ni Kuya Win Gatchalian @Win Tayong Lahat | July 16, 2026
Nitong nakaraang Lunes, naging karangalan ng inyong lingkod na dumalo sa General Assembly ng Philippine Association of State Universities and Colleges (PASUC), kung saan tinalakay natin ang ating narating sa pagpapatupad ng Universal Access to Quality Tertiary Education Act (Republic Act No. 10931) o ang batas para sa libreng kolehiyo.
Malinaw ang ating mensahe sa ating mga SUCs, sa ating mga administrador, mga guro, mga kawani, at higit sa lahat sa ating mga mag-aaral at mga magulang: patuloy na susuportahan ng Senado, sa ilalim ng ating liderato, ang epektibong pagpapatupad at pagpapalawak ng libreng kolehiyo upang maabot pa natin ang mas maraming mga kabataan.
Simula noong ganap na ipatupad ang batas noong 2018 hanggang sa Academic Year 2025-2026, umabot na sa mahigit limang milyong mag-aaral ang nakinabang sa libreng kolehiyo.
Nirepaso ng ating tanggapan ang datos at batay sa ating pagsusuri, lumalabas na umabot na sa 4.070 milyon ang nakapag-aral sa ating mga SUCs nang hindi nagbabayad ng matrikula, samantalang umabot naman sa 1.406 milyon ang naging benepisyaryo ng Tertiary Education Subsidy (TES). Sa kabuuan, 5.476 milyong mga unique beneficiaries o mga indibidwal na benepisyaryo na ang natulungan natin.
Bilang isa sa mga nagpanukala ng batas na ito, ikinagagalak nating makitang ganito na karami ang mga kabataang nabibigyan natin ng pagkakataong magkaroon ng mas magandang kinabukasan.
Nakakatuwang balikan na isa pa lamang Kongresista ang inyong lingkod noong una nating inihain ang panukalang gawing libre ang kolehiyo sa mga SUCs. Noong nanalo tayong senador noong 2016, ang panukalang ito ang isa sa mga binigyan natin ng prayoridad na maihain. Patuloy nating isinulong ang panukalang ito hanggang sa ganap na maging batas noong 2017.
Noong nagsilbi ang inyong lingkod bilang Chairman ng Senate Committee on Finance, tiniyak nating madadagdagan ang pondo para sa libreng kolehiyo sa ilalim ng 2026 national budget upang matulungan natin ang mas marami pang mga mag-aaral.
Ngayong taon, P32.8 bilyon ang inilaan natin para sa pagpapatupad ng libreng kolehiyo, hindi lamang sa ating mga SUCs kundi pati na rin sa ating mga local universities and colleges (LUCs). Umabot naman sa P26.3 bilyon ang inilaan natin para sa TES. Inaasahang 1.3 milyong mag-aaral mula sa mga mahihirap na pamilya ang matutulungan natin.
Samantala, P2.9 bilyon sa pondo ng TES ang nakalaan para sa 200,000 na mga mag-aaral o higit pa mula sa mga pamilyang bahagi ng 4Ps o kaya naman ay mula sa mga lugar na walang SUCs o LUCs.
Pinagsikapan din nating tulungan ang mga SUCs na tugunan ang kanilang limitadong kapasidad. Noong nakaraang taon, lumabas sa aming pagsusuri na may 168,493 na mga mag-aaral ang hindi nakapag-enroll dahil sa kakulangan ng slot sa ating mga SUCs.
Kaya naman naglaan ang Senado ng dagdag na P6.3 bilyon para sa ating mga SUCs, P5.2 bilyon dito ay panukala ng ating tanggapan upang makapagpatayo ang mga SUCs ng mga dagdag na silid-aralan at mga pasilidad, mga bagay na tutugon sa kanilang limitadong kapasidad.
May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City
o mag-email sa surewin.bulgar@gmail.com
