Pagkalat ng mga survey at pangangampanya, nagsisimula na!

ni Korina Sanchez - @Isyung 'K' | October 12, 2021

Congratulations kay Maria Ressa, ang kauna-unahang Pilipinong nabigyan ng Nobel Peace Prize — kasama niya si Russian journalist Dmitry Muratov. Prestihiyoso ang gantimpalang ito sapagkat hindi basta-basta ang mga taong nakakatanggap nito.

Pinag-aaralang mabuti ng Nobel Peace Prize Committee sa Oslo, Norway kung sino ang karapat-dapat makatanggap nito. Ayon sa kagustuhan ni Alfred Nobel, ang nagpasimuno ng parangal, dapat ibigay ito sa taong may “pinakamalaking pakinabang sa kapwa.”

Kaugnay nito, bukod sa medalyang matatanggap ni Ressa, may pera rin itong gantimpala. “Free, independent and fact-based journalism serves to protect against abuse of power, lies and war propaganda,” ayon kay Berit Reiss-Andersen, chair ng Norwegian Nobel Committee, nang inanunsiyo ang makatatanggap ng gantimpala.

Natutuwa tayo nang husto sa parangal na natanggap ni Maria Ressa. Alam nating kritiko siya ng kasalukuyang administrasyon. May mga kilos nga na ipinakulong pa ang beteranong mamamahayag sapagkat hindi maganda ang relasyon ng Rappler sa kasalukuyang gobyerno.

Kapansin-pansing walang pahayag ang Palasyo sa pagkapanalo ni Ressa kahit napakalaking tagumpay para sa Pilipino. Hindi tayo magtataka kung nanggagalaiti si Pangulong Rodrigo Duterte sa pagkapanalo ni Ressa. Gayundin, kung maglabas ng pahayag ang administrasyon na minamaliit ang kanyang pagkapanalo.

Samantala, ang lumabas na pahayag mula kay Pangulong Duterte ay hindi na tatakbo si Sara bilang pangulo. Maniniwala lamang tayo kapag lumipas na ang Nov. 15 at hindi ito nagpasa ng substitution sa kanilang partido. Tandaan, ganito ang ginawa ng kampo ni Pangulong Duterte noong 2016 nang pinalitan niya si Martin Diño bilang kandidato ng PDP-Laban. May higit isang buwan pa para mangyari ang pagpalit ng kandidato. Parang ganito na ang pinahiwatig ni Sen. Dela Rosa nang mag-file para maging kandidato sa pagka-pangulo ng PDP-Laban. Taas-kilay at tingin sa langit ang marami sa kilos ng PDP-Laban.

Natapos ang pag-file ng pagiging kandidato sa maraming posisyon noong Biyernes. Pero ganun nga, hanggang Nov. 15 pa ang pagpalit ng kandidato. Sasalain na rin ng Comelec kung sino ang may kakayanang tumakbo para sa mga nasyunal na posisyon tulad ng pangulo, pangalawang pangulo at senador. Marami rin kasing wala namang kakayanang mangampanya sa buong bansa kaya tatanggalin ng Comelec ang mga ito. Ngayong alam na natin kung sinu-sino ang tatakbo para sa iba’t ibang posisyon, magsisimula na rin ang mga surveys. Halos nagsimula na nga ang panganagmpanya ng ibang kanidato.

Gulantang ang madlang pipol sa pagreretiro ni P-Digong!

ni Korina Sanchez - @Isyung 'K' | October 05, 2021

Nagsimula na noong Biyernes ang pag-file ng Certificate of Candidacy (COC) ng mga nais tumakbo ngayong darating na halalan. May mga nauna agad na magsumite ng kanilang COC tulad ni Sen. Manny Pacquiao na tatakbo sa pagka-pangulo ng bansa. Aniya, magreretiro na siya sa boksing upang makapokus sa pulitika. Samantala, ang kanyang kandidato para VP ay si Lito Atienza.

Ang ikinagulat ng marami ay ang pag-anunsiyo ni Pangulong Rodrigo Duterte na magreretiro na siya mula sa pulitika, habang si Sen. Bong Go ang kandidatong tatakbong bise-presidente ng PDP-Laban. Pero narinig na natin itong lumang tugtugin. Nag-anunsiyo rin si P-Duterte noong 2015 na magreretiro na mula sa pulitika. Pero nakita naman nating kung ano ang nangyari. Pinalitan niya ang bumitiw na si Martin Diño sa pagkapangulo matapos makitang mataas siya sa pagsusuring isinasagawa noon. Ang huling araw na itinakda ng Comele para magpalit ng kandidato ngayon ay Nov. 15.

