Kulang na kulang ang supply ng bakuna

ni Korina Sanchez - @Isyung 'K' | July 10, 2021

Ilang siyudad sa National Capital Region (NCR) ang hininto na muna ang pagbigay ng unang bakuna dahil nauubos na ang kanilang suplay at kailangan pang bigyan ng pangalawang bakuna ang mga nakatanggap na.

Sa madaling salita, hindi pa sila nabibigyan ng suplay ng National Task Force against COVID-19 (NTF). Humingi naman ng pang-unawa ang NTF dahil kulang na kulang ang kabuuang suplay para sa buong bansa. Bagama’t natutuwa ito na mas marami na ang nais magpabakuna — suplay naman ang problema.

Pero nananalig ang paniwala ni Vaccine Czar Sec. Carlito Galvez, Jr. na 70-milyong tao ang makatatanggap ng unang bakuna itong Nobyembre. Kaya muli tayong bumalik sa datos.

Ayon sa ourworldindata.org/covid-vaccinations, 8.26% ng populasyon o 9.05 milyong tao ang nakatanggap ng unang bakuna noong Hulyo 6 — apat na buwan na lang bago mag Nobyembre. Kung ganyang may problema sa suplay, hindi natin alam kung maaabot ang target ni Galvez maliban na lang kung magdatingan na ang ipinahahayag na milyun-milyong doses ng iba’t ibang bakuna.

Sa worldometers.info/coronavirus/, umakyat na naman tayo ng ranggo sa listahan ng mga bansa — nasa numero 23. Noong unang nadiskubre natin ang website ay pang-32 pa tayo. Nasa apat hanggang anim na libong positibong kaso araw-araw ang naitatala pa hanggang ngayon, sa kabila ng pahayag na bumabagal na ang pagkalat sa Metro Manila. Ang mga probinsiya ngayon ang tinatamaan ng pagkalat ng COVID dahil mas kaunti umano ang natatanggap nilang bakuna mula sa gobyerno.

Nagsabi naman si Galvez na kung hindi makukuha ang target na 70-porsiyento itong Nobyembre at umabot sa 40 porsiyento, pasok pa rin tayo sa target ng WHO. Ang suma ay makatanggap ng isang bakuna ang mas maraming tao sa mas mabilis na panahon. Rumaragasa ang Delta variant sa ibang bansa kaya ito ang binabantayan ngayon ng DOH. Hindi ito dapat mabigyan ng pagkakataong kumalat sa ating bansa.

Malawak na modernisasyon ang lahat ng sangay ng AFP

ni Korina Sanchez - @Isyung 'K' | July 08, 2021

Bumagsak ang C-130s Hercules military cargo plane ng Philippine Air Force (PAF) noong Linggo sa Patikul, Sulu. Nasa 50 pasahero, kabilang ang sundalo at mga sibilyan ang namatay habang may ilan pa na sugatan at kasalukuyang nagpapagaling sa ospital.

Nakikiramay tayo sa pamilya ng mga namatay, at ipinagdarasal natin ang mabilis na paghilom ng kanilang puso. Ang eroplano ay katatanggap lamang ng PAF mula sa Amerika itong Pebrero. Isa ito sa dalawang C-130 H na binili at inayos nang husto para makapagserbisyo pa nang matagal. Hindi pa nade-deliver ang isa — tatlo ang lumilipad na C-130 ng PAF, nabawasan pa ng isa, ang pinakabago pa. Napakahalaga ng C-130 Hercules at napakarami ang nagagawa nito, maging sa labanan o sa panahon ng kalamidad.

Sunud-sunod nga ang inabot na trahedya ng PAF mula noong 2020. Noong nakaraang dalawang linggo, isang brand new, na S-70i Blackhawk ang bumagsak sa Tarlac kung saan pito ang namatay.

Samantala, noong Abril nitong taon, isa naman ang namatay nang bumagsak ang MD520 scout helicopter. Nais imbestigahan ng Senado ang pagbagsak ng C-130 H para malaman ang mga problema at hindi na maulit pa. Pero iginiit agad ni AFP spokesperson Maj. Gen. Edgard Arevalo na nasa maayos na kondisyon ang eroplano at ang mga pilotong nagpalipad ay beterano sa C-130. Nakuha na ang black box ng C-130H kaya makikita kung ano ang mga kilos ng piloto at eroplano bago bumagsak. Alam na rin ang pagkakakilanlan ng pito sa 50 sundalong pasaherong nasawi. May resulta na ba ang mga imbestigasyon ng mga nakaraang pagbagsak ng mga eroplano?

