Naibenta ng P29,026,000… WILLIE, TALO SA BIDDING NG ROLLS ROYCE NG DISCAYA COUPLE

ni Erlinda Rapadas @Teka Nga | February 12, 2026

Photo: FB Wilyonaryo

Nagkaroon ng auction ang Bureau of Customs (BOC) para sa mga nakumpiskang luxury cars ng Discaya couple, at kasama na rito ang kontrobersiyal na Rolls Royce na may kasamang payong. 

Tatlo ang nag-bid sa Rolls Royce Cullinan na may starting bid na P29 milyon. Isa sa mga nag-bid para sa Rolls Royce ay ang TV host-comedian na si Willie Revillame. 

Sad to say, hindi napanalunan ni Wil ang sasakyan ng mga Discaya. Ang nanalo sa auction ay ang Igorot Stone Kingdom, Inc., na siyang nagpagawa ng Igorot Stone Kingdom sa Baguio. 

Ayon sa balita, nabenta ang kontrobersiyal na Rolls Royce ng Discaya couple sa halagang P29,026,000.

---

SA February 14 pa ang kanyang kaarawan, pero isang advance birthday celebration na ang isinagawa ni Heart Evangelista para sa kanyang 41st birthday. 

Bumisita siya sa mga foundation na kanyang sinusuportahan. May sarili na siyang foundation, ang Heart Can Foundation, na tumutulong sa mga batang may sakit. 

Maging ang Corridor of Hope at Cerebral Palsy of Sorsogon ay suportado rin ng Heart Can Foundation. 

Aktibo ang aktres-fashion icon sa kanyang mga advocacies, tulad ng pagsuporta sa karapatang-pantao ng LGBTQIA+ community, mental health awareness at pagtulong sa Philippine Animal Welfare Society (PAWS) na sumasagip sa mga stray dogs at cats. 

Malapit din ang puso ni Heart sa mga senior citizens, kaya bumisita siya sa Homes for the Elderly at namigay ng mga basic needs ng mga seniors. 

Kaya naman naging fulfilling para kay Heart Evangelista ang kanyang 41st birthday celebration.

---

NATATAWA na lang ngayon si Luis Manzano kapag naaalala niya na tinatawagan siya ni Toni Gonzaga kahit na madaling-araw kapag broken hearted ito. At to think na isa siya sa mga masusugid na manliligaw nito that time, ha? 

Masakit iyon para kay Luis, pero hindi niya matiis ang aktres-TV host. At kahit hindi siya pinalad, naging best friends naman sila at sinusuportahan ang isa’t isa. 

Happy si Luis para kay Toni na nakahanap ng perfect guy na tulad ni Direk Paul Soriano. Sila talaga ang meant for each other. 

May chemistry sina Toni at Direk Paul. Mas nag-grow ang aktres at mas humusay sa pagho-host. Nag-level-up nang husto ang career niya. 

Maraming aktor ang nanligaw noon kay Toni Gonzaga, pero si Direk Paul Soriano ang tumagal at hindi sumuko sa panliligaw, kaya pumasa rin siya sa pamilya Gonzaga.

Pramis, ‘di raw siya naghihirap… WILLIE: MAY BAGO AKONG BAHAY, 3 CHOPPERS AT YATE

ni Janiz Navida @Showbiz Special | January 24, 2026

Photo: IG _willrevillame

Tinatawanan na lang ng nagbabalik na host na si Willie Revillame via Wilyonaryo ang mga nagkakalat ng balitang naghihirap na siya at nagbebenta na ng kanyang mga properties dahil naubos daw ang kanyang pera nang tumakbong senador last election.

Sa panayam ng press kay Kuya Wil recently, diretsahang sinabi nito na “Hindi totoo ‘yun. Minsan, matatawa ka na lang sa mga ikinukuwento ng iba.”

Kung nagbebenta man daw siya ng ilang properties, ‘yun ay para i-invest sa ibang properties na gusto niyang bilhin na mas malaki ang value.

