Taas ng pride ni Malacañang spokesperson Claire Castro, ayaw mag-public apology sa mga guro

ni Pablo Hernandez @Prangkahan | August 22, 2026

MAHIRAP NANG PANIWALAAN KUNG NAGSASABI SILA NG TOTOO O HINDI, KASI PERA-PERA PALA ANG LAKAD NI GUTEZA AT 4 PANG FORMER SEKYU NI ZALDY CO – Sabi ni retired Marine Sgt. Orly Guteza at ng apat pang dating bodyguards ni former

Ako Bicol partylist Rep. Zaldy Co, pinangakuan daw sila ng malaking halaga ng pera nina Sen. Rodante Marcoleta, former Cong. Mike Defensor at Atty. Levi Baligod para siraan si Leyte 1st District Rep. Martin Romualdez sa isyu ng male-maletang perang kanilang idinideliber sa kanya.

Ngunit dahil hindi raw ibinigay ang ipinangakong pera, binabawi na nila ngayon ang kanilang testimonya laban sa dating speaker.

Kaya't ang tanong, may ipinangako rin kayang pera sa kanila si Cong. Romualdez kaya nililinis na nila ngayon ang pangalan ng dating speaker?

Sa totoo lang, ang hirap paniwalaan kung totoo o hindi ang sinasabi ni Guteza at ng apat pang dating security escorts ni Zaldy Co. Kasi nga, mismong sila na ang nagsabi, “pera-pera” ang lakad nila. Boom!

XXX

TAAS NAMAN NG PRIDE NI MALACAÑANG SPOKESPERSON CLAIRE CASTRO KASI HANGGANG NGAYON, AYAW PANG MAG-SORRY SA MGA GURO – Ubod pala ng taas ng pride ng Malacañang spokesperson na si Presidential Communications Office (PCO) Usec. Claire Castro.

Public apology lang naman ang hiling ng mga guro kaugnay sa sinabi ni Usec. Claire na kesyo minsan daw ay mga guro ang nagtuturo sa mga estudyante para mawalan ng modo sa kapwa, lalo na sa matatanda. Pero hanggang ngayon, ayaw pa ring mag-sorry ng Malacañang spokesperson sa mga titser ng bayan. Tsk!

XXX

SA HALIP NA TUPARIN ANG PROMISE NA P20 PER KILONG BIGAS, LALO PANG TUMAAS ANG PRESYO NITO SA MERKADO – Tumaas ng P2 hanggang P3 ang presyo kada kilo ng bigas sa ilang pamilihan sa bansa. Ayon sa mga rice trader, idinadahilan nila sa taas-presyong ito ang halos isang linggong pananalasa ng Habagat sa bansa.

Hay naku, malapit nang matapos ang termino ni Pangulong Ferdinand “Bongbong” Marcos Jr. (PBBM) nang hindi naisakatuparan ang pangako niyang P20 kada kilo ng bigas. Tapos, ang mababalita pa ay ang pagtaas ng presyo nito sa merkado. Buset!

XXX

MGA TAGA-CUSTOMS NA KASABWAT NG MGA SINDIKATO NG DROGA, DAPAT HUBARAN NG MASKARA – Sa patuloy na pagpasok ng illegal drugs sa bansa, dapat magsagawa na uli ng imbestigasyon ang Senado at Kamara hinggil dito. Dapat nilang imbestigahan kung may mga tiwaling Customs officials na kasabwat ng mga sindikato ng droga, kung kaya’t malaya nilang naipupuslit sa Pilipinas ang sangkaterbang shabu.

Eh, sa totoo lang naman, hindi maipapasok ng mga drug syndicate ang sangkaterbang shabu sa ‘Pinas kung wala silang mga kasabwat na “buwayang” Customs officials. Kaya dapat nang mahubaran ng maskara ang mga tiwali sa Adwana. Period!

Kapabayaan sa baril, dapat may mabigat na kaparusahan

ni Leonida Bonifacio-Sison @Boses | August 22, 2026

Sa bawat baril na hindi ligtas na naitatago, may posibilidad na malagay sa panganib ang isang pamilya, paaralan at buong komunidad. Hindi sapat na legal ang pagmamay-ari ng armas para masabing ligtas na ang lahat. Kasabay ng pribilehiyong magkaroon nito ang mas mabigat na responsibilidad na tiyaking hindi ito maaabot ng mga taong hindi dapat gumagamit nito, lalo na ng mga bata.

