Mga cong. na sangkot sa flood scam, walang 'K' na maging tagausig vs. VP Sara

ni Pablo Hernandez @Prangkahan | August 11, 2026

MGA CONG. NA SANGKOT SA FLOOD CONTROL SCANDAL AT MEMBER NG HOUSE PROSECUTOR PANEL, DAPAT MAG-INHIBIT SA IMPEACHMENT TRIAL NI VP SARA — Binatikos ni Baguio City Mayor Benjamin Magalong ang Marcos administration kasi ni-isa raw sa mga kongresistang sangkot sa flood control scandal ay wala pang naipapakulong, na ayon sa alkalde ay 'yung iba pa nga raw na mga cong. na sabit sa flood control projects scam ay kasama pa sa House prosecutions panel sa impeachment ni Vice Pres. Sara Duterte.

Kaya kung sinuman 'yung tinutukoy ni Mayor Magalong na kongresistang sangkot sa flood control scandal na kasama sa House prosecution panel. Kung may delicadeza pang natitira ang mga ito sa kanilang mga sarili, ay dapat mag-inhibit bilang tagausig sa impeachment ni VP Sara, boom!

XXX

DAHIL LABIS NAAPEKTUHAN ANG CORDILLERA REGION SA 'HABAGAT,' KAYA'T DAPAT PURSIGIHIN NA NG OMBUDSMAN ANG PAG-IIMBESTIGA SA UMANO'Y ANOMALYA NINA CONG. ERIC YAP, CONG. EDWIN GARDIOLA AT FORMER CONG. ZALDY CO SA PROYEKTO NILANG P50B LANDSLIDE SLOPE SA REHIYONG ITO — Isa ang Cordillera region sa labis naapektuhan ng walang humpay na buhos ng ulan dulot ng "Habagat," sa rehiyong, hindi lang flash flood, kundi may muds flood din na rumagasa sa mga tahanan at kalsada, maraming ari-arian ang nawasak at may 11 katao pang nasugatan sa trahedyang ito.

Dahil d'yan ay mas dapat pagtuunan ngayon ng pansin ni Ombudsman Boying Remulla ang pag-iimbestiga sa ibinulgar noon ni Task Force Kasanag convenor John Chiong na ginawan ng umano'y anomalya nina Benguet, former ACT-CIS Partylist Rep. Eric Yap, CWS Partylist Rep. Edwin Gardiola at former Ako Bicol Partylist Rep. Zaldy Co, ang proyekto nilang P50 billion landslide slope protection system sa Cordillera region, at kapag napatunayang may katiwalian dito, sampahan agad ng kasong plunder ang tatlong kongresistang iyan para sama-sama silang makulong sa city jail, period!

XXX

DAMAY NA SI SEN. PIA CAYETANO SA BANGAYANG SEN. PING LACSON AT SEN. ALAN CAYETANO — Nadamay na si Sen. Pia Cayetano sa bangayang Sen. Ping Lacson at Sen. Alan Cayetano.

Ibinulgar kasi ni Sen. Lacson na base sa nakuha niyang mga dokumento, noong 2025 national budget ay may P4.7 billion insertion si Sen. Pia at P6.7 billion naman daw ang insertion ni Sen. Alan.

Kung totoo 'yang ibinulgar ni Sen. Lacson, aba'y dapat imbestigahan ito ng Office of the Ombudsman kung saan napunta 'yang insertions ng magkapatid na Cayetano kasi kapag pinagsama ang total n'yan, aba'y P11.4 billion 'yan, at pera 'yan ng bayan kaya't dapat malaman ng publiko kung 'yang halaga na 'yan ay nagastos sa tama, boom!

XXX

DAHIL ANG NATIONAL AT LOCAL ELECTIONS AY NATATAPAT SA SUMMER SEASON, HUWAG KALIMUTAN NG MAMAMAYAN ANG MGA IBABASURA NILANG MGA SEN. AT CONG. NA SANGKOT SA FLOOD CONTROL SCANDAL — Ang national at local elections sa Pilipinas ay idinaraos tuwing Mayo, at ang buwan na 'yan ay summer season, na ibig sabihin, walang ulan at walang baha.

Ang nais nating ipunto rito ay huwag sanang makalimot ang mga kababayan na nabibiktima ng baha kapag panahon ng tag-ulan, na dapat itanim na ng mamamayan sa kanilang isipan ang mga senador at kongresistang sangkot sa flood control scandal, na dapat sa mga ito i-zero vote sa halalan, period!

