29 estudyante, na-food poison

ni Mai Ancheta @News | August 27, 2026

Photo: Sto. Tomas Information Office

Isinugod sa ospital ang 29 na mag-aaral ng Tulalian National High School sa Sto. Tomas, Davao del Norte matapos makaranas ng sintomas ng food poisoning nitong Lunes, Agosto 24.

Batay sa imbestigasyon ng Municipal Health Office, ang mga estudyante ay nakaranas ng pananakit ng tiyan, pagkahilo at pagsusuka.

Isinailalim na sa pagsusuri ang mga pagkain sa school canteen at paninda ng mga vendor sa paligid ng paaralan upang matukoy kung anong partikular na pagkain ang nakapinsala sa mga estudyante.

Mula sa bilang na 29, nakalabas na sa pagamutan ang 24 na estudyante at lima na lamang ang nanatili sa ospital at inoobserbahan ang kondisyon.

Hinihintay pa ng mga awtoridad ang resulta ng laboratory sa mga sinuring pagkain na nakaapekto sa mga estudyante.

Lolo, lola 4-anyos na apo, niratrat

ni Janice Baricuatro @News | August 27, 2026

Photo: File

Tatlong katao, kabilang ang isang 4-anyos na bata, ang nasawi matapos pagbabarilin ng hindi pa nakikilalang suspek ang kanilang bahay sa Sitio Buho, Brgy. Daine 1, Indang, Cavite, kamakalawa ng gabi.

Kinilala ang mga biktima sa alyas Franco, 63; Juanita, 62, at isang 4-anyos na bata. Lumalabas sa inisyal na imbestigasyon na alas-10:50 ng gabi nang makarinig ng sunud-

sunod na putok ang isang residente mula sa direksiyon ng bahay ng mga biktima. 

Naiulat ang insidente sa barangay at alas-12:30 ng hatinggabi nang makarating ang impormasyon sa Indang MPS. 

Agad na rumesponde ang mga pulis at nakita ang tatlo sa loob ng kanilang bahay na nipa sa isang liblib na lugar.

Patuloy ang imbestigasyon, kabilang ang pagkuha ng CCTV footage at pakikipanayam sa mga residente, upang matukoy ang suspek at motibo sa pamamaril.

P36M drugs, buking sa parcel

ni Gina Pleñago @News | August 26, 2026

Photo: Ang mga nakuhang iba't ibang droga ng Bureau of Customs (BoC) mula sa 13 abandonadong parcel sa Central Mail Exchange Center sa Pasay. (Gina Pleñago)

Tinatayang mahigit sa P36.1 milyong halaga ng iba't ibang uri ng ilegal na droga ang nasabat ng Bureau of Customs (BoC) mula sa 13 inbound abandonadong parcel sa Central Mail Exchange Center sa Pasay City.

Ang mga naturang parcel ay nagmula sa Netherlands, Estados Unidos, Alemanya, India, Thailand at Poland, na naka-consingnee sa Pasay, Parañaque, Bacoor, Cavite, Tanza, Maynila, Quezon, Rizal at Mandaluyong.

Ang mga kahina-hinalang imahe na nakita sa X-ray screening ng mga tauhan ng Customs ang nag-udyok ng karagdagang inspeksyon.

Nakuha mula sa 13 pakete ang humigit-kumulang 9,695 gramo ng ilegal na droga at 3,756 na hinihinalang ecstasy tablets, marijuana kush, shabu at ketamine na nagkakahalaga ng P36,159,900.

Ang mga nakumpiskang droga ay dinala ng Philippine Drug Enforcement Agency (PDEA) sa National Office sa Lungsod ng Quezon para sa nararapat na legal na imbestigasyon at tamang disposition.