‘Wag balewalain ang sentimyento ng mga health workers

ni Korina Sanchez - @Isyung 'K' | September 16, 2021

Sa tindi ng batikos na inabot ni Presidential Spokesperson Secretary Harry Roque, Jr. mula sa mga netizens kaugnay sa panenermon nito sa mga medical health workers, tinutularan na rin niya ngayon ang kanyang ‘boss’ sa pagbabala na maaaring kasuhan ng Anti-Wiretapping Law ang sinumang nagkalat ng naturang viral video. Kuha sa video ang panenermon nito sa grupo ng mga health workers habang nasa pandemic meeting ang mga ito, kung saan naunang nakiusap ang mga doktor na huwag munang luwagan ang quarantine measure dahil maaaring pumalya ang health system sa patuloy na pagdami ng kaso ng COVID-19 sa bansa.

Ani ng Spokesperson, dapat kilalanin ang diskarte ng administrasyon kontra ng pandemya dahil pamimintas lang ang ginagawa ng mga ito.

Kung ganun, dapat pala purihin lang ang administrasyon — purihinin ang pangulo, purihin silang lahat, bakit wala ba silang kakulangan sa kasalukuyang krisis na ating nararanasan?

Nadala man ng emosyon, wala pa rin karapatang si Roque na manermon ng kahit sino, lalo na ang sa sektor ng mga doktor.

Dapat lang siyang makatikim ng matinding batikos mula kay Dr. Leni Jara ng Solidarity of Health Advocates and Personnel for a Unified Plan to Defeat COVID-19 (Shape Up).

Marahil ay hindi alam ng Spokesperson na araw-araw ay humaharap sa peligrong dulot ng COVID-19 ang mga ito, mula sa doktor, nurse at iba pang medical personnel.

Narasan ba niyang mag-duty sa mga ospital nang sampu hanggang 12-oras o higit pa? Karamihan sa ating mga ospital ay hindi mahulugang karayom ang bilang mga pasyente, na sa kabila nito ay sobrang kulang ang mga tauhan na nangangalaga sa mga pasyente.

Naranasan ba nitong humarap sa mga kamag-anak na desperado para sa kanilang pasyente?

Naranasan ba niyang makiusap at makipagbabaang-loob sa mga kababayan nating hindi makakuha ng kuwarto sa mga ospital? Malamang, hindi. Paniguradong higit na komportable ang tanggapan ng tagapagsalita ng pangulo, may masarap na pagkain at nakakauwi pa sa tahanan ng takdang oras.

Ang sentimyento ng mga doktor ay hindi dapat isinasawalambahala, karapatan nilang magsalita at maglabas ng sama ng loob. Higit sa ating lahat, malaki ang sakripisyo ng mga ito — hindi lamang isang paa ng mga ito ang nalalagay sa alanganin, kundi maging ang kaligtasan ng inuuwian nilang pamilya.

Hindi mataas na boses o panduduro ang dapat ginawa ng tagapagsalita ng pangulo, sana ay nakinig ito saka nakilahok sa maayos na diskurso — hindi porke galing ang kritiko ay magagalit agad.

Lahat tayo ay gustong makabalik na sa normal mula sa operasyon ng mga negosyo, pagbabalik-eskuwela at iba pa. Bawat manggagawa ay nais magpatuloy sa kanilang trabaho, kailangang kumita para may pantugon sa pangangailangan ng kani-kanilang pamilya.

Sa kabila ng lahat ng hirap, may pakialam ba riyan ang COVID-19? Walang time-out sa nakamamatay na virus.

Hangga’t hindi pa nakakamit ang herd immunity sa pamamagitan ng bakuna, anuman ang bilang na meron nito sa ngayon, hindi magiging normal ang lahat — kahit ano pang pilit ang gawin ng gobyerno. Hindi pa magiging normal ang operasyon ng mga negosyo kung takot pa lumabas ang tao. Gayundin, alam naman nating kahit kumpleto na ng bakuna, hindi ito garantiya na hindi madadale ng sakit. Ang malaking posibilidad lang ay hindi seryoso ang magiging tama nito sa pasyente. Hindi pa tapos ang pandemya. May mga naglilitawan pang mga variants.

Sa panahon ngayon, hindi tayo dapat nag-aaway o nagsisisihan. Pakakaisa at malasakit sa kapwa ang dapat na umiiral sa bawat isa.

Kung walang COA, hindi mabubuking ang mga buwaya

ni Korina Sanchez - @Isyung 'K' | September 09, 2021

Nagpatuloy ang mga banat ni Pangulong Rodrigo Duterte laban sa mga kumukuwestiyon sa paggastos ng kanyang administrasyon sa pondo ng bayan. Nagsimula siya sa Commission on Audit (COA), na sinabihan silang huwag isapubliko ang mga ulat o natuklasan dahil agad na hinuhusgahan ng tao ang mga ahensiyang sangkot, at pagkatapos ay sinabihan ang kanyang gabinete na huwag pansinin ang COA. Kaugnay nito, Senado naman ang sunod na tinira, partikular ang Blue Ribbon Committee na iniimbestigahan ang mga natuklasan ng COA hinggil sa pagbili ng mga PPE at iba pang materyales kontra-COVID napatunayang mahal ang presyo at kung bakit isang suplayer na may kaduda-dudang kuwalipikasyon ang nakakuha ng bilyun-bilyong pisong kontrata.

