Kahit 2nd cousin pa… SANDRO, UMAMIN KUNG BAKIT ‘DI CLOSE KINA ATASHA AT ANDRES

ni Melba R. Llanera @Insider | January 24, 2026

Photo: File / Robi Domingo - FB

SIiniguro sa amin ni Sandro Muhlach na walang kompetisyon sa pagitan nila ng second cousin niyang si Andres Muhlach at masaya siya sa magandang takbo ng career nito at ng kakambal na si Atasha Muhlach. 

Ayon kay Sandro, bata pa lang ay nakitaan na niya ng potensiyal si Andres, lalo’t super-guwapo at may star quality. 

Hindi rin niya pinagtatakhan ang mainit na pagtanggap ng publiko sa AshDres o Andres-Ashtine Olviga team-up. 

Nabasa ni Sandro ang mga komento ng publiko sa tambalan ng dalawa at kapansin-pansin umano ang kanilang chemistry.

Aminado rin si Sandro na mas close siya kay Iggy Boy Muhlach kaysa kina Andres at Atasha, at dulot na rin ito ng layo ng tirahan nila at ng busy schedule ng bawat isa. 

Huli silang nagkasama-sama sa Filipino Academy of Movie Arts and Sciences (FAMAS) kung saan nasa iisang lamesa sila at nagkumustahan. Hindi rin niya inakala na mahusay na TV host si Atasha, na naipakita nito sa noontime show na Eat… Bulaga! (EB!).

Sa ngayon ay abala si Sandro sa pagtulong sa pagpapalago ng kanilang negosyo na Megamelt Bakeshop habang naghihintay ng mga proyektong gagawin niya ngayong 2026. 

Patuloy din ang kanyang pagdarasal na sana ay manalo ang mga kasong isinampa niya laban sa dalawang independent contractors ng GMA-7 kaugnay ng sexual harassment sa kanya.

---

Nasa history na ‘yang ginawa niya…

SIKAT NA AKTRES, BIGLANG IPINATIGIL ANG INTERVIEW NG PRESS, NAKASIMANGOT PA

• 

BLIND ITEM:

SINO ang sikat na aktres na ito na naging dahilan kung bakit hindi na pinatapos ang interview ng mga TV crew sa isang high-rating primetime serye ng isang

network? 

Bago dumating ang sikat na aktres ay malayang nakaka-interview sa loob ng venue ang mga TV crew. Pero nang dumating siya ay kinausap ng staff ng serye ang mga reporters at sinabihang tapos na ang mga interviews.

Nakausap ng isang reporter ang naturang staff at tinanong kung sino ang nagreklamo. Inamin naman ng staff na ang sikat na aktres nga at nakasimangot na agad nang makita sila.

Sino ang naturang aktres? Sikat siya noong panahon niya at ngayon ay pahinga na sa paggawa ng mga proyekto.

---

SAMANTALA, ibinahagi ni Debbie Lopez na ang mga aktor na sina JM de Guzman at Joseph Marco ang kanyang showbiz crushes. 

Isang singer, host, cosplayer at Radyo Agila anchor, nakilala si Debbie sa Visayan song na Ang Higugmaon Ka na tumutukoy sa isang unconditional love. 

Si Ice Seguerra naman ang nais niyang maka-collaborate kung mabibigyan ng pagkakataon. 

Ayon kay Debbie, nakikita niyang magiging komportable siya rito, bukod pa sa gusto niya ang pagiging acoustic singer nito at hindi mabirit. Kung magkakaroon siya ng concert, si Ice rin ang gusto niyang maging special guest.

Nakapag-guest na si Debbie sa Letters and Music (LAM) at NET25 noong nakaraang taon, at nitong nakaraang Lunes ay sa morning show ng istasyon na Kada Umaga, kung saan masayang-masaya siya sa naging guesting. 

Magkakaroon din siya ng collaboration sa kilalang composer na si Mon del Rosario, ang may likha ng mga kantang Somewhere in My Past, Sino ang Baliw, Minsan, at Kay Sarap Isipin.