Muling naging usapin ang pananagutan ng gun owners matapos ang dalawang magkahiwalay na insidente ng pamamaril sa paaralan sa Tacloban at Zamboanga City na kapwa kinasangkutan ng mga menor-de-edad. Sa mga kasong ito, lumitaw ang mahalagang usapin ng access ng mga bata sa mga baril na pag-aari ng kanilang mga magulang o kamag-anak.

Sa ganitong sitwasyon, hindi dapat matapos ang pananagutan sa mismong taong gumamit ng armas. Kailangang tingnan kung paano ito napunta sa kamay ng mga bata at kung sapat ba ang pag-iingat ng legal na may-ari. Kung may pagkukulang sa pagtatago ng armas, makatuwirang pag-isipan kung dapat magkaroon ng malinaw na parusa para rito.

May panawagan ding repasuhin ang batas tungkol sa illegal possession of firearms, kabilang ang mga probisyong nagtakda rito bilang bailable offense. Anuman ang magiging desisyon ng Kongreso, dapat itong pag-aralan nang mabuti upang matiyak na magiging epektibo ang batas sa pagpigil sa krimen at hindi lamang dagdag na parusa pagkatapos may mangyaring trahedya.

Mahalaga rin ang mas mahigpit na pamantayan sa safekeeping. Ang baril ay hindi ordinaryong gamit na maaaring iwan sa sasakyan, kabinet o lugar na madaling maabot. Dapat itong nasa ligtas na lugar at may sapat na kontrol upang hindi ito mapasakamay ng bata o sinumang walang awtoridad na gumamit nito.

Gayunman, hindi rin sapat ang pagbabago sa batas. Kailangan ang edukasyon sa responsableng gun ownership, mas maayos na pagsusuri sa seguridad at tuluy-tuloy na pagpapatupad ng mga umiiral na panuntunan. Kailangang tingnan din ang iba pang salik na maaaring may epekto sa pag-uugali ng kabataan, kabilang ang kanilang exposure sa online content at iba pang impluwensiya.

Ang tunay na layunin ay hindi ang basta paghihigpit sa karapatan ng mga legal na gun owners. Ang dapat palakasin ay ang pananagutan na kasama ng pribilehiyong iyon.

Sa bawat baril na pag-aari, dapat may katumbas na responsibilidad sa pag-iingat. Kung ang isang sandata ay maaaring makuha ng bata at mauwi sa trahedya, hindi sapat ang sabihing legal itong pagmamay-ari. Panahon nang gawing mas malinaw ang pananagutan, higpitan ang safekeeping at unahin ang kaligtasan ng mga bata at komunidad. 

Pinoy, ‘di dapat matakot na magpaospital dahil sa bayarin

ni Bong Go @Bisyo Magserbisyo | August 21, 2026

Napakaraming Pilipino ang takot magpa-ospital dahil walang pambayad. Marami rin ang nangangamba na kahit gumaling na sa sakit at pinayagan na ng doktor na umuwi, baka hindi sila makalabas ng ospital dahil may natitira pa silang bayarin.

Bilang Vice Chairman ng Senate Committee on Health, naniniwala ako na kapag gumaling na ang pasyente, hindi dapat maging dahilan ang kakulangan sa pera para manatili siyang nakakulong sa ospital – o kung tawagin ay “hospital detention”, lalo na kung hindi naman nito pinili na sa private room mai-admit.

Ito ang isa sa mga dahilan kung bakit mahalaga para sa akin ang pagpasa ng Senado, sa ikatlo at huling pagbasa noong August 17, ng Senate Bill No. 1511 o ang panukalang Enhanced Anti-Hospital Detention Act. Tayo po ay co-author at co-sponsor ng panukalang batas na ito. 

Layunin nitong palakasin ang Republic Act No. 9439 o ang Anti-Hospital Detention Law at dagdagan ang proteksyon sa mga pasyente at kanilang pamilya laban sa hindi makatarungang pagpigil sa ospital dahil lamang sa hindi pa nababayarang gastusin. Ipinalalawak ng panukala na maisama sa saklaw ng batas ang mga pasyenteng na-admit sa private room nang hindi nila naman kagustuhan. 

Mananatili pa rin ang mga mekanismo kung saan maaaring gumawa ng promissory note o magbigay ng kaukulang garantiya ang pasyenteng walang kakayahang magbayad agad.

