OFW, exempted sa travel tax

ni PAO Chief Persida Rueda-Acosta @Magtanong Kay Attorney | August 4, 2026

Dear Chief Acosta, 

Nagbabalak akong maging OFW. Dahil dito ay nag-ayos ako ng aking mga papeles at nakakuha ako ng kontrata para maging skilled worker sa Australia. Naayos ko na rin ang lahat ng aking papeles para sa pag-alis ko, ngunit nabalitaan ko na may binabayaran palang “travel tax” sa paliparan ng Pilipinas. Dapat din ba akong magbayad ng nasabing tax? — Chess

---

Dear Chess,

Bago natin sagutin ang iyong katanungan, alamin muna natin kung ano ang travel tax. Ayon sa Presidential Decree No. 1183 (as amended), ang travel tax ay ang buwis na ipinapataw ng batas sa mga indibidwal na palabas ng ating bansa, kasama ang mga banyaga na permanente ng nakatira sa Pilipinas, at ang mga banyaga na nanatili sa Pilipinas ng mahigit isang taon, maliban kung kasama sa mga eksempsyon na ibinibigay ng batas. 

Ayon sa Section 73 ng Republic Act (R.A.) No. 9593, ang nakolektang travel tax ay nakalaan at ibibigay sa mga sumusunod: a. 50% ay mapupunta sa Tourism Infrastructure and Enterprise Zone Authority (TIEZA) b. 40% ay magiging kontribusyon sa Higher Education Development Fund; at c. 10% ay mapupunta sa National Commission for Culture and the Arts (NCAA). 

Ngayon, alamin natin kung ang mga Overseas Filipino Workers (OFWs) ba ay minamandato rin at inoobliga ng batas na magbayad ng travel tax tuwing lalabas ng bansa at pupunta sa bansa para magtrabaho? 

Ayon sa Section 35 ng Republic Act (R.A.) No. 8042 (as amended), ang mga OFWs ay exempted sa mandato ng batas na magbayad ng travel tax sa tuwing lalabas ng bansa. Narito ang pahayag ng batas: 

“Section 35. Exemption from Travel Tax, Documentary Stamp and Airport Fee. - All laws to the contrary notwithstanding, the migrant worker shall be exempt from the payment of travel tax and airport fee upon proper showing of proof of entitlement by the POEA.”   

Kaya maliwanag na ang ating mga OFWs ay hindi kasama sa mga dapat magbayad ng travel tax. Ito ay bilang pagkilala sa kanilang mahalagang kontribusyon sa ekonomiya ng ating bansa. 

Kaya sa iyong sitwasyon, kung ikaw ay aalis bilang OFW, hindi ka maaaring obligahin na magbayad ng travel tax para sa iyong flight palabas ng bansa. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala. 

Magna Carta of Barangay Health Workers, aprubado na sa Senado

ni Kuya Win Gatchalian @Win Tayong Lahat | August 4, 2026

Aprubado na ng Senado sa huli at ikatlong pagbasa ang Magna Carta of Barangay Health Workers, isang panukalang batas na layong itaguyod ang kapakanan ng mga barangay health workers (BHWs) na nagsisilbing frontliners sa paghahatid ng serbisyong pangkalusugan sa ating mga komunidad.

Bilang isa sa mga may akda at co-sponsor ng panukalang batas na ito, nakikiisa ako sa pagkilala sa mahalagang papel ng ating mga BHWs: sila ang unang naghahatid ng mga pangunahing serbisyong pangkalusugan sa ating mga komunidad.

Pinapaigting din nila ang kaalaman ng mga miyembro ng komunidad pagdating sa pag-iwas at pangangalaga sa iba’t ibang sakit. Kinikilala natin ang kanilang kontribusyon upang gawing organisado ang ating mga komunidad, pati na rin sa pagkalap at pagsasaayos ng datos sa kalusugan ng ating mga kababayan.

Noong una nating inihain ang panukalang batas na ito, binigyang-diin ng inyong lingkod na hindi tumutugma ang responsibilidad ng mga BHWs sa mga benepisyo at proteksyong nakasaad sa Barangay Health Workers' Benefits and Incentives Act of 1995 (Republic Act No. 7883).

Kaya naman isinulong natin ang batas na ito upang matiyak nating matatanggap ng ating mga BHWs ang kaukulang mga benepisyo at proteksyon na naaayon sa iba’t ibang papel na kanilang ginagampanan. Sa ilalim ng panukalang ating inaprubahan, magiging bahagi na ng plantilla ng gobyerno ang mga posisyon ng BHWs na may kaukulang salary grade.

