Working student, ninakawan ng motor, pinatay

ni Eli San Miguel @News | Oct. 10, 2024

Photo: Allan Vincent Eugenio - Pasig Police

Patay ang isang college student matapos barilin noong maagang bahagi ng Lunes, sa harap ng kanyang tahanan sa Barangay Sumilang, Pasig City, matapos umuwi mula sa kanyang sideline bilang delivery rider. Kinilala ang biktima na si Allan Vincent Eugenio, 22.

Dumating ang dalawang lalaki habang nagpaparada ng kanyang motorsiklo si Eugenio, isa sa kanila ang naglabas ng baril at pinaputukan siya.

Tumakas naman ang mga suspek kasama ang kanyang motorsiklo. Natagpuan ng kanyang ina si Eugenio na nakahiga at duguan, at bagaman dinala siya sa ospital, namatay pa rin siya sa 10 sugat mula sa bala.

Sinabi ng pulisya na talagang motorsiklo ng biktima ang target ng mga suspek. Naaresto ng Pasig City Police ang dalawang suspek, na may edad 19 at 20, sa loob ng wala pang 24 na oras.

Ayon kay PCol. Hendrix Mangaldan, hepe ng Pasig City Police, may mga naunang kaso na ng carnapping at attempted homicide ang mga suspek. Kinasuhan ang mga suspek ng paglabag sa batas sa carnapping, illegal possession of firearms, at murder.

P-BBM nakipagpulong sa gabinete sa gitna ng gusot sa Middle East

ni Angela Fernando @News | Oct. 9, 2024

Photo: Presidential Communications Office

Nagdaos ng online meeting si Pres. Ferdinand "Bongbong" Marcos Jr. kasama ang ilang kalihim ng gabinete sa sidelines ng 44th and 45th ASEAN Summit and Related Summits upang talakayin ang sitwasyon sa Middle East.

Ayon sa Presidential Communications Office nitong Miyerkules, dumalo sa Zoom meeting sina Executive Secretary Lucas Bersamin, Foreign Affairs Secretary Enrique Manalo, Defense Secretary Gilberto Teodoro, Migrant Workers Secretary Hans Leo Cacdac, at National Security Adviser Eduardo Año.

Sa kanyang talumpati sa meet and greet kasama ang Pinoy community sa Lao PDR, binanggit ni Marcos na patuloy ang kanyang pakikipag-ugnayan sa mga kinauukulang opisyal tungkol sa repatriation ng mga Pilipinong naapektuhan ng tensyon sa Israel at Lebanon.

Magugunitang pinayuhan ang mga Pilipino sa Israel na iwasan ang ilang lugar sa Middle East, kabilang ang ilang bahagi ng Israel at Lebanon, dahil sa lumalalang gusot sa rehiyon. Ang paalala ay dumating matapos magpasabog ng bomba ang Israel sa mga target ng Hezbollah sa Lebanon at Gaza Strip.

'Pinas at SK, nagkaisa para sa feasibility study ng Bataan Nuclear Power Plant

ni Eli San Miguel @Overseas News | Oct. 7, 2024

Nilagdaan ng 'Pinas at South Korea (SK) ang isang kasunduan na nagsusulong ng feasibility study para sa Bataan Nuclear Power Plant (BNPP).

Naging saksi sina Pangulong Ferdinand "Bongbong" Marcos Jr. at Pangulong Yoon Suk Yeol ng SK sa pagpresenta ng mga nilagdaang kasunduan sa pagbisita nila sa Palasyo ng Malacañang.

Patuloy na umaasa si Marcos kaugnay sa BNPP na matatandaang isang proyekto nu'ng panahon ng administrasyon ng kanyang yumaong ama, si Ferdinand Marcos Sr., na ipinagpaliban nang mahigit tatlong dekada.