SOCE) niya.Alam ng Comelec na kung parurusahan nila si Marcoleta, puputaktihin sila sa social media ng mga pro-Marcoleta, lalo na’t mahigit 15 milyong Pilipino ang bumoto sa kanya. Kaya’t para makaiwas sa bash, mas pinili ng Comelec na iabsuwelto ang senador. Period!

XXX

DAPAT LANG TULUYANG KASUHAN AT IPAKULONG NG MALACAÑANG ANG MGA FAKE NEWS VLOGGERS PARA MABAWASAN ANG MGA NAGPAPAKALAT NG PEKENG IMPORMASYON SA SOCMED – Sinabi ni Usec. Claire na hindi tatanggapin ng Malacañang ang anumang paghingi ng paumanhin mula sa mga Duterte Diehard Supporters (DDS) vlogger na nag-post ng pekeng medical record ni PBBM, na nag-uulat ng malubhang karamdaman ng presidente. Dapat tuluyang kasuhan at ikulong ang mga vlogger na ito upang mabawasan ang pagkalat ng pekeng impormasyon sa social media at maprotektahan ang mga netizens mula sa panloloko. Boom!