PAO forensic sumaklolo sa ina ng binatilyo na hinihinalang namatay sa Covid-19 vaccine

ni Jeff Tumbado | March 29, 2022

Isang ginang mula sa Maynila ang humingi ng saklolo sa Public Attorneys Office (PAO) kaugnay sa kanyang 19-anyos na anak na lalaki na sinasabing namatay matapos itong magpabakuna kontra Covid 19.

Ito ang ibinulgar ni Atty. Persida Rueda-Acosta, chief ng PAO, patungkol kay Helen Gaa na lumapit at humihiling sa kanila, partikular sa forensic lab division na isailalim sa pag awtopsiya ang labi ng nasawi nitong anak.

Lumiham umano si Gaa sa PAO nitong Marso 25, para humingi ng saklolo na maisailalim sa awtopsiya ang labi ng anak sa posibleng dahilan ng pagkamatay ay bakuna kontra covid 19.

Nabatid sa liham ni Gaa, ang anak na si Miguel Antonio de Castro ay namatay sa Mary Chiles General Hospital dahil sa "septic shock" CAP high-risk at meningo-encephalitis batay na rin sa death certificate nito.

“To my knowledge, my son was in perfect health before it happened,” pahayag ni Acosta. Ayon kay Acosta, nangako siyang tutulungan ang pamilya Gaa sa kanyang hiling sa kabila na sakop ng hurisdiksyon ng Department of Justice (DOJ) ang nabanggit na kaso. Bilang resulta ay agad na nailapit ni Acosta kay Justice Secretary Menardo Guevarra ang kahilingan ni Gaa na mailagay sa pag susuri ang labi ng binatilyo.

Giit pa ng PAO chief na dapat ay imbestigahan ng DOJ sa pamamagitan ng National Bureau of Investigation (NBI)ang posibleng adverse effect ng Covid 19 sa biktima kaya ito pumanaw.

“We are constrained to refer the matter to you being within your jurisdiction considering Republic Act No. 11525 or the Covid-19 Vaccination Program Act of 2021 stated that the said government vaccination is experimental and may result to serious adverse events, permanent disabilities and deaths,” saad sa liham ni Acosta kay Guevarra.

Bukod kay Guevarra ay hiniling din kay Interior Secretary Eduardo Ano, Health Secretary Fransisco Duque at PNP Chief General Dionardo Carlos ang pagsagawa din ng hiwalay na pag-awtopsiya at imbestigasyon sa kaso.

Bago ang pagkamatay ni Miguel ay nagbigay ito bilang donasyon nang kanyang dugo sa isang kaibigan dahil sa sakit na leukemia nitong February 27, 2022.

Habang kinukuhanan ng dugo ay nakaramdam na si Miguel ng pagkahilo na siya namang inihinto agad ng attending nurse.

Subalit nasa 200 cubic centimeters na ng dugo ang nakuha sa kanya. March 1, nang sabihin ni Miguel sa kanyang ina na hindi maganda ang pakiramdam nito kaya pinainom sya ng paracetamol subalit mas lalo lamang umanong lumala ang kondisyon nito na dahilan para isugod na siya sa ospital noong Marso 15.

Matapos ang apat na araw (Marso 19), ay binawian ng buhay ang binatilyo.

Nabatid na nabakunahan si Miguel ng unang dose nito kontra covid 19 noong September 23, 2021, at October 14 naman para sa ikalawang dose nito.

Hindi na umano nabigyan ng booster shot ang binatilyo matapos na makumpleto ang vaccine dose nito.

Ilang mga showbiz personalities, buhos-suporta sa kandidatura ng Ang Probinsyano Partylist

ni Jeff Tumbado | February 10, 2022

Ilang mga sikat na showbiz personalities ang nagpahayag ng kanilang pagsuporta sa kandidatura ng Ang Probinsyano Partylist sa nalalapit na May 9, 2022 national and local elections.

Nanguna sa mga nagpahayag ng kanilang suporta si King of talk show host na si Boy Abunda. Gayundin sina Piolo Pascual, JM De Guzman, Ella Cruz, Jason Abalos at Vickie Rushton. Sa pag-arangkada ng grand proclamation rally at motorcade ng Ang Probinsyano ay kasama mismo si Abunda sa pag-iikot sa Marikina City.

Sa kanyang talumpati, sinabi ni Abunda na suportado niya ang Ang Probinsyano Partylist dahil siya mismo ay isang probinsyano.

Sabi pa niya, “naiintindihan ng Ang Probinsyano Partylist ang aking pagkatao, hindi lamang ang aking pangangailangan”. Katunayan aniya, nang humagupit ang bagyong Odette nito lamang Disyembre, isa sa mga unang tumulong sa mga biktima ng bagyo sa mga apektadong probinsya ang Ang Probinsyano Partylist.

“Napakarami ring proyekto ng Ang Probinsyano Partylist para sa mga kapwa probinsyano partikular na sa Samar, Cebu, Palawan, Siquijor at maging dito sa Metro Manila ay may mga tinutulungan din sila,” paliwanag pa ng king of talk show.

Para kay Abunda, wala nang iba pang higit na makakaunawa sa mga probinsyano kundi ang kapwa probinsyano rin. Kaya sa darating na eleksyon, hiling nito na pahalagahan ng mga Pilipino ang kanilang boto dahil ito ay makapangyarihan at sagrado.

Hiniling din niya ang suporta ng mga Pilipino sa Ang ProbinsyanoPartylist upang maipagpatuloy pa nito ang pagtulong at pagbuo ng mga batas at programa para sa mga probinsyano.

Mahigit 140 COVID-19 vaccination sites, pagaganahin sa Quezon City

ni Jeff Tumbado | February 1, 2022

Pinalakas pa ng pamahalaang lokal ng Quezon City ang bakunahan laban sa COVID-19 bilang paghahanda na rin sa pagsisimula na maturukan ang mas nakababatang populasyon o ang mga edad 5 hanggang 11.

Ito ay makaraang umabot na ng 140 ang vaccination sites na itinakda ng Quezon City LGU sa anim na distrito na araw-araw ang operasyon.

Ayon kay Quezon City Mayor Joy Belmonte, tinatayang 2.8 milyon ang mga eligible na residente ng Quezon City ang target pang mabakunahan laban sa COVID-19.

Hindi pa aniya kasama sa nasabing bilang ang mga manggagawa sa lungsod ngunit sa ibang lugar nakatira.

“We are expanding and intensifying our vaccination program to accommodate the city’s eligible population, estimated at 2.8 million residents, including 5-11 year old children. This figure does not include the thousands of non-resident workers who also get their shots in the city,” ang pahayag ni Belmonte, na muling kandidato sa ikalawang termino.

Kabilang sa vaccination areas sa Quezon City ay ang health centers, malls, schools, community venues, mga simbahan at iba pang special venues tulad ng Smart Araneta Coliseum at Quezon Memorial Circle.

May mga bakunahan din sa loob ng subdivision, pribadong lugar-trabaho, government agencies, care homes, at ibang institusyon. Mayroon ding home vaccinations para sa mga bedridden at drive-thru jabs sa ilang mall parking lots.

Para sa mga interesadong indibidwal o pamilya, maaaring tingnan ang schedule at lugar ng bakunahan sa opisyal na Facebook page ng Quezon City government.

Maaari ring magparehistro sa QC VaxEasy Portal www.qceservices.quezoncity.gov.ph/qcvaxeasy, sa mga barangay pero may limitadong slots para sa mga walk-in sa mall vaccination sites.