Private audio recordings at transcripts, planong ilabas... DOJ, kinasuhan ni ex-US Pres. Joe Biden

ni Jenny Rose Albason @World News | May 29, 2026

Nagsampa ng kaso si dating US President Joe Biden laban sa US Department of Justice (DOJ) upang pigilan ang planong paglalabas ng audio recordings at transcripts ng kanyang pribadong pag-uusap sa kanyang biographer noong 2016 at 2017.

Ayon sa reklamong inihain sa federal court sa Washington, DC, nakatakdang ilabas ng DOJ sa Hunyo 15 ang mga naturang materyales sa US House Judiciary Committee at sa conservative group na Heritage Foundation.

Hiniling ng Heritage Foundation ang mga dokumento bilang bahagi ng impormasyong ginamit sa imbestigasyon ni dating Special Counsel Robert Hur noong 2023 kaugnay sa paghawak ni Biden ng classified documents.

Giit sa demanda, inaabuso umano ng komite ang proseso ng request upang malusutan ang mga probisyon ng Freedom of Information Act na naglilimita sa paglalabas ng sensitibong impormasyon.

Hinihiling ng kampo ni Biden sa korte na ideklarang “not valid” at “pretextual” ang request ng komite at tuluyang ipagbawal ang paglalabas ng mga recording.

Samantala, sinabi ng isang tagapagsalita ng DOJ na nais umano ng ahensya na ilabas ang mga recording upang makita ng publiko ang nilalaman nito, na anila’y nagpapakita ng kondisyon ng pag-iisip ng dating pangulo.

“We will fight to ensure the American people can hear these recordings and draw their own conclusions,” ayon sa DOJ spokesperson.

Mariing itinanggi ng kampo ni Biden ang mga paratang at sinabing ibinigay ang mga recording sa kondisyon na hindi ito ilalabas sa publiko.

Ayon kay TJ Ducklo, tagapagsalita ni Biden, nakipagtulungan na ang dating pangulo sa imbestigasyon ni Hur at iginiit na hindi na lamang ito usapin ng transparency kundi bahagi na ng pamumulitika.

Nabatid na ang mga recording ay bahagi ng proseso ng pagsulat ng memoir ni Biden na “Promise Me, Dad,” na tumalakay sa kanyang buhay habang nilalabanan ng kanyang anak na si Beau Biden ang brain cancer.

Nauna nang pinayagan ng korte si Biden na makialam sa kaso ng Heritage Foundation laban sa DOJ, ngunit hindi siya pinayagang kuwestiyunin ang request ng US House Judiciary Committee.

US at Israel, joint forces sa pagwakas ng nuclear threat ng Iran

ni Jenny Rose Albason @World News | May 26, 2026

Sinabi ni Israeli Prime Minister Benjamin Netanyahu nitong Linggo na nagkasundo sila ni US President Donald Trump na anumang pinal na kasunduan sa Iran ay dapat tuluyang wakasan ang umano’y nuclear threat ng Islamic republic.

Ayon kay Netanyahu, nakausap niya si Trump noong Sabado ng gabi sa isang pag-uusap na nauna nang inilarawan ng Amerika bilang “napakaganda.”

Kabilang umano sa kanilang napagkasunduan ang pagbuwag sa uranium enrichment facilities ng Iran at ang pag-aalis ng enriched nuclear materials mula sa teritoryo nito.

Binigyang-diin din ng Israeli leader na pareho ang kanilang posisyon ni Trump na hindi dapat magkaroon ng nuclear weapons ang Iran.

Napag-usapan din umano ng dalawang lider ang memorandum of understanding kaugnay ng muling pagbubukas ng Strait of Hormuz, isang mahalagang ruta sa pandaigdigang kalakalan at suplay ng langis.

Dagdag pa ni Netanyahu, nananatiling matatag ang alyansa ng Israel at Estados Unidos, lalo na sa usapin ng seguridad at depensa laban sa mga banta sa rehiyon, kabilang na umano ang sitwasyon sa Lebanon.

4 patay... Bagong hypersonic missile ng Russia, pinakawalan sa Ukraine

ni Jenny Rose Albason @World News | May 26, 2026

Naglunsaad ang Russia ng pag-atake gamit ang bago at napakalakas na hypersonic ballistic missile sa Kyiv, na ikinasawi ng apat na katao. Isa ito sa pinakamatinding pambobomba ng Russia sa Kyiv region mula nang sumiklab ang digmaan sa Ukraine.

Klinasipika ng Amerika ang Oreshnik missile bilang isang intermediate-range missile na kayang magdala ng iba’t ibang conventional o nuclear warheads. Dahil sa bilis at trajectory nito, halos hindi ito mapigilan ng air defense systems ng Ukraine.

Ito na ang ikatlong beses na ginamit ng Russia ang naturang missile.

Ayon kay Ukrainian President Volodymyr Zelensky, bumagsak ang missile malapit sa lungsod ng Bila Tserkva sa central Ukraine. Tinawag ni Zelensky na “wala na sa tamang pag-iisip” ang Russia at iginiit na hindi nila ito palalampasin.

Kumondena rin ang ilang world leaders sa panibagong pag-atake ng Russia sa Ukraine, kabilang sina European Union foreign affairs chief Kaja Kallas, French President Emmanuel Macron, at German Chancellor Friedrich Merz. Binigyang-diin din ng Germany ang patuloy nitong suporta para sa Ukraine.

Nangyari ang magdamag na pag-atake sa Kyiv matapos ipag-utos ni Russian President Vladimir Putin ang pagganti sa deadly attack ng Ukraine sa okupadong teritoryo ng Russia.