Tuluy-tuloy na oil price hike, DOE at oil companies dapat nang maimbestigahan

ni Pablo Hernandez @Prangkahan | July 11, 2026

SEN. JINGGOY ESTRADA, HINDI NA MAKAKATUNGTONG SA SENADO, HINDI NA MAKAKALABAS SA CITY JAIL? – Ibinasura ng 5th Division ng Sandiganbayan ang mosyon ni detenidong Sen. Jinggoy Estrada na makadalo bilang senator-judge sa impeachment trial ni Vice President Sara Duterte sa Senado.

Ibig sabihin nito, hindi na talaga makakatungtong muli sa Senado at hindi rin makakalabas ng kulungan si Sen. Estrada habang kinahaharap niya ang kasong plunder kaugnay ng umano’y pagkakasangkot sa flood control scandal. Period!

XXX

HINDI PA TAPOS ANG 'KALBARYO'  NI EX-CONG. KIKO BARZAGA KASI BUKOD SA NAPATALSIK NA SIYA BILANG KONGRESISTA, MALAMANG MAKUKULONG PA – Kahit pinatalsik na bilang kongresista ng 4th District ng Cavite, tila hindi pa rin tapos ang "kalbaryo" ni dating Cong. Kiko Barzaga.

Naisampa na kasi sa korte ang ikalawang kasong cyberlibel laban sa kanya na isinampa ni Manila 2nd District Rep. Rolan Valeriano kaugnay ng umano'y paratang na kabilang ito sa mga tumanggap ng suhol mula kay billionaire Enrique Razon. Samantala, nagsampa rin si Razon ng walong bilang ng kasong cyberlibel laban kay Barzaga.

Ang punto natin dito, kung mapapatunayang guilty si dating Cong. Barzaga sa mga kasong cyberlibel na ito, bukod sa pagkawala niya sa puwesto bilang kongresista, maaari pa siyang humantong sa pagkakakulong. Boom!

XXX

DAPAT TIGILAN NA NG DDS ANG PAG-XEROX DAW NG PERA BILANG PANG-OKRAY KAY ATTY. LIGUTAN KASI BAWAL ANG GINAGAWA NILA – Dapat tigilan na ng mga Duterte Diehard Supporters (DDS) ang pang-ookray kay private prosecutor Atty. Amando Virgil Ligutan kaugnay ng naging pahayag nito sa impeachment trial ni VP Sara tungkol sa paggamit ng photocopy bilang ebidensya.

Ang nais lamang ipunto ni Atty. Ligutan ay pinapayagan ng Supreme Court (SC) na gamitin ang photocopy bilang ebidensya sa korte sa mga kasong pinahihintulutan ng batas. Ngunit inookray ito ng ilang DDS sa pamamagitan ng pagpo-post sa social media ng mga xerox na pera at pagbibirong puwede na rin daw itong ipambili.

Naku, kapag hindi nila itinigil ‘yan, baka kaso pa ang abutin nila dahil ipinagbabawal ng Bangko Sentral ng Pilipinas (BSP) ang pagpo-photocopy ng pera. Period!

XXX

DAPAT NANG IMBESTIGAHAN NG KONGRESO ANG PATULOY NA OIL PRICE HIKE – May nagbabadya na namang oil price hike sa susunod na linggo—P2 hanggang P4 kada litro ng diesel at P1 kada litro naman ng gasolina.

Dapat imbestigahan ng Kongreso ang patuloy na pagtaas ng presyo ng langis upang malaman kung may iregularidad sa pagitan ng Department of Energy (DOE) at mga oil company. Kataka-taka kasing mababa ang presyo ng langis sa international market, pero patuloy namang tumataas ang halaga ng mga produktong petrolyo sa Pilipinas. Tsk!

Pagiging handa at alerto, dapat pairalin sa oras ng sakuna

ni Leonida Sison @Boses | July 11, 2026

Sa bawat paparating na bagyo o malakas na habagat, paulit-ulit na lamang ang eksena ng biglaang paglikas, stranded na mga motorista, at mga pamilyang nawawalan ng tirahan. Mas makabubuti kung ang paghahanda ay mauuna kaysa pagsisisi, lalo na ngayong inaasahang lalakas ang epekto ng habagat na pinalalakas ng Bagyong Inday.

