Mga sangkot sa flood control scandal, kabado na naman dahil sa muling pagbaha at pagbuhos ng ulan

ni Pablo Hernandez @Prangkahan | May 17, 2026

ILANG ARAW PA LANG MULA NANG MAGING SP SI CAYETANO, PLANO NA SIYANG IKUDETA, PATALSIKIN SA PUWESTO – Wala pang isang linggo sa panunungkulan ni Senate President Alan Cayetano, may mga usap-usapan na agad na bukas, May 18 (Lunes), ay may planong pagpapalit sa kanya bilang lider ng Senado, at si Sen. Migs Zubiri ang sinasabing posibleng pumalit.

Dahil dito, muling lumilitaw ang isyu ng umano’y agawan sa kapangyarihan sa Senado, na sinasabing nakaaapekto sa bilis ng pagpasa ng mga batas. Habang binubusisi pa lamang ni SP Cayetano ang mga panukalang dapat unahin para sa kapakanan ng publiko, may mga haka-haka na agad tungkol sa kanyang posibleng pag-alis sa puwesto.

Giit ng ilan, nakababahala ang ganitong sitwasyon kung saan tila mas nauuna pa ang pulitika kaysa sa agarang pagtugon sa mga pangangailangan ng mamamayan. Tsk!

XXX 

SA HARAPAN SA KAMARA NINA CONG. ROMUALDEZ AT 2 PGMN VLOGGERS, DAPAT NAKA-LIVE STREAMING ITO PARA MAKITA NG PUBLIKO KUNG SINO ANG NAGSISINUNGALING – May plano ang Kamara na imbestigahan sina vloggers Franco Mabanta at CJ Hirro ng online Peanut Gallery Media Network (PGMN) kaugnay ng alegasyong pangingikil ng P350 milyon kay Leyte 1st District Rep. at dating Speaker Martin Romualdez, kapalit umano ng hindi pagbubunyag sa isyu ng multi-billion flood control projects scam na kinasasangkutan ng dating pinuno ng House of Representatives. Itinanggi naman ng dalawang vlogger ang paratang.

Hinihiling na maging bukas sa publiko ang imbestigasyon, kabilang ang posibilidad ng live streaming, upang masuri nang mabuti ng taumbayan ang mga pahayag ng magkabilang panig at matukoy kung sino ang nagsasabi ng totoo. Abangan!

XXX

SA PAGBUHOS NG ULAN AT NAGKABAHA ULI, KINABAHAN NA NAMAN ANG MGA SANGKOT SA FLOOD CONTROL SCANDAL – Bumuhos ang malakas na ulan kamakalawa ng gabi hanggang madaling-araw kahapon na nagdulot ng pagbaha sa iba’t ibang lugar sa Metro Manila at mga karatig lalawigan.

Dahil dito, muling naapektuhan ang maraming komunidad at muling umigting ang mga usapin tungkol sa kahandaan ng mga flood control system sa bansa. Kasabay nito, muling nabuhay ang mga paratang at kontrobersiya kaugnay ng umano’y iregularidad sa ilang flood control projects, na patuloy na kinukuwestiyon ng publiko sa tuwing may malawakang pagbaha. Boom!

Kahit wala sa Senado si Sen. dela Rosa... Impeachment trial ni VP Sara, puwedeng ‘di matuloy kasi lamang pa rin sa bilang ang 12 pro-Duterte senators

ni Pablo Hernandez @Prangkahan | May 16, 2026

KAPAG NANALO SA KASO SI ATTY. MANS CARPIO, SAKIT-ULO SINA FR. SABALLA AT RAMIL MADRIAGA KASI MAGBABAYAD SILA NG P7.3M SA MISTER NI VP SARA –Nagsampa si Atty. Mans Carpio, mister ni Vice President Sara Duterte, ng P7.3 milyong damage suit sa Davao City Regional Trial Court laban kina Fr. Joel Saballa at Ramil Madriaga.

Ayon kay Carpio, nasira umano ang kanyang reputasyon dahil isa lamang siyang pribadong mamamayan ngunit nadadamay ang kanyang pangalan sa impeachment case na isinampa laban sa kanyang asawa na si VP Sara Duterte.

Bagama’t wala pang pahayag ang kampo nina Fr. Saballa at Madriaga hinggil dito, tiyak na mabigat ang kinahaharap nilang kaso dahil kapag natalo sila, maaari nilang paghatian ang pagbabayad ng P7.3 milyon kay Atty. Mans Carpio. Boom!

XXX

WALA MAN SI SEN. DELA ROSA, AT DAHIL 12 PA RIN ANG PRO-DUTERTE SENATORS, MAARI TALAGANG WALANG MAGANAP NA IMPEACHMENT TRIAL LABAN KAY VP SARA – Kumpleto na ang 11 kongresista na magsisilbing House prosecutors sa impeachment case ni Vice President Sara Duterte na kasalukuyan nang nasa Senado.

