Ilegal ang pagpalit o pagbabago ng kontrata ng OFW

ni Atty. Persida Rueda-Acosta @Magtanong Kay Attorney | March 14, 2026

Dear Chief Acosta,

Isa akong OFW sa Middle East. Bago ako umalis ng Pilipinas, may pinirmahan na akong kontrata. Pero ang pinagtataka ko, ilang buwan na ako rito nang sinabihan akong kailangan kong muling pumirma ng panibagong kontrata. Legal po ba ito? Maaari ba akong pilitin na pumirma ng bagong kontrata? — Sydney

---

Dear Sydney,

Binibigyan ng ating Saligang Batas ang lahat ng miyembro ng sektor ng paggawa, kahit pa saan sila naka-deploy, ng ganap na proteksyon at mga karapatan para sa kanilang kapakanan. Alinsunod dito, isinabatas ang Republic Act (R.A.) No. 8042 (The Migrant Workers and Overseas Filipinos Act of 1995), na inamiyendahan ng Republic Act (R.A.) No. 10022, upang itatag ang mga patakaran sa pagtatrabaho sa ibang bansa at magtatag ng mas mataas na pamantayan ng proteksyon at pagtataguyod ng kapakanan ng mga migranteng manggagawa. Kaugnay nito, ipinagbabawal ng Section 6 (i) ng nasabing batas ang pagpapalit o pagbabago sa kontrata nang walang pahintulot ng Department of Labor and Employment (DOLE):

“(i) To substitute or alter to the prejudice of the worker, employment contracts approved and verified by the Department of Labor and Employment from the time of actual signing thereof by the parties up to and including the period of the expiration of the same without the approval of the Department of Labor and Employment;”

Sa kasong Fil-Expat Placement Agency, Inc. vs. Maria Antoniette Cudal Lee, G.R. No. 250439, 22 Setyembre 2020, sa panulat ni Kagalang-galang na Kasamang Mahistrado Mario V. Lopez, pinagtibay ng ating Korte Suprema ang karapatan ng mga Overseas Filipino Workers (OFW):

“The substitution or alteration of employment contracts is listed as a prohibited practice under Article 34(i) of the Labor Code. Indeed, "[t]o substitute or alter to the prejudice of the worker, employment contracts approved and verified by the Department of Labor and Employment from the time of actual signing thereof by the parties up to and including the period of the expiration of the same without the approval of the Department of Labor and Employment" - is considered an act of "illegal recruitment" under Section 6(i) of Republic Act No. 8042. 

The employer's claim that the new contract was for uniformity and was not intended to alter the terms of the original contract is implausible. It is illogical to require Maria Antoniette to sign a second contract if it would only restate the contents of the Philippine Overseas Employment Administration (POEA)-approved employment contract, which incidentally, already included an Arabic translation of the agreed terms and conditions between the employee and the foreign employer."

Malinaw sa kasong nabanggit na ang pagpapalit o pagbabago ng mga kontrata sa pagtatrabaho ay ilegal. Itinuturing ito na akto ng illegal recruitment at pinarurusahan sa ilalim ng ating batas.  

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Mga korup sa flood control scandal, safe na, patapos na ang operasyon ng ICI

ni Pablo Hernandez @Prangkahan | March 14, 2026

SANA LAHAT NG VICE GOVERNOR TULAD NI BULACAN GOV. ALEX CASTRO NA UMAAKSYON AGAD SA PANAHON NG KRISIS – Sa panahon ng krisis sa langis dulot ng digmaan sa Middle East, agad na gumawa ng dalawang resolusyon ang Bulacan Vice Governor na si Alex Castro. Una, ang Resolution No. 20-2026 na humihiling sa mga lungsod at munisipalidad ng lalawigan na kanselahin ang business permit ng mga establisimyento na sangkot sa overpricing, profiteering, hoarding, at mga gasoline station na tumatangging magbenta ng krudo.

Pangalawa, ang Resolution No. 21-2026 na humihiling sa national government na ipatupad agad ang fuel subsidy para sa mga magsasaka, mangingisda, at mga driver ng pampublikong transportasyon sa probinsya.

Sana’y lahat ng vice governor ay tulad ni Gov. Castro na agad kumikilos sa panahon ng krisis upang maibsan ang epekto nito sa kabuhayan ng mamamayan. Period!

XXX

LUNDAGAN SA TUWA ANG MGA KURAKOT NA HINDI PA NAIIMBESTIGAHAN KASI LUSOT NA SILA SA FLOOD CONTROL SCANDAL DAHIL TAPOS NA ANG OPERASYON NG ICI SA MARCH 3 – Inanunsyo ni Independent Commission for Infrastructure (ICI) Chairman Andres Reyes Jr. na sa March 31, 2026, o sa katapusan ng buwan, ay matatapos na ang operasyon ng komisyon.

Bad news ito sa taumbayan dahil halos lahat ng 82 probinsya sa bansa ay may naganap na ghost, substandard, at incomplete na flood control projects. Sa ngayon, tanging Bulacan, Oriental Mindoro, at Davao Occidental pa lamang ang naimbestigahan, at sa pagwawakas ng ICI, tapos na rin ang papel ng komisyon sa pagtuklas sa mga sangkot sa flood control scandal.

Dahil sa anunsyong ito, pihado namang naglulundag sa tuwa ang maraming kurakot na politiko, Department of Public Works and Highways (DPWH) officials, at contractors sa 79 probinsya—dahil hindi na sila iimbestigahan ng ICI at lusot na sa flood control scandal. Tsk!

XXX

SANA MAY MAGPANUKALA RIN NA ANG MGA KAKANDIDATO SA ELEKSYON AY DAPAT MAGPA-PSYCHO TEST – Desidido ang Senado at Kamara na maipasa ang panukalang batas na anti-political dynasty.

