Babaeng Dolphy… P2.41 B, TOTAL GROSS NG LAHAT NG MOVIES NI AI AI

ni Mercy Lejarde @Talkies | May 13, 2026

Photo: IG _msaiaidelasalas

Nakaramdam ng hiya si Ai Ai delas Alas nang sabihin ng aktres-TV host na si Toni Gonzaga na ang counterpart niya bilang Comedy Queen ay walang iba kundi ang Comedy King na si Dolphy (RIP). 

Kamakailan lang ay nag-guest si Ai Ai sa YouTube (YT) channel ni Toni Gonzaga na Toni Talks (TT).

Sa panayam ay napag-usapan ang tungkol sa bonggang kinita ng mga pelikula ni Ai Ai na umabot sa P2.41 billion gross ang lahat ng pinagsama-samang pelikula ng aktres.

Tanong ni Toni, “Nag-start ka as talent and to this day, si Ate Ai Ai pa rin ang may record ng highest-grossing film ng isang comedy actress in Philippine cinema with P2.41 billion gross of all your movies combined?”

Sey ni Ai Ai, “Yes. Thank you, Lord.”

Dagdag na tanong ni Toni, “Actually, ‘pag inisip mo, ikaw ang comedy queen. Ang counterpart mo na si Dolphy, ah, comedy king, ‘di ba?”

Sey ni Ai Ai, “Nakakahiya pero siguro, thank you, anak. Thank you, sister. Nakakatuwa ‘yun. Sabi ko, ‘Si Toni, naging anak ko ‘yan pero from the very start, tawag na n’ya talaga sa akin, ‘Ate.’”

Samantala, ang pelikula kung saan nagkasama sina Ai Ai Delas Alas at Toni Gonzaga at gumanap na anak ni Ai Ai si Toni ay sa Ang Tanging Pamilya: A Marry-Go-Round! (ATPAMGR) noong 2009.

Saad ni Toni na tipong hindi makapaniwala na senior na si Ai Ai, “Oo, parang ‘di kasi. Parang laging tingin ko sa ‘yo ay ate…”

Sey ni Ai Ai na may kasamang magandang ngiti, “Talaga? Bata?”

Saad ni Toni, “Oo. Kaya nga nu’ng nakita ko, ha? Senior na si Ate Ai Ai?”

Sey ni Ai Ai, “Oo, senior na ako. Kaya nga ‘yung iba, parang, ‘Ah, nag-HYROX ka? Ilang taon ka na ba?’ Secret.”

Well, in fairness kay Ai Ai ay mukha naman talaga siyang bata at kahit ang wankatitat (katawan) ay sexy pa rin.

Samantala, sa social media post ni Ai Ai ay nagbahagi siya ng matinding paalala kung ano ang dapat gawin ng isang babaeng nasawi at nawalan ng pag-asa sa buhay.

Sey ni Ai Ai, “Maraming nagagawa ang determinasyon at paniniwala. Mindset is the key. Laban lang sa mga babaeng nasawi at nawalan ng pag-asa sa buhay. Bangon mga sis, mga ate, mga nanay. Let’s go!

“Akala ko dati, pang-chill na lang ang cardio pero heto ako, sumasabak sa HYROX at buhay pa naman.

“Sobrang thankful kay God sa lakas, courage, at pagkakataong ma-push ko pa ang sarili ko. Maraming salamat sa partner ko at sa mga coaches na naniwala, sumuporta, at binigyan ako ng chance na patunayan sa sarili ko na kaya ko pala. Totoong age is just a number. Sa mga nanay na nawalan ng pag-asa diyan, bangon, mga mamamama. Kaya n’yo ‘to. Happy Mother’s Day sa lahat. To God all the glory and honor.”

Anyway, pak na pak ka d'yan, Ai Ai delas Alas, as in wapak at tumpak!

