Mga cong. na sangkot sa flood scam, malamang kabado na sa pagpasok ng 2 bagyo

ni Pablo Hernandez @Prangkahan | August 5, 2026

WALA SANANG KINAKAHARAP NA PROBLEMA AT IMPEACHMENT SI VP SARA KUNG HINDI SIYA HUMINGI NG CONFI FUNDS – Kinumpirma ni Commission on Audit-Intelligence and Confidential Funds Audit Office (COA-ICFAO) State Auditor Roderick Wamil na mula nang mapasok siya sa COA, si Vice President Sara Duterte lamang ang nagkaroon ng confidential funds sa Office of the Vice President (OVP) at Department of Education (DepED) noong siya pa ang kalihim ng naturang departamento.

Ayon kay State Auditor Wamil, wala siyang na-audit na confidential funds nina dating Vice President Jejomar Binay at dating Vice President Leni Robredo, gayundin nina dating DepEd Secretary Armin Luistro at dating DepEd Secretary Leonor Briones, dahil walang confidential funds na ini-audit ang COA sa kanilang mga tanggapan mula 2010 hanggang 2022.

Kung hindi sana humingi si VP Sara ng confidential funds para sa OVP at DepED, marahil ay wala siyang kinakaharap na problemang tulad nito at hindi siya haharap sa impeachment trial. Tsk!

XXX

GOOD NA PAGKASUNDUIN SINA SEN. LACSON AT SEN. ALAN CAYETANO, PERO BAD NA ITIGIL ANG IMBESTIGASYON SA 'GHOST PROJECTS' SA TAGUIG — Ilang senador daw ang gumagawa ng paraan upang pagkasunduin ang nagbabangayang sina Sen. Ping Lacson at Sen. Alan Cayetano para hindi na matuloy ang imbestigasyon sa mga "ghost projects" sa Taguig City.

Kung mapagkakasundo sina Sen. Lacson at Sen. Alan Cayetano, good 'yan para matigil na ang kanilang bangayan. Pero kung ititigil din ang imbestigasyon sa mga "ghost projects" sa Taguig City, bad 'yan, dahil dapat malaman ng taumbayan kung saan-saang lugar sa lungsod may mga ganitong proyekto. Pera ng bayan ang sangkot diyan. Period!

XXX

2 BAGYO PAPASOK SA ‘PINAS KAYA MALAMANG KABADO NA NAMAN ANG MGA CONG. NA SANGKOT SA FLOOD CONTROL SCAM – Dalawang bagyo ang binabantayan ngayon ng PAGASA na posibleng pumasok sa Philippine Area of Responsibility (PAR).

Hindi man aminin, malamang kinakabahan na naman ang mga kongresistang sangkot sa umano'y flood control projects scam. Kapag binaha na naman ang kanilang mga distrito, tiyak na batikos na naman ang aabutin nila mula sa mga kababayan nilang naapektuhan, dahil ang pondong inilaan sana para sa mga proyektong panlaban sa baha ay ibinulsa umano. Boom!

XXX

SINU-SINO KAYANG MGA SEN. AT CONG. ANG TATAMAAN SA 30 FLOOD CONTROL CASES NA ISASAMPA NG NBI SA DOJ? – Kinumpirma ni NBI Director Melvin Matibag na may 30 pang kaso kaugnay ng mga flood control project ang isasampa nila sa Department of Justice (DOJ).

Sinu-sino kayang mga kurakot na senador at kongresista ang tatamaan ng mga kasong ito ng NBI? Abangan!

Kabataan, protektahan laban sa online exploitation

ni Leonida Sison @Boses | August 5, 2026

Siguraduhin na walang batang mapipilitang mabuhay sa takot at pananamantala, lalo na kung ang panganib ay nagmumula mismo sa loob ng kanilang tahanan. Sa pag-usbong ng teknolohiya, kasabay ding lumalawak ang mga banta sa mga kabataan. Kaya nararapat lamang na maging mas mahigpit ang pagbabantay ng pamilya, komunidad at pamahalaan upang hindi na madagdagan pa ang mga biktima ng online sexual exploitation.

Bilang isang survivor, nagsalita ang isang biktima bilang isang tagapagtaguyod at bilang lakas sa mga nakaranas ng pang-aabuso, sa isang Multi-Disciplinary Team and Basic Internet Crimes Against Children (MDT-BICAC) Training na ginanap sa loob ng limang araw at nagtapos noong Hulyo 31.

Ang kanyang kuwento ay sumasalamin sa dinaranas ng maraming batang tahimik na nagdurusa sa likod ng mga cellphone, computer at iba pang digital platform. Sa likod ng mga terminong Online Sexual Exploitation of Children (OSAEC) at Child Sexual Abuse and Exploitation Materials (CSAEM) ay mga totoong batang nawalan ng seguridad, dignidad at pagkakataong maranasan ang normal na pagkabata.

Nagsimula ang bangungot ng biktima at ng kanyang kambal na kapatid noong sila ay 11-anyos pa lamang. Masaklap pa, ang mismong kanilang ina ang nagpasok sa kanila sa online sexual exploitation upang kumita ng pera. Dahil sa mga dayuhang kliyente, napipilitan silang manatiling gising hanggang madaling-araw para sa mga online session.

Kalaunan, napilitan ang biktima na tumigil sa pag-aaral dahil sa matinding pagod at kawalan ng sapat na pahinga. Tuwing tumatanggi siya, nakararanas siya ng pananakit at pang-aabuso. Ang kanyang pribadong larawan ay ginawang kalakal para sa kapakinabangan ng mga taong walang pakialam sa kinabukasan ng isang bata.

