Win, acting Senate Pres... Balik-trabaho na tayo

ni Mylene Alfonso @News | June 4, 2026

Photo: Win Gatchalian - Senate of the Philippines

Nahalal si Senador Sherwin “Win” Gatchalian bilang Senate President Pro Tempore matapos muling magbukas ng sesyon ang Senado, na nagbigay-daan upang ideklara siya ng mga senador mula sa minority bloc na dumalo bilang acting Senate President.

Samantala, nag-post naman ng isang video sa kanyang Facebook account si Gatchalian ng ilang kaganapan sa Senado na may caption na “Balik-trabaho na tayo sa Senado.”  

Naluklok si Gatchalian matapos makabuo ng quorum ang mataas na kapulungan kasunod ng pagdalo ni Senator Francis "Chiz" Escudero. 

Bilang bagong Senate President Pro Tempore, pinalitan ni Gatchalian si Sen. Loren Legarda.

Si Escudero lamang ang miyembro ng majority bloc na dumalo sa plenary session, na siyang nagtapos sa dalawang magkasunod na araw na walang sesyon ang Senado dahil sa patuloy na pagliban ng majority bloc.

Edukasyon, nananatiling pangunahing prayoridad sa pambansang badyet

ni Kuya Win Gatchalian @Win Tayong Lahat | June 2, 2026

Sa mga susunod na araw ay inaasahang magbabalik ang milyung-milyong mga mag-aaral sa ating mga pampublikong paaralan sa pagbubukas ng School Year 2026-2027. Nagpapatuloy ang maraming hamon sa sektor ng edukasyon, ngunit mahalagang magpatuloy ang ating pagtutulungan, lalo na’t ang kinabukasan ng susunod na henerasyon ang nakasalalay dito. 

Balikan natin ang ilan sa mga hamong kinakaharap ng sektor ng edukasyon. Una ang 90% na learning poverty sa ating mga mag-aaral. Ibig sabihin, 9 sa 10 batang may 10 taong gulang ang hindi marunong bumasa at umunawa ng maikling kwento. Nariyan din ang kakulangan natin sa silid-aralan na ayon sa Department of Education (DepEd) ay hindi bababa sa 147,000 noong Hulyo ng nakaraang taon. 

Kinakaharap din natin ang malawak na suliranin pagdating sa nutrisyon. Batay sa mga pag-aaral, lumalabas na isa sa apat na batang wala pang limang  taong gulang ang itinuturing na stunted o maliit para sa kanilang edad. Ang stunting ay epekto ng kakulangan sa nutrisyon, lalo na sa unang 1,000 araw ng buhay ng isang bata, mula sa sinapupunan hanggang sa kanyang ikalawang kaarawan.

Ilan lamang iyan sa mga sinasabi nating hamon. Bagama’t mabigat ang ating suliranin, may natatangi rin tayong oportunidad upang magpatupad ng mga solusyon. Noong ang inyong lingkod ay nanungkulan bilang Chairman ng Senate Committee on Finance, tiniyak nating ang pinakamalaking bahagi ng 2026 national budget ay nakalaan sa sektor ng edukasyon: P1.3 trilyon ang inilaan natin para sa sektor, ang pinakamataas sa kasaysayan ng bansa, katumbas ng 4.4% ng ating Gross Domestic Product (GDP). 

Sa kauna-unahang pagkakataon, nakasunod ang bansa sa rekomendasyon ng United Nations na ilaan ang katumbas ng apat hanggang anim na porsyento ng GDP sa edukasyon.

Bahagi ng pondong ito ang P8.9 bilyon para sa Academic Recovery and Accessible Learning (ARAL) Program na nagbibigay ng suporta sa mga mag-aaral na nangangailangan ng tulong, kabilang ang mga hindi pa marunong at nahihirapang magbasa. Umabot naman sa P67 bilyon ang pondong inilaan natin ngayong taon para sa pagpapatayo ng higit 24,000 na mga silid-aralan, kung saan makikinabang ang 4.64 milyong mag-aaral.

