Biyuda, puwede na bang magpakasal agad?

ni PAO Chief Persida Rueda-Acosta @Magtanong Kay Attorney | July 15, 2026

Dear Chief Acosta, 

Ang aking asawa ay nagkaroon ng malubhang sakit at kalaunan ay pumanaw noong ika-4 ng Enero 2026. Noong Marso 2026, may nakilala ako sa aking trabaho at nagkamabutihan kami. Dahil pareho kaming nasa wastong edad, napagpasyahan naming magpakasal. Nguni’t may nakapagsabi sa akin na meron diumanong batas sa Pilipinas na nagpaparusa kung ang isang biyuda ay magpakasal agad sa ibang lalaki matapos pumanaw ang nauna niyang asawa. Maaari po ba nila akong kasuhan kung sakaling magpakasal ulit ako?

— Marimar

---

Dear Marimar,

Sa ilalim ng Revised Penal Code (RPC), ipinagbawal ang muling pagpapakasal ng isang babae sa loob ng tatlong daan at isang araw matapos pumanaw ang kanyang asawa. Ayon dito:

“ART. 351. Premature marriages.—Any widow who shall marry within three hundred and one days from the date of the death of her husband, or before having delivered if she shall have been pregnant at the time of his death, shall be punished by arresto mayor and fine not exceeding 500 peso.”

Gayunpaman, inamyendahan na ang probisyon na ito ng RPC. Sang-ayon sa Republic Act (R.A.) No. 10655 o ang “Act repealing the crime of premature marriage under Article 351 of the Revised Penal Code,” ang Artikulo 351 ng RPC ay pinawalang-bisa na o hindi na aplikable sa ngayon. Narito ang pahayag ng batas: 

“Section 1. Without prejudice to the provisions of the Family Code on paternity and filiation, Article 351 of Act No. 3815, otherwise known as the Revised Penal Code, punishing the crime of premature marriage committed by a woman, is hereby repealed.”

Ang pagpapawalang-bisa ng Artikulo 351 ng RPC ay sang-ayon sa pagkakapantay-pantay ng mga karapatan na nakasaad sa 1987 Konstitusyon ng Pilipinas. Ang probisyong ito ng batas ay humahadlang sa karapatan ng isang babae na muling magpakasal. Hindi rin ito sang-ayon sa pagkakapantay-pantay ng karapatan, dahil ang nasabing probisyon ng batas ay aplikable lamang sa mga biyuda at hindi sa mga biyudo. 

Sa iyong sitwasyon, kung sakaling mapagdesisyunan mo na muling magpakasal sa iyong bagong kasintahan, kahit na ito ay nasa loob pa ng 301 araw mula sa pagkamatay ng iyong unang asawa, hindi ka na makakasuhan ng kasong kriminal na Premature Marriage dahil pinawalang-bisa na ito ng R.A. No. 10655. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala. 

ICC ‘pag nabuwag ni Trump, laya na si Digong

ni Pablo Hernandez @Prangkahan | July 15, 2026

KAPAG NABUWAG NI US PRES. DONALD TRUMP ANG ICC, MAKAKALAYA NA SI FPRRD KAYA LAGOT ANG MARCOS ADMIN – Desidido si United States President Donald Trump na buwagin ang International Criminal Court (ICC) dahil sa umano'y panghihimasok nito sa justice system ng iba't ibang bansa. Sinimulan na niya ito sa pamamagitan ng travel bans at visa revocations laban sa mga hurado at prosecutors ng ICC, na susundan pa umano ng diplomatic pressure sa mga bansang sumusuporta rito.

Kaya kung tuluyang mabuwag ang ICC dahil kay Trump, makakalaya na rito si former President Rodrigo Roa Duterte (FPRRD). Kapag nangyari ito, tiyak na magiging malaking hamon umano ito sa Marcos administration. Abangan!

XXX

4-0 ANG ISKOR NG NETIZENS SA IMPEACHMENT TRIAL, 4 SA TEAM NI VP SARA AT 0  BOKYA SA HOUSE AT PRIVATE PROSECUTORS PANEL – Ayon sa defense team ni Vice President Sara Duterte, sa apat na araw ng impeachment trial ay inilampaso nila ang House prosecutors at private prosecutors panel.

Dahil dito, binigyan ng netizens sa social media ng iskor na 4-0 ang impeachment trial—4 para sa defense team ni VP Sara at bokya naman ang House at private prosecutors panel. Kung ganito ang magiging takbo ng paglilitis, mukhang mahihirapan talaga ang Marcos administration at Kamara na mapa-impeach ang bise presidente. Boom!

XXX

KUNG SINO ANG MGA UMAASISTE SA 18 'SECURITY NI EX-CONG. ZALDY CO, SILA ANG INISYUHAN WARRANT OF ARREST – Matapos arestuhin at ikulong sina Sen. Rodante Marcoleta at dating Cong. Mike Defensor sa kasong plunder, si Atty. Levito Baligod naman ay inisyuhan ng korte ng dalawang warrant of arrest kaugnay ng dalawang kasong cyberlibel na isinampa ni Agriculture Sec. Francisco Tiu Laurel.