Kaya lahat ay binabantayan ang magiging kilos ni Davao City Mayor Sara Duterte. Nag-file na nga siya ng COC para tumakbong mayor muli ng Davao. Pero nagpahayag din siyang hindi siya tatakbong pagka-pangulo kung tatakbo ang kanyang ama sa pagka-VP dahil hindi magandang tingnan ang dalawang Duterte na tumatakbo para sa dalawang pinakamataas na posisyon sa gobyerno. Pero sa pag-atras na ni Pangulong Duterte, bukas na bukas na ang pinto para sa kanya. Nagpahayag pa nga ito na si Sara ang tatakbong pangulo ka-tandem ni Bong Go.

Sa totoo lang, marami ang nakitang ganito ang mangyayari. May higit isang buwan pa para mangyari ‘yan. Wala pang opisyal na kandidato ang PDP-Laban para sa posisyon ng pangulo, lalo na’t wala pang desisyon ang Comelec kung kaninong paksiyon ang opisyal na PDP-Laban, kaya bukas nga ang pinto para manumpa si Sara sa PDP-Laban at siya ang tumakbong pangulo. Lahat naman ng tinatawag na oposisyon ay nais tumakbo kaya wala na talaga ang pinaplanong “united opposition” para tapatan ang mga Duterte. Maliban na lang kung may umatras para suportahan ang kandidatong malakas, ‘di ba? Mangyari kaya?

Luxury cars ng mga opisyal ng Pharmally, talupan!

ni Korina Sanchez - @Isyung 'K' | September 21, 2021

Patuloy ang imbestigasyon sa Pharmally at sa bilyun-bilyong nakuhang kontrata sa Duterte administration noong nagsimula ang pandemya, kung saan naungkat maging ang mga sasakyan ng mga opisyal nito na talaga nga namang nakakalula ang mga presyo.

Ang presidente ng Pharmally ay may 2021 Lamborghini Urus na nagkakahalaga umano ng P25-M, habang ang direktor naman nito ay may Porsche Carrera 4S na may halaga umanong P13. 5-M, samantalang ang corporate secretary/treasurer naman at may dalawang sasakyan na ang isa ay nagkakahalagang P80.5-M habang higit P5-M naman ang isa pa.

Isipin mo, tatlong opisyal pa lamang ‘yan. Ilang mahihirap na pamilyang Pinoy na kaya ang makikinabang sa halagang ‘yan kapag sinuma-total? Napakalaking bagay sana ‘yan, lalo na sa panahon ng pandemya.

Pero ang masaklap, lahat ‘yan nabili ng mga opisyal ng kumpanyang kulang ang kapital para ipatupad ang kontrata. Pero nakahiram naman sila, ‘di ba?

Magkano naman kaya ang kinita ni Michael Yang sa kanyang pinautang sa Pharmally? Kung ganyan kamahal na sasakyan ang nabili ng mga opisyal matapos makuha ang kontrata, siguradong may kinita rin si Yang, ‘di ba? Magpapahiram ka ba sa negosyo na walang kita, lalo na’t ganyan kalaki?

Wala namang masama sa pagbili ng mamahaling sasakyan kung pinaghirapan at may karapatan at kakayanan naman. Pero ang kinukuwestiyon dito ay ang napakabilis lumaki ng kumpanyang Pharamally lalo na’t hindi kalakihan ang kapital. Ang babata pa ng mga opisyal para kumita ng ganyang kalaking halaga. Ang iba riyan, nakabibili lang ng ganyang sasakyan kapag matagal nang may negosyo at may edad na para ma-enjoy ang kinita.

At para makabili ng ganyang kamahal na sasakyan, siguradong napakalaki ng kinita ng Pharmally. Lahat ‘yan sa loob lamang ng isa’t kalahating taon. Paano kumita ng ganyang kalaki? ‘Yan ang iniimbestigahan ng Senado, kasama ang overpricing, pinaboran ng gobyerno dahil tila may padrino at kung ano pa. Hindi dapat pinatitigil o binabalakid ang imbestigasyon dahil mga kaibigan o kilala ang sangkot.