Iba-iba ang paborito… NORA, MAY “FLAVOR OF THE MONTH” SA MGA ANAK

ni Mercy Lejarde @Talkies | May 31, 2026

Photo: AFP via Getty Images file

Ikinuwento ng aktres na si Matet de Leon kung paano sila pinalaki ng yumaong Superstar na si Nora Aunor at kung paanong hindi nila kailanman naramdaman ng kanyang mga kapatid na may pagkakaiba sa pagtrato sa kanila bilang mga ampon at tunay na anak.

Saad ni Matet, “‘Yung sa amin, alam mo, maikuwento ko lang din sa ‘yo. Never naming naramdaman na adopted. Because, ah, pareho ang turing, eh, sa tunay na anak. Same. Parehas na parehas. Minsan, mas kami pa ang paborito. May mga ganu’n. S’ya, etong buwan na ‘to, s’ya ang paborito,  saka ‘yung dalawang lalaki, sa akin galit. 

“Sa susunod na buwan, ako naman ang favorite saka ‘yung isa kong kapatid. Silang dalawa, ‘yung tunay na anak at ‘yung isang lalaki, sila naman. Si Mommy, meron s’yang flavor of the month. May ganu’n si Mommy. So pare-parehas, eh.

“Pantay-pantay ang turing. Kung sino’ng papagalitan, ikaw ang papagalitan. At anak ka man o ampon o ano, wala, eh.”

Anyway, isa si yours truly sa makapagpapatunay na totoo ang lahat ng sinabi ng anak ni Bok na si Matet de Leon — na pantay-pantay ang tingin at pagmamahal ni Guy sa kanilang magkakapatid.

---

Kasal, umabot na ng 40 yrs…

BONG, AMINADONG ILANG BESES NASAKTAN AT PINAIYAK SI LANI

IPINAGMALAKI ni Cavite 1st District Representative Jolo Revilla ang kanyang mga magulang na sina Sen. Bong Revilla at Cavite 2nd District Representative Lani Mercado sa pag-abot ng mga ito sa kanilang ika-40 wedding anniversary.

Saad ni Jolo sa post niya, “Happy 40th Civil Wedding Anniversary, Papa at Mama!

“Proud kami sa inyong apat na dekada ng pagmamahalan, sakripisyo, at matatag na pagsasama na naging pundasyon ng ating pamilya. Kayo po ang aming inspirasyon sa tunay na kahulugan ng pagmamahal, respeto, at pagtutulungan sa buhay.

“Maraming salamat sa lahat ng aral, gabay, at walang sawang pagmamahal na ipinadama ninyo sa amin, Papa Bong at Mama Lani!

“Nawa’y patuloy kayong pagpalain ng malusog na pangangatawan, kaligayahan, at mas marami pang taon ng pagsasama. We love you!”

Samantala, nagkaroon ng renewal of vows sina dating Sen. Bong Revilla at Congw. Lani Mercado na ginanap sa New Quezon City Jail Male Dormitory sa Payatas Road, Brgy. Bagong Silangan, Quezon City.

Ayon sa ating kaibigan at reporter na si Gorgy Rula na nakasaksi sa kasalan, hindi lang ang mag-asawa ang naging emosyonal kundi pati na rin ang kanilang pamilya at mga piling bisita. 

Dagdag pa niya, nagpahayag din ng mensahe si Sen. Bong para sa kanyang asawa.

Saad ni Sen. Bong, “At Mama, maraming beses kitang nasaktan. Maraming beses kitang binigyan ng dahilan para mapagod. Sorry for the heartbreaks, sorry for the nights you cried silently so our children would never hear your pain. Sorry for every dream you quietly folded away so ours could survive.

“Forgive me for the moments I failed to show you how deeply I value you. For the years when the noise drowned the simple words you deserved to hear every single day.

“Habang tumatanda ako, lalo kong nauunawaan kung gaano kabigat ang pagmamahal na ibinigay mo sa akin.”

Happy 40th Wedding Anniversary, Sen. Bong Revilla at Congw. Lani Mercado! 