Basta okay daw sina Ria at Zanjoe… ROBI, NAGSALITA NA SA AWAY NILA NI JOHN LLOYD

ni Melba R. Llanera @Insider | January 21, 2026

Photo: File / Robi Domingo - FB

“My stand is as long as Ria and Zanjoe are okay, then I’m okay. ‘Yun ang pinakamahalaga. The Atayde family is okay, the Marudo family is okay. For me, there’s nothing to worry about,” ito ang naging pahayag ni Robi Domingo sa eksklusibong panayam ng PEP.ph nang tanungin ang Kapamilya TV host tungkol sa nabalitang hindi pagkakaunawaan sa pagitan nila ni John Lloyd Cruz na naganap sa nakaraang after party ng church wedding nina Ria Atayde at Zanjoe Marudo noong nakaraang December 22, 2025.

Ayon sa lumabas na balita, si Robi ang tumayong host nu'ng araw na iyon at matapos tanungin si Ria kung ano ang pakiramdam na maging Mrs. Marudo ay sinundan niya ito ng biro kay Zanjoe at tinawag na ‘Mr. Atayde’. 

Diumano, hindi ito nagustuhan ng A-list actor. Pagkababa ni Robi sa entablado at pagpunta nito sa bar area ay lumapit si John Lloyd at nagtaas umano ng boses at kinompronta si Robi, dahil hindi niya nagustuhan ang sinabi nito na wala raw sa lugar.

Diumano ay sumagot si Robi at nagtanong kung may isyu ba sa kanila ni John Lloyd at dito ay nagpalitan na sila ng mga salita. Nagulat ang maraming bisita at balita na isa sa mga umawat at nagpababa ng tensiyon ay si Donny Pangilinan. Pinagsabihan umano ang dalawa na igalang ang kasal ng mag-asawa at dito ay unti-unti ring bumaba ang tensiyon.

Sa kabilang banda ay excited naman ang Kapamilya TV host dahil 20 weeks nang nagdadalantao ang asawa nitong si Maiqui Pineda at inaasahang manganganak sa June o July. 

Bukas na aklat naman na may dermatomyositis si Maiqui, isang autoimmune disease kung saan nagkakaroon ng panghihina ng mga kalamnan, inflammation o pamamaga at skin rashes. Wala ring lunas ang naturang karamdaman at bihira ito.

Ibinahagi ni Robi na sumailalim muna sa treatment ang asawa at nang bigyan sila ng go signal ng doktor na puwede na silang mag-anak, makalipas ang ilang buwan ay nagbuntis na nga si Maiqui. 

Ayon pa sa TV host ay nagkaroon ng clinical remission ang kanyang asawa. Hindi man masasabing tuluyang nawala ang sakit, maayos naman ang kalusugan ni Maiqui at aktibo pa rin ito at pumapasok sa kanyang trabaho.

Nakaranas ng morning sickness si Maiqui noong first trimester ng pagbubuntis ngunit sa kasalukuyan ay nabawasan na ito. 

Wala rin itong partikular na pinaglilihian at nahihilig lamang sa maaalat at matatamis na pagkain.

Sumang-ayon din si Robi nang tanungin kung lalo bang lumalim ang pagmamahalan nila ni Maiqui. Matagal na umanong subok ang kanilang relasyon dahil hindi niya iniwan ang asawa at pinakasalan pa rin ito sa kabila ng autoimmune disease nito.

Sa ngayon ay trabaho-bahay ang routine ng Kapamilya TV host. Bukod sa nais niyang laging updated sa kalagayan ni Maiqui ay lilipat din ng bahay ang mag-asawa at kasalukuyan nila itong ipinapa-renovate. 

Tuluy-tuloy din ang mga proyekto ni Robi Domingo sa ABS-CBN kung saan regular siyang napapanood sa Pinoy Big Brother (PBB) at A.S.A.P.

---

MASAYA at lalong inspirado namang maglabas ng mga bagong original compositions ang bandang Inner Voices ngayong nakuha ng kanilang mga kanta na I Will Wait For You in the Rain at Shadows ang puwesto sa Vibe PH. 

Nagpahayag ng pasasalamat ang grupo sa kanilang mga tagahanga at sa mga sumuporta sa kanilang mga kanta at gigs. Kahanga-hanga na sa kabila ng ilang dekada sa industriya ay nananatiling matatag at buo ang Inner Voices.

Ayon kay Atty. Rey Bergado, ang sikreto ng kanilang matibay na samahan ay ang malalim na pagkakaibigang nabuo sa kanila. Wala ring lugar ang kompetisyon at inggitan dahil may kani-kanya silang career sa labas ng showbiz. 

Makikita rin ang pagbibigayan at kawalan ng sapawan sa pagitan ng mga miyembro.