Gayunman, kahit kumpleto na ang prosecution panel, malaking hamon pa rin umano para sa kanila ang sitwasyon sa Senado. Sa kabila ng pag-alis ni Senador Ronald “Bato” dela Rosa sa Senate majority, nananatili pa rin umanong mayorya ang mga senador na itinuturing na kaalyado ng mga Duterte, habang mas kakaunti naman ang nasa minority at may ilan ding independent.

Ang punto rito, kung may isang pro-Duterte senator na maghain ng mosyon na huwag nang i-convene ang impeachment court at ito ay pagbotohan, posibleng manaig ang panig na tutol sa impeachment trial dahil sa kanilang bilang. Kapag nangyari ito, hindi na magkakaroon ng paglilitis at hindi rin maihaharap ng 11 miyembro ng House prosecution panel ang kanilang mga ebidensya laban kay VP Sara Duterte. Period!

XXX

KAPAG 'NGANGA' LANG ANG DEPT. OF ENERGY SA PAGNIPIS NG SUPPLY NG KURYENTE, ASAHAN NA ANG ROTATIONAL BROWNOUT SA ‘PINAS – Inanunsyo ng National Grid Corporation of the Philippines (NGCP) na patuloy ang pagnipis ng reserbang kuryente sa bansa. Ayon sa ulat, ang matinding init ng panahon ang isa sa mga sanhi ng aberya sa mga transmission line at sa ilang power generation facility.

Dahil dito, dapat agad na kumilos ang Department of Energy (DOE) upang tugunan ang sitwasyon. Kapag hindi ito maagapan, may posibilidad na muling maranasan ang rotational brownout sa iba’t ibang panig ng bansa. Naku po!

XXX

SA PAGSADSAD ULI NG HALAGA NG PISO KONTRA-DOLYAR, ASAHAN NANG KATUMBAS NIYAN ANG PAGTAAS NG PRESYO NG MGA BILIHIN AT BAYARIN – Sumadsad na naman ang halaga ng piso kontra dolyar, matapos umabot sa ₱61.64 ang palitan ng $1 sa merkado.

Masamang balita ito para sa mga mamamayan, dahil ang paghina ng piso ay karaniwang kaakibat ng pagtaas ng presyo ng mga bilihin at bayarin. Period!

PBBM, delikado sa People Power kapag ipinilit ang term extension

ni Pablo Hernandez @Prangkahan | May 15, 2026

LAGOT SI CONG. SANDRO MARCOS KAPAG NAGING RESOURCE PERSON NI SEN. MARCOLETA SI MANONG CHAVIT SA ISYUNG FLOOD CONTROL PROJECT – Kapag sinimulan na ni Sen. Rodante Marcoleta, incoming chairperson ng Senate Blue Ribbon Committee, ang imbestigasyon sa flood control projects, malamang na isa sa mga kuning resource person ay si former Ilocos Sur Gov. Chavit Singson.

Nauna nang nagprisinta si Singson kay Ping Lacson upang tumestigo at ibulgar ang umano’y flood control scam sa Ilocos Norte, ngunit hindi ito natuloy.

Kung sakaling maimbitahan siya bilang resource person sa komite ni Marcoleta, posibleng may mga pangalan na madamay sa imbestigasyon—kabilang na si Sandro Marcos. Lagot!

XXX

DAPAT GALINGAN NI ATTY. HAYNES ANG PAGTATANGGOL KAY FPRRD PARA HINDI SIYA MATULAD KAY ATTY. KAUFMAN NA NASIBAK – Si Atty. Peter Haynes na ang bagong abogado ni dating Pangulong Rodrigo Roa Duterte (FPRRD) na magtatanggol sa kanya sa International Criminal Court (ICC).

Pinalitan niya ang dating abogado na si Atty. Nicholas Kaufman matapos umanong hindi maging epektibo ang mga naging argumento nito sa ICC.

Dahil dito, inaasahang pagbubutihin ni Atty. Haynes ang kanyang depensa para kay FPRRD, lalo na sa harap ng bigat ng kasong kinakaharap ng dating pangulo. Period!

XXX

BAKA MA-PEOPLE POWER SI PBBM KAPAG ISINULONG ANG CHA-CHA PARA SA KANYANG PAGPAPALAWIG NG TERMINO – Nagpahayag ng pangamba si Sara Duterte kaugnay sa posibilidad ng Charter Change (Cha-Cha) na maaaring magresulta sa pagpapalawig ng termino ni Ferdinand "Bongbong" Marcos Jr.

Kung maisusulong ang ganitong hakbang, may babala ang ilan na maaari itong magdulot ng matinding reaksyon mula sa publiko, na posibleng humantong sa panibagong kilos-protesta na kahalintulad ng People Power Revolution. Boom!

XXX

DAPAT IWASAN NA NI SEN. KIKO MANIGAW, BAKA TULUYAN SIYANG UMBAGIN NI SEN. PADILLA – Matapos sigawan ni Sen. Kiko Pangilinan si Sen. Robin Padilla, muntik na umano siyang maumbag ng actor-turned-senator.

Kaya naman, sa susunod ay iwasan na ni Sen. Kiko ang pagsigaw kay Sen. Robin. Kapag naulit pa ito, posibleng hindi na “muntik” ang balita—kundi tuluyan na siyang maumbag. Abangan!