ni Jeff Tumbado | December 30, 2021
Pirmado na ni Pangulong Rodrigo Duterte ang isang kautusan na nagbibigay para sa pamamahagi ng gratuity pay sa mga kawani ng gobyerno na nasa ilalim ng Contract of Service (COS) at Job Order (JO).
Ito ang nakasaad sa inilabas na Administrative Order 46 ng Malacañang na pinirmahan ni Pangulong Duterte kahapon, December 29. Mula P2,000 hanggang hindi hihigit sa P5,000 ang matatanggap ng mga COS at job order workers depende sa kanilang performance.
Sa ilalim ng AO 46, binibigyang-diin na ang mga COS at job order workers bagaman pinasusuweldo, wala naman silang tinatanggap na iba pang mga benepisyo tulad ng nakukuha ng mga regular na kawani kabilang na ng personnel economic relief allowance, midyear at yearend bonuses, at performance based bonus dahil wala silang employer-employee relationship sa gobyerno.
Batay sa kautusan, ang pagbibigay ng gratuity pay sa mga COS at job order workers ay pagkilala na rin sa kanilang tiyaga at pagpupursige sa trabaho para sa mga ipinatutupad na programa, proyekto at mga aktibidad kabilang na ang emergency COVID-19 response ng pamahalaan.
Hinihikayat ang mga lokal na pamahalaan na i-adopt sa kani-kanilang mga tanggapan ang pagbibigay ng gratuity pay sa kanilang mga kawani na nasa ilalim ng COS at job order.