---

Nababasa raw sa phone ng tatay ng mga anak…

AJ, IBINULGAR NA MARAMING KARIBAL KAY ALJUR

Umamin ang aktres na si AJ Raval na nabubuksan at nagagamit niya ang phone ng kanyang partner na si Aljur Abrenica, ayon sa naging panayam sa kanya ng King of Talk na si Boy Abunda sa Fast Talk with Boy Abunda (FTWBA) kung saan napag-usapan ang relasyon nila ni Aljur.

Tanong ng mahusay na TV host, “Kumusta kayo ni Aljur bilang partners?”

Saad ni AJ, “Okay po kami, Tito Boy. Iba’t ibang relationship po ‘yung meron kaming dalawa. Minsan magkapatid, magbarkada, mag-partner, minsan mag-nanay, mag-tatay.”

Tanong ni Boy, “May access ka sa phone ni Aljur?”

Diretsong sagot ni AJ, “Yes.”

Dagdag na tanong ni Boy, “AJ, guwapo si Aljur, maganda ka. Wala bang mga pagkakataon na may mga tabi-tabi pong lumalandi?”

Saad ni AJ, “Ay, Tito Boy… noong nag-start kami, siguro mga one to two years, ganu’n, sobrang dami. As in sobra-sobra, sobrang dami.”

Hirit na tanong ni Boy, “Kanino?”

Saad ni AJ, “Kay Aljur… nagme-message sa kanya, tapos minsan pinupuntahan s’ya.”

Tanong ni Boy, “Nagme-message sa phone, nababasa mo? Pinupuntahan sa bahay n’yo?”

Saad ni AJ, “‘Di pa po kami magkasama sa house nu’n. Pero si Aljur, very open s’ya. Sasabihin n’ya, ‘Ito ang nangyari.’ Tapos lumilipas ‘yung panahon, siguro nakaka-realize po s’ya kung ano ang tama at hindi tama.”

Tanong ni Boy, “Is Aljur loyal?”

Saad ni AJ, “Yes, Tito Boy. Sobrang loyal nu’n. At ‘yun ‘yung foundation ng relationship namin — loyalty.”

Well, wish lang ni yours truly na tumagal ang pagsasama nina AJ Raval at Aljur

Abrenica para sa magaganda nilang mga anak.

At sana’y makatagpo rin ng tunay na lalaking magmamahal sa magandang aktres na may pusong mapagbigay na si Kylie Padilla, ‘di ba naman, Aljur Abrenica?

‘Yun lang, and I thank you.

Sa mga senador na bumoto kay Alan kapalit ni Sen. Tito… AGOT: 13 SATANAS SA SENADO

ni Reggee Bonoan @Sheet Matters | May 13, 2026

Photo: IG _agotsidro

Nagngitngit sa galit ang singer-actress na si Agot Isidro sa mga bumotong senador para mawala sa puwesto si Tito Sotto bilang Senate President (SP).

Si Alan Peter Cayetano ang humalili kay Tito Sen at kaagad nitong tinanggap ang puwesto na sakto dahil mainit na pinag-uusapan ang pag-impeach kay Sara Duterte.

Post ni Agot sa kanyang X (dating Twitter) account kahapon, Mayo 11, “I have ducking (f*cking) NO respect for these 13 hooligans who call themselves Senators of the Philippines. DUCK YOU.

“Liar, liar, pants on fire.”

Sinabihan din ni Agot si Sen. Alan Peter Cayetano na huwag na itong mag-post ng Bible verses sa social media.

“APC, can you please stop uttering Bible verses kasi sure ako, ‘di natutuwa si God sa ‘yo. #13SatanasSaSenado.

“Catch that Bato now! We have a runner! Just saw the CCTV.”

Anyway, ang mga bumotong senador para kay Cayetano ay sina Ronald dela Rosa, Francis Escudero, Joel Villanueva, Imee Marcos, Rodante Marcoleta, Robin Padilla, Bong Go, Pia Cayetano, Loren Legarda, Mark Villar, Camille Villar, at Jinggoy Estrada.

Sina Panfilo Lacson, Francis Pangilinan, Risa Hontiveros, Bam Aquino, Raffy Tulfo, Erwin Tulfo, Sherwin Gatchalian, at Lito Lapid ang bumoto sa panig ni Tito Sen.