Sure si yours truly na malalampasan at maaayos din ninyo ang anumang naging problema ninyo dahil mabuti kang tao, Sen. Bong. God bless your beautiful marriage!

---

Hindi lang isa, marami raw!

WENDELL, UMAMING MILYONES ANG KAPALIT NG MGA INDECENT PROPOSALS

UMAMING nakatanggap ng maraming indecent proposals ang aktor na si Wendell Ramos noong kasagsagan ng kanyang kasikatan, kabilang ang mga alok na puwede sanang magpabago sa direksiyon ng kanyang buhay at karera.

Tanong ng King of Talk na si Boy Abunda, “Noong kapanahunan mo, Wendell, did you get indecent proposals?”

Saad ni Wendell, “A lot. Yes po.”

Dagdag na tanong ni Boy, “Paano ginagawa ‘yun noong time n’yo? Letters, I mean. You know, calls. How?”

Saad ni Wendell, “I have this cousin of mine, minsan, kaibigan, dumadaan. So, ‘di mo alam kung seryoso ba, Tito Boy, but it’s kind of flattering kasi parang, wow! ‘Yung mga inaalok nila, ‘di rin s’ya biro.”

Hirit na tanong ni Boy, “Ano’ng iniaalok?”

Saad ni Wendell, “Something na parang puwedeng tamarin ka na, maging reason para tamarin ka nang mag-work.”

Tanong pa ni Boy, “You’re talking about millions of money and house and lot and a car?”

Saad ni Wendell, “Mayroong ganu’n, Kuya Boy, na tinatanong mo rin ang sarili mo. I’m asking myself, totoo ba ‘tong ganito? Pero parang totoo, legit naman sila. 

“But anyway, Tito Boy, the thing about it, du’n ko lang naisip ‘yung itinuro sa atin ng our parents, na masarap na nakakatanggap ka ng ganu’n at nakakataba ng puso minsan.

“Pero kasi, ang ‘di lang din maganda, Tito Boy, minsan kakainin ka rin kung medyo mahina-hina ‘yung loob mo. ‘Di ko sinasabing perpekto ako, Tito Boy, pero puwede kang kainin ng situation, na puwedeng maging reason ng downfall mo sa work mo. That’s why siguro I feel blessed pa rin po, Tito Boy, na naiahon ko ‘yung mga anak ko sa dapat kong gawin. ‘Di ako naging perpektong tao but in a way.

“So far, alam ko na kung ano man ‘yung meron kami at ang naitaguyod kong pamilya is because of God’s grace and hard work.”

Well, big tumpak ka d’yan, Wendell! At least, kahit hindi mo tinanggap ang mga indecent proposals, boom, patok ka naman sa work mo, ‘di ba, mga madlang people?

Naipit sa gitgitan, sumigaw at umiyak… NETIZENS SA MGA ANAK NI SEN. JINGGOY: KAMI NGA, ARAW-ARAW NAIIPIT SA TRAFFIC, NALULUNOD SA KONTING BAHA

ni Reggee Bonoan @Sheet Matters | May 31, 2026

Photo: Jinggoy Estrada / FB

Napasigaw at umiyak ang mga anak ni Sen. Jinggoy Estrada na sina dating San Juan City Vice-Mayor Janella Marie Ejercito at bunsong si Julienne ‘Jill’ Ejercito dahil nagitgit sila ng media na gustong makapanayam ang kanilang ama nu’ng Biyernes nang hapon.

Nagpunta sa Sandiganbayan Second Division Clerk of Court si Sen. Jinggoy para mag-post ng bail na aabot sa P90 thousand para sa kasong plunder at graft kasama ang asawang si Gng. Precy Vitug-Ejercito at dalawang anak.

Base sa video na inilabas ni Joseph Morong ng GMA News sa kanyang Facebook (FB), inaabangan ng media ang senador palabas ng elevator at nang lumabas ay naggitgitan na. 

Pinatatabi naman sila ng security ng gusali para bigyang-daan ang mag-anak, pero dahil sadyang masikip ang daan at napakaraming TV reporters at media, hindi maiwasang magkaroon ng tulakan at gitgitan.

Nakarinig kami ng malakas na sigaw na, “Ano ba!” at pasimpleng kinunan si Janella na siya pala ang nanigaw sa mga tao.

