May deal sa Ombudsman... Bonoan, lusot, gagawing state witness

ni Jeff Tumbado @News | June 30, 2026

Photo: Manuel Bonoan - Senate of the Philippines

Nakatakdang maging state witness ang dating kalihim ng Department of Public Works and Highways (DPWH) na si Manuel Bonoan sa nagpapatuloy na imbestigasyon sa flood control project.

Ayon kay Ombudsman Jesus Crispin Remulla, hihilingin nila sa korte na alisin si Bonoan bilang respondent sa kaso upang payagan itong magsilbing cooperating o state witness.

“We already have a signed agreement for the cooperation of Bonoan to become a cooperating witness,” ani Remulla.

Mahalaga umano ang magiging testimonya ni Bonoan dahil sa kanya mismong direktang kaalaman sa pagpaplano, pagpapatupad, at implementasyon ng mga flood control project ng pamahalaan.

Dagdag-bawas sa presyo ng petrolyo

ni Jeff Tumbado @News | June 30, 2026

Photo: File

Magkakaroon ng magkakaibang galaw sa presyo ng mga produktong petrolyo simula ngayong Martes.

Sa press briefing ni Department of Energy (DOE) Secretary Sharon Garin, sinabi nito na maaaring bumaba ng 10 sentimos kada litro ang presyo ng gasolina, ngunit posible ring tumaas ito nang hanggang P1.90 kada litro.

Samantala, ang presyo ng diesel ay maaaring magkaroon ng rollback na P1.16 kada litro, o kaya naman ay tumaas nang hanggang 84 sentimos kada litro.

Posible ring bumaba ng 78 sentimos kada litro ang presyo ng kerosene, ngunit maaari rin itong tumaas nang hanggang P1.22 kada litro.

Ayon kay Garin, nagpapakita ang kasalukuyang galaw ng merkado na unti-unti nang humuhupa ang pabagu-bagong presyo ng langis.

Bagyong Henry, hahataw

ni Jeff Tumbado @News | June 30, 2026

Photo: DOST-PAGASA

Posibleng maging isang ganap na bagyo sa Miyerkules ang low pressure area (LPA) na binabantayan sa loob ng Philippine Area of Responsibility (PAR).

Ayon sa Philippine Atmospheric, Geophysical and Astronomical Services Administration (PAGASA), huling namataan ang LPA sa layong 495 kilometro silangan ng Surigao City, Surigao del Norte.

Inaasahang tatawid ang sama ng panahon sa bahagi ng Southern Luzon at Visayas sa Martes bago lumabas sa West Philippine Sea pagsapit ng Miyerkules.

Ayon kay PAGASA weather specialist Aldczar Aurelio, mataas ang posibilidad na lumakas ang LPA at maging isang tropical cyclone kapag nasa West Philippine Sea na ito sa Miyerkules.

Kapag tuluyang naging bagyo, tatawagin itong Henry, na siyang magiging ikawalong tropical cyclone na papasosa bansa ngayong 2026.