May reaksiyon si Agot sa tangkang pag-aresto ng National Bureau of Investigation (NBI) kay Sen. Bato sa loob mismo ng Senado na may kinalaman sa pag-iisyu ng International Criminal Court (ICC) ng arrest warrant dahil sa umano’y partisipasyon ng dating Philippine National Police (PNP) chief sa drug war ni dating Pangulong Rodrigo Duterte.

Sey pa ni Agot Isidro, “Sign the call for due process, impeachment, and constitutional accountability.”

---

Super happy na balik-acting…

AJ, AYAW NANG MAGPA-SEXY

BALIK-SHOWBIZ na si AJ Raval at mapapanood siya sa Magpakailanman sa GMA Network ngayong Sabado, May 16 na may titulong Batang Nanay, Tatlo ang Panganay.

Huling napanood si AJ sa Pinoy Ghost Tales (PGT) noong 2023 at pagkatapos ay nag-lie-low na ang ina ng mga anak ni Aljur Abrenica.

Sa pagharap ni AJ kay Boy Abunda para sa Fast Talk with Boy Abunda (FTWBA) ay ang ganda ng aura ngayon ng aktres at aminado siyang sobra ang tuwa sa pagbabalik niya sa harap ng camera.

“Mixed emotions po ako at sobrang excited kasi ‘to po ‘yung official comeback ko sa acting at nagpapasalamat po ako sa GMA na binigyan nila ako ng chance na ipakita ‘yung skill ko,” nakangiting sagot ni AJ.

Sobrang tuwa raw ni Aljur nang matanggap ni AJ ang tawag mula sa GMA para sa muling pag-arte at supportive raw sa kanya ang aktor kasama ang amang si Jeric Raval at sila ang nagsabing balikan na niya ang pag-arte.

Inamin din ni AJ, “Idinasal ko po ‘to at ‘di ko naman hinangad maging superstar pero I love acting, maka-acting lang po ako, masaya na po ako. ‘Di man po ako ganu’n kagaling pero may joy na naibibigay sa akin ang pag-arte.”

Natanong ni Kuya Boy ngayong balik-showbiz na siya at may offer na sexy role ay mabilis na ‘hindi’ ang sagot ni AJ.

“Honestly po, Tito Boy, after po ng interview natin noon ay may mga projects pong dumating pero nag-decide po ako na ‘di na tanggapin dahil sexy at s’yempre, may mga anak na rin po ako. Ilan na po sila kaya ayaw ko na pong gumawa ng ganu’n,” katwiran ni AJ.

Inamin din ni AJ na may pagsisisi sa parte niya noong gumawa siya ng sexy movies.

“Opo, eh, pero wala na po akong magagawa, Tito Boy. Nagawa ko na at ang maganda po ay marami akong natutunan. ‘Di na ‘to gagawin ng mga anak ko in case mag-artista sila dahil napagdaanan ko na ‘to,” pagtatapat ni AJ.

At kaya ayaw na niyang magpa-sexy ay dahil pinipigilan siya ni Aljur.

“Si Aljur po, susuporta lang naman s’ya kung ano ang gusto ko, pero as a partner, rerespetuhin ko si Aljur at desisyon ko kung ano ang ‘di ko dapat gawin,” saad ng aktres.

Samantala, gustong subukan ni AJ Raval ang iba’t ibang genre maliban sa pagpapakita ng katawan.

Focus lang daw sa sarili… GERALD, AYAW MUNANG MAGKA-GF AFTER JULIA

ni Vinia Vivar @Frankly Speaking | May 13, 2026

Photo: IG _andersongeraldjr & _juliabarretto

Matapos ang breakup niya with Julia Barretto, very much single pa rin si Gerald Anderson at naka-focus lang daw siya ngayon sa kanyang mga goals sa buhay.

Sa latest episode ng Stars On Stars (SOS) ng Jeepney TV kung saan ay nag-interview-han sila ng co-star niya sa Blood vs. Duty (BVD) na si Baron Geisler, sinabi ni Gerald ang mga dahilan kung bakit siya single.