Naiintindihan natin na may obligasyon din ang mga ospital at kailangan nilang magkaroon ng sapat na pondo para magpatuloy ang kanilang serbisyo. Kaya mahalagang magkaroon tayo ng patas at makataong sistema na nagpoprotekta sa pasyente at mayroon ding mekanismo para mapangalagaan ang ating mga health facilities.

Bilang isang health reforms crusader, patuloy kong ipinaglalaban na mas maging abot-kaya at accessible ang serbisyong pangkalusugan, lalo na para sa mahihirap at walang sapat na kakayahang magbayad.

Kasama rito ang patuloy kong panawagan sa Philippine Health Insurance Corporation (PhilHealth): gamitin ang pondo ng tama. Ang pera ng PhilHealth ay dapat mapakinabangan ng mga miyembro nito sa pamamagitan ng mas malawak na benepisyo, mas malaking tulong sa gastusing medikal, at mas mababang kailangang ilabas na pera ng mga pasyente.

Ang pondong para sa kalusugan ay dapat makarating sa mga taong nangangailangan nito. Bahagi ng ating health reforms crusade ang pagpapalakas sa primary care ng mga pampublikong ospital, at mga programang naglalapit ng tulong medikal sa ating mga kababayan.

Ngayong patuloy ang pag-ulan sa maraming bahagi ng bansa, paalala natin sa kapwa Pilipino na hangga't maaari ay iwasang mababad sa ulan. Kapag nakakaramdam ng sintomas o hindi maganda ang pakiramdam, magpatingin agad sa health professional. Mas mabuting maagapan ang sakit habang maaga kaysa hintaying lumala at mas maging mahirap at magastos ang gamutan.

Samantala, bilang miyembro ng Senate Committee on Local Government, personal tayong dumalo sa Vice Mayors’ League of the Philippines - Quezon Chapter Legislative Excellence (LEx) Academy sa Maynila noong August 12. Dito, binigyang-diin natin ang mahalagang papel ng mga bise alkalde sa pagtataguyod ng maayos at responsableng pamamahala at sa paghahatid ng mas mahusay na serbisyo publiko.

Dumalo rin tayo bilang Guest of Honor and Speaker sa 4th Regional Conference ng Pambansang Samahan ng Inhinyero Mekanikal (PSIM) Davao Chapter sa Davao City noong August 13.

Nito namang August 17, kahit inabot tayo ng malakas na ulan, binisita natin ang mga kababayan nating nasunugan sa Brgy. 739 sa Malate, Manila. Agad tayong nagbigay ng tulong para sa kanilang pang-araw araw.

Nito ring August 19 ay personal nating binisita at tinulungan ang mga kababayan natin sa Brgy. 51 sa Pasay City na apektado rin ng sunog. Personal nating kinumusta ang sitwasyon ng ilang pamilya doon kung saan nakita nating dikit-dikit ang mga kabahayan na nagdulot ng mabilis na pagkalat ng sunog sa lugar. 

Noong nakaraang linggo, nagpaabot din ng tulong ang ating Malasakit Team sa iba’t ibang kababayan nating nangangailangan. Agad nilang tinulungan ang mga nasunugan sa Caloocan City; Malabon City; Roxas City, Capiz; San Carlos City, Negros Occidental; Cagayan de Oro City; at Bislig City, Surigao del Sur.

Tuloy-tuloy rin ang pamamahagi natin ng tulong sa mga kababayan nating apektado ng bagyo at malakas na ulan mula sa Malolos City at Bulakan, Bulacan; Dinalupihan, Bataan; Narvacan, Ilocos Sur; at Sta. Barbara, Pangasinan. Binisita at naghatid ng pakikiramay ang aking team sa mga kababayan nating namatayan sa insidente ng landslide sa Atok at La Trinidad, Benguet at Baguio City.

Dumalo rin ang aking Malasakit Team sa pagbubukas ng bagong Super Health Center sa Kalamansig, Sultan Kudarat, kung saan namahagi rin tayo ng tulong sa mga barangay health workers.

Bilang Chairman ng Senate Committee on Youth, patuloy kong sinusuportahan ang mga programang nagbibigay ng oportunidad sa ating mga kabataan. Nakiisa rin ang ating Malasakit Team sa Sangguniang Kabataan Congress ng mga youth leaders mula sa lalawigan ng Quezon at sa 6th Mayor’s Cup Tournament sa San Remigio, Antique.

Bilang inyong Mr. Malasakit, patuloy akong magseserbisyo sa ating kapaa Pilipino dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.