Yuka Saso, aangat pa sa Olympic Golf rankings

ni Eddie M. Paez Jr. - @Sports | August 26, 2020

Tiyak na ang pag-angat ni Fil-Japanese Yuka Saso sa Tokyo Olympics Golf rankings matapos niyang bulabugin ang malupit na Japan Ladies Professional Golf Association Tour sa nakalipas na mga linggo.

Mula sa kasalukuyang pag-upo sa pang-46 na posisyon, maaring sumampa sa top 35 ang dalagang nangulekta rin ng dalawang gintong medalya sa huling Asian Games sa Indonesia.

Animnapu lang ang papayagang lumahok sa Tokyo Olympics golf tournament sa kababaihan base sa panuntunan. Paiiralin din ang polisiya ng dalawang lady golfers lang kada bansa ang puwedeng sumalang sa prestihiyosong event.

Malaking ayuda sa 20-taong-gulang na dalaga ang kanyang paghahangad na makakuha ng upuan sa Tokyo Olympics ay ang pag-alagwa niya sa NEC Karuizawa 72 Golf Tournament at ang pagkuha niya ng panglimang puwesto sa Earth Mondamine Cup sa Chiba, Japan. Sa naunang torneo, inilampaso ng tour rookie ang kompetisyon sa pamamagitan ng isang 16-under-par na 200 na iskor at ng apat na strokes na kalamangan mula sa sumegunda at pumangatlo.

At dahil dito, sumibad din siya sa Rolex Women's World Rankings.kung saan mayroon na siyang 31.71 puntos mula sa pagsabak sa 13 paligsahan. Ang kanyang 0.91 average points ay pang -113 sa buong mundo. Ito ay malaking paglundag mula sa pinakamababa niyang ranggo na pang-287 sa talaan.

FIDE Online Chess Olympiad: GM Paragua, top board 1 player

ni Eddie M. Paez Jr. - @Sports | August 22, 2020

Hinirang si Pinoy Grandmaster Mark Paragua na top board 1 performer sa Pool A ng katatapos na bakbakang Division 2 ng FIDE Online Chess Olympiad.

Ipinoste ni Paragua, may FIDE standard chess rating na 2529 at rapid chess rating na 2573, ang lima at kalahating puntos mula sa walong laro ng nakasaysayang kompetisyon at ito ang naging tulay niya pagtungo sa pagiging best performer sa Division 2, Pool A o 'yung tinawag na Group of Death. Bukod sa 36-taong-gulang na chesser, wala nang ibang kinatawan ng bansa ang nakasungkit ng katulad na karangalan.

Samantala, napagsaraduhan na ng pinto paakyat sa Division 1 ang Pilipinas matapos lang itong pumanglima sa Pool A. Nasa Division 1 na mula sa pangkat na ito ang Bulgaria, Germany at Indonesia matapos nilang makuha ang unang tatlong puwesto. Australia ang pumang-apat. Sa apat na nanguna, tatlong talo ang natikman ng Pilipinas bagamat nakaungos ito sa karibal mula sa Timog Silangang Asya na Indonesia, 3.5 - 2.5.

Ang koponan ng International Physically-Disabled Chess Association o IPCA na pinangunahan ni Pinoy FIDE Master Sander Severino ay na-promote mula Division 3 papuntang Division 2 pero hindi na rin nakasampa sa Top Division matapos na mabigong mapabilang sa unang tatlong finishers ng Division 2 Pool B.

Sa kasalukuyan, ang mga apisyonado ng ahedres sa bansa ay nakatutok sa magiging laro ni dating Philippine champion GM Wesley So, 26-anyos at tubong Cavite, na poposte sa board 1 ng Top Division heavyweight USA (Pool D).

Parbuster Ardina , papalo na sa AIG Open sa Scotland

ni Eddie M. Paez Jr. - @Sports | August 20, 2020

Lalarga na ngayong Huwebes si Pinay parbuster Dottie Ardina sa prestihiyosong AIG Women's Open 2020 na sisimulan sa palaruan ng Royal Troon ng Scotland.

Tatangkain nitong magmarka sa Europa kung papaano kuminang si Yuka Saso sa Japan noong weekend.

Bihirang makaeksena sa isa sa mga pinakamalaking global event ng women’s golf ang tatlong kulay ng Pilipinas at sa pagkakataong ito, si Ardina ang nakasungkit ng karapatan para lumahok sa paligsahang tinatawag ding British Open.

Nakuha ng 26-taong-gulang na Pinay, isang dating Symmetra Tour runner-up, ang upuan sa isa sa mga golf majors ng malupit na Ladies Professional Golf Association (LPGA) matapos nitong mairekord ang isang top-20 performance sa Marathon LPGA Classic Presented By Dana sa Sylvannia, Ohio. Sa naturang kompetisyon, sampung upuan papunta sa prestihiyosong bakbakan ang nakaabang sa mga manlalaro.

Nakasama ng Pinay mula sa Canlubang sina Maria Fassi (Mexico), Andrea Lee (USA), Emma Talley (USA), Kendall Dye (USA), Sophia Popov (Germany), Kelly Tan (Malaysia), Patty Tavatankit (Thailand), Peiyun Chien (Taiwan) at Lindy Duncan (USA) papasok sa AIG Women's Open.

Bitbit ni Ardina, kampeon ng 2020 Ballarat Golf tilt sa Australia, ang momentum ng unti-unti niyang pagbalik sa pangkameponatong porma matapos na kalawangin dahil sa pandemyang dulot ng coronavirus. Sa unang torneo niya mula sa community quarantine (Drive-On Championships sa Ohio), nasibak siya pagkatapos lang ng dalawang rounds. Sa Marathon Classic, tila malalaglag na naman ang dating jungolf star ng bansa pero unti-unting gumanda ang kartada niya (72-70-69-67) kaya naiposte niya ang isang 6-under-par 278 strokes na iskor at maiuwi ang halos PHP900,000 gantimpalang salapi.

Taong 2002 nang isang Pinay, si Jennifer Rosales, ang lumahok sa British Open at tumapos sa pang-apat na puwesto. Si Rosales din ay nakahablot ng pang-apat na baytang sa 2004 US Open. Si Hinaku Shibuno ng Japan ang nagkampeon sa torneo noong 2019.