Kaagad namang pinatabi ng security ang mga nag-uunahang kunan ng larawan si Sen. Jinggoy at inalalayan naman sila habang papasok sa kuwarto.

Biglang nakarinig ng malakas na sigaw at iyak na nagmula naman sa bunsong anak na si Jill dahil naipit daw siya, kaya niyakap siya kaagad ng inang si Precy habang papasok sa nasabing kuwarto.

Ang caption ng video ni Joseph Morong ng GMA News ay naipit daw ang bunsong anak ni Sen. Jinggoy at nasaktan dahil sa gitgitang naganap sa Sandiganbayan.

At pagpasok sa isang kuwarto ay makikitang nakaupo na ang senador habang naghihintay at nakatayo naman ang anak na si Janella.

Binasa namin ang lahat ng komento sa post ng GMA News reporter na pawang negatibo ang reaksiyon sa pag-iyak ng anak ng senador.

Sey ng mga netizens:

“Hahahaha! Para ‘yan lang? Araw-araw naming kinakaharap ‘yan sa biyahe. Pwe!”

“Nakakaawa, ‘di ba? Samantalang ang mga Pilipino, araw-araw naiipit sa traffic. Marami na ring nalunod sa baha kahit kaunting ulan lang. Samantalang SILA, ilang dekadang nagpasarap sa pera ng mga naiipit sa traffic at nalunod o nalulunod sa baha!”

“Naks! Parang sila pa inaapi ngayon.”

“OA. Kung kami ngang mananakay ng jeep, nagkakaipitan at halos magkapalitan pa ng mukha, okay lang. Masaya lang na may balyahan nga.”

“Try mo mag-MRT (Metro Rail Transit) o LRT (Light Rail Transit). Arte pa. Hahaha!”

“Grabe, OA. Hahaha! ‘Pag nahahagip ng camera, may paiyak at sigaw agad.”

Hindi na namin isinulat ang iba pang komento dahil personal na, pero may ilan kaming nabasa na sana ay hindi na lang sumama ang mga bata dahil alam naman nila ang magiging senaryo.

Sa ganang amin, siyempre ay gustong suportahan ng mga anak ang tatay nila.

Anyway, may hiling daw si Sen. Jinggoy Estrada, ayon kay DILG Secretary Jonvic Remulla.

“Ang concern n’ya ay ‘yung tuhod n’ya na kailangan ng knee replacement surgery. Sabi ko, it’s beyond our jurisdiction. Sa Sandiganbayan na lang s’ya magpapaliwanag,” sabi nito sa mga reporters.

---

MAS umiigting ang aksiyon at tensiyon sa Blood vs. Duty (BVD) habang unti-unting nabubunyag nina Richard Gutierrez at Gerald Anderson ang katotohanan sa likod ng pagpapakalat ng ilegal na armas sa bansa.

Tuluyan nang natuklasan ni Marcus (Richard) ang sabwatan ng ilang awtoridad at kriminal na grupo sa operasyon ng smuggling sa kanyang pag-iimbestiga sa Isla Damai.

Samantala, ipinagpapatuloy naman ni Jalil (Gerald) ang kanyang pagpapanggap bilang pulis upang mas mapalalim ang imbestigasyon matapos niyang mapagtagumpayang iligtas ang kanyang adoptive father na si Datu Rahman (Jaime Fabregas).

Dala ng matinding galit at hangaring makamit ang hustisya para sa pagkamatay ng kanyang mga magulang, nakipagtulungan si Lara (Bela Padilla) kay Felix (Baron Geisler) upang mabawi si Datu Rahman mula kay Jalil.

Sa gitna ng lumalalang panganib, patuloy kayang paghihiwalayin ng tadhana sina Marcus at Jalil dahil sa kanilang tungkulin at magkaibang paniniwala, o matutuklasan kaya nila na pareho ang kalabang kinakaharap nila kaugnay ng planong destabilisasyon laban sa gobyerno?