Sa tanong kung hindi ba sila nainip sa matagal na panahong itinakbo bago sila mas nakilala ng publiko, sinabi ng grupo na hindi nila naramdaman ang pagkainip dahil ine-enjoy lamang nila ang kanilang ginagawa at masaya sila tuwing nagpe-perform para sa mga tao.

BF ng anak, nakakasama na… MONCHING, BOTO KAY ECHO PARA KAY JANINE

ni Melba R. Llanera @Insider | January 13, 2026

Photo: File / Janine at Echo IG

Sa premiere night ng pelikulang Breaking The Silence (BTS), nakapanayam si Ramon Christopher Gutierrez kung saan kinuha ang kanyang reaksiyon sa relasyon ng anak na si Janine Gutierrez kay Jericho Rosales. 

Ayon sa aktor, masaya siya kung saan masaya ang kanyang anak. Nakikita rin niyang masaya sina Janine at Echo at wala sa kanya ang pagpili kung sino ang mas okay para sa kanyang mga anak. 

Papuri pa ni Ramon Christopher, mabait si Echo at wala siyang masasabing hindi maganda sa Kapamilya actor sa mga pagkakataong nakasama niya ito.

Isa si Ramon sa cast ng BTS na tumatalakay sa bullying at mental health problems na kinahaharap ng mga nagiging biktima nito. 

Ayon sa aktor, ibang-iba na ang bullying ngayon kumpara noon dahil mas matindi na ang epekto nito at lubhang naaapektuhan ang mentalidad ng mga biktima. 

Iikot din umano ang istorya sa stress at anxiety ng mga kabataang nakararanas nito at kung paano nila haharapin at lalabanan ang ganitong sistema.

Ang BTS ay isinulat at idinirek ni Direk Errol Ropero at produced nina Ms. Ann Michelle Weber at Mr. Lawrence Weber ng Gummy Production.

Kasama sa cast sina Potchi Angeles, Bugoy Cariño, Shira Tweg, at ipinapakilala sina Gray Weber at Francis Saagundo. Mapapanood din dito sina Pinky Amador, Jeffrey Santos, Rob Sy, Pekto Nacua, Mark Herras, Gene Padilla, atbp..

Mapapanood ito sa mga sinehan sa darating na mga araw.

---

NAKAPANAYAM namin si Rica Peralejo kung saan inamin ng aktres na malaking tulong ang mga pinagdaanan niyang intriga at kontrobersiya sa showbiz kung kaya’t hindi siya gaanong naapektuhan ng isyung ipinukol kamakailan ng isang netizen sa kanila ng asawang si Joseph Bonifacio, kaugnay ng paratang na nagnakaw umano sila ng ‘ikapu’ o tithes mula sa kanilang dating kongregasyon.

Kinlaro rin ni Rica na walang katotohanan ang naturang paratang. 

Ayon sa aktres, may sarili siyang ipon mula sa kanyang kinita sa pag-aartista at may tatlong trabaho na pinanggagalingan ng kanilang pang-araw-araw na pangangailangan ng pamilya. 

Namuhay din sila nang simple at ibinahagi ni Rica na sa loob ng mahabang panahon ay masaya na sila kahit Tamaraw FX lamang ang sasakyang ginagamit ng kanyang asawa.

Sa tanong kung paano nila pinananatili ang financial transparency at accountability sa bagong tayong kongregasyon na No Other Name, ipinaliwanag ng aktres na may ginagawang financial report ang kanyang asawa at ang team nito. 

Ayon pa kay Rica, kahit noon ay mayroon na silang financial report, ngunit mas detalyado lamang ito ngayon. 

Dagdag pa niya, hindi rin sila nanghihingi ng ikapu sa kanilang church services dahil hindi naman money-making ang layunin ng NON. Maaari umanong magbigay ang sinumang nais magbigay at kung wala o ayaw magbigay ay hindi ito isyu.

Huling napanood si Rica sa Metro Manila Film Festival (MMFF) entry na Manila’s Finest (MF) kung saan gumanap siya bilang asawa ni Piolo Pascual. 

May ilang nagsabi na masyadong maigsi ang kanyang role para sa isang comeback movie, ngunit ipinaliwanag ng aktres na choice niya ito at ayaw niyang ang kanyang pagbabalik ay puro exposure lamang. 

Aniya, mas mahalaga na sa kanya ngayon ang kabuuan ng isang proyekto kaysa sa dami ng kanyang eksena.