Ingat sa baha para ‘di magsisi

ni Leonida Bonifacio-Sison @Boses | August 11, 2026

Ngayong tag-ulan, hindi lang payong at kapote ang dapat laging dala ng bawat Pilipino—kundi dagdag na pag-iingat. Sa bawat baha na tinatahak ng mga manggagawa, estudyante at ordinaryong mamamayan, may panganib na hindi agad nakikita ngunit maaaring magdulot ng malubhang sakit. Isa na rito ang leptospirosis, isang panganib na hindi dapat minamaliit.

Kaya makatuwiran ang paalala ng Department of Health (DOH) na iwasan hangga’t maaari ang paglusong sa tubig-baha. Hindi lahat ng baha ay simpleng maruming tubig lamang. Maaari itong may halong kontaminadong tubig at iba pang bagay na maaaring makapagdulot ng sakit, lalo na kapag may sugat o galos ang isang taong lumusong dito.

Para sa mga hindi maiiwasang dumaan sa baha, pinapayuhan ng DOH ang publiko na magsuot ng boots at iba pang proteksiyon sa katawan. Mahalaga ring agad na kumonsulta sa doktor o pinakamalapit na health center upang makatanggap ng tamang payo at kinakailangang gamot. 

Hindi rin dapat balewalain ang mga sintomas. Agad magpatingin kapag nakaranas ng lagnat, paninilaw ng mata o balat at iba pang sintomas na maaaring maiugnay sa leptospirosis. Mas mabuting maagapan ang sakit kaysa hintaying lumala bago humingi ng tulong.

Kasabay ng malawakang pagbaha sa Metro Manila at iba pang bahagi ng bansa dahil sa pabugsu-bugsong pag-ulan na pinalakas ng habagat, inatasan na rin ng Malacañang ang DOH na magsagawa ng mga produktibong hakbang laban sa mga sakit na maaaring kumalat pagkatapos ng baha. 

Hinikayat din ang mga mamamayan na magpakonsulta sa pinakamalapit na health center kapag may nararamdamang sintomas o may posibleng exposure sa kontaminadong tubig.

Sa ganitong sitwasyon, hindi sapat ang paalala lamang. Dapat tiyaking madaling naaabot ng mga komunidad ang mga health center, sapat ang suplay ng gamot at malinaw ang impormasyon tungkol sa mga hakbang na dapat gawin bago at pagkatapos lumusong sa baha.

May bahagi ang bawat mamamayan sa pag-iwas sa sakit, ngunit may mas malaking tungkulin ang pamahalaan na tiyaking hindi pahirapan ang paghingi ng serbisyong pangkalusugan. 

Sa tag-ulan, ang pag-iingat ay hindi pagiging praning. Ito ay paraan ng pagprotekta sa sarili at pamilya. Mas mabuting maagap kaysa magsisi

Alex Eala at ang muling pagpapakita ng kadakilaan at kabayanihan ng Pinoy

ni Fr. Robert Reyes @Kapaayapaan / Patakbo-takbo | August 10, 2026

Umuulan na talaga at natapos na ang mahabang panahon ng matinding tagtuyot. Napakalaking kawalan sa mga magsasaka ang matagal na tagtuyot dahil naaantala ang pagtatanim ng palay at iba pang produktong pangsakahan. Dahil dito, lumiit ang posibilidad na makabawi sila sa puhunan at kumita nang maayos. Hindi pa kasama rito ang banta ng mga paparating na bagyo na maaaring sumira sa kanilang mga pananim.

Kung may tagtuyot na dinadaing ang mga magsasaka, mayroon ding kakaibang tagtuyot na matagal nang nararanasan ng maraming mamamayang Pilipino. Matagal nang tuyo at uhaw ang lupang sakahan at pandayan ng isip, puso, diwa at kaluluwa ng bawat mamamayan para sa tunay at wagas na kabayanihan.

Lantarang napapanood ang mga halimbawa ng kataksilan, kasakiman, kayabangan at pagtatakipan ng mga tiwali na maingat na nagtatago at nag-iingat sa kani-kanilang mga kaso. Kitang-kita ito sa lingguhang pagharap ng depensa at prosekusyon sa Senado na nagsisilbing Impeachment Court. Hindi na kailangang banggitin ang mga pangalan ng mga nakakadismaya, nakakawalang-gana at nakakagalit, lalo na sa panig ng depensa at ng mga Senador na tila kampi rito.

