Saso, kumakapit sa Olympic slot; TOPS, sa digital program ng M-Phls

ni Eddie M. Paez Jr. / MC - @Sports | July 30, 2020

Lalong humigpit ang kapit ni Fil-Japanese Yuka Saso sa isa sa mga upuang pinag-aagawan para sa Tokyo Olympics sa larangan ng golf base sa pinakahuling Tokyo Olympics Golf Rankings.

Umakyat sa pang-47 baytang si Saso mula sa pang-50 posisyon sa listahang nagdedetalye ng 60 lady parbusters na may karapatang lumahok sa prestihiyosong sports event na nausog na mula 2020 papuntang 2021 dahil sa pananalasa sa buong mundo ng Coronavirus 2019 (COVID-19) pandemic.

Ang pag-angat sa listahan ni Saso, 19-taong-gulang at may-ari ng dalawang gintong medalya mula sa huling Asian Games, bukod pa sa maraming amateur podium performances, ay sanhi ng pagsampa niya sa 5th place sa Japan Ladies Professional Golf Association (JPLGA) Earth Mondamine Cup sa Chiba, Japan.

Hindi malayong umakyat pa sa Tokyo rankings ang dalagita dahil inaasahan ang patuloy niyang pagkinang sa JLPGA sa mga susunod na buwan.

Samantala, mahirap ang walang ehersisyo o aktibidad ang mga bata ngayon panahon ng pandemic, at dahil bawal silang lumabas at magsama-sama para man lang makadalo sa sports clinic, nakaisip ng paraan ang Milo Philippines na gawing digital ang sports program nila. Sa pamamagitan ng digital platform, ipaliliwanag ni Lester P. Castillo, asst. VP ng Nestle Phils ang paglulunsad kung paano mapalalakas ng mga bata ang kanilang katawan at manatiling nage-ehersisyo kahit nasa bahay lamang bilang panauhin sa Tabloids Organization in Philippine Sports TOPS Usapang Sports on Air via Zoom online ngayong Huwebes ng 10:00 am. Kasama sina sports partner coach Igor Mella ng Phil. Taekwondo Association at 2019 SEAG gold medalist, 2020 PTA National Online Speed Kicking Champion Pauline Lopez, na siyang MILO ambassador, iaanunsiyo ang bagong online sports campaign, Milo home court (MHC).

Tampok sa kanilang slides at videos ang overview ng kampanya, detalye ng program, campaign video launch, kasama ang pivoting sports program online ni coach Mella, video ng interactive training sessions at iba pang programa ng MHC.

Billiard netizens, inalmahan ang 'pandaraya' kay De Luna

ni Eddie M. Paez Jr. - @Sports | July 28, 2020

Maaaring sina Russian Fedor Gorst at Albanian Eklent Kaci ang mga nakakuha ng unang dalawang puwesto sa pinakaunang edisyon ng Predator One Pool 10 Online Challenge pero nasa puso ng mga billiards netizens ang Pinoy na si Jeffrey “The Bull” De Luna.

Marami ang naniniwala na hindi dapat pinigilan ng mga tagapangasiwa ng torneo ang pagpasok ni De Luna sa semifinals kung ang basehan naman ay ang pagkakamali ng organizers.

Ilan sa mga komento ay ang mga sumusunod:

“You lot are just pathetic. . . The whole tournament is a joke! How come you’re soon into whatever Jeff did and then let go of Kaci who clearly moved the ball at least an inch and he jumped on the shot so he must’ve felt it. I figure because Predator is his sponsor.”

“That is straight up wrong!!!” “So how can you disqualify a player after the Ref approved the racks?”

“I’m done watching. Forget this tournament. Its ridiculous!”

Matatandaang sa quarterfinals, maigting ang duwelong Pinoy-Austrian at sa unang sargo ay bahagyang nakaangat si Albin Ouschan sa iskor na 60-55. Sa pangalawang laro, tablang 60-60 ang resulta kaya nauwi sa tiebreaker na napagwagian ni De Luna. Dahil sa 1-1 na sitwasyon, kinailangan ng winner-take-all match. Sa puntong ito, napunta uli sa 60-60 na iskor kaya nagkaroon na naman ng tiebreaker na napanalunan ni De Luna, 40-25, kaya ito nakapasok sa semis.

Pero wala pang ilang oras ang lumilipas nang ipaulit ng mga organizers ang huling laro dahil sa “patterned racking” ni De Luna. Umalma ang Pinoy at nagdesisyon ang tagapangasiwa na si Ouschan sa halip na si De Luna ang papasukin sa semifinals.

Nabalewala ang magandang performance ng Pinoy dahil sa delubyo. Nauna rito, pinadapa niya si dating World Pool Association no. 1 Jayson Shaw ng Scotland, 2-1.

Sa huli, sinabi ni De Luna na tanggap niya ang desisyon ng organizers. Ang gusto lang niya ay makapaglaro sa panahon ng pandemic. “Let’s respect the decision. I just wanna end it here.”

Online Chess: Pinoy Banjo tinalo si GM Kamsky, napikon ang kano

ni Eddie M. Paez Jr. - @Sports | July 27, 2020

“Mandaraya!” Ito naman umano ang akusasyong ipinukol ni Grandmaster Gata Kamsky ng U.S.A kay GM Rogelio “Banjo” Barcenilla Jr. ng Pilipinas matapos hindi matanggap ng elite woodpusher ang kanyang dalawang magkasunod na pagkatalo sa kamay ng Pinoy sa kanilang online na duwelo.

Sa isang online post ng kabiyak ni Banjo na si Lilibeth, sinabi nitong, “Hubby practicing today by joining bullet online tournaments in preparation for Online Chess Olympiad next week! Beating Super GM Kamsky 2-0 and can’t accept results calling my hubby Cheater cheater!!! Tsk tsk tsk!!! idinagdag pa niyang nakalimutan daw ni Kamsky na lahat ay may pangil.

Dagli namang nagpakita ng suporta ang chess aficionados sa bansa nang tawagin nila si Kamsky na “loser”, “poor loser” at “sourgraping”. Sinabi pa ng isa na nawala ang kanyang respeto sa 46-taong-gulang at dating Soviet na si Kamsky.

Magandang senyales ito para sa paghahanda ng RP team na sasabak sa online chess olympiad dahil naiposte ni Barcenilla ang tagumpay tangan nang dalawang beses ang itim na piyesa.

Samantala, sa ginaganap na pinakaunang FIDE Online Chess Olympiad, tumatrangko sa Pool “A” ng pinakamababang grupo (“Base Division”) ang Myanmar at Fiji bitbit ang tig-aanim na puntos. Isang puntos naman sa likod nila ang Oman at Pakistan. Nagsosolo sa panglimang puwesto ang Brunei Darussalam (4.0 puntos). Ang mga koponan naman ng Lebanon, Bahrain at Qatar ang mga namamayagpag sa Pool “B” dahil sa rekord na 6.0 puntos habang nag-iisa sa unahan ng Pool “C” ang Cyprus dala ang walang mantsang kartada.

Puntirya ng mga bansang nabanggit na makahakbang patungo sa Division 4. Sa kabilang dako, hindi pa naglalaro ang pangkat nina IPCA world king FIDE Master Sander Serverino sa “Division 3” at ang Philippine Team na kabilang sa mga swak sa “Division 2”.