Alas Pilipinas Men sinampolan ang Jakarta sa Invitationals

ni Anthony E. Servinio @Sports | June 11, 2025

Photo: Alas Pilipinas via Dominic Santos / Marish Rivera - Bulgar Sports Courtside Report

Nagtala ang Alas Pilipinas ng matinding panalo kontra Jakarta Bhayangkara Presisi upang simulant ng positibo ang Alas Invitationals Martes sa Araneta Coliseum.

Natapos ang hampasan sa 25-23, 27-29, 25-21 at 25-22. Nalampasan ng mga Pinoy ang huling banta ng mga Indones, 19-21, para kunin ang unang set at nagdulot ito ng positibong enerhiya. Kahit ibinigay ang pangalawang set, humabol ang Alas buhat sa 18-21 subalit nanaig ang Jakarta sa unahan lumamang ng dalawang puntos.

Kumapit ng husto para kunin ang huling dalawang set. Muntikan na ang pangatlong set kung saan inaksaya ng mga Pinoy ang 21-14 lamang bago isara ito sa 25-21. Namuno sa buwenamanong panalo si Louie Ramirez na may 25 puntos mula sa 21 atake at tatlong block. Sumuporta si Steven Rotter na may 14 at Michaelo Buddin na may 11.

Nagtala ng 20 para sa Jakarta si outside hitter Agil Angga Anggara. Nag-ambag ng 15 si Mahendra Arjuna habang 12 si Rendy Febriant Tamamilang. Susunod para sa Alas ang Hyundai Capital Skywalkers ng Timog Korea. Galing ang mga Koreano sa 22-25, 26-24, 19-25 at 21-25 talo sa pambansang koponan ng Thailand.

TPSK Water Run raragasa sa bagong ruta ng MOA

ni Anthony E. Servinio @Sports | June 10, 2025

Photo: Pinangunahan ni Green Media events race organizer ng Takbo para sa kalikasan Water Run series Ms. Jenny Lumba ang media launching ng patakbo na idinaos sa Max Rest. SM Manila kamakailan. ( A. Servinio)

Tubig ay buhay. Lalarga ang Water Run – ang ikalawang yugto ng 2025 Takbo Para Sa Kalikasan – ngayong Hulyo 20 sa MOA.

Mula sa mainit na pagtanggap ng pambungad na karera na Fire Run noong Mayo 4 sa Luneta, inaasahang mas marami ang kalahok ngayon dahil gaganapin ito sa mas malawak na lugar. Patunay ito ng paglaki ng serye na itinatag noong 2018.          

Para sa Water Run, susubukan ng mga mananakbo ang tampok na kategoryang 18 kilometro. Magkakaroon din ng patakbo na 10 at limang kilometro.

Marami sa tatakbo ng 18 ay mga tumakbo rin ng 16 kilometro sa Fire Run. Malaking hamon para sa lahat ang makabuo ng apat na medalyang kahoy.           

Pagkatapos ng Water Run ay nakatakda ang Air Run sa Setyembre 28 at ang engrandeng pagtatapos ng serye sa Earth Run sa Nobyembre 16. May espesyal na TPSK Pampanga Edition sa Oktubre 5 sa Clark.         

Maaaring magpalista na sa mga piling sangay ng Chris Sports sa MOA, Megamall, SM Bicutan, Trinoma, Glorietta 3 at One Bonifacio High Street at online sa My Run Time.  Tulad ng dati, may pagkakataon na lumahok sa virtual race para sa mga hindi makakapunta sa lugar at araw mismo ng karera at makukuha pa rin ang parehong medalya at t-shirt.

Hinihikayat muli ang lahat na magdala ng sariling lalagyan ng inumin. Bilang fun run na nagtataguyod ng pag-aalaga sa Inang Kalikasan ay mahalaga na mabawasan ang iiwanang kalat na tinatayang umaabot sa mahigit 10,000 na baso at mga basyong boteng plastik.

Ang BULGAR ay opisyal na media partner ng buong TPSK serye. Muling mamimigay ng mga regalo para sa mga minamahal na tatakbong nagbabasa at may pagkakataon na makasama ang sobrang kulit pero mabait na si Bulgarito.

Pacers kalabisan ang lakas, dikit na sa Finals

ni Anthony E. Servinio @Sports | May 29, 2025

Photo: Nagbuhos ng huling 6 na puntos ng pangalawang quarter at unang 7 puntos ng pangatlong quarter para itayo ang 78-66 bentahe ang Pacers. Hindi pa sila tapos at nagpasok ng 5 sunod na puntos si Pascal Siakam para sa pinakamalaking agwat at 10 minuto ang nalalabi sa huling quarter, 111-96. 

Isang panalo na lang ang kailangan ng bisitang Indiana Pacers para makabalik sa NBA Finals matapos magtagumpay sa Game 4 ng 2025 Eastern Conference Finals laban sa New York Knicks, 130-121, kahapon sa Madison Square Garden. Maaaring tapusin na ang seryeng best-of-7 pag-uwi ng Pacers para sa Game 5 sa Biyernes. 

Nagbuhos ng huling 6 na puntos ng pangalawang quarter at unang 7 puntos ng pangatlong quarter para itayo ang 78-66 bentahe ang Pacers. Hindi pa sila tapos at nagpasok ng 5 sunod na puntos si Pascal Siakam para sa pinakamalaking agwat at 10 minuto ang nalalabi sa huling quarter, 111-96. 

Hindi nakabangon ang New York at inihatid ng dating Knick Obi Toppin ang pandiin na 3-points, 126-116, at 46 segundo ang nalalabi. Sinigurado ng mga free throw nina Siakam at Benn Mathurin ang resulta at 3-1 lamang sa serye. 

Nagtala ng halimaw na triple-double si Tyrese Haliburton na 32 puntos, 12 rebound at 15 assist na may kasamang apat na agaw at hindi niya itinapon ang bola kahit isang beses sa 38 minuto. Sumunod si Siakam na may 30 at reserba Mathurin na may 20 sa 12 minuto lang. 

Sa simula ay tila nakalimutan ang depensa ng parehong panig at nagtapos ang unang quarter, 43-35, pabor sa Indiana. Tumanggap ng malaking dagok ang Knicks nang napilay ang tuhod ni Karl-Anthony Towns bago ang huling dalawang minuto at nalagay sa alanganin ang kanyang kahandaan para sa Game 5. 

Sisikapin ng numero unong Oklahoma City Thunder na wakasan ng maaga ang kanilang Western Conference Finals sa Game 5 laban sa bisitang Minnesota Timberwolves ngayong Huwebes sa Paycom Center. Nanaig ang OKC sa Game 4, 128-126, para umakyat sa 3-1.