Nahubaran at lantad na ang kani-kanyang ugali at pagkatao ng iba't ibang may papel sa Senate Impeachment Trial. Mahigit labindalawang araw nang naghaharap ang depensa at prosekusyon sa harap ng mga Senador bilang mga hurado.

Iniharap na rin ang mga personal bank account, gayundin ang mga rekord mula sa AMLAC at BIR, ng Bise Presidente at ng kanyang asawang si Mans Carpio. Nakita at narinig na ng publiko ang mga kataka-takang halaga na pumasok at lumabas sa mga bank account ng mag-asawang Duterte-Carpio. Nakita rin kung paano inilabas ang iba't ibang halaga mula sa confidential funds ng Bise Presidente.

Napanood kamakailan ang mahabang pagtatanong ni Senador Robin Padilla sa isang kawani ng COA. Umabot ang kanyang mga tanong sa kung nakarating na ang COA officer sa BARMM at kung nakapaglibot na siya sa mga bundok ng Sierra Madre. Sa huli, tinanong pa ni Padilla ang opisyal ng COA kung naiintindihan niya at kung ano ang ibig sabihin ng “confidential.”

Mahabang pagtatanong iyon na nakapagdulot ng pagkainis, kasabay ng matiyaga at mahinahong pagsagot ng opisyal ng COA. Malinaw na tila malayo sa pangunahing papel ng opisyal ng COA ang ilan sa mga tanong. Mabuti na lamang at kapansin-pansin ang kahandaan at kahinahunan ng naturang opisyal.

Naalala natin sa pagkakataong ito ang komentaryo ng batikang Amerikanong tennis player na si Serena Williams tungkol kay Alex Eala:

“I was struck not by her power, not by her technique, not by any of the things scouts and coaches talk about when they describe a prospect. What struck me was her composure. I mean there is a particular kind of stillness that the greatest players have, a quality that you cannot teach and cannot manufacture.”

Namangha si Serena hindi lamang sa kakayahan ni Alex, kundi higit sa lahat sa kanyang kahinahunan o “composure”—isang uri ng kapanatagan na hindi basta natututunan o nalilikha.

Sa kabilang banda, puno ng kayabangan at kahambugan ang himig ng ilang nagsasalita sa Impeachment Trial. May malalim na galit at pagkamuhing tila kumukulo sa loob.

Tunog ng mga batang barumbado—mga “spoiled brats,” ika nga.

Dagdag pa ni Serena:

“…She’s 21 but she is so mature…the way she reads a situation, the way she adjusts mid-match without losing the thread of what she is trying to do. That is not a 21-year-old’s mind. Honestly, that is not a quality that all veterans carry. There are players who compete for 15 years but do not develop the in-match intelligence that Alex shows naturally…”

Maaari bang maging higit na may isip at hinog sa pagkatao ang isang batang tulad ni Alex Eala, na 21 taong gulang pa lamang?

Sa ilalim ng marami nang tagumpay ni Alex, muling lumilitaw ang tinatawag nating “best, beautiful and basic” tungkol sa ating pagkatao. Ipinakikita ni Alex kung ano ang likas, pinakamagaling at pinakamaganda sa pagkataong Pilipino—mga katangiang tila nahihirapan na tayong makita sa ating bansa.

Hindi nangangahulugang tuluyan nang nawala ang mga katangiang ito. Marahil, nakalimutan lamang at napabayaan ng marami. Sa halip, nahumaling tayo sa mga ugali at pagpapahalagang bunga ng unti-unting pagsira sa tunay na dangal at kadakilaan ng bawat mamamayan.

Sapat nang balikan natin ang Kartilyang isinulat noong 1896 ni Emilio Jacinto bilang gabay sa mga bagong kasapi ng Katipunan. Marahil, kailangan nating balikan ang mga aral nito at pagnilayan ang isang bagong Kartilya na maaaring ibatay sa mga ipinakikitang halimbawa ng mga bagong bayani tulad ni Alex Eala at marami pang iba.

Salamat, Alex, sa sariwang hangin ng iyong malinis at wagas na pagmamahal—hindi lamang sa tennis kundi, higit sa lahat, sa iyong Inang Bayan at mga kababayan.

Salamat, Alex, sa liwanag na sumisilip sa pusikit na kadiliman ng kasalukuyan. Salamat sa bawat salitang binibitawan mong pumupukaw sa ating likas na kagandahan at kadakilaan na tila nahihiyang muling magpakita.

Salamat sa unti-unting pagbabalik ng tiwala, lakas ng loob at pagmamahal na pilit na pinapatay ng mga kalaban ng Liwanag at Kabayanihan.