“Sa totoo lang, isa lang ang naibenta ko sa Tagaytay kasi sobrang laki nu’ng tatlong hectares. Sobrang laki nu’ng naging deal. Parang hindi ko na rin maasikaso. ‘Yung pera (na napagbentahan), nabili ko ‘yung ibang properties (tulad) nu’ng penthouse sa Grand Hyatt. Dalawang floors ang binili ko roon. Buong floors, ha? Hindi isang unit lang,” kuwento niya.

Itinanggi rin niyang naibenta na niya ang kanyang mansiyon at yate.

“Sa yate, naroon pa rin ‘yung yate. May private resort ako sa Puerto Galera. Malaking investment ‘yan. Pinapaganda ko, high-end hotel.” 

Kinumpirma rin niya ang una na naming naisulat noon na bumili siya ng condo unit sa BGC, Taguig.

“Mayroon akong biniling buong floor (49th floor) sa BGC. Binili ko ‘yung buong penthouse sa BGC. Bumili ako ng apat na units sa tapat ng Mitsukoshi. Baka sabihin, nagyayabang, pero tinanong lang,” aniya.

Dagdag pa nito, “May bago akong bahay. Ayaw ko na sanang sabihin. Para sabihin n’yo na hindi ako naghihirap, may tatlo akong choppers. Binili ko ‘yung yate ko, para hindi na ako mukhang naghihirap.”

Hirit din ni Kuya Wil, kung anumang yaman ang meron siya ngayon, pinaghirapan niya lahat at hindi ‘yun galing sa nakaw.

Never din daw niyang ipinagyabang sa social media ang kanyang mga naipundar na properties, sasakyan, etc..

Samantala, bubuksan ni Kuya Wil ang bagong yugto ng mga game shows sa Pilipinas dahil ibang klaseng programa ang kanyang inihanda. 

Bilang hybrid na programang maihahambing sa mga patok na e-gaming platforms sa bansa ngayon, orihinal na plano talaga na sa online ito mapanood bago pa man inialok ang pagpapalabas sa Kapatid Network. 

Kaya sa January 25, dalawang araw bago ang ika-65 kaarawan ng Pambansang Kuya, ilulunsad ang Wilyonaryo sa official website na wilyonaryo.com. 

Hindi normal na palabas ang Wilyonaryo dahil bukod sa nakasanayang mga palaro ni Kuya Wil, hatid din niya ang WILPICK na isang raffle game. 

Aprubado ng Philippine Amusement and Gaming Corporation (PAGCOR) ang WILPICK segment ng Wilyonaryo kung saan maaaring bumili ng ticket ang mga kababayan natin mula Luzon, Visayas, hanggang Mindanao para sa pagkakataong manalo ng milyun-milyon. 

Kung dati ay kailangan pang nasa studio ang mga manlalaro para subukan ang kapalaran, ngayon ay puwede nang sumali kahit nasa bahay lang para maging milyonaryo. 

Para updated ka sa mga sorpresa ni Kuya Wil, mag-follow at subscribe sa official social media accounts ng Wilyonaryo.

---

Patutsada sa utol na si Sen. Raffy…

BEN: WALA AKONG CHICKS AT BINIGYAN NG TIP

Isa ang TV and radio broadcast journalist na si Ben Tulfo sa mga advocates ng flood control projects scam na malaking problema ngayon sa bansa, kaya isa siya sa mga naging panelists sa ginanap na Pandesal Forum sa Kamuning Bakery ni Wilson Lee Flores nu’ng Huwebes kasama sina DPWH Secretary Vince Dizon, Cong. Toby Tiangco at Prosecutor General Richard Fadullon.

Tulad nina Sec. Dizon, Cong. Toby at PG Fadullon, naniniwala si Ben na mareresolba rin ang most controversial scam ngayon sa gobyerno pero kakailanganin ng matinding imbestigasyon at hindi madali ang proseso kaya hindi dapat magmadali ang taumbayan sa pagpapakulong sa mga personalidad na nasasangkot.

Sa kaso ni dating Sen. Bong Revilla, Jr. na kaibigan din naman daw niya, nalulungkot siya sa nangyari rito na kinasuhan ng graft at malversation of public funds, pero naniniwala siyang hindi ito mabibigyan ng warrant of arrest nang hindi dumaan sa due process.

