LPG sumabog... 3-anyos, 3 pa, na-trap sa sunog

ni Gina Pleñago @News | August 22, 2026

Photo: Courtesy Brgy. 106 Pasay CCTV

Apat ang kumpirmadong patay, kabilang ang tatlong taong gulang na paslit, habang apat ang sugatan sa sunog na sumiklab sa Pasay City, Biyernes ng hapon.

Hindi pa tinukoy ng mga tauhan ng Pasay Bureau of Protection (BFP) ang pagkakakilanlan ng mga biktima na isang lolo, isang lola, tatlong taong gulang na bata at kanyang tiyahin na pawang na-trap sa sunog na nagsimula ala-1:35 ng hapon sa bahay ng mga nasawi sa Tengco St., Tramo, Brgy. 107.

Isinugod naman sa pagamutan ang apat na nasugatan, kabilang ang isang babae na nalapnos ang malaking bahagi ng katawan habang dalawa pang babae at isang lalaki ang nagtamo rin ng sugat.

Batay sa inisyal na imbestigasyon, bumagsak ang ikalawang palapag kaya naging pahirapan ang pagrekober sa mga katawan.

Tinatayang nasa 30 pamilya naman ang apektado ng sunog.

Iniimbestigahan pa ang pinagmulan ng sunog at halaga ng mga napinsalang ari-arian subalit may nagsasabing sumabog na liquified petroleum gas (LPG) ang narinig bago ang sunog.

May tama ng bala sa ulo... Ina at edad 4 at 9 na mga anak, patay sa loob ng sasakyan

by Jeff Tumbado @News | August 22, 2026

Photo: Nakatanggap ng tawag bandang alas-2 ng hapon nitong Huwebes hinggil sa isang sasakyang matagal nang nakaparada sa lugar. Nang puntahan at suriin nila ang sasakyan, nakita nila sa loob ang mag-iina na wala nang buhay. (Circulated)

Natagpuang patay ang isang 31-anyos na ina at ang dalawa nitong anak na pawang may mga tama ng bala sa ulo habang nasa loob ng isang nakaparadang sasakyan sa isang liblib na lugar sa Brgy. Talacsan, San Rafael, Bulacan.

Batay sa paunang impormasyon ng pulisya, tatlong basyo ng bala mula sa 9mm na baril ang narekober sa crime scene.

Nakita rin sa loob ng sasakyan ang isang 9mm na handgun, ngunit patuloy pang inaalam ng mga imbestigador kung mula sa naturang baril ang mga basyo ng bala.

Iniulat na lisensyado ang baril at nakarehistro sa pangalan ng ina, na nagtatrabaho online para sa isang kumpanyang nakabase sa Estados Unidos.

Sinisiyasat din ng mga awtoridad ang kalagayan ng mga biktima bago ang insidente.

Kabilang sa tinitingnang anggulo ang impormasyon na nakaranas umano ng depresyon at problemang pinansiyal ang babae.

Gayunman, nilinaw ng pulisya na isa lamang ito sa mga anggulong kanilang sinusuri at wala pang nakukumpirmang motibo sa insidente.

Tinutukoy din ng mga awtoridad ang mga huling nakausap ng mga biktima at isasailalim sa imbestigasyon ang kanilang mga huling komunikasyon bago sila natagpuang patay.

Sa ngayon, sinabi ng pulisya na wala pa silang itinuturing na person of interest kaugnay ng insidente.

Ayon sa mga opisyal ng barangay, nakatanggap sila ng tawag bandang alas-2 ng hapon nitong Huwebes hinggil sa isang sasakyang matagal nang nakaparada sa lugar.

Nang puntahan at suriin nila ang sasakyan, nakita nila sa loob ang mag-iina na wala nang buhay.

Ang dalawang anak ay siyam at apat na taong gulang

Patuloy ang imbestigasyon ng mga awtoridad sa insidente

Mag-asawa, pinagbabaril ng mga nakamotor

by Jeff Tumbado @News | August 22, 2026

Photo: File

Patay ang isang misis habang sugatan naman ang kanyang asawa matapos pagbabarilin ng mga nakamotorsiklong salarin sa Brgy. Inug-ug sa Pikit, Cotabato, Biyernes ng umaga.

Kinilala ang mga biktima na sina Orlan Saguta-on, 34, at Colie Mar, 29, kapwa residente ng Brgy. Amas, Kidapawan City.

Minamaneho ni Orlan ang kanilang multicab mula Brgy. Amas patungong Brgy. Takepan upang maghatid sana ng mga punla ng niyog nang dikitan sila ng mga suspek na sakay ng motor.

Bigla umanong pinagbabaril ang mag-asawa, na kapwa nagtamo ng mga tama ng bala sa iba’t ibang bahagi ng kanilang katawan. Nasawi agad si Colie habang isinugod naman sa pagamutan si Orlan.

Patuloy naman ang imbestigasyon sa krimen.