Huwag palampasin ang BVD mula Lunes hanggang Biyernes, 8 PM sa ABS-CBN sa ALLTV2, A2Z, Kapamilya Channel, iWant, at Kapamilya Online Live (KOL) sa YouTube (YT) at Facebook (FB).

‘Di raw away-bata lang ‘yun, Rob… ALFRED: 7-ANYOS KONG ANAK, NANGANIB, IPINAHIYA SA MARAMING TAO, NA-TRAUMA!

ni Vinia Vivar @Frankly Speaking | May 31, 2026

Photo: Alfred Vargas / FB

Inamin ng aktor-pulitiko na si Alfred Vargas na parang gumuho ang kanyang mundo nang malaman niya na ibinasura ng Manila City Prosecutor’s Office ang Child Abuse Complaint na isinampa niya at ng misis na si Yasmine laban sa aktor na si Rob Sy at partner nito.

Sa bagong statement na inilabas ng aktor-pulitiko sa kanyang social media accounts, ipinauna niya ang pasasalamat sa lahat ng suportang natatanggap nila kaugnay ng kaso.

“Labis-labis ang aming pasasalamat sa walang patid na mga mensahe ng suporta na aming natanggap at patuloy na natatanggap mula sa inyong lahat,” bungad ni Alfred.

“Aaminin ko na nanlumo ako pagkabasa ko ng desisyon, parang gumuho ang mundo ko. Naawa ako sa aking mga anak, nahiya ako sa kanila. I felt like I failed them as a parent,” patuloy niya.

Dahil sa nangyari, napatanong ang aktor kung sino pa ba ang puwede nilang takbuhan ngayon.

“Wala na ba kaming matatakbuhan? Wala na bang tutulong sa anak kong biniktima ng paulit-ulit na bullying?” aniya.

Para kay Alfred, hindi lang ‘away-bata’ tulad ng sinasabi ng iba ang naranasan ng kanyang anak.

“Seven years old lang ang anak ko. Sinaktan s’ya nang paulit-ulit, binigyan ng trauma, nalagay sa panganib ang buhay niya, ipinahiya sa harap ng maraming tao. Sinira ang kanyang dignidad.

“Tapos, sasabihin na ‘away-bata’ lang at wala na kaming magagawa? Paano na ‘yung anak ko na biniktima? Wala ba s’yang karapatang mabuhay nang ligtas at walang takot?” pahayag niya na ramdam na ramdam mo ang sakit na nararamdaman para sa kanyang anak.

Kaya naman labis na na-appreciate ni Alfred ang lahat ng nag-message sa kanila ng mga encouraging words at nagpahayag ng pagsuporta.

“But in our moment of doubt, all of you gave us clarity and purpose. You gave us strength. Nalaman namin na ‘di kami nag-iisa.

“Yasmine, my children, and I are overwhelmed with gratitude,” ang mensahe ni Konsehal Alfred Vargas sa kanilang mga supporters.

---

MAGBABALIK-AKSIYON na si Coco Martin! 

Muling mapapanood gabi-gabi sa telebisyon ang “Ang Hari ng Aksyon sa Ating Henerasyon” kasama ang prime actress na si Julia Montes sa Coco Martin’s Sigabo simula Hunyo 22.

Tatak-Coco Martin na walang humpay na aksiyon ang handog ng aktor sa mga manonood sa Sigabo. 

Ang inaabangang ABS-CBN serye ay mula sa orihinal na konsepto ni Coco, kasunod ng makasaysayang pag-ere ng mga programang minahal ng sambayanang Pilipino na pinagbidahan niya na FPJ’s Ang Probinsyano (AP) at FPJ’s Batang Quiapo (BQ).

Siksik sa aksiyon, kilig at katatawanan, at puno ng mahahalagang aral ang masusubaybayan ng mga manonood gabi-gabi mula Lunes hanggang Biyernes.

Bagong putahe naman ang handog ni Coco at ng ABS-CBN na tiyak na tatatak sa puso ng mga Pilipino, katulad ng matagumpay na pag-ere ng FPJ’s Ang Probinsyano, na naging longest-running action-drama series sa Pilipinas, at ng FPJ’s Batang Quiapo, na naging pinakapinanonood na primetime series sa loob ng tatlong taon.