Bilang paghahanda, naka-standby na ang mga food pack, evacuation centers, rescue equipment at emergency response teams sa buong National Capital Region (NCR). Layunin nitong matiyak na may agarang maibibigay na tulong sakaling magkaroon ng pagbaha at iba pang epekto ng masamang panahon.

Ayon sa Metro Manila Council, inatasan na ang lahat ng lokal na pamahalaan sa Metro Manila na maagang ipuwesto ang mga kinakailangang kagamitan, tiyaking maayos ang operasyon ng mga pumping station, at ihanda ang mga evacuation center, partikular sa mga komunidad na madalas bahain.

Kasabay nito, nanawagan din sa mga residenteng nakatira sa flood-prone areas na huwag nang maghintay na tumaas ang tubig bago lumikas. Ang maagap na paglikas ang pinakamabisang paraan upang maiwasan ang panganib at maprotektahan ang buhay ng bawat pamilya.

Mahalaga ang ganitong paghahanda dahil hindi lamang mga opisyal ng pamahalaan ang may pananagutan sa panahon ng kalamidad. May malaking papel din ang bawat mamamayan sa pakikinig sa mga babala, pagsunod sa evacuation protocols, at paghahanda ng sariling pamilya bago pa lumala ang sitwasyon. Ang maagap na pagkilos ay makatutulong upang mabawasan ang panganib at mapabilis ang pagtugon sa oras ng sakuna.

Ang paghahandang ginagawa ng mga lokal na pamahalaan ay isang mahalagang hakbang, ngunit magiging mas epektibo lamang ito kung sasabayan ng disiplina at kooperasyon ng publiko. Ang kaligtasan ng komunidad ay nakasalalay hindi lamang sa dami ng rescue equipment o evacuation centers, kundi sa kahandaan ng bawat isa na kumilos sa tamang oras. Sa harap ng mas malalakas na pag-ulan at mas madalas na pagbaha, ang pagiging alerto at maagap ang pinakamabisang sandata upang maprotektahan ang buhay at kabuhayan ng mamamayan.

Senado, kinikilala ang natatanging tagumpay ng Pinoy athletes

ni Bong Go @Bisyo Magserbisyo | July 10, 2026

Nag-file ako ng magkakahiwalay na resolusyon sa Senado upang kilalanin at batiin sina Alexandra “Alex” Eala, Ernest John “EJ” Obiena, at Carlos Yulo sa kanilang mga tagumpay sa international sports.

Bilang Chairperson ng Senate Committee on Sports, naniniwala ako na mahalagang mabigyan ng pagkilala ang ating mga atletang patuloy na nagbibigay ng karangalan sa bansa. Malaking karangalan para sa ating bansa ang ipinakita nina Alex, EJ, at Carlos. Ipinakita nila na kayang makipagsabayan ng atletang Pilipino sa pinakamataas na antas kung may disiplina, tiyaga, at tamang suporta.

Partikular kong binigyang-diin ang naging historic run ni Alex Eala sa 2026 Wimbledon Championships. Siya ang naging unang Filipina na nanalo sa women’s singles main-draw match sa Wimbledon at unang Filipino sa Open Era na umabot sa fourth round, matapos niyang talunin ang defending champion ng torneo na si Iga Świątek ng Poland. Malaking tagumpay para sa Philippine tennis ang kanyang nakamit.

Ramdam natin kung gaano ka-proud ang buong bansa kay Alex Eala. Ang kanyang tagumpay ay inspirasyon sa maraming kabataang Pilipino. Patuloy niyang ipinapakita na kaya ng Pilipino na makipagsabayan sa international competitions.

Nais din nating pasalamatan para sa karangalang handog sa bansa si EJ, na nakakuha ng back-to-back gold medals sa 2026 outdoor athletics season, gayundin si Carlos, na nanalo ng gold medal sa men’s floor exercise sa 2026 Asian Men’s Artistic Gymnastics Championships.

Bilang isang atleta at sports enthusiast, naniniwala ako na marami tayong mga manlalaro sa bawat barangay at komunidad na naghihintay lang mabigyan ng pagkakataon, maayos na programa, at suporta. Kaya naman patuloy nating isinusulong ang mga panukala at programa para palakasin ang grassroots sports sa buong bansa.