Naging personal si Pangulong Duterte sa kanyang pag-atake kay Sen. Richard Gordon na namumuno sa komite at Sen. Ping Lacson. Sinabi kong kapag ang mga pag-atake ay naging personal sa pagtatalo o debate, alam nating natalo na ang namemersonal. Nasa tungkulin ng COA ang suriin ang paggasta ng gobyerno at punahin ang mga anomalya, kakulangan, o disallowances sa paggastos ng gobyerno - trabaho nila 'yan. Ang Senado ay nagsisilbing bantay din sa lahat ng ginagawa ng gobyerno. Kabilang ito sa "checks and balance". Ngunit para kay Pangulo Duterte, tila nais niyang mawala na lang lahat ito.

Para sa pangulo, walang dapat magtanong, pumuna sa kanyang administrasyon at lumabag sa kanyang kalooban o kagustuhan. Maging ang senador na dating nag-imbestiga sa kanya habang siya ay alkalde pa sa Davao City, maging ang Komisyon sa Karapatang-Pantao sa pagpuna at pagsita sa kanyang madugong laban kontra ilegal na droga, maging isang network na nagpalabas ng mga pampulitikang komersiyal na hindi niya nagustuhan o kung ano pang mga ahensiya o grupo na pumupuna sa kanyang administrasyon o sa kanyang gabinete. Ipinahayag niya noong 2016 na ang kanyang itinalaga sa kanyang gabinete ay "the best and brightest". Matapos ang limang taon panunungkulan, "the best and brightest" nga ba?

Pinupuri ang COA at ang mga senador sa pagiging matatag sa kanilang posisyon sa kabila ng mga panunuyo at banta ni Pangulong Duterte. Mabuti at nakikita natin ang mga senador na may gulugod, kahit ngayon lang. Dapat magpatuloy ang imbestigasyon. At tungkol sa pagtatangka ni Roque na ilihis at ituro ang mga daliri sa inaakalang mga pagkakamali sa nakaraang administrasyon, isang dating tagapagsalita at maging ang COA ay kaagad na nagbigay ng mga sagot kontra sa kanyang mga pahayag. Dapat sagutin na lang ang mga isyu sa matalino at marangal na pamamaraan, kung kaya pa nila.

Aminado si P-Digong…“Utang na loob” ang dahilan kaya may posisyon sa Gov’t si Lao

ni Korina Sanchez - @Isyung 'K' | September 04, 2021

Ano’ng madalas idepensa ng taong natatalo na sa diskusyon, debate o argumento? Hindi ba’t idinadaan nito sa personalan? Hindi ba, magtuturo ng ibang isyu, tao o grupo na mas masama pa umano ang ginawa o kaya’y ibabalik ang tanong sa nagtatanong, paglilihis?

Lahat ‘yan ay ginawa ng Palasyo, nitong mga nakaraang araw habang nagaganap ang imbestigasyon ng Senado sa napakamahal na pagbili ng mga gamit laban sa pandemya tulad ng PPE, at iba pang healthcare supply. Ang nakapagtataka pa, mula sa nag-iisang supplier — bilyun-bilyon ang halaga ng nakuhang kontrata ng Pharmally Pharmaeuticals Corp.

Pinuna ni Pangulong Rodrigo Duterte ang katawan ni Senate Blue Ribbon Committee Chairman Sen. Richard Gordon, na dapat umanong magpapayat. Binatikos nito ang huli dahil sa ginawang imbestigasyon sa dating namuno sa Procurement Service of the Department of Budget and Management (DBM), Lloyd Christopher Lao.

Inamin pa ni Pangulong Duterte na “utang ng loob” ang dahilan kaya binigyan niya ng posisyon sa gobyerno si Lao. Karamihan ng miyembro ng gabinete nito ay mga tumulong sa kanyang sa kampanya o kaya’y ‘fraternity brad’, tulad nina Lao, Aguirre, Argosino at Robles, mabanggit ang ilan. Noong binubuo ni Pangulong Duterte ang gabinete, “best and brightest” umano ang mga ito, kayo na ang humusga.

Samantala, pinuna rin nito ang buhok ni Sen. Panfilo “Ping” Lacson, at tinanong kung malinis siya. May ilalabas umano ito kapag hindi nagustuhan ang sagot. Para namang may saysay ang mga ‘yan sa isyung iniimbestigahan. At wala bang mataba sa kanyang gabinete, una na ang madalas nating makitang tagapagsalita niya? Lahat ba sila ay maaayos ang buhok, o may buhok? Ano’ng kinalaman ng buhok sa isyu ng bayan? Wala.

Ngayon, ang kanilang bagong depensa, mas mataas presyo ng pagbiling PPE ng nakaraang adminstrasyon. May pandemya na ba noong panahong iyon? Alam na ba ng tao kung ano ang PPE? Saan ginamit ang mga PPE na ‘yan, dahil sa ating pagkakaalam, wala namang naganap na pandemya sa dating administrasyon? Malinaw na paglilihis ng usapan ang ginagawa ng Palasyo.

Gayunman, “panic mode” na umano si Pangulong Duterte kaya ganyan na ang mga depensa. Pati si Michael Yang, ang dating “economic adviser” ay ipinagtanggol rin nito kahit lumantad na may kuwestiyunable palang nakaraan. Ang mga ka-negosyo ay pugante sa Taiwan. Kahit nang-iinsulto na ang pangulo ay hindi umano ititigil ang imbestigasyon sa isyung ‘to. Dapat lang. May natatamaan nang buto, kaya ganyan na ang depensa. Nanggagalaiti na kaya ganyan ang pananalita. Tsk!