Uso ngayon ang multo, pero mas nakakatakot ang ghost projects ng mga kurakot!

ni Imee Marcos @Imeesolusyon | September 10, 2025

Ayan, simula na ng Ber months! Pero bago tayo magbalot ng mga regalo, let’s unwrap muna ang happenings, besh! 

Ghost Month ngayon, uso na naman ang mga multo. Pero ang mas nakakatakot? Hindi mga ligaw na espiritu, kundi ghost projects ng mga kurakot!

Iniimbestigahan na ang kontrobersyal na flood control projects na ‘yan sa Senado. Ang daming pondo, ang daming approved, pero hanggang ngayon, nganga! Binabaha pa tayo nang bongga!

Kung ‘yung mga multo, marunong magparamdam, itong ghost projects ng mga korap, kahit anino hindi makita. 

Saan kaya nila dinala ang pera? Baka kung mag-Spirit of the Glass tayo, hindi ‘yung kaluluwa ang magparamdam kundi BIR, COA at galit ng taumbayan!

Ayon sa datos, dahil sa mga ghost projects na ‘yan, nalugi ang ekonomiya ng P42.3 bilyon hanggang P118.5 bilyon mula 2023 hanggang 2025. ‘Yan ang tunay na horror story! Only in the Philippines, beshie!

Kaya ito lang ang malinaw na pangako ko: itutuloy natin ang imbestigasyon. Kung sino man ang sangkot, dapat managot. Walang lusot, dapat maparusahan!

Sa nalalapit na deliberasyon ng 2026 national budget, sisiguraduhin nating walang maisisingit na kalokohan. Bubuksan natin ito sa publiko — dahil pera ninyo ‘yan, dapat kayo rin ang may boses kung saan mapupunta.

At mga beshie, for the nth time, kalampagin na natin ang DPWH at iba pang ahensya — gumawa na ng matinong National Flood Control Masterplan! Now na! ‘Wag na magsayang ng oras at pera! Tama na ang mahigit P100B na lugi ng bansa dahil sa mga multong proyekto na ‘yan!

Sundin ang masterplan -- hindi ang pasingit-singit na insertions ng mga congressman, small committee, bicam at iba pang kababalaghan!

Alam ko Ghost Month ngayon pero ‘wag naman nating gawing multo pati ang hustisya!

Opisinang ginawa kontra-korupsiyon, hindi dapat magpapakorup, OMB OIC Vargas!

ni Imee Marcos @Imeesolusyon | September 3, 2025

Naku beshie, eksena na naman ang mga lulong! Hindi sila nagtagumpay sa Peoples’ Initiative at sa impeachment kay VP Sara, kaya narito na tayo ngayon -- Round 3! Are you ready?!

Ito na nga ang game plan nila: ipipilit nila si SOJ Boying Remulla maging Ombudsman para ipakulong si VP Inday bago mag-2027, at hindi lang si INDAY -- kundi LAHAT NG MGA DUTERTE. 

Kasakiman pa rin ang pinaiiral nila sa gitna ng paghihirap ng mga Pilipinong binabaha — ng tubig, korupsiyon at kawalang aksyon. 

Tinutukan ko ang PLAN A nilang PEOPLE’S INITIATIVE. 

Binuking ko ang PLAN B nila na para mawala sa landas nila si VP Inday sa 2028.

At ngayong nasa PLAN C na tayo — na noon pa’y nakita ko na kaya ako nagsampa ng kaso.

Kung hindi sila titigil sa pamumulitika — eh ‘di mag-asaran na lang kami, dahil HINDI KO SILA TATANTANAN.

Ang Ombudsman ang bantayog ng katuwiran para sa mga lingkod-bayan -- pati ba naman ‘yan gusto na nilang baluktutin. 

Habang nagsusumikap ang lahat nang tapat. Habang ang lahat ng Pilipino ay galit na dahil gustong makakita ng tuwid. Habang pilit naming nire-rebond ang sistema, heto kayo at pilit niyong kinukulot!

Ang Ombudsman ay OPISINA – HINDI PARLOR! Tigilan niyo ‘yan!

Ito naman ang mensahe ko para kay Ombudsman OIC Vargas: Kung nayayanig ka sa pressure, isabuhay mo ang sikat na kanta ni April Boy Regino. Kapag nariyan na ang suhol, itaas mo ang dalawang kamay mo at sabihin: HINDI KO KAYANG TANGGAPIN!

Ang opisinang ginawa para labanan ang korupsiyon ay hindi dapat magpapakorup! Agree?!

‘Wag puro lifestyle check, kasuhan, ikulong mga kurakot, now na!

ni Imee Marcos @Imeesolusyon | September 1, 2025

Maulan na naman at bumabaha ng tsismis! Hindi kinayang tabunan ni Mareng Taylor Swift ang flood control issue! Nga pala, congrats beshie! Buti ka pa engaged, kami rito sa Pilipinas, ENRAGED!

Mainit ang ulo ng lahat sa mga shopping spree at travelife ng mga pulitiko at mga junakis nila gamit ang buwis natin. Pero teka muna beshie, sana naman ‘wag lang puro lifestyle check ang gawin!

Alam naman ng lahat kung sinu-sino ang nangurakot noh! Sa kakaimbestiga natin sa mga OOTD at expensive life nila, bibigyan lang natin ng time ang mga ‘yan na makipag-areglo ng cash-unduan! Remember, loaded sila -- sponsored by the Filipino people! 

Sampahan na ng kaso, prosecute and convict! Marami nang kumakanta, ang dami pang ngawngaw! Nakabulaga ang ebidensya sa ating lahat -- ano pang inaantay natin, beshie??? 

Awat na sa lifestyle check, rehas check na tayo! Ang daming puwedeng ikaso -- graft and corrupt practices, plunder, money laundering, tax evasion -- lahat na ng puwede! ‘Wag lang tayo sa social media mag-ingay! Tuluyan na ‘yang mga ‘yan!

At ito, suggestion ko lang naman -- baka dapat isama na sa 2026 budget ang pondo para sa bagong kulungan, puwede rin bagong crocodile farm sa rami ng mga buwaya!

Dapat lang may managot at maparusahan sa mga ginawang personal ATM ang pondo ng bayan! Kasuhan at hulihin na ang mga buwaya na ‘yan! NOW NA!