Sina Sen. Marcoleta, Defensor at Atty. Baligod, na kabilang sa mga umaalalay sa 18 dating security ni former Ako Bicol Party-list Rep. Zaldy Co na nagbulgar umano ng maleta-maleta umanong perang idineliber sa ilang pulitiko at opisyal ng gobyerno, ang inisyuhan ng warrant of arrest. Samantala, wala pa umanong naisasakdal o nakukulong sa mga sinasabing tumanggap ng mga maletang may lamang pera. Tsk!

XXX

SA QUEZON CITY, PATI FINAL SCORE NG PBA GINAGAWANG RAKET NG MGA ILEGALISTA – Noong Hulyo 9, 2026, inaresto ng mga tauhan ni Quezon City Police Director Brig. Gen. Randy Glenn Silvio ang isang kubrador ng Philippine Basketball Association (PBA) ending sa Anonas, Quezon City.

Grabe na talaga ang mga ilegalistang nagpapatakbo ng raket sa teritoryo ni Mayor Joy Belmonte. Isipin n'yo, pati ang final score ng PBA ay ginagamit na rin sa iligal na pasugal. Buset!

Reporma sa DOH, dapat ramdam ng bawat Pinoy

ni Leonida Sison @Boses | July 15, 2026

Kailan matatapos ang paghihintay ng mga Pilipino sa isang sistemang pangkalusugan na tunay na inuuna ang kapakanan ng pasyente at ng mga healthcare worker? 

Ang pag-upo ng bagong kalihim ng Department of Health (DOH) ay nagbibigay ng panibagong pag-asa na maisusulong ang mga repormang matagal nang hinihintay ng taumbayan. Sa panahong patuloy na humaharap ang bansa sa iba’t ibang hamon sa kalusugan, mahalagang ang bawat polisiya ay nakatuon sa mas maayos, mas abot-kaya, at mas makataong serbisyong medikal para sa lahat.

Malugod na tinanggap ng Alliance of Health Workers (AHW) ang pagkakatalaga sa bagong kalihim bilang bagong kalihim ng DOH. Kasabay nito, hinikayat ng grupo ang kalihim na unahin ang pagpapabuti ng kalagayan ng mga healthcare worker sa bansa, kabilang ang mas maayos na kondisyon sa trabaho at mga polisiyang tunay na magbibigay-prayoridad sa pampublikong kalusugan.

Umaasa rin ang AHW na mananatiling matatag ang paninindigan ng kalihim laban sa privatization ng mga pampublikong ospital, lalo na ang Philippine Orthopedic Center (POC). Para sa grupo, mas nararapat na palakasin ang pampublikong healthcare system kaysa ilipat sa pribadong sektor ang mga serbisyong dapat ay madaling maabot ng bawat Pilipino, lalo na ng mga mahihirap na umaasa sa mga ospital ng gobyerno.

Samantala, nagpahayag din ng suporta ang public health advocacy group na HealthJustice Philippines. Nakatakda silang makipagtulungan sa bagong kalihim upang maisulong ang mahahalagang programang pangkalusugan, kabilang ang mas mahigpit na regulasyon sa sigarilyo at vape, gayundin ang pagpapatupad ng mga hakbang na makatutulong sa pagpigil sa pagdami ng mga noncommunicable diseases tulad ng sakit sa puso, diabetes, at iba pang karaniwang karamdaman.

Nanumpa naman ang bagong kalihim nitong Martes, Hulyo 14, sa Malacañang Palace bilang bagong pinuno ng DOH.

Malaki ang magiging epekto ng kanyang pamumuno hindi lamang sa mga doktor, nars, at iba pang healthcare worker, kundi lalo na sa milyun-milyong Pilipinong araw-araw na umaasa sa serbisyong pangkalusugan ng pamahalaan. Ang anumang repormang kanyang isusulong ay maaaring magbukas ng mas maayos na access sa dekalidad na gamutan, mas ligtas na mga ospital, at mas mahusay na serbisyong medikal sa buong bansa.

Ang tunay na sukatan ng tagumpay ng bagong kalihim ay hindi lamang makikita sa dami ng programang ilulunsad kundi sa konkretong pagbabago na mararamdaman ng ordinaryong mamamayan. Kapag napangalagaan ang kapakanan ng mga healthcare worker at nanatiling matatag ang pampublikong sistema ng kalusugan, mas maraming Pilipino ang magkakaroon ng pagkakataong makatanggap ng serbisyong medikal na nararapat para sa kanila. Ito ang uri ng pamumunong inaasahan ng taumbayan—isang pamumunong inuuna ang buhay, kalusugan, at kapakanan ng bawat Pilipino.