Nationwide safety drill, 'di tuloy — DepEd

by Mervin Reyes @News | August 25, 2026

Photo: File / DepEd PH

Ipinagpaliban ng Department of Education (DepEd) ang nationwide safety drill para sa “active attack incidents” na nakatakda sa Agosto 25 sa mga pampubliko at pribadong elementary at secondary schools.

Ayon sa DepEd, ililipat ang drill sa unang linggo ng Setyembre 2026 dahil sa masamang panahon at kanselasyon ng face-to-face classes sa ilang lugar. 

Sinabi ng DepEd na gagamitin ang dagdag na panahon upang maiayon ang aktibidad sa rekomendasyon ng mga eksperto sa weather, disaster preparedness, child protection at psychosocial support.

Online gambling company, pinagmulta ng P1M... Pa-iPhone ni Ivana, ipina-stop ng Pagcor

by Mervin Reyes @News | August 25, 2026

Photo: Circulated / YT

Isang milyong pisong multa ang ipinataw ng Philippine Amusement and Gaming Corporation (Pagcor) sa isang online gambling company na konektado sa celebrity na si Ivana Alawi dahil sa isinagawang cellphone giveaway, at inatasan din itong itigil ang naturang promosyon.

Ayon kay Pagcor Chairperson Alejandro Tengco nitong Lunes, hindi humingi ng pahintulot sa ahensya ang naturang kumpanya bago isagawa ang promosyon.

Inihayag ni Tengco ang hakbang sa pagdinig ng House Committee on Appropriations kaugnay ng panukalang 2027 budget ng Pagcor matapos magpahayag ng pagkabahala si Kamanggagawa Partylist Rep. Elijah Fernando sa dumaraming content creators at influencers na nag-eendorso ng online gambling.

Binanggit ni Fernando ang isinagawang giveaway ni Alawi ng 100 high-end cellphone. Para maging kwalipikado sa giveaway, kinakailangang i-like ng mga interesadong sumali ang Facebook page ng gambling platform.

Sa isang video na inilabas ni Alawi sa kanyang Facebook page noong Hulyo 15, sinabi niyang umabot sa mahigit P4 milyon ang ginastos sa pagbili ng 100 high-end cellphone.

Pinasalamatan din niya ang online gambling company na kanyang iniendorso, na aniya ay tumulong sa pagbili ng mga cellphone.

Nagbabala rin si Tengco na mas mabigat na parusa ang ipapataw sa kumpanya, kabilang ang posibleng suspensyon o pagkansela ng lisensya, kung mauulit ang naturang paglabag.

Ipinaliwanag niya na may kapangyarihan ang Pagcor na parusahan ang gambling company dahil legal itong nagpapatakbo at lisensyado ng ahensya.

Gayunman, sinabi ni Tengco na nasa 50% ng mga online gambling operator sa bansa ay ilegal.

Tinanong din ni Fernando si Tengco tungkol sa mga mekanismo ng Pagcor para mapanagot ang mga influencer at content creator na nag-eendorso ng mga online gambling platform.

Ayon kay Tengco, nakikipag-ugnayan ang Pagcor sa Department of Information and Communications Technology (DICT), National Telecommunications Commission (NTC), at Cybercrime Investigation and Coordinating Center (CICC) upang magsampa ng mga kaso laban sa mga nag-eendorso ng ilegal na online gambling sites.

Sinabi rin niya na marami nang influencer at content creator ang umatras sa kanilang mga endorsement at lumipat sa mga legal na operator.

P2.31 taas-presyo sa diesel, P1.08 gasoline, P0.95 kerosene

ni Gina Pleñago @News | August 23, 2026

Photo: File

May panibagong taas-presyo sa petrolyo bago matapos ang Agosto.

Sa press briefing, inanunsyo ni Energy Usec. Sandy Sales na sisipa ng P1.08 ang kada litro ng gasolina, P2.31 sa diesel at P0.95 sa kerosene.

Paalala ng opisyal, bawal lumagpas sa inanunsyong presyo ng DOE ang dapat na ipatupad ng mga oil company simula ngayong araw ng Martes.

Mahigit 47 araw pa, ani Sales, ang fuel inventory ng bansa hanggang noong Agosto 21.

Tatagal pa ng 44 araw ang suplay ng gasolina, 47 araw ang diesel, 121 araw ang kerosene, 75 araw ang jet fuel, 54 araw ang fuel oil at 34 araw ang LPG.

Inanunsyo naman ni DOE-Oil Industry Management Bureau Director Rino Abad na magpapatuloy ang fuel subsidy program ng gobyerno sa Setyembre.