Namatok, nagkasa ng baril sa siklista.. Driver's license ng ex-cop, 2 yrs. suspendido — LTO

ni Jeff Tumbado @News | September 8, 2023

Sinuspinde na ng Land Transportation Office (LTO) ng dalawang taon ang driver's license ni Wilfredo Gonzales, ang dating pulis na nag-viral sa social media dahil sa pamamatok at pagkasa ng baril sa isang siklista na nakaalitan sa Quezon City kamakailan.

Kinumpirma ito ng LTO Central office kahapon.

Ang hakbang ay batay na rin sa rekomendasyon ng LTO-NCR na nag-imbestiga sa pangyayari.

Hindi pa naisisilbi sa ngayon ng LTO ang desisyon ukol sa revocation ng lisensya ni Gonzales.

Matatandaang hindi na humarap sa LTO-NCR noon si Gonzales nang ipatawag ito upang ipaliwanag kung bakit 'di dapat kanselahin ang kanyang lisensya sa pagmamaneho.

Kahit nahuli-cam.. Ex-cop, 'di inaresto dahil wala raw baril — cyclist

ni Mylene Alfonso @News | September 6, 2023

Bagama't nakita sa viral video na nagkasa ng baril, hindi inaresto ng mga miyembro ng Quezon City Police District (QCPD) ang dating pulis na si Wilfredo Gonzales dahil hindi umano nila nakita ang baril na ginamit nito sa panunutok sa siklistang si Allan Bandiola noong Agosto 8.

Ito ang lumitaw sa isinagawang pagdinig kahapon ni Senador Ronald "Bato" dela Rosa, chairman ng Senate Committee on Public Order and Dangerous Drugs.

"Sabi ni Sir Adan, 'Hindi namin pwedeng arestuhin si Ginoong Gonzales, wala naman kaming nakitang baril' Ganito na lang, sabi niya, tatawag tayo sa traffic sector para maayos 'to at magawan ng incident report," salaysay ni Bandiola sa komite.

Ayon pa kay Dela Rosa, dapat iginiit ni Bandiola sa mga pulis na may baril si Gonzalez.

"Dapat sinumbong mo, may baril 'yan, kinasahan ako," dagdag pa ng senador na dating hepe ng PNP.

Iginiit naman umano ni Bandiola sa mga pulis na may baril si Gonzales pero sinabi ng mga pulis na rumesponde sa insidente na hindi nila ito maaaring arestuhin.

Wala naman sa naturang pagdinig ang mga sinasabing pulis ni Bandiola.

Inamin naman ni Gonzales na isinuko ang kanyang baril sa Galas Police Station matapos siyang sabihan ng mga imbestigador.

Samantala, inihayag naman ni Police Firearms and Explosives Office chief Brig. Gen. Paul Kenneth Lucas na agad naman binawi ang License To Own and Possess Firearms (LTOPF) ni Gonzales matapos mag-viral sa social media ang video ng kanyang pananakit at pagkasa ng baril kay Bandiola.

Matatandaang Agosto 8 nang mangyari ang iringan sa kalye nina Gonzales at Bandiola ngunit noong Agosto 27 lamang lumabas ang viral video na nakitang naglabas ng baril si Gonzales at ikinasa ito sa harap ni Bandiola.

Nagsampa na ng reklamong alarm and scandal ang Quezon City Police District laban kay Gonzales.

Natanggal na rin si Gonzales sa pagiging empleyado ng Korte Suprema.

Bukod dito, nais ng pamunuan ng PNP na isauli niya ang natanggap na retirement benefits matapos matuklasan na may mga kaso pa siyang kinakaharap nang umalis sa serbisyo.

0Plano rin ng PNP na sampahan pa ng ibang reklamo si Gonzales kabilang ang grave threat.

Ex-cop na nanutok ng baril sa siklista, empleyado ng SC

ni Madel Moratillo @News | August 31, 2023

Kinumpirma ng Korte Suprema na naging empleyado si Wilfredo Gonzales, ang dating pulis na nasa video na nanutok ng baril sa isang siklista.

Gayunman, ayon sa SC, agad sinibak at tinerminate ang employment ni Gonzales noong Agosto 27 matapos malaman ang insidente.

Si Gonzales ay coterminous employee umano sa tanggapan ni Associate Justice Ricardo Rosario. Binigyang-diin ng SC na hindi kukunsintihin ni Justice Rosario ang anumang uri ng karahasan o pang-aabuso.

Si Gonzales ay dati nang na-dismiss sa Philippine National Police noong June 2018 dahil sa grave misconduct.