Palalawakin din natin ang ating mga feeding programs. Umabot sa P25.7 bilyon ang inilaan natin para sa School-Based Feeding Program ng DepEd. Ngayon taon, lahat ng mag-aaral sa Kindergarten at Grade 1 ay magiging saklaw na ng programa. Kung dati ay 120 araw lamang ang feeding days sa ilalim ng School-Based Feeding Program, aabot na ito sa 200 araw ngayong taon. 

Dinagdagan din natin ang feeding days sa ilalim ng Supplementary Feeding Program ng Department of Social Welfare and Development (DSWD) na nakatanggap ng P9.56 bilyon para sa taong ito. Kung dati ay 120 araw lamang ang feeding days, aabot na ito sa 180 ngayong taon. Saklaw ng programang ito ang mga batang dalawa hanggang limang taong gulang na enrolled sa mga child development centers.

Ngayong magsisimula na ang school year, makakaasa ang ating mga kababayan na patuloy nating itataguyod ang kapakanan ng ating mga mag-aaral at mga guro. 

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

32K bagong guro, aprubado na para sa mga pampublikong paaralan

ni Kuya Win Gatchalian @Win Tayong Lahat | May 28, 2026

Inanunsyo kamakailan ng Department of Education (DepEd) na inaprubahan na ng Department of Budget and Management (DBM) ang paglikha ng mahigit 32,000 teaching positions para sa School Year 2026-2027. Kasunod ng anunsyong ito, muli nating hinimok ang DepEd na tiyakin ang mabilis na proseso para sa pag-hire ng mga guro upang mapunan natin ang kakulangan ng mga guro sa buong bansa.

Mahalagang matiyak natin na mayroon tayong sapat na bilang ng guro sa ating mga paaralan, lalo na’t sila ang may pinakamahalagang papel. Kung mananatiling kulang ang ating mga guro, ang ating mga mag-aaral ang lubos na maaapektuhan.

Sa mga talakayan ng national budget sa mga nagdaang taon, ilang beses pinuna ng inyong lingkod na inaabot ng hanggang anim na buwan ang pagkuha ng DepEd ng mga guro. Isa sa mga dahilan nito ang pakikilahok ng iba pang ahensya tulad ng DBM at Civil Service Commission (CSC) sa proseso. Ngunit nitong 2024, naglabas na ang DepEd ng DepEd Order No. 021 series of 2024 upang mas mapabilis ang pagpuno sa mga bakanteng posisyon.

Matatandaan na sa ilalim ng 2026 national budget, P42.4 bilyon ang inilaan para sa pagkuha ng 32,916 teaching positions at 32,047 dito ay para sa mga Teacher I items.

Isang mahalagang hakbang ang paglalaan ng pondo, ngunit mahalagang hakbang din ang pagtiyak na magagamit nang tama ang pondong ito upang magkaroon ng sapat na bilang ng guro sa ating mga pampublikong paaralan.

Habang inaasahan natin ang nalalapit na pagbubukas ng klase, muli na namang mabibigyang-diin ang malawakang krisis na kinakaharap ng sektor ng edukasyon. Muling mabibigyang-pansin ang mga suliranin tulad ng siksikan sa mga silid-aralan at ang malaking bilang ng mga mag-aaral na hindi pa rin marunong bumasa.

Ngunit meron din tayong natatanging oportunidad upang tugunan ang krisis na kinakaharap. Noong nanungkulan ang inyong lingkod bilang Chairman ng Senate Committee on Finance, nailaan natin ang P1.34 trilyon para sa sektor ng edukasyon para sa taong ito, ang pinakamataas sa kasaysayan ng bansa. Bahagi ng makasaysayang pondong ito ang P65.9 bilyon para sa pagpapatayo ng 24,000 na bagong mga silid-aralan.

Makakaasa ang ating mga kababayan na patuloy nating babantayan ang paggastos ng national budget upang matiyak na napapakinabangan ng ating mga kababayan ang binabayaran nilang buwis. 

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com