Nagbago lamang ang kanyang buhay makalipas ang anim na taon nang siya ay mailigtas sa edad na 17. Naaresto ang kanyang ina at inilagay siya at ang kanyang mga kapatid sa isang government residential facility. Doon niya unang naranasan ang tunay na kaligtasan sa tulong ng mga social worker, house parents at iba pang taong nagmalasakit sa kanyang paggaling.

Sa suporta ng International Justice Mission (IJM) at iba pang katuwang na organisasyon, unti-unti niyang nabuo muli ang kanyang tiwala sa sarili. Natapos niya ang kursong Psychology nang may karangalan sa kabila ng kakulangan sa pananalapi. Ngayon ay isa na siyang lider ng Philippine Survivor Network (PSN), kung saan aktibo niyang isinusulong ang Hope U Protect, isang survivor-led campaign laban sa OSAEC at CSAEM.

Nakikipagtulungan din siya sa mga awtoridad upang isulong ang trauma-informed at child-centered na pagtrato sa mga biktima at mapanagot ang mga responsable sa krimen.

Ang kuwento ng survivor na ito ay hindi lamang salaysay ng pagdurusa kundi patunay na maaaring makabangon ang isang biktima kung may tamang suporta, proteksyon at hustisya. Gayunman, hindi sapat ang paghanga sa kanyang katatagan.

Mas mahalaga ang pagkilos upang maiwasan ang pagdami ng mga batang makararanas ng kaparehong trahedya. Dapat palakasin ang kampanya laban sa online sexual exploitation, paigtingin ang pagpapatupad ng batas at tiyaking ligtas ang bawat bata sa loob man o labas ng kanilang tahanan.

Kapag sama-samang kumilos ang pamilya, komunidad at pamahalaan, mas malaki ang pag-asang maputol ang siklo ng pang-aabuso at mabigyan ng mas ligtas na kinabukasan ang bawat kabataan. 

Cong. Pulong, na-bash sa isyung hindi naman siya ang pinatatamaan

ni Pablo Hernandez @Prangkahan | August 4, 2026

SABLAY ANG ILANG TESTIGO NG HOUSE PROSECUTORS PANEL KAYA MAGBABAWAS SILA NG WITNESSES VS. VP SARA – Inanunsyo ni House prosecutor at Manila 3rd District Rep. Joel Chua na babawasan o tatanggalin nila ang ilan sa 13 testigo sa impeachment court kaugnay ng confidential funds ni Vice President Sara Duterte.

Tila naramdaman ng House prosecutors panel na may kahinaan ang ilan sa kanilang mga testigo laban kay VP Sara kaya nais na nilang huwag na itong iharap sa impeachment court. Boom!

XXX

2 JUSTICES NG SANDIGANBAYAN NA NAG-GRANT NG BAIL KAY EX-SEN. REVILLA, DAPAT MAG-INHIBIT – Matapos putaktihin ng batikos ng publiko ang Sandiganbayan dahil sa desisyon nitong payagang makapagpiyansa si dating Sen. Bong Revilla sa halagang P1 milyon, agad na nagbigay-linaw si Associate Justice Karl Miranda na sa tatlong miyembro ng 3rd Division ng Sandiganbayan, siya lamang ang kumontra sa hiling na bail dahil naniniwala siyang malakas ang ebidensya laban sa dating senador.

Aniya, sina Associate Justice Fritz Bryn Anthony Delos Santos at Associate Justice Ronald Moreno ang bumoto pabor sa piyansa dahil kapwa nila itinuring na mahina ang ebidensya ng Ombudsman. Dahil 2-1 ang naging boto, naaprubahan ang hiling ni dating Sen. Revilla na makapagpiyansa para sa kanyang pansamantalang kalayaan.

Ang kasong P90 milyong malversation through falsification of public funds na may kaugnayan sa umano'y "ghost" flood control project laban kay dating Sen. Revilla ay nagpapatuloy. Dahil nababatikos ngayon ang Sandiganbayan sa pagpayag na makapagpiyansa ang dating senador, ang pinakamainam na gawin nina Justice Delos Santos at Justice Moreno ay mag-inhibit sa kaso upang mawala ang pagdududa ng publiko sakaling sa darating na panahon ay maabsuwelto si dating Sen. Revilla. Period!

XXX

CONG. PULONG, NA-BASH SA PAG-REACT SA SINABI NI DEFENSE SEC. TEODORO NA MAG-RESIGN ANG MGA OPISYAL NA PRO-CHINA – Umuusok sa galit si Davao City 1st District Rep. Paolo Duterte sa sinabi ni Defense Secretary Gibo Teodoro na dahil sa patuloy na pangha-harass ng China Coast Guard (CCG) sa mga sundalo at mangingisdang Pinoy, dapat umanong magbitiw sa puwesto ang mga opisyal ng gobyerno na pro-China. Ayon sa Davao congressman, "Bakit parang ginagawang demonyo ang China?" kaugnay ng isyu sa West Philippine Sea (WPS).

Sana ay hindi na lang nagbigay ng reaksyon si Cong. Pulong sa pahayag ni Sec. Teodoro dahil wala naman itong tinukoy na pangalan. Dahil nag-react ang kongresista, naputakti tuloy siya ng pambabatikos ng mga netizen sa social media dahil, batay sa kanyang pahayag, lumalabas na pro-China talaga siya. Tsk!

XXX

TONGPATS COLLECTOR SA CAMANAVA, DAPAT IPA-TOKHANG NA KASI AYAW MAGLUBAY SA 'TONGPATS COLLECTION' – Hindi pa rin naglulubay sa umano'y raket nitong "tongpats collection" ang isang "Roy Pulis" sa mga ilegalista sa CAMANAVA.

Kailan kaya ito ipapa-Tokhang ni Northern Police District (NPD) director Brig. Gen. Benliner Capili? Abangan!