DTI, may E-commerce Bureau para sa online transaction

ni PAO Chief Persida Rueda-Acosta @Magtanong Kay Attorney | July 10, 2026

Dear Chief Acosta,

Talamak na ngayon ang pagbebenta gamit ang mga online platform, at dahil dito, madami rin ang tumatangkilik sa mga produktong ibinebenta online. Nais ko sanang malaman kung may binuo bang ahensya ang ating pamahalaan na tumututok sa mga transaksyon o gawain sa tinatawag nating electronic commerce (E-commerce)? Salamat po sa iyo. — Lokie

---

Dear Lokie,

Ang sagot sa iyong katanungan ay maaaring matatagpuan sa Seksyon 7 ng Republic Act (R.A.) No. 11967, o kilala rin sa tawag na “Internet Transactions Act of 2023,” kung saan nakasaad na:

“Section 7. Creation and Composition of the E-Commerce Bureau. - Within six (6) months after the effectivity of this Act, the E-Commerce Bureau, hereinafter referred to as the Bureau, shall be created under the DTI.

The Bureau shall be headed by a Director and at lease one (1) Assistant Director who must possess competencies in e-commerce and online transactions, and all the laws and process related thereto.

The DTI Secretary shall determine the organizational structure and staffing pattern of the Bureau, subject to the approval of the Department of Budget and Management and consistent with the civil service laws, rules, and regulations.”

Ayon sa nasabing probisyon ng batas, inatasan ang Department of Trade and Industry na bumuo ng isang bureau na tatawaging E-Commerce Bureau sa loob ng anim na buwan magmula sa pagkabisa ng nasabing batas. Ang nasabing E-Commerce Bureau ay pamumunuan ng isang director at kahit isang assistant director na may kakayanan sa e-commerce at mga transaksyon online, at mga batas at proseso na konektado rito.

Ilan sa mga mga tungkulin ng E-commerce Bureau ay ang mga sumusunod:

“a) Formulate policies, plans, and programs to ensure the robust and dynamic development of e-commerce 

(e) Receive and refer business and consumer complaints on internet transactions to the appropriate government agency, consistent with the no-wrong door policy of the DTI; 

(g) Investigate, motu propio, and recommend the filing of the appropriate case for violations of this Act; 

(k) Engage with law enforcement and other relevant government agencies in a formalized inter-regulator cooperation mechanism to address all cross-cutting issues and concerns that affect online consumers and the general public.” (Sec. 8, R.A. No. 11967)

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Marcoleta at Defensor, kulong na nga, dinagdagan pa ng warrant

ni Pablo Hernandez @Prangkahan | July 10, 2026

SANA MAG-IMBESTIGA ULI ANG SENATE BLUE RIBBON COMMITTEE, ‘WAG TITIGIL HANGGA'T HINDI NATUTUMBOK ANG PINAKA-MASTERMIND SA FLOOD CONTROL SCANDAL – Ang impeachment trial sa Senado ay hindi naman araw-araw, kundi tatlong beses lamang sa isang linggo.

Sana naman ay magsagawa muli ng imbestigasyon ang Senate Blue Ribbon Committee kaugnay ng flood control scandal. Huwag sanang tigilan ng Senado ang imbestigasyon hangga't hindi natutukoy ang tunay na utak sa umano'y flood control scam. Period!

XXX

NAPAHIYA ANG MGA LOYALISTA KASI MAS MARAMI PALA ANG OBJECTIONS NI ATTY. LIGUTAN KAYSA KAY ATTY. NARVASA – Umaani ng batikos sa social media ang mga abogado ng magkabilang panig sa impeachment trial ni Vice President Sara Duterte.

Noong ikalawang araw ng paglilitis, binash ng mga loyalista si Atty. Carlo Joaquin Narvasa dahil sa sunud-sunod nitong objections. Ngunit pagsapit ng ikatlong araw noong Hulyo 8, ang private prosecutor na si Atty. Amando Virgil Ligutan naman ang pinulaan ng mga Duterte Diehard Supporters (DDS) dahil sa mas marami nitong objections habang nagaganap ang cross-examination.

Sa totoo lang, tila nabaligtad ang sitwasyon para sa mga loyalista. Akala nila ay hindi mag-o-object ang panig ng private prosecution, pero nang sila na ang nag-cross-examine sa testigo, sunud-sunod din ang objections ni Atty. Ligutan. Boom!

