Akala malalaos na, nagka-project pa sa US… ANTHONY, MARAMING NATUTUNAN SA PANLOLOKO SA GF DAHIL KAY MARIS

ni Ambet Nabus @Let's See | june 1, 2026

Photo: IG _anthonyjennings & FB Maris Racal

Mas mukhang ‘fresh’ at ramdam mo talaga ang sinasabing ‘saya’ ni Anthony Jennings nang makaharap namin ito kamakailan.

Halos magtu-2 years pala siyang walang gaanong activity sa showbiz after ngang sumabog at mabulgar ang ‘cheating item’ niya sa kanyang noo’y GF na kinasangkutan pa ni Maris Racal.

“‘Di ko talaga inakala na may magtitiwala sa akin uli. Inisip ko na marahil ay matatagalan pa siguro bago ako uli makabangon,” sambit ni Jennings na taglay pa rin ang pagiging kenkoy at palabirong karakter.

Sobra raw talaga niyang in-assess at inalisa ang mga nangyari at mga pagkakamaling nagawa.

“S’yempre, with the help and support of my family, ‘yung mga taong nand’yan at ‘di bumitaw, mas madali kong natanggap lahat ng pagkakamali ko,” sey nito.

“Basta happy ako, masaya ako sa ngayon at masasabi kong pinatatag ako ng mga wrongdoings ko at natuto talaga ako. Marami akong natutunan sa mga pagkakamali ko,” seryoso nitong sambit.

“Be a good person,” ang buod umano ng lesson na kanyang sinusubukang laging bitbit ngayon sa lahat ng kanyang mga gawain.

“Always be a good person, and everything will follow,” dugtong nito.

May upcoming series si Anthony na malapit nang mapanood sa iWant na ginawa pa nila sa USA, ang Nurse the Dead (NTD), kung saan nakatrabaho niya ang mga ngayo’y USA-based actors na sina Princess Punzalan, Tootsie Guevarra, Gigette Reyes at Ruby Rodriguez at iba pang mga Pinoy talents doon.

Pinagbibidahan din ang may pagka-supernatural story na Nurse the Dead ng Fil-Am (Filipino-American) host na si Jelynn Malone.

---

Mga hosts, ‘minemohan…

ABS-CBN NADUWAG SA GOBYERNO, GUESTING NI CHRISTIAN ESGUERRA SA Y SPEAK, TINANGGAL NA

“NATATAKOT ba sila o masyado lang nag-iingat?” ang reaksiyon ng mga supporters ni Christian Esguerra na gaya ng YouTuber (YTr) ay dismayado umano sa tila karuwagan o pag-play safe ng ABS-CBN Network na nagpapatakbo ng show na Y Speak 2.0 (YS2.0).

Kaugnay nga ‘yan ng diumano’y pagtanggal sa naging guesting ng kilalang YTr at minsan na ring naging parte ng ANC bilang news correspondent.

“Nasaan ang tapang nila? Ang dami-dami nilang celebrities na kung makapuna at makabuska sa gobyerno ay feeling mga mahuhusay at entitled, bakit kung kailan mayroong nagsasalita sa programang bagay naman sa topic, saka may ganyan? Kahit kailan talaga, negosyante ang ABS-CBN,” sigaw ng netizen.

Sa naturang guesting nga raw ay may portion kung saan binigyan ng paglalarawan ni Esguerra ang mga top personalities sa politics/government gaya nga ng mga nasa Senado.

Halimbawa nga raw diyan ay sina Sen. Robin Padilla at Sen. Bato dela Rosa na pinagtatakhan ni Esguerra kung paanong naging senador. ‘Evil’ naman ang itinawag nito kay Vice-President (VP) Sara Duterte, habang ‘decent’ si Hontiveros, ‘madaldal’ si Usec. Claire Castro, ‘matapang’ si Trillanes, at tinawag nitong ‘Tsinador’ si Marcoleta. ‘Promising’ naman ang description nito kay Pasig City Mayor Vico Sotto.

Ayon sa mga supporters ni Esguerra — at maging siya mismo — ay wala na, tinanggal na o sadyang hindi na ini-upload ang naturang interview sa kanya ng programa.

Ayon sa tsismis na lumabas, nagpalabas diumano ng memo ang YSpeak 2.0 producers sa mga hosts ng show na kinabibilangan nina Elijah Canlas, Robbie Jaworski, River Joseph, KD Estrada, Ralph de Leon at Aya Fernandez na manahimik at huwag nang makisali pa sa mainit na reaksiyon at diskurso ng madlang pipol.

‘Di napikon sa ‘ampon’… MATET, TINAWAG NA BIPOLAR, MAGDEDEMANDA

ni Vinia Vivar @Frankly Speaking | June 1, 2026

Photo: FB Matet

Inalmahan ni Matet de Leon ang isang basher na nagsabing bipolar siya at sinabing magsasagawa siya ng aksiyon tungkol dito.