Isa sa pinakamahalagang bahagi ng adbokasiyang ito ay ang National Academy of Sports o NAS, na itinatag sa ilalim ng Republic Act No. 11470, na aking iniakda at co-sponsored. Matatagpuan ito sa New Clark City sa Capas, Tarlac, at nagbibigay ng dual-track system na pinagsasama ang de-kalidad na secondary education at specialized sports curriculum upang matulungan ang young student-athletes na mapaunlad ang kanilang pag-aaral habang hinuhubog ang kanilang talento sa sports.

Upang mas mapalawak pa ang ganitong oportunidad, inihain natin ang Senate Bill No. 171, o ang proposed National Academy of Sports Regional Expansion Act of 2025, na naglalayong magtatag ng regional NAS campuses sa iba’t ibang bahagi ng bansa, lalo na sa Visayas at Mindanao. Sa pamamagitan nito, mas maraming kabataang atleta ang mabibigyan ng full scholarships, maayos na training, at pantay na pagkakataong maabot ang kanilang pangarap.

Pasado na rin sa Senado ang ipinaglaban natin na SB 1743 na naglalayong itaas at ipantay ang matatanggap na insentibo ng ating mga para-athletes sa kung ano ang tinatanggap ng iba pang national athletes. Dapat pantay ang pagkilala sa sakripisyo, husay, at karangalan na dala ng lahat ng atletang Pilipino.

Inihain din natin ang Senate Bill No. 413, o ang Philippine National Games bill, upang gawing institusyonal ang isang nationwide grassroots sports competition na magsisilbing recruitment platform para sa mga National Sports Associations. Kasabay nito, isinusulong din natin ang Senate Bill No. 678, o ang proposed National Tertiary Games Act, para magkaroon ng national collegiate multi-sport tournament na tutulong sa paghubog at pagpapakita ng talento ng ating mga atleta sa tertiary level.

Samantala, tuloy pa rin tayo sa pagbibigay ng serbisyo sa ating mga kababayang nangangailangan. Noong July 4, personal nating tinulungan ang mga nasunugan sa Barangay Ilang, Bunawan District, Davao City sa pakikipag-ugnayan kay 2nd District City Councilor Che Che Justol-Baguilod at Barangay Ilang Captain Amado Babao. Pagkatapos nito, nagtungo tayo sa Barangay 19-B Poblacion sa lungsod upang maghatid din ng tulong sa mga pamilya sa pakikipag-ugnayan kay 1st District City Councilor Atty. Luna Acosta, Kagawad Jenny Ann Monreal-Nicolas, at SK Chairman Robin Lo.

Bukod dito, nagpaabot din ang ating Malasakit Team ng iba’t ibang tulong sa mga nasunugang pamilya sa Mandaue City at Talisay City sa Cebu, Puerto Princesa City, at Cagayan de Oro City.

Natulungan din ng Malasakit Team ang mga residenteng nangangailangan mula sa iba’t ibang bayan sa Batangas, gaya ng Calaca, Balayan, Calatagan, Lemery, Lian, Nasugbu, Taal, at Tuy.

Namigay rin tayo ng dagdag na tulong sa ilang estudyante sa Sampaloc at Tondo sa Maynila. Nagpaabot din tayo ng tulong sa ilang indigents mula sa Lupon, Davao Oriental.

Nagbigay din ang ating team ng karagdagang tulong sa mga nasunugan sa Navotas City na patuloy na bumabangon. Nakatanggap din ang mga benepisyaryong ito ng tulong mula sa pambansang pamahalaan, na sinuportahan natin para sa pagbili ng mga materyales sa muling pagpapatayo ng kanilang mga tahanan.

Bilang Mr. Malasakit at Chairperson ng Senate Committees on Sports at on Youth, patuloy kong gagampanan ang aking tungkulin na bigyang-diin ang pangangailangang palakasin ang suporta para sa ating mga atleta, lalo na sa grassroots sports, training programs, at mga oportunidad para sa kabataang Pilipino. Marami tayong talento sa bawat paaralan, barangay, at komunidad na kailangan lang mabigyan ng tamang gabay, programa, pasilidad, at suporta.

Bisyo ko na ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.