XXX

GRABE KUNG RUMESBAK ANG MARCOS ADMIN SA MGA KAKAMPI NI VP SARA, NAKAKULONG NA SINA SEN. MARCOLETA AT EX-CONG. DEFENSOR, SINILBIHAN PA ULI NG PANIBAGONG WARRANT OF ARREST – Grabe rin ang resbak ng Marcos administration sa mga kaalyado sa pulitika ni VP Sara.

Nakakulong na sa kasong plunder na walang piyansa sina Sen. Rodante Marcoleta, na nasa hospital arrest, at dating Cong. Mike Defensor na nasa city jail, pero sinilbihan pa sila ng warrant of arrest kaugnay naman ng kasong graft. Tsk!

XXX

HINDI NGA NAGAWA NI GEN. MARANTAN NA LANSAGIN SA CALABARZON ANG 'PROTECTION RACKET SYNDICATE' AT 'OIL PILFERAGE SYNDICATE' TAPOS GUSTO PANG I-EXTEND ANG TERMINO NITO – Tinabla ni Pangulong Ferdinand “Bongbong” Marcos Jr. (PBBM) ang hirit ni Department of the Interior and Local Government (DILG) Secretary Jonvic Remulla na bigyan ng isang taong extension sa puwesto si Brig. Gen. Hansel Marantan, director ng PNP-Region 4-A, na nakatakdang magretiro ngayong Hulyo 10, 2026.

Hay naku! Ewan ba kay Sec. Jonvic Remulla kung bakit gusto pa niyang patagalin sa puwesto si Gen. Marantan, gayong sa tagal ng kanyang panunungkulan sa PNP-Region 4-A ay hindi naman nalansag ang umano'y "Protection Racket Syndicate" nina "Tongpats Collectors," "Rico," "Adlawan," "Tata Obet," "Jong," at "Tsan Parak," gayundin ang umano'y oil pilferage syndicate nina "Paihi Gang" members na sina "Bogs," "Dondon Alahas," "Jayvee," "Amang," "Aldo," "J. Cruz," at "Madick" sa CALABARZON. Boom!

Responsableng paggamit ng social media, dapat ituro sa kabataan

ni Leonida Sison @Boses | July 10, 2026

Sa panahon ngayon na malaking bahagi na ng pag-aaral, komunikasyon, at pang-araw-araw na pamumuhay ang internet, mas mahalagang pagtuunan ng pansin ang responsableng paggamit nito kaysa ang tuluyang pagbawalan ang mga menor-de-edad na magkaroon ng access sa social media.

Mas makabubuti ang maayos na regulasyon at mahigpit na paggabay kaysa sa isang total ban na mahirap ding ipatupad, lalo na sa loob ng mga tahanan. Hindi maikakaila na sa panahon ng digital technology, ginagamit na rin ng maraming kabataan ang social media para sa pag-aaral, pakikipag-ugnayan, at pagkuha ng mahahalagang impormasyon.

Kasabay nito, mahalagang gampanan ng mga magulang ang kanilang responsibilidad sa pagbabantay at paggabay sa kanilang mga anak habang gumagamit ng internet. Hindi sapat na umasa lamang sa mga batas o paghihigpit kung wala ring aktibong pakikilahok ng pamilya sa paghubog ng tamang asal, disiplina, at wastong paggamit ng teknolohiya.

Patuloy namang pinag-aaralan sa Kongreso ang mga panukalang may kaugnayan sa paggamit ng social media ng mga menor-de-edad upang makabuo ng mga patakarang makasasabay sa mga hamon ng digital age. Isa sa mga tinitingnang hakbang ang mas malinaw na pananagutan ng mga magulang sa paggabay sa online activities ng kanilang mga anak nang hindi nalalabag ang karapatan at kapakanan ng mga bata.

Hindi lamang tungkol sa social media ang isyung ito. Nakasalalay dito ang kaligtasan, edukasyon, at kinabukasan ng kabataan. Kaya naman mahalagang makabuo ng balanseng batas na nagbibigay ng sapat na proteksyon habang hindi inaalis ang mga benepisyong naidudulot ng teknolohiya sa pagkatuto at pag-unlad ng mga kabataan.

Sa huli, nagsisimula ang tunay na solusyon sa loob ng tahanan at pinalalakas ng mga makatwirang batas at patakaran. Kapag nagtutulungan ang mga magulang, paaralan, komunidad, at pamahalaan sa pagtataguyod ng responsableng paggamit ng social media, mas magiging ligtas ang kabataan at mas mapakikinabangan nila ang teknolohiya sa tama, responsable, at makabuluhang paraan.