US Tennis Open ayaw tantanan ng COVID-19

ni Eddie M. Paez Jr. - @Sports | August 19, 2020

Isang kalahok ang nakumpirmang positibo sa COVID-19 habang humaba na naman ang listahan ng mga ayaw nang humawak ng raketa sa makasaysayang U.S. Open dahil pa rin sa patuloy na pananalasa ng nakamamatay na coronavirus.

Dinapuan na ng virus si Kei Noshikori matapos ilabas ang resulta ng isang pagsusulit sa world no. 31 at olympic bronze medalist mula sa Japan. Paalis na ang Hapones sa kanyang tinitirhan sa Florida nang mabatid ang resulta. Sinabi niyang maganda naman ang kanyang pakiramdam bagamat nagpasya nang sumalang sa isoloation sa ngayon ang dating US Open runner-up.

Nakatakda itong sumabak sa isa pang pagsusuri bago matapos ang linggong ito. Depende sa resulta, maari pa itong magbago ng desisyon.

Samantala, anim na makikinang na mga pangalan sa women’s division ay nagpasyang huwag nang sumugal sa kompetisyong magsisimula sa huling araw ng buwang kasalukuyan.

Hindi na masasaksihan ang mga hampas sa bola nina defending champion Bianca Andreescu ng Canada, world no. 2 Simona Halep, 2019 semifinalist Belinda Bencic, Ukrainian Elina Svitolina, Netherlands ace Kiki Bertens at top Australian tennister Ashleigh Barty sa Flushing Meadows.

Ang Billy Jean King Tennis Center na dating pinagdarausan ng torneo ay minsan nang ginawang pagamutan para sa mga apektado ng pandemya.

Kagaya ni Andreescu, wala na rin sa eksena ng grandslam event na ito si 2019 king Rafael Nadal at natirang pa or ito para mamayagpag sa kalalakihan si Novak Djokovic.

Lumalaban pa ang 4 na Pinoy GM sa FIDE Olympiad

ni Eddie M. Paez Jr. - @Sports | August 17, 2020

Isang panalo kontra sa dalawang talo lang ang naisukbit ng Pilipinas sa kalagitnaan ng bakbakan kaya nanatili ito sa panglimang baitang sa Division 2 ng Group of Death na Pool “A” sa ginaganap na FIDE Online Chess Olympiad.

Dinaig ng bansa ang Belarus sa round 4 (4.5-1.5) pero hindi nito kinaya ang tikas ng Belgium (2.5-3.5; round 5) at ng Australia (2.0-4.0; round 6) kaya pagkatapos ng anim na yugto ay meron lang itong anim na puntos.

Nauna rito, nakulekta ng Pilipinas, may rating na 2144, ang mga panalo laban sa Kyrgyztan (rating: 1846), 6-0 at Southeast Asian rival Indonesia (rating: 2188), 3.5-2.5 bago tumiklop sa powerhouse Germany (rating: 2327), 1.0-5.0 sa unang tatlong yugto.

Tumatrangko sa pulutong ang Bulgaria (12.0 puntos) at Germany (12.0 puntos) habang nasa pangatlong at pang-apat na posisyon ang Australia (10.0 puntos) at Indonesia (8.0 puntos) ayon sa pagkakasunod-sunod.

Inaasahang hahataw sa huling tatlong rounds ang mga pambato ni GM Eugene Torre na sina Grandmaster Rogelio Barcenilla Jr., GM Mark Paragua, Woman GM Janelle Mae Frayna, International Master Daniel Quizon at Woman IM Kylen Joy Mordido para makapasok sa top 3 at makasikad paakyat sa Division 1.

Samantala, ang IPCA naman ni Pinoy FIDE Master Sander Severino (na sumampa sa Division 2 galing sa Division 3) ay nasa pampitong puwesto dahil sa natipong tatlong puntos sa sagupaan sa Pool B. Romania ang bumabandera sa pangkat.

May audience na, sumisigla ang sports sa South Korea

ni Eddie M. Paez Jr. - @Sports | August 15, 2020

Hindi nagpapaawat ang pagsigla ng palakasan sa South Korea matapos na isagawa ang mga Professional baseball games habang nanonood ang mga tagasubaybay onsite at matapos patakbuhin ang isang live na national weightlifting event.

Sa pagpapatuloy ng 2020 season ng Korean Baseball Organization o KBO, pinapayagan nang pumasok sa palaruan ang mga manonood. Ang torneo na nagsimulang gumiling noong Mayo 5 sa isang “closed door” na kondisyon, ay pinapayagan na ngayong magkaroon ng 25% mga manonood onsite. Pinapanatili pa rin ang one-seat apart na polisiya. Mandatory ang pagsusuri ng temperatura ng kada manonood bago pumasok sa palaruan gayundin ang paggamit ng face mask.

May 4,000 hanggang 6,000 manonood ang kasali kada laro sa KBO. Noong Hulyo 26, may 10% lang ng mga manonood ang pinapapasok sa venue.

Sa isang pahayag, sinabi ng tagapangasiwa na, “KBO and the 10 clubs welcome the government’s decision to expand audiences and express their deep gratitude to the crowds for maturely handling the inconvenience and thoroughly complying with the quarantine guidelines”.

Samantala, ang 2020 Korea National Spring Championships ay ginanap sa Seochun, Chungnam sa loob ng walong araw. Sinasabing may 466 na kalahok ang sumailalim sa anti-COVID-19 na mga panuntunan ng kompetisyon.

“Fever check,” paggamit ng hand sanitizer at face masks, at “one athlete - one coach sa warm-up area” ang ilan lang sa mga patakarang ipinairal onsite. Ipinagbawal ang mga manonood noong una bagamat malaking hakbang na ito sa panunumbalik ng isports sa aktibong estado.

Ang South Korea ay may kumpirmadong kaso na 14,873 bilang ng may COVID-19, habang 13,863 ang nakarekober at 305 ang mga namatay. May dagdag na 103 ang kaso kahapon habang walang nasawi.