Sa guesting ng aktres sa i-Listen podcast ni Kara David, aniya ay sanay na siya sa mga bashing pero iba na kapag masyado nang foul o nakakabastos.

“‘Ganyan talaga ang ‘bifolar’, selfish,’ ‘yun ang sabi n’ya (basher). Bifolar, ha, ‘di bipolar,” kuwento ni Matet.

Ang panganay na anak daw niya ang nagalit kaya may gagawin silang aksiyon about it.

“‘Di rin ako napikon du’n pero nagalit ‘yung panganay ko, so we’re going to do something about it,” aniya.

Naitanong din kay Matet kung ano ang pakiramdam niya na lagi na lang sinasabi ng mga tao na ampon siya at sey ng aktres, “Nakakaumay na nga, eh.”

Bata pa lang daw siya ay ito na ang laging ibinabato sa kanya ng mga tao, kahit noong wala pang social media.

Mismong ang mga drivers and helpers nila sa bahay ang nagsasabing ampon siya at putok sa buho.

As we all know, si Matet ang pangalawang ampon ng yumaong Superstar na si Nora Aunor. Si Lotlot de Leon ang nauna sa kanya at pagkatapos niya ay nag-ampon pang muli si Ate Guy ng dalawang lalaki na sina Kenneth at Kiko. 

May isang biological son si Guy sa ex-husband na si Christopher de Leon, si Ian de Leon.

Sey ni Matet de Leon, hindi na raw siya napipikon sa ‘ampon issue’ dahil nasanay na siya pero minsan ay nakikipagbardagulan din siya sa mga fans.

---

DAHIL nga katatapos lang ng Encantadia Chronicles: Sang’gre (ECS), nagkaroon ng time si Bianca Umali na magpahinga at mag-enjoy sa isang out of town camping.

Siyempre, kasama niya ang boyfriend na si Ruru Madrid.

Ipinost ng aktor ang mga larawan na kuha mula sa kanilang camping at simpleng caption niya: “I’m home.”

Makikita nga sa larawan ang pagtutulungan nilang mag-setup ng awning, ang pag-watch nila ng sunset together, ang quiet relaxation kung saan ay nakaupo lang sila at pinapanood lang ang nature sa paligid nila, at iba pang mga ganap.

Actually, mapapansin nga sa Instagram (IG) feeds ng dalawa na medyo matagal-tagal na rin silang walang photos na magkasama dahil na rin sa pareho silang busy sa kani-kanilang work. May mga nang-intriga na nga na baka break na sila.

Nakatakda ring magbakasyon ang isa pang bida ng ECS na si Gabbi Garcia.

Lilipad ang aktres patungong France naman next week, and this time ay hindi niya kasama ang boyfriend na si Khalil Ramos.

Sey ni Gabbi sa panayam sa 24-Oras, gift daw niya sa kanyang sarili ang naturang travel.

“After my work in Paris, I’ll be extending for a solo trip naman. So parang gift ko s’ya sa sarili ko for my late 20s,” aniya.

Ayon sa aktres ay dadalo siya sa French Open sa nasabing bansa at wish niyang makita roon ang kanyang mga favorite tennis players.

“Hopefully, makanood ako ng mga favorite kong tennis players, makita ko sila in person,” sey ng aktres.

Resbak sa pagkalat na may attitude siya… BELLA: PATAWARIN NG DIYOS ANG MGA NAGTANGKANG SIRAIN AKO

ni Beth Gelena @Bulgary | June 1, 2026

Photo: IG _bela

Nagparinig ang aktres na si Bela Padilla sa pamamagitan ng pag-share sa Instagram (IG) Stories ng mga art card na sagot niya sa mga isyung ibinabato sa kanya. Marami tuloy ang nagtataka kung bakit iba ang ikinikilos ng aktres nitong mga nakaraang araw.

Marami kasing negatibong sitsit ang ipinupukol sa aktres tulad ng pagiging sakit daw ng ulo ng produksiyon ng Blood Vs. Duty at ang tampuhan daw nila ni Kim Chiu dahil sa kanya.

Ito ang ilan sa mga posts ni Bela…

“Walang makakatalo sa taong pinili ng Diyos na manalo.”

“Nawa’y patawarin ng Diyos ang mga taong nagtangkang sirain ako.”

Sey pa niya, “Ang paggawa ng drama sa ganitong edad ay nakakahiya. Kumita ka ng pera at maghanap ng kapayapaan.”

Ang huli, “Ang lahat ng ginagawa mo, babalik sa ‘yo. Gumawa ng mabuti, maging mabuti.”

