Senate shooting, ‘tago-CCTV,’ pag-alis ni Bato... Robin at Jinggoy, tatalupan — Ombudsman

ni Jeff Tumbado @News | May 16, 2026

Photo: File / Jinggoy Estrada at Robin Padilla - FB

Kinumpirma ni Ombudsman Jesus Crispin “Boying” Remulla na kanilang iimbestigahan si Senador Robin Padilla kaugnay ng pag-alis ni Sen. Ronald “Bato” dela Rosa sa Senado matapos ang insidente ng pamamaril nitong May 13.

Kasama rin sa iimbestigahan ang naging pahayag ni Senator Jinggoy Estrada na, “Itago n’yo ‘yung CCTV” habang naka-social media live.

Ayon kay Remulla, sisiyasatin ng Office of the Ombudsman ang lahat ng panig upang mabuo ang kabuuang larawan ng naturang insidente.

Kabilang sa tatalupan ang National Bureau of Investigation, Office of the Senate Sergeant-at-Arms, at mga pulis na nagtungo sa lugar upang matukoy ang tunay na nangyari mula sa perspektibo ng gobyerno.

Una nang nilinaw ni Sen. Estrada na ang tinutukoy umano niya sa kanyang pahayag ay ang pag-secure o pagpreserba ng CCTV footage dahil maaari itong magsilbing mahalagang ebidensya sa imbestigasyon ng pamamaril sa Senado.

P2.50 dagdag-presyo sa diesel, P1.25 sa gasoline

ni Jeff Tumbado @News | May 16, 2026

Photo: NBI

Nakaamba ang muling pagtaas ng presyo sa produktong petrolyo sa susunod na linggo bunsod ng muling paglala ng tensyon sa Gitnang Silangan.

Ayon sa isang industry source nitong Biyernes, tinatayang tataas ng P2 hanggang P2.50 kada litro ang presyo ng diesel, habang maaaring madagdagan ng P0.75 hanggang P1.25 kada litro ang gasolina.

Batay umano ang pagtataya sa unang apat na araw ng trading ng Mean of Platts Singapore at galaw ng foreign exchange ngayong linggo.

10 iniimbestigahan sa pamamaril sa Senado — PNP

ni Jeff Tumbado @News | May 15, 2026

Photo Courtesy Eloisa Lopez / Reuters

Iniimbestagahan na ng Philippine National Police (PNP) ang hindi bababa sa 10 indibidwal kaugnay ng insidente ng pamamaril at kaguluhan sa loob ng gusali ng Senado nitong gabi ng Miyerkules.

Ayon kay PNP Spokesperson Police Brig. Gen. Randulf Tuaño, lumabas sa paunang imbestigasyon na hindi nag-iisa ang lalaking naaresto sa loob ng Senate complex na si Mel Oragon, 40, at sinasabing NBI volunteer.

“Sa initial report natin, hindi lang naman nag-iisa 'yung indibidwal na nahuli,” ani Tuaño sa isang press briefing sa Camp Crame.

Dagdag pa niya, may hindi bababa sa 10 iba pa umano na namataang kasama sa grupo na nagtangkang pumasok sa ikalawang palapag ng gusali ng Senado noong Miyerkules ng gabi, ngunit napigilan sila ng mga armadong tauhan ng Senate Office of the Sergeant-at-Arms (OSAA).

Patuloy pa umanong inaalam ng mga otoridad kung kabilang nga sa grupo ang mga naturang indibidwal o kung ilan sa kanila ay mga empleyado lamang sa loob ng complex.

Hindi naman agad maipaliwanag ng PNP kung paano nakatakas o nawala ang mga hinihinalang kasama sa grupo.

Gayunman, iniutos na umano sa Police Security and Protection Group (PSPG) na magsagawa ng imbestigasyon upang matukoy kung nagkaroon ng pagkukulang ang kanilang hanay o ang OSAA sa seguridad ng Senado.

Nauna nang kinumpirma ng Southern Police District (SPD) ang pagkakaaresto kay Oragon sa gitna ng kaguluhan.

Nagbigay na rin umano ng testimonya at mga pangalan si Oragon, ngunit bineberipika pa ito ng mga imbestigador.

Dagdag pa niya, wala ring nakuhang lehitimong government-issued ID mula kay Oragon kaya’t hindi agad pinaniniwalaan ng mga imbestigador ang mga impormasyong ibinibigay nito.

Inatasan na rin umano ang PNP Directorate for Intelligence at Directorate for Investigation and Detective Management (DIDM) na magsagawa ng hiwalay na background investigation laban kay Oragon.