“The reason why I’m single now because, you know, I want to become a better partner, a better person, a better son, a better brother, a better provider,” aniya.

Ito raw ang goal niya ngayon at pipilitin niya raw itong ma-achieve.

“Magagawa ko ‘yan if I focus on myself muna. I’m building the life I want in 5 years, eh. I wanna be that kind of person. I wanna be the best version pagdating ko ng... I have to start now. So, focus muna ‘ko sa sarili ko,” aniya.

Ayon pa sa aktor, ang buhay daw niya ngayon ay umiikot lang sa trabaho at kanyang mga negosyo.

“Resort, ‘yung gyms, kahit on set ako, mino-monitor ko pa rin,” aniya.

“Ultimo costing ng gasul, ng toilet paper, binabantayan ko,” sambit pa niya.

Ipinagmalaki naman ni Baron na sa ngayon ay may dalawang resort na si Gerald at tatlong malalaking gym, bukod pa nga sa sunud-sunod ang ginagawang proyekto nito sa showbiz.

Pero pag-amin ni Gerald, at the end of the day ay ang showbiz career pa rin niya ang pinakaimportante sa kanya.

Matatandaang opisyal na inanunsiyo ng Star Magic at Viva Artists Agency noong September 2025 ang breakup nina Gerald Anderson at Julia Barretto. Since then ay wala pang napapabalitang girlfriend ang aktor.

---

Patuloy pa ring mainit ang usapin kung tuloy ba o hindi ang kasal ni Bea Alonzo sa bilyonaryong businessman na si Vincent Co na gaganapin daw sa Spain ngayong May 16 pero huling napabalitang na-move ng May 14.

Nanganganak nang nanganganak ang tsika at ngayon ay may bagong isyu na namang lumulutang at may mga bagong pangalan na nadadamay.

Base sa latest report ng Bilyonaryo, hindi lang ang diumano’y prenuptial agreement ang dahilan ng pagkakakansela ng kasal ni Bea.

Ayon sa ulat, may mga insider na nagsabing tumindi ang tensiyon dahil sa impluwensiya ng mga taong malapit kay Bea at partikular na tinukoy sina Shirley Kuan at Alan German.

Nag-aalala umano ang mga malalapit kay Bea na ang pag-aasawa at pagsisimula ng pamilya ay maaaring magpabago sa mga prayoridad ng aktres at makaapekto sa karera nito.

Iniulat din ng Bilyonaryo na tila nais nina Vincent at Bea na ituloy ang kasal, ngunit ang patuloy na pakikialam ng mga handler at tagapayo sa mahahalagang desisyon ang umano’y naging sanhi ng problema.

Nag-aalala rin umano ang mga nakapaligid sa aktres sa posibilidad na tumigil na ito sa pag-aartista kapag nag-asawa na.

Nabanggit din sa artikulo na matapos ang halos isang taon na pagkawala sa spotlight, naghahanda na ngayon si Bea para sa kanyang pagbabalik sa telebisyon kasabay ng paglabas ng canceled wedding preparations with Vincent.

Idinagdag din ng Bilyonaryo na nagulat umano ang panig ni Vincent sa matinding pagtutok sa isyu ng prenup gayung ang mga nakasaad diumano sa kasunduan ay itinuturing na ‘standard financial protection for prominent business families’.

Nakasaad din sa report na ang tunay daw na issue rito ay maaaring higit pa sa usapin ng dokumento at pananalapi kundi nasa mga taong nakapaligid sa mismong relasyon at sa kanilang sariling mga interes.

Samantala, wala pang pahayag ang mga nabanggit na pangalan tungkol sa ulat na ito ng Bilyonaryo.

Maging sina Bea Alonzo at Vincent Co ay wala pa ring official statement, o sinuman sa kanilang kampo, kung tuloy ba o hindi ang kasal kaya naman inaabangan ng lahat ngayon kung magkakaroon ba ng palitan ng ‘I do’s’ ang engaged couple on May 16 o 14.