Kaya naman, hindi mapigilan ng mga netizens na magkomento. Ito ang sey nila…

“Go, Bela! Puksain mo ang mga Mosang na nang-iintriga sa ‘yo.”

“Nah! S’ya naman ang gumawa nu’n. Sisihin ang sarili, ‘di ‘yung pa-victim.”

“Alamin kung saan ka nakatayo at sundin ang protocol. Kung ‘di kaya, gumawa ka ng sariling project, team, at company, like Coco Martin.”

“Right, pinangunahan ang production, sumbong sa big boss, pinangunahan si Kim allegedly sa pag-disclose ng personal info (pagpapa-freeze ng eggs para magkaanak pa) niya, may track record siya ng pagka-know-it-all. ‘Di magandang optics. 

“Mag-damage control s’ya sana, mag-apologize sa shortcomings n’ya para tapos na at humanga pa sa kanya ang lahat, instead nag-hanash/double down pa s’ya sa socmed (social media). Baka ma-cancel at ‘di pa siya bigyan ng mga future projects for being problematic, not a team player.”

“Remember sa ginawa n’ya kay Kimmy du’n sa interview ni Boy, very red flag ‘yun. BFF ka pa naman. May rift din daw ito kay Angge, JC, at Carlo. At ang latest about kay Baron sa show nila. Parang ayaw n’yang nasasapawan. Diyos ko.”

“May issue raw sa production ng BVD (Blood vs. Duty) primetime series, sa mga production staff, sa co-stars, sa iba pang artista outside show. I think target si Bela para maiba ang focus kasi guest star si Tito Robin P. sa BVD. Sisihin ang babae at ilihis ang lahat ng masamang istilo ng publicity.”

“As per Ogie Diaz vlog, nag-attitude raw si girl sa set ng Blood vs. Duty series at expected n’ya na s’ya ang magiging highlight sa ending scene sa ibang episodes, pero ‘di pala. Nag-post sa IG Story na she worked hard pero ‘di nangyari. Imbiyerna raw ang mga nasa production ng series dahil feeling big star at inaway pa ang staff at si Baron Geisler (na sinabihan diumano ng retarded).”

---

Maghihiwalay na raw, fans na-curious…

MOVIE NG DONBELLE, P25M SA 3 DAYS

Kung kailan maghihiwalay na ang love team nina Donny Pangilinan at Belle Mariano (DonBelle) ay saka naman pumatok nang husto ang kanilang pelikula.

Kumita ang Tayo Sa Wakas (TSW) ng higit sa P25 million sa loob lamang ng unang tatlong araw ng pagpapalabas nito. 

Dahil dito, tuwang-tuwa ang mga DonBelle fans at umaasa na hindi na matutuloy ang paghihiwalay ng kanilang tambalan.

Nakatulong din sa usapan ang naunang anunsiyo ng management tungkol sa pagbabago sa direksiyon ng career ng DonBelle, kaya lalo itong naging mainit na paksa sa showbiz.

Ang TSW ang pinaka-mature na proyekto ng DonBelle, na tumatalakay sa relasyon, ambisyon, at mga sakripisyong kaakibat ng pagtupad sa mga pangarap.

Kung magpapatuloy ang momentum nito sa weekend at sa international screenings sa Australia, New Zealand, United States (US), Canada, Hong Kong, at iba pang bansa, posible pang madagdagan ang kabuuang kita ng pelikula. Marami rin ang umaasang makapasok ito sa listahan ng pinakamalalaking Filipino box-office hits ng 2026.

---

PAMINSAN-MINSAN ay nagpo-post si John Lloyd Cruz (JLC) sa kanyang Instagram (IG) Stories, kabilang ang pagbati niya sa Tita Mean ng anak niyang si Elias ng “Happy birthday.”

Ipinost ni JLC ang mga larawan ni Elias na kuha ni Mean. 

Mensahe ng aktor, “Mga kuha ni Ate Mean. Happy birthday, Ate Mean, salamat sa pag-aalaga.”

Makikita sa mga larawan si Elias na simpleng naglalaro kasama ang ibang mga bata sa tabi ng kalsada at paminsan-minsang namumulot ng basura.

Ang tinutukoy na ‘Ate Mean’ ay ang nakatatandang kapatid ni Ellen Adarna, na siyang pangunahing tagapag-alaga ni Elias. Malapit siya sa mag-ama at madalas ding magbahagi ng kanilang bonding moments online.

Dahil dito, muling na-miss ng mga fans si John Lloyd at umaasa silang makagawa pa siya ng bagong proyekto sa telebisyon o pelikula.

May isa namang fan na nag-request ng collaboration nina John Lloyd Cruz at Julia Montes, na aniya’y magandang makita sila sa iisang proyekto mula sa magkaibang networks.