Para kay Ben, sa pagpapatupad ng batas, walang dapat na sinisino kahit kaibigan, kamag-anak o sariling kadugo.

Tulad na nga lang nang pitikin niya ang pamangking si Cong. Ralph Tulfo na anak ng kapatid niyang si Sen. Raffy Tulfo. Kahit daw magkapamilya sila, dahil may sarili siyang advocacy at opinyon at dahil may ginawa raw na mali ang kanyang pamangkin na public servant, kailangan niya itong pitikin at hindi kunsintihin.

Kinumusta nga namin ang relasyon nila ngayong magkakapatid dahil hindi naman kaila sa lahat na nagkakaroon sila ng ‘word war’ ni Sen. Raffy at ng panganay na si Ramon Tulfo dahil sa magkakaiba nilang pananaw sa buhay at pulitika.

Inamin ni Ben na kahit dumaan ang Pasko at Bagong Taon ay hindi sila nagkakausap na magkakapatid dahil may kani-kanya na silang buhay. Pero idiniin din naman niyang hindi sila magkakaaway dahil bali-baligtarin man ang mundo ay iisang dugo lang ang nananalaytay sa kanila.

Aniya para kay Sen. Raffy, “Hindi kami nag-uusap. Wala akong paki sa ginagawa niya bilang senador. Wala rin siyang paki sa pagiging media ko.”

Pero dagdag nito, “Maaaring hindi tutugma doon sa kanilang pinaggagagawa, pero hindi ibig sabihin na magkaaway kami. Magkagalit ba kami? Hindi.”

Tapos ay bigla itong kumambiyo, “Siguro du’n sa matanda, buwisit ako, si Ramon. Kahit ano’ng sabihin, pero mahal ko pa rin ‘yung topak na ‘yun.”

May naging patutsada rin siya kay Sen. Raffy na ilang beses nang naintriga dahil sa babae.

“May apo na ako, pero wala akong chicks. Wala naman akong pambayad sa tip. Wala akong pambayad para du’n sa kapag natuwa ako dahil sa kasuotan mo dahil sasayaw-sayaw ka,” ani Ben habang pangiti-ngiti.

Well, dahil kilalang pare-parehong palaban ang Tulfo Brothers na noon ay magkakakampi pero ngayon ay kani-kanya na nga, sila tuloy ang sinasabing male counterpart ng Barretto Sisters na sina Gretchen, Marjorie at Claudine Barretto.

Puwede pa rin daw umatras sa pagka-senador… WILLIE: TRY LANG ‘TO KAYA AKO TUMAKBO!

ni Julie Bonifacio @Winner | Oct. 10, 2024

Photo: Willie Revillame / Wil To Win

Tatakbong independent candidate si Willie Revillame bilang senador sa 2025 elections. Diretsahang inamin ni Willie na walang nag-alok sa kanya na mapasama sa mga existing political parties. 

Marami ang nag-akala na sasanib si Willie sa mga kandidato sa pagka-senador ng partido ni former President Rodrigo Duterte (PRRD). Ang alam ng publiko, close siya kay dating P-Duterte.

“Hindi naman. Ipinatawag niya ako, gusto n’ya akong tumakbong senador before. Hindi pa ako handa. So, ‘yun lang,” pahayag ni Willie sa interbyu sa kanya sa isang talk show sa TV5 four hours after mag-file ng Certificate of Candidacy (COC) ng TV host.

Nagsabi pala si Willie na tatakbo siyang senador kina Vice-President Sara Duterte at Sen. Bong Go, hoping na makakarating kay former President Duterte, wala raw kasi siyang access para makausap nang diretso ang dating pangulo.

Sabi ni Willie sa mga hosts, “Alam mo, I’ll tell you this. Maano ako, maayos akong tao. Marespeto ako. Kinausap ko lahat. The Vice-President, Sen. Bong Go, Sen. Raffy Tulfo, Erwin Tulfo, Sen. Tito Sotto.