Sana, kapag ganap nang batas ang anti-political dynasty, ang susunod na panukala ng Senado at Kamara ay obligahin ang lahat ng kakandidato sa halalan na magpa-psycho test. Kasabay nito, isasama ng mga kandidato sa pagsusumite ng kanilang certificate of candidacy (COC) ang resulta ng kanilang mental health records upang matiyak na sila ay nasa wastong pag-iisip.

Sa totoo lang, may ilang kandidato na nananalo sa halalan na para bang may “sayad” sa pag-iisip—kapag humarap at nagsalita sa publiko, parang mga “krung-krung.” Boom!

XXX

DEPENSA NI ATTY. TOPACIO KAY CONG. SUNTAY, SABLAY KASI PATI SIYA KINASUHAN NG DISBARMENT SA IBP – Sablay ang pagdepensa ni Atty. Ferdinand Topacio kay Quezon City 2nd District Rep. Bong Suntay nang sabihin niyang hindi daw dapat kasuhan ang kongresista dahil isinapubliko lang daw ng lawmaker ang pagnanasa nito kay actress Anne Curtis, at wala naman daw pisikal na harassment na ginawa sa aktres. Ayon pa sa abogado, siya rin daw ay nagkaroon ng pagnanasa kay Gabriela Partylist Rep. Sarah Elago nang minsang madikit daw siya dito at maamoy ang amoy ng congresswoman.

Kaya natin nasabing sablay ang depensa ni Atty. Topacio kay Cong. Suntay—dahil hindi nagustuhan ni Cong. Sarah ang “bastos” na pahayag ng abogado tungkol sa kanya. Resulta nito, sinampahan siya ng congresswoman ng disbarment case sa Integrated Bar of the Philippines. Period!

Hindi praktikal ang pag-alis ng VAT at excise tax, apektado ang serbisyo-publiko — Quimbo

ni Leonida Sison @Boses | March 14, 2026

Nakakabahala ang patuloy na pagtaas ng presyo ng langis, lalo na para sa ordinaryong mamamayan na araw-araw na umaasa sa transportasyon at mga produktong may kaugnayan sa petrolyo. 

Sa bawat paggalaw ng presyo ng gasolina at diesel, direktang naaapektuhan ang gastusin ng bawat pamilya, mula pamasahe hanggang sa presyo ng pagkain. Dahil dito, lumalakas ang panawagan ng ilang sektor na suspendihin ang value-added tax o VAT sa mga produktong petrolyo upang kahit paano ay gumaan ang pasanin ng publiko.

Gayunman, ayon kay Miro Quimbo, hindi praktikal sa kasalukuyang sitwasyon ang ganitong hakbang. Ipinaliwanag ng kongresista na ang suspensyon ng VAT ay maaaring magdulot ng malaking kakulangan sa kita ng pamahalaan. 

Kapag bumaba ang koleksyon ng buwis, maaaring maapektuhan ang pondo para sa mga serbisyong pampubliko tulad ng imprastraktura, edukasyon, at iba pang programang panlipunan na mahalaga rin sa taumbayan.

Binigyang-diin ni Quimbo na hindi lamang mga konsyumer ang makikinabang kung aalisin ang VAT sa fuel. 

Pati malalaking kumpanya ng langis at mga negosyong kasali sa supply chain ay maaaring makinabang dahil nagbabayad din sila ng VAT sa bawat yugto ng transaksyon bago pa makarating ang produkto sa mga gasolinahan. Dahil dito, hindi garantisadong ang buong benepisyo ng VAT suspension ay mararamdaman ng ordinaryong motorista o komyuter.

Dagdag pa niya, kahit alisin ang VAT, hindi rin agad bababa nang eksaktong 12 porsyento ang presyo ng langis. 

Ang dahilan ay ang VAT ay ipinapataw sa iba’t ibang bahagi ng supply chain, kaya hindi ganap na mapupunta sa konsyumer ang inaasahang bawas sa presyo.

Sa gitna ng tumitinding tensyon sa Middle East na isa sa mga dahilan ng pagtaas ng presyo ng langis sa pandaigdigang merkado, may mga grupo at mambabatas, kabilang ang Makabayan bloc, na patuloy na nananawagan na suspendihin hindi lamang ang VAT kundi pati ang excise tax sa fuel. 

Sa kasalukuyan, ang excise tax ay nasa humigit-kumulang ₱6 kada litro ng diesel at ₱10 kada litro ng gasolina.

Samantala, inaprubahan na ng House of Representatives of the Philippines sa ikalawang pagbasa ang House Bill 8418, na magbibigay kapangyarihan kay Ferdinand Marcos Jr. na suspindihin ang koleksiyon ng excise tax sa fuel products sa panahon ng national emergency.

Sa ganang akin, malinaw na ang usapin ng buwis sa petrolyo ay hindi simpleng desisyon. 

Kailangang timbangin ang kapakanan ng mamamayan at ang kakayahan ng pamahalaan na pondohan ang mahahalagang programa.

Ang mahalaga ay ang pagkakaroon ng malinaw at praktikal na solusyon sa patuloy na pagtaas ng presyo ng langis. 

Ang pananaw ni Quimbo ay paalala na ang bawat polisiya ay may domino effect sa ekonomiya. Bagama’t nais ng publiko ang agarang ginhawa sa presyo ng fuel, mahalaga ring isaalang-alang ang pangmatagalang epekto nito sa pondo ng bansa. 

Dahil ang tunay na hamon ay kung paano makakahanap ng balanseng hakbang na kapwa makatutulong sa mamamayan at sa katatagan ng ekonomiya ng bansa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com