Mga barkong dadaan sa Strait of Hormuz, tutulungan ng US

ni Jenny Rose Albason @World News | May 5, 2026

Inanunsyo ni US President Donald Trump na gagabayan ng Estados Unidos ang mga barko na dadaan sa Strait of Hormuz simula ngayong Lunes.

Ayon sa US Central Command (CENTCOM), kabilang sa ibinibigay na military support ang mga guided-missile destroyers, mahigit 100 aircraft, at humigit-kumulang 15,000 service members.

Bahagi umano ito ng tinatawag na “Project Freedom” ni Trump, na layuning mabawi ang kalayaan sa paglalayag sa Strait of Hormuz. Nilinaw naman ng isang opisyal ng US na hindi ito isang escort mission.

Ayon kay CENTCOM commander Adm. Brad Cooper, ang naturang suporta ay itinuturing na isang “defensive mission” na mahalaga para sa regional security at sa pandaigdigang ekonomiya, kasabay ng pagpapanatili ng naval presence sa lugar.

Samantala, nagbabala ang mataas na opisyal ng Iran na si Ebrahim Azizi na maaaring ituring na paglabag sa umiiral na ceasefire o tigil-putukan ang naturang hakbang.

Sa kanyang Truth Social account, sinabi ni Trump na ang paggabay sa mga barko ay layuning maprotektahan ang mga tao, kumpanya, at bansa na aniya’y walang kasalanan at naaapektuhan lamang ng mga pangyayari.

Iniulat din ng Pangulo na may “very positive discussions” sa pagitan ng mga kinatawan ng Estados Unidos at Iran, at umaasa siyang magreresulta ito sa positibong kinalabasan para sa lahat ng panig.

5K US Military aalisin sa Germany, NATO, pumalag

ni Jenny Rose Albason @Overseas News | May 4, 2026

Patuloy na pinag-aaralan ng North Atlantic Treaty Organization (NATO) ang planong pag-alis ng mga sundalo ng United States mula sa Germany.

Ayon kay NATO spokesperson na si Allison Hart, kinakalap pa nila ang mga detalye hinggil sa dahilan ng desisyon ng US na bawiin ang humigit-kumulang 5,000 nitong mga sundalo.

Iniulat na ang hakbang na ito ay kaugnay umano ng hindi pagsuporta ng ilang bansa sa Europa sa panig ng US at Israel sa tensyon laban sa Iran.

Samantala, tinawag ni Donald Trump ang NATO bilang isang “paper tiger” at inilarawang wala itong silbi.

Pagtiwalag ng UAE sa OPEC at OPEC+, nagdulot ng pangamba sa suplay ng langis

ni Jenny Rose Albason @World News | April 30, 2026

Inanunsyo ng United Arab Emirates nitong ang pag-alis nito sa Organization of the Petroleum Exporting Countries at OPEC+ na magiging epektibo bukas, Mayo 1. Ayon sa pamahalaan, isa itong “strategic decision” upang magkaroon ng mas flexible na patakaran sa enerhiya.

Ayon sa UAE Ministry of Energy, bahagi ito ng tinawag nilang “evolution of sector policies” na layuning bigyan ang bansa ng mas malawak na kalayaan sa pagtugon sa galaw ng pandaigdigang merkado, habang patuloy na isinusulong ang matatag at responsableng suplay ng langis.

Ipinaliwanag din ng UAE na ang desisyon ay bunga ng masusing pagsusuri sa kanilang production policy at long-term capacity, at nakabatay sa pambansang interes, kabilang ang plano nitong palakasin ang domestic energy investments.

Dahil dito, inaasahang magkakaroon ng epekto sa pandaigdigang oil market, lalo na’t ang UAE ay isa sa mga pangunahing producer ng langis sa OPEC. Ayon sa ilang analyst, maaaring humina ang impluwensya ng OPEC dahil sa pag-alis ng UAE. Gayunpaman, may mga naniniwala ring magbibigay ito sa bansa ng mas malaking kalayaan upang palawakin ang produksyon at iayon ito sa sariling estratehiyang pang-ekonomiya.

Sa kabila ng hakbang na ito, iginiit ng UAE na nananatili itong committed sa global energy stability at patuloy na magiging maaasahang supplier sa pandaigdigang merkado ng langis.