“Even Honey Rose Mercado from Malacañang giving kortesiya na eto ang balak ko, na baka tumakbo ako. Ano ba sa tingin n’yo?

“I’m asking for advices. So, okey naman silang lahat. Positive.

“And the most important thing is MVP. Kasi I’m a part of TV5. Tapos sinabi n’ya, ‘Sige, mag-usap kayo ni Jane (Basas, president and CEO of Media Quest na nagmamay-ari ng TV5), ni Ma’am Jane, saka ni Ma’am Sienna (Olaso, Cignal’s VP for channels and content).

“Pag-usapan natin. Then, let’s meet kung ano ang plano.”

Mananatili pa rin daw si Willie sa kanyang programa sa TV hanggang February 10. After that, bawal na dahil simula na ng campaign ng mga tatakbo.

Kapag nanalo at naging senador si Willie, three days daw siyang magtatrabaho sa Senate and the rest of the week ay sa kanyang programa sa TV5.

Samantala, tinanong ng isa sa mga hosts si Willie kung ‘di ba siya magbabasa ng bills kapag wala siya sa Senado.

“Alam mo ‘yang bills na ‘yan, ang dami nang batas na ginawa, eh. Nabago ba ang buhay ng mahihirap?” patanong na sagot ni Willie.

Follow-up naman ni Gretchen Ho, na bukod-tanging kilala namin sa tatlong hosts ng programa, trabaho ng senador ay ang gumawa at pag-aralan ang batas.

“Para saan? Para sa bansa? Eh, ang dami nang nagawa. Eh, ano ba ang trabaho natin? Hindi ba gumawa ng mabuti sa kapwa?

“Kaya ka nga public servant, eh. Kaya gagawa ka ng batas para sa mahihirap, kasi ang dami nang batas. Ilan na ba ang nagawang batas from the start ng mga senador, may nagagawa ba? Ano bang batas ‘yan?

“Ang pinakagusto kong batas, marami naman sigurong magagawa, pero eto para sa seniors. Kasi, malaking bagay ‘yan,” diin ni Willie.

Ibinulgar pa ni Willie na hindi siya inalok ni PRRD na sumali sa list ng senatoriables sa partido nito na PDP-Laban.

“Hindi naman nila ako in-offer-an, eh. Walang nag-offer sa ‘kin. So, si Manong Chavit

(Singson), isang independent (candidate).

“I’ve talked to Ben Tulfo, independent s’ya. Sabi ko, ang kasama ko rito, eh, ‘yung nagmamahal sa programa ko. ‘Yung programa ko it’s about 17 million followers sa Facebook (FB). 7.9 million sa YouTube (YT).

“Siguro naman ay sapat-sapat na ‘yun na tutulong sa ‘kin. Eh, para sa kanila naman ‘tong gagawin ko, eh. Hindi naman para sa ‘kin.

“Alam mo masaya na ako sa buhay ko, eh. I’m so blessed. Mas mabe-blessed siguro ako kapag itong blessing na meron ako, isine-share ko na lang.

“Okey na ako, kuntento na ako on what I have. Ang hinahangad ko lang ay makita ang lahat kong kababayan na masaya,” lahad ni Willie.

Sa kabila nito, posible rin daw na mag-withdraw ng kanyang kandidatura bilang senador si Willie.

“Kasi nararamdaman ko, eh (kung ayaw na niyang ituloy). Parang ‘di ko talaga kaya ‘to. Marami, eh. ‘Yung health ko. Kaya pa ba ng katawan ko?

“Kasi, nagso-show pa ako everyday. So, depende. Hindi lang naman ‘yung pursigido ka, eh. Tingnan mo rin kung kaya ng katawan mo. Kasi kapag nagkampanya ka for senatorial, buong Pilipinas ‘to.

“Actually, kaya ko lang din ginawa ‘to, sinubukan ko na lang din. Titingnan ko rin, nasa mga tao naman ‘to kung gusto nila ako. Eh, kung wala ka sa rating, bakit pa ako, ‘di ba? Ibig sabihin, hindi nila ako gusto dito sa posisyon na ‘to. Baka doon lang ako sa show gusto,” esplika pa ni Willie Revillame.