Nakatakda rin sa inaprubahan nating panukala ang mga benepisyong matatanggap ng mga volunteer BHWs, kabilang dito ang buwanang benepisyo na hindi bababa sa P3,000, transportation allowance o expense reimbursement, subsistence allowance, hazard allowance, at iba pa.

Nakasaad din sa panukalang batas na makakatanggap na rin ang ating mga BHWs ng insurance coverage, libreng serbisyong legal, mga serbisyo para sa mental health, at psychosocial support.

Upang isulong naman ang kanilang professional development at iangat ang kanilang kakayahan, magiging mandato ng batas ang pagkakaroon ng competency-based education at curriculum.

Umaasa ang inyong lingkod na magiging batas na ang panukalang ito sa lalong madaling panahon. Sa pagtataguyod natin ng kapakanan ng ating mga BHWs, isinusulong din natin ang kalusugan ng ating mga komunidad.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Proteksyon sa mga batang content creator, tiyakin

ni Leonida Sison @Boses | August 4, 2026

Dapat lang na higit pang maprotektahan ang mga bata sa panahon ng social media. Habang dumarami ang mga batang lumalabas sa mga vlog, online advertisement, livestream at iba pang digital content, nararapat lamang na tiyaking hindi sila naaabuso, napagsasamantalahan o napipilitang magtrabaho nang labag sa kanilang mga karapatan. Ang kasikatan sa internet ay hindi dapat maging dahilan upang isantabi ang kapakanan ng isang bata.

Bilang tugon sa lumalawak na paggamit ng mga menor-de-edad sa digital content creation, naglabas ang Department of Labor and Employment (DOLE) ng Labor Advisory No. 12, Series of 2026, na nag-aatas na ang mga batang wala pang 15 taong gulang ay kailangang kumuha muna ng working child permit bago makilahok sa mga proyektong pang-aliwan o pang-impormasyon, kabilang ang mga nilalaman na inilalathala sa social media at iba pang online platform.

Ipinaalala ng DOLE na sa ilalim ng Republic Act No. 9231 o Special Protection of Children Against Child Abuse, Exploitation and Discrimination Act, ipinagbabawal ang pagtatrabaho ng mga batang wala pang 15 taong gulang. Pinapayagan lamang ito sa ilang pagkakataon, gaya ng kapag ang bata ay nagtatrabaho sa ilalim ng direktang pangangasiwa ng magulang o legal na tagapag-alaga at ang mga kasama lamang sa gawain ay miyembro ng pamilya, o kung ang paglahok ng bata ay mahalaga sa isang pampublikong pagtatanghal o proyektong pang-impormasyon. Sa alinmang sitwasyon, kinakailangan pa ring magkaroon ng permit mula sa DOLE bago payagang makilahok ang bata.

Nilinaw din ng ahensya na ang saklaw ng “public entertainment or information” ay hindi lamang telebisyon, radyo, pelikula, teatro at print media. Kabilang na rin dito ang mga vlog, livestream, digital advertisement, web series, podcast, educational content, streaming platform, social media at iba pang umuusbong na anyo ng digital media. Dahil dito, ang mga batang lumalahok sa paggawa ng online content na ipo-post sa internet ay maaari ring saklawin ng regulasyong ito.

Binigyang-diin ng DOLE na may pananagutan ang mga magulang o legal na tagapag-alaga sa pagsunod sa batas at sa pagkuha ng kinakailangang permit. Inatasan din ang mga employer at content producer na sundin ang mga umiiral na panuntunan laban sa child labor, kabilang ang limitasyon sa oras ng trabaho, wastong paggamit ng kinikita ng bata, at pagtiyak na hindi maaapektuhan ang kanilang pag-aaral, pagsasanay at iba pang pangunahing pangangailangan. Hinikayat din ng ahensya ang publiko na iulat ang anumang hinihinalang paglabag upang agad na maimbestigahan at maaksyunan.

Mahalagang paalala ang bagong patakarang ito na ang kapakanan ng bata ay dapat manatiling pangunahing konsiderasyon sa anumang uri ng trabaho o content creation.

Ang teknolohiya ay maaaring magbukas ng maraming oportunidad, ngunit may kaakibat din itong responsibilidad. Kung magiging mas maingat ang mga magulang, content creator at iba pang sangkot sa industriya, masisiguro na ang talento ng mga bata ay mahuhubog sa ligtas, makatao at makatarungang kapaligiran na tunay na nagbibigay-halaga sa kanilang kinabukasan.