Walang argumento na kailangan ng malawak na modernisasyon ang lahat ng sangay ng AFP. Sinimulan ito ng nakaraang administrasyon sa pagbili ng dalawang frigates at 12 FA-50PH na eroplanong pandigma na nabigay, na nakompleto kailan lang. Marami pa ang kailangan para maitapat ang AFP sa sandatahang-lakas ng mga bansa sa Timog-Silangan Asya man lang. Hindi natin maaabot ang lakas-militar ng China. Pero natural, malaking pera ang pinag-uusapan at kung saan kukunin? ‘Yan ang malaking tanong.

Kaugnay nito ay nagsalita na rin ang US Air Force tungkol sa Lockheed C-130 Hercules. Ang mga katangian nito ay maaasahan, ligtas, kayang lumipad at lumapag sa maiksi at maligasgas na runway. Noong 1956 unang gamitin sa serbisyo ng Amerika at hanggang ngayon ay ginagamit pa rin ang mga pinakabagong bersiyon nito, partikular ang mga bagong teknolohiya na ikinabit sa eroplano. Gamit din ito ng humigit-kumulang sa 60 bansa.

Sa huli, dapat lang imbestigahan ang pagbagsak ng eroplano nang sa gayun ay mabigyan ng paliwanag ang pamilya ng mga namatay, at mabigyang-katahimikan ang mga nasawing sundalo.

Bilang ng mga nabakunahan sa bansa, sadyang napakababa

ni Korina Sanchez - @Isyung 'K' | July 02, 2021

Natapos na ang Hunyo. Pero ayon sa ourworldindata.org/covid-vaccinations, ang kanilang datos noong Hunyo 29 ay 7.67 milyong tao pa lang ang nabakunahan o 7% ng populasyon. Kung bibigyan pa natin ng isang araw para opisyal na katapusan ng Hunyo, hindi pa rin siguro aabot ng sampung milyong tao.

Sa datos na nakalap ng organisasyong ito ang ating basehan. Kinakalap din nila ang lahat ng impormasyon hinggil sa pagbabakuna mula sa maraming bansa sa buong mundo. Numero-uno sa malalaking bansa ay ang Canada sa 68.0% noong Hunyo 29. Kaunti na lang makakamit na nila ang ‘herd immunity’. Naunahan na nila ang Israel na dating numero-uno. Magandang pinagmumulan ng tamang impormasyon ang website. Walang fake news — walang pulitika.

Malayo pa tayo sa herd immunity. Pero nagpahayag ang OCTA research na maaaring makamit ng NCR Plus ang herd immunity ngayong Disyembre kung hindi kakalat ang Delta variant ng na sinasabing pinaka-nakahahawa.

May balita mula sa Guangdong, China na 14-segundo lang ang kinailangan ng Delta variant makahawa ng ibang tao. Dalawang babae ang nakunan ng CCTV na hiwalay pumasok sa banyo, sa mall. Hindi raw magkakilala at hindi rin nag-usap. Pero hinawaan agad ng may impeksiyon na ang nakasabay sa banyo. Hindi ba nakakatakot ‘yan? Hindi ba sa Disyembre dumarami nang husto ang populasyon ng NCR dahil dumarating ang mga taga-ibang lugar para sa Christmas shopping? Magawa o payagan kaya ng gobyerno ngayong Disyembre? Kaya mahalaga ang magpabakuna para may laban sa COVID-19, kasama na ang Delta variant nito.

Samantala, napag-uusapan na rin ang pagbabakuna, huwag sanang ipahiya, siraan, pagtawanan o ‘ipako sa krus’ ang nagkamaling nagbigay ng bakuna sa Makati. Daan na rin ‘yan sa paulit-ulit na kilos at pagod. Ilangdaan din ang dumaraan sa kanya sa isang araw.

Ang importante ay naitama agad ang pagkakamali, na sigurado hindi sinasadya. Bigyan natin ng parangal at pasasalamat ang ating health frontliners na higit